2
Nyɛmɛ minɛ n bo wɔ yi bu n jɔrɛ
1 Nyini dɛɛ ti, am yaki sa kɛrɛ bo i ti má kpa, má am kpɔ am beŋgum, má am sisi am beŋgum, má am yo am beŋgum burukɔɔnu sa, má am si am beŋgum kɔrɛ, má am kan am beŋgum jɔrɛ saaki bu.
2 Kabo baakan koro nyufini ni, am gusu, am koro Nyɛmɛ nɔaniɛ n bo i ti ka nɔnɔ casi ni, nyini buka am ye am koro nyi na am nya tiide a,
3 dama ambɛrɛ ni am tii si kabo Micɛra n ti kpa barasu.
4 Am bra Kristo dɔ, yiri ti ka yabuɛ n bo i la ŋgɔɔ n a. Yiri ye fatafɔm ayi i atu n a. Ama, Nyɛmɛ ayi i ka i la anyunuyi.
5 Ambɛrɛ gusu, am ti ka yabuɛm n bo bu la ŋgɔɔ n wɔ, na Nyɛmɛ sufa am ta awuru n bo i Awiɛwiɛ Casi n wo nu, na am yo i sayoowa dɔŋguyofɔ casim, na Awiɛwiɛ Casi buka am na am yo yoowa bo i sun Nyɛmɛ nu, Yesu Kristo dɛɛ ti.
6 Dama ba kɛrɛ i Nyɛmɛ Jɔrɛ Kadasi n nu ka, Nyɛmɛ ŋa,
“Am ti fɛn, m sufa yabuɛ bo i la anyunuyi
sufa bo Siyon miɛ kpiri n bu,
sɔnɔ kɛrɛ bo i yoori i yarada,
i mi dí má nyinsɛ.”
7 Tɔ, ambɛrɛ bo am ayo i yarada ni, am anya deke bo i la anyunuyi ni, ama, minɛm bo bu yo má i yarada ni, ba kɛrɛ i Nyɛmɛ Jɔrɛ Kadasi n nu ka,
“Yabuɛ n bo bondo tafɔm n faari i tuuri ni,
yiri ye wɔ kaaki bondo n jaa yabuɛm n kɛrɛ tii a.”
8 Na ba kaaki akɛrɛ i Nyɛmɛ Jɔrɛ Kadasi n nu ka,
“Nyini yabuɛ ni, minɛm bo bu jaa su,
na bu kpaasi.”
Deke n bo i ti na bu kpaasi n la ka, ba de má Nyɛmɛ nɔaniɛ ni, kabo wɔ yo daka ka i yo lɛɛ.
9 Ama, ambɛrɛ, am ti daanfiɛ n bo Nyɛmɛ ayi am wɔ, am ti sayoowa dɔŋguyofɔm bo am su Nyɛmɛ bo i ti am fɛmɛ n wɔ, am ti Nyɛmɛ dɛɛ minɛ casim wɔ, am ti Nyɛmɛ dɛɛ awurunbaam wɔ. Yiri ye wɔ yi am ka am kan i sakpam kere minɛm a, dama wɔ yi am afite awosin nu, afa am awura i dɛɛ wein n bo i la má aŋusu n nu.
10 Ba kɛrɛ i Nyɛmɛ Jɔrɛ Kadasi n nu ka,
“Saŋga be, am yo ti má i dɛɛ minɛm,
ama, kisa, am ti Nyɛmɛ dɛɛm wɔ.
Nyini saŋga, Nyɛmɛ yo si má am aŋunfɔ,
ama, kisa, wɔ si am aŋunfɔ.”
Kabo Nyɛmɛ akɔɔm woowa ti barasu ni
11 M danfo kpam, am ti wɔfɔm wɔ, ni minɛm bo bu la má woobiri durunya n nu fɛn, nyini dɛɛ ti, m sere am ni anyumboro wɔ, má am ma am nyunu boro am aŋuniɛmbaa koroowa su, dama am aŋuniɛmbaa koroowam sukoro ka bu kunma am wɔ.
12 Am ma am woowa ti kpa, na nzɛn minɛm bo bu su má Nyɛmɛ n jaraki am fa kɔ satiɛ be su, bu ba ŋu am sakpa n bo am yo i ni, na bu kánsi Nyɛmɛ, cɛɛn n bo i bá niɛ i minɛm su ni.
13 Ya Mibiɛ n dɛɛ ti, am de nfaŋgafɔm kɛrɛ nɔaniɛ, fɛmɛ bo i niɛ adamande kɛrɛ su ni,
14 ni nkpiɛnkpiɛnm bo wɔ yi bu ka bu suniɛ am su ni, am de bu nɔaniɛ, dama ba fa bu ase ka bu cin minɛm bo bu yo satiɛ n sui wɔ, na bu kansi minɛm bo bu yo sakpa ni.
15 Nyɛmɛ koro ka am yo sakpa a, na minɛm bo bu ti sinnzinm na bu si má be ni, na bu si má kabo bu kan.
16 Am ti minɛm bo am ade am tii wɔ, má am niɛ ka am anya am tii n dɛɛ ti, na am sufiɛ yo satiɛ. Ama, am ma am woowa ti kabo Nyɛmɛ akɔɔm woowa ti barasu ni.
17 Am bu sɔnɔ kɛrɛ sɔnɔ, am koro am ninbaam kɛrɛ, am soro Nyɛmɛ, na am bu Romafɔm fɛmɛ kpiri ni.
Kabo ya sɔn Kristo wahara diiwa n su ni
18 Ambɛrɛ bo am ti akɔɔm ni, am de am mibiɛm nɔaniɛ, na am bu bu nahɔrɛ su, má ka bo bu ti bɛnlɛ na bu yo am sakpa ni ŋgumi, ama, haari bo bu ti tiɛ ni mmɔɔ, am bu bu.
19 Nzɛn am ayo má satiɛ be, na bu kere am wahara na am mindi deeri i, ka am soro Nyɛmɛ n dɛɛ ti, nyini ti kpa a.
20 Nzu kpɛrɛ ye am nyá i a, nzɛn am yoori satiɛ na bu boori am na am mindi deeri i? Ama, nzɛn am yoori sakpa, na bu kere am wahara, na am mindi deeri i, nyini ti kpa Nyɛmɛ dɔ a.
21 Nyini dɛɛ ti, ye Nyɛmɛ afere am a, dama Kristo ni i tii adi wahara ama am, nyini kere am ka i ti ye ni ka am sɔn i su di i wahara n be.
22 Bu ŋa, yiri,
“Wɔ yo má satiɛ be,
wɔ kaaki abu má kɔrɛ be.”
23 Bu kpiɛɛri i nzukɔ ni, wɔ wɔrɔ má nzukɔ ama má bu. Bu kereeri i wahara ni, wɔ se má bu ka bu ŋú i. Ama, yiri faari i deke kɛrɛ maari Nyɛmɛ wɔ, yiri bo i di jɔrɛ bo i kɔ atin su ni.
24 Ya satiɛ dɛɛ ti, ye Kristo deeri ya jinaabiri diiri wahara wuuri baka jaanu n su a. I yoori sɔ, adena i kere ka ya wu wɔ, fa kɔ ya satiɛ su, na ya la ŋgɔɔ bo ya koro yo sakpa. Wahara n bo Kristo diiri i ŋuniɛ nu n dɛɛ ti, ye am anya laifiɛ a.
25 Am yo ti ka nbɔɛm bo ba mini wɔ, ama, kisa, am akaaki aba yiri bo i ti am sasafɔ na i niɛ am dika n dɔ.