Chru RÔMA 12

PƠNUAĬ PƠTO-KƠKƠI

(Mư̆ng tăl 12:1 truh tăl 15:13)

Rài Hơdiŭ Bơrhơu Lăm Pô Krist

1 Yơu nư̆n, ơ buơl adơi-ai, kơyoa Yàng Pô Lơngì hũ ràng-tơbiă hơtai-hơtiàn anĭt-rơnăm prŏng sơ̆ng buơl gudrơi, nư̆n dơlhă lơkơu-yòng buơl adơi-ai pơyă bĕ rài hơdiŭ drơi tơ Yàng Pô Lơngì yơu sa phơ̆n c̆ĕ-pơyơ̆r duh-dơlbăt hơdiŭ sơ̆ng sơc̆ih-sri, sa phơ̆n c̆ĕ-pơyơ̆r duh-dơlbăt siàm hơtai Yàng Pô Lơngì. Nư̆n la pơnuaĭ duh-dơlbăt iơŭ tơpă biă tô buơl adơi-ai duh-dơlbăt Pô. 2 Juơi ngă tui rài ni, bloh păl hũ pơsơlih tui pơnuaĭ pơsơlih bơrhơu lăm hơtai-akŏ drơi, tô buơl adơi-ai hũ rơgơi kơnăl-pơklah jiơ̆ng hơtai-khiăng Yàng Pô Lơngì la hơgĕ, sơ̆ng wờng thơu loh-làng pơnuaĭ hơgĕ mơkrư-siàm, wĭl-tơ̆l, siàm hơtai Pô.

3 Yơu nư̆n, gơnừm tơ pơnuaĭ anĭt-brơi-soh Yàng hũ brơi tơ dơlhă, dơlhă yòng đờm sơ̆ng yàu aràng lăm buơl adơi-ai lài: juơi c̆ơ-sơnư̆ng glòng rơlau đơ̆i mư̆ng rùp-phŭn drơi, bloh păl c̆ơ-sơnư̆ng iơŭ tơpă sa-sĭt, tui iơŭ sơ̆ng pơnuaĭ păng-tui bloh Yàng Pô Lơngì hũ brơi tơ yàu aràng. 4 Kơyoa mơhiơ̆ yơu lăm sa boh rùp-phàp, buơl gudrơi hũ lô pơ-ơnah, sơ̆ng du pơ-ơnah 'buh ngă sa bruă mơhiơ̆ yơu gơŭ, 5 kŭng yơu nư̆n rơi, buơl gudrơi yah lô mơnih, bloh mĭn la sa rùp-phàp lăm Pô Krist, sơ̆ng yàu aràng buơl gudrơi la du pơ-ơnah lăm rùp-phàp nư̆n. 6 Buơl gudrơi hũ du pơnuaĭ brơi-soh krơi gơŭ, tui yơu pơnuaĭ anĭt-brơi-soh Yàng brơi: Mơnih hũ pơnuaĭ brơi-soh đờm hwơ̆r, nư̆n đờm bĕ tui pơnuaĭ păng-tui drơi; 7 mơnih hũ pơnuaĭ brơi-soh duh bruă, nư̆n abih hơtai-hơtiàn bĕ bloh duh bruă; mơnih hũ pơnuaĭ brơi-soh pơto-pơsài, nư̆n abih hơtai-hơtiàn bĕ bloh pơto-pơsài; 8 mơnih hũ pơnuaĭ brơi-soh pơto-kơkơi, nư̆n kơjăp hơtai-hơtiàn bĕ bloh pơto-kơkơi; mơnih hũ pơnuaĭ brơi-soh pơrpha-brơi, nư̆n mă bĕ hơtai-hơtiàn lơnah-lơnàng bloh brơi pơrpha; mơnih hũ pơnuaĭ brơi-soh apăn-akŏ, nư̆n abih hơtai-hơtiàn bĕ bloh apăn-akŏ; mơnih hũ pơnuaĭ brơi-soh ngă bruă anĭt-dŏng, nư̆n sờh-sài bĕ bloh ngă.

Hơdiŭ Lăm Pơnuaĭ Anĭt-Rơnăm

9 Hơtai-hơtiàn uơ̆n-rơnăm păl tơpă-tơpe 'buh hũ mơthĭ-lơ̆r. Mơbai bĕ tơ pơnuaĭ mơsak-jơhà bloh rơlĭn-kơjăp sơ̆ng pơnuaĭ siàm. 10 Uơ̆n-rơnăm bĕ tơ gơŭ sơ̆ng abih hơtai-hơtiàn yơu uơ̆n-rơnăm adơi-ai phŭn; mă bĕ hơtai-hơtiàn c̆ơ prŏng-màng bloh ă-ư̆n tơ gơŭ. 11 Păl tơriăng-tơryồng ngă bruă, juơi alah. Păl abih hơtai-hơtiàn duh bruă Yàng. 12 Sờh-sài bĕ lăm pơnuaĭ c̆àng-gơnừm, ă-ư̆n bĕ lăm pơnuaĭ pơđì-pơđoa gleh-glăr, kơjăp hơtai-hơtiàn bloh iơu-lài. 13 Brơi pơrpha bĕ mư̆ng tơgrơ̆ pơnuaĭ păl hũ tô angui sơ̆ng du mơnih păng-tui Yàng păp pơnuaĭ siơŭ kơđòng; păl hũ hơtai-hơtiàn wă-rò thuai. 14 Lơkơu lơngai-pơtuah bĕ tơ du mơnih mă-pơkơŭ buơl adơi-ai; lơkơu lơngai-pơtuah bĕ, juơi alĕ-aluah. 15 Sờh-sài bĕ sơ̆ng mơnih sờh-sài, hia bĕ sơ̆ng mơnih hia. 16 Hơdiŭ bĕ hơlàr-tămsòr sơ̆ng gơŭ; juơi hũ hơtai-sơnư̆ng pơglòng-rùp, bloh păl pơ-ơneh rùp hơdiŭ hơlàr-siàm sơ̆ng du mơnih bơhiàn 'buh prŏng-màng. Juơi brơi rùp-phŭn drơi la mơnih jak-khờh. 17 Juơi mă pơnuaĭ mơsak-jơhà bơ-yàr wơ̆ pơnuaĭ mơsak-jơhà tơ aràng sơi, bloh păl abih hơtai-hơtiàn tui duah pơnuaĭ siàm tơ anaŭ tơgrơ̆ mơnih. 18 Yah hũ rơgơi jiơ̆ng, nư̆n abih pràn-hơtai bĕ bloh hơdiŭ hơlàr-siàm sơ̆ng tơgrơ̆ mơnih. 19 Ơ buơl adơi-ai uơ̆n-rơnăm biă, rùp-phŭn buơl adơi-ai juơi ngă bơ-yàr wơ̆ pơnuaĭ mơsak-jơhà tơ mơnih ngă pơnuaĭ mơsak-jơhà tơ drơi, bloh luơi bĕ tơ pơnuaĭ anok-anoa prŏng Yàng Pô Lơngì ngă bruă nư̆n, kơyoa hũ pơnuaĭ wă: “Ngă bơ-yàr wơ̆ pơnuaĭ mơsak-jơhà la bruă Kơu, Kơu rơŭ ngă bơ-yàr wơ̆.” * 20 Bloh, “yah mơnih mơbai-tămdră sơ̆ng buơl adơi-ai lơpa, brơi bĕ buơl guñu 'bơ̆ng; yah mơhau ia, brơi bĕ buơl guñu mơñŭm; kơyoa ngă yơu nư̆n 'buh krơi yơu buơl adơi-ai daŭ du a-ngàh apui mơr-yah tơ ngŏ akŏ buơl guñu.” †

21 Juơi luơi pơnuaĭ mơsak-jơhà pha-jai rơlau drơi, bloh păl mă pơnuaĭ siàm pha-jai rơlau tơ pơnuaĭ mơsak-jơhà.

* 12:19 12:19 Akhàn Wơ̆ Pơnuaĭ Adăt-Adia 32:35. † 12:20 12:20 Pơđik Pơto 25:22,22.