១៦
ព្រាក់កើលមាផូងញឆីងតាប៝នយេរូឆាលឹម
១ ល៝ង់នាវរាគូមព្រាក់មាអ៝ន់ផូងប៝នលានកោរាញឞ្រាសតាប៝នយេរូឆាលឹម ៖ អ៝ន់ខាន់អៃមៃតាប៝នកោរិនតោ ជានកើតគ៝ប់លែៈនតិញជេសមាផូងអីញឆីងតាឞ្រីកាលាតី នើស។
២ អាប់ពើសតានារពើសអ៝ន់ខាន់អៃមៃឆ៝ៈព្រាក់អាបាៈអីខាន់អៃមៃលែៈត៝ង់ឞើសនទើទ៝ង់ ព្រាប់អេងល៝រតាញីសជៃខាន់អៃមៃនើម គៃមានោកគ៝ប់ត៝ត់តៃ មោហោមអោសខាច់ញចោមានតើមរាគូម។
៣ អ៝ន់ខាន់អៃមៃកើយ្សឞូនុយ្សអាបាៈញអោតព្រាក់អីនៃមាហាន់តាប៝នយេរូឆាលឹម ត៝ត់គ៝ប់អាខាន់អៃមៃនៃតៃ គ៝ប់មរាញចីសឆ៝ម់បុតអ៝ន់មាខាន់ពាង់អីនៃញអោត គៃមាផូងញឆីងតាប៝នយេរូឆាលឹម រ៝មខាន់ពាង់។
៤ លាសទីមាគ៝ប់ហាន់ដ៝ង់ ហេនហាន់នទ្រែលឞាល់។
នាវពោល នតិញអេងៗ
៥ គ៝ប់អុចហាន់រ៝ៈឞ្រីមាឆេដោន ល៝រ ជេសហាន់រ៝ៈឞ្រីមាឆេដោន នៃ គ៝ប់មរាហាន់អាខាន់អៃមៃដ៝ង់។
៦ ក្លាប់លាសគ៝ប់គុនទ្រែលខាន់អៃមៃឆឹន ជឹតនារ មោលាសលែៈទូខៃឆ្យាលពោសមោគឹត គៃមាអ៝ន់ខាន់អៃមៃកើលគ៝ប់ហាន់តៃជឹតនាប់នតុកអីគ៝ប់មរាហាន់ជឹត។
៧ គ៝ប់មោអុចអោសវែសអាខាន់អៃមៃទូប្ល៝ត់ទើម យើនមាគ៝ប់រានើមមរាគុនទ្រែលខាន់អៃមៃជ៝ៈអ៝យ លាសកោរាញឞ្រាសអ៝ន់។
៨ យើនមាគ៝ប់ហោមអុចគុតាប៝នអេផេឆោ អ្យានហ៝មាត៝ត់ជេសញេតបុន ៥០ នារផូងអីឆ្រាអែល
៩ យ៝រលាសកោរាញឞ្រាសលែៈពើកមពោងអ៝ន់គ៝ប់មឞើសងក៝ចនាវមហែមហានអ្វែសតាប៝នអ្យាគែសអ៝ក់ឞូនុយ្សអ្យាត់ ឞ៝លលាសគែសអ៝ក់ឞូនុយ្សអីតឹមរាទ៝ង់ដាសគ៝ប់កាដោយដ៝ង់។
១០ លាសតីមោថេ ត៝ត់អាខាន់អៃមៃ ទាន់រ៝មពាង់អ៝ន់អ្វែស លើយអោសអ៝ន់ពាង់គែសនាវក្លាចខាន់អៃមៃ យ៝រលាសពាង់ឞូនុយ្សជានការកោរាញឞ្រាសកើតគ៝ប់ដ៝ង់។
១១ លាសនទ្រីលើយអោសអ៝ន់ទូហ្វេឞូនុយ្សមឺចរាម៝តពាង់។ អ៝ន់កើលពាង់ព្លឹឆឹតអាគ៝ប់មានាវដាប់មពាន់។ គ៝ប់នទ្រែលមាអ៝សនោតានាវញឆីងតាអ្យាគុក៝ប់ពាង់រើបហើប។
១២ ល៝ង់នោអាពោលុស គ៝ប់លែៈនត្រោលពាង់ហាន់អាខាន់អៃមៃ ហាន់នទ្រែលមាអ៝សនោអាបាៈអេង យើនមាពាង់អេហ៝ៈអុចអោសហាន់អាបៃអ្យា ពាង់ហោមក៝ប់ម៝សនារអ្វែសមាពាង់ហាន់។
នាវនតិញងគ្លែៈទុត
១៣ អ៝ន់ខាន់អៃមៃគុញជ្រាង់ងាន់ហ៝ៈ អ៝ន់គុន៝ប់តានាវញឆីង អ៝ន់គែសនូយ្សនហ៝ម់ឞាញ់ នទ្រែលមាអ៝ន់គែសនហ៝ម់ឆ្វានទាង់។
១៤ ទឹងលែៈនទើខាន់អៃមៃជាន អ៝ន់ជាននអ៝ប់មានូយ្សនហ៝ម់រ៝ង់។
១៥ អើអ៝សនោតានាវញឆីង ខាន់អៃមៃលែៈគឹតជេសរានាក់វ៝ល់នោឆាតេផានាស ខាន់ពាង់ជេងឞូនុយ្សញឆីងល៝រឞូតាឞ្រីអាខៃ ខាន់អៃមៃនៃ ជេសរីលែៈជាវឆាក់ខាន់ពាង់នើមមាជានការអ៝ន់មាផូងប៝នលានកោរាញឞ្រាស។ គ៝ប់ទាន់ខាន់អៃមៃហោងាន់
១៦ អ៝ន់អ្យាត់មាឞូនុយ្សអីគែសនូយ្សនហ៝ម់កើតអីនៃ ជេសរីអ៝ន់អ្យាត់មាទឹងលែៈឞូនុយ្សអីញឆ្រោយ្សជានការនទ្រែលខាន់ពាង់អីនៃដ៝ង់។
១៧ គ៝ប់រាម់មអាកងាន់គែសនោឆាតេផានាស នោផ៝រតីនាតុស នទ្រែលមានោអាខៃកុស ខាន់ពាង់លែៈត៝ត់តាអ្យា។ គ៝ប់ក្ល៝ង់ខាន់អៃមៃ យើនមាគែសខាន់ពាង់អីពែនុយ្សអ្យាជានអ៝ន់នូយ្សនហ៝ម់គ៝ប់រាម់មអាក
១៨ ខាន់ពាង់រាថីនូយ្សនហ៝ម់គ៝ប់ កើតខាន់ពាង់លែៈរាថីនូយ្សនហ៝ម់ខាន់អៃមៃនើសដ៝ង់។ អ៝ន់ខាន់អៃមៃយើកមាឞូនុយ្សអីកើតខាន់ពាង់អីនៃទោ។
១៩ ផូងញឆីងតាប៝នអេងៗតាឞ្រីអាឆី អ្យាទាន់អោបនាវអ្វែសលាង់ខាន់អៃមៃទាទេ។ នោអាកីលា នទ្រែលមាយោសព្រីឆីល ឞារហៃអូរឆាយខាន់ពាង់ នអ៝ប់មាទឹងលែៈផូងញឆីងអីគុរាបុនតាជៃខាន់ពាង់ អោបនាវអ្វែសលាង់ខាន់អៃមៃតារាញាកោរាញឞ្រាសដ៝ង់។
២០ ទឹងលែៈអ៝សនោតានាវញឆីងគុតាអ្យាអោបនាវអ្វែសលាង់ខាន់អៃមៃទាទេដ៝ង់។ ទាន់ខាន់អៃមៃតឹមអោបនាវអ្វែសលាង់នទ្រាង់នើមមានាវអ្វែសរាសរើច។
២១ នាវអោបអ្វែសលាង់អ្យា គ៝ប់ពោល ញចីសមាតីគ៝ប់នើម។
២២ ឞូម៝សអីមោរ៝ង់កោរាញយេឆូ អ៝ន់កោរាញឞ្រាសរាតាប់ពាង់អីនៃទោ។ អើកោរាញយេឆូ ទាន់ព្លឹវាច់ហ៝ម់!
២៣ ទាន់នាវអ្វែសកោរាញយេឆូ គុតានូយ្សនហ៝ម់ខាន់អៃមៃ!
២៤ គ៝ប់រ៝ង់ទឹងលែៈខាន់អៃមៃតាឞ្រាសក្រីសយេឆូ ៕៚