2
Yônais rgâl nuih n'hâm plơ̆ sât ma Brah Yêhôva
1 Jêh ri Brah Yêhôva ăn du mlŏm ka kuŏng rnguăn Yônais, jêh ri ka kuŏng i nây rnguăn Yônais ri, păng gŭ ta trôm ndŭl ka pe năng pe nar
2 jêh ri păng mbơh sơm ma Brah Yêhôva i Brah păng nơm ri bơh trôm ndŭl ka i nây.
3 Păng lah:
“Dôl gâp geh nau jêr, gâp joi kuăl Brah Yêhôva
Păng plơ̆ ơh ngăn ro
Dôl gâp mân gâp mra khât ngăn ro gâp nter dăn May kơl
May kơl ngăn ro.
4 May mƀăr gâp ta ntŭk dŭt jru ngăn
Ta nâm blat dak văch dak văr
Chiao ma năp kơi dŏng lơ gâp nơh geh dak dadê
May đă đŏng dak nchŏch rbuh
Truyh ta gâp.
5 Gâp mân lah May mƀăr gâp ngai
Bơh măt May ngăn
Gâp mâu mra uănh
Nhih jan brah kloh uehMay nơm jât ôh.
6 Gâp ngŏm ta nâm dak ngăn bơi ma khât ro
Gâp gŭ ta nklang dak dŭt jru ngăn
Mbrâng put jŭm bôk gâp.
7 Hơi Brah Yêhôva i Brah gâp ơi
Gâp nơh ngŏm ta nâm dak văch dak văr dŭt jru ta njŏng yôk ri
Nkre ma khan ta bri phan nây
Yơn ma May lĕ sŏ jêh bơh ntŭk nây ăn gâp rêh tay.
8 Dôl gâp bơi ŭch tăch n'hâm
Gâp kah gĭt mbơh sơm ma May
Jêh ri tăng tât
Ta nhih jan brah May ta ƀon Yêrusalem ngăn ro.
9 Bunuyh i tâng mbah ma brah êng êng i mâu geh nau khlay
Păng mâu ôh dơi geh sŏ nau rŏng răp jăp tă bơh Kôranh Brah i ŭch ăn i nây nơh.
10 Gâp be nơh lah ueh ma Kôranh Brah
Ndrel ma sŏ ndơ jan nhhơr ma Brah Yêhôva
Tâm di đah nau gâp mât ton
Yorlah Brah Yêhôva dơm dơi rklaih”.
11 Jêh ri Brah Yêhôva đă ka i nây hok nglôh lơi Yônais, jêh ri ka i nây hok nglôh păng a kơh ti ngăn.