4
កោរាញអ៝សម៝នឞ្រាសក្រីស
1 លាសនទ្រីទាន់ខាន់អៃមៃកើបអាពោលុស នទ្រែលមាគ៝ប់ជេងឞូនុយ្សអីឆើមកើលជានការមាឞ្រាសក្រីស កើបហេនជេងឞូនុយ្សអីកោរាញឞ្រាសដាៈមឞើសងក៝ចនាវពាង់នើមលែៈញហើអាបៃអ្យាហ៝ៈ អីឞើសនតើមនើសហោមនទ៝ប់មពោន។
2 លាសគែសឞូដាៈទូហ្វេឞូនុយ្សជានការទូនតីល ពាង់អុចឞូនុយ្សអីនៃជានការរាប់ជាប់ងាន់។
3 ល៝ង់គ៝ប់អីអ្យា ឞ៝លលាសខាន់អៃមៃកាដោយ មោលាសឞូនុយ្សអេងកាដោយ គែសនាវមឹនលាសគ៝ប់ជានការអ្វែសមោលាសជានការមោអ្វែស ក៝ៈគ៝ប់មោជីឞោកជីតោរ ជេសរីឆាក់គ៝ប់នើមក៝ៈគ៝ប់មោលាសដ៝ង់ គ៝ប់ជានការអ្វែសមោលាសជានការមោអ្វែស។
4 តានូយ្សនហ៝ម់គ៝ប់ ឞ៝លលាសគ៝ប់គែសនាវដាប់មពាន់យ៝រមាគឹតមោគែសជាននទើអ្យើសនទើមោអ្វែស យើនមានាវអីគ៝ប់មឹនកើតនៃ មោអោសទីជានអ៝ន់គ៝ប់អ្យាជេងឞូនុយ្សឆ៝ង់មោគែសនាវតីស ហោមគែសទូហ្វេកោរាញឞ្រាសអីផាតទោយ្សគ៝ប់។
5 លាសនទ្រីលើយហ៝ៈអោសតឹមផាតទោយ្សនទ្រាង់នើមអេល៝រមាត៝ត់ទីនារកោរាញយេឆូ ព្លឹវាច់ផាតទោយ្ស យ៝រលាសពាង់នើមមរាឆ៝ៈតេៈអានតុកអាងនទើអីឞូនុយ្សទែលែៈមពោនតានតុកង៝ ជេសរីពាង់ញហើនាវមឹននាវអុចអីទុតនទ៝ប់តាត្រោមនូយ្សនហ៝ម់ឞូនុយ្ស។ តានោកនៃកោរាញឞ្រាសរានេមាទូហ្វេទូហ្វេឞូនុយ្ស តឹងនទើអីគែសញហើនៃ។
6 អើអ៝សនោតានាវញឆីង គ៝ប់ទ៝ង់អាពោលុស នទ្រែលមាទ៝ង់គ៝ប់នើមជេងនាវនតឹតគៃមាគែសខ្លៃមាខាន់អៃមៃ។ គ៝ប់អុចខាន់អៃមៃគឹតវ៝ត់នាវអីឞូលាសកើតនអា៖ «លើយអោសជានរាលាវដាសនទើអីលែៈគែសញចីសតានាវកោរាញឞ្រាសងើយ»។ លាសនទ្រីខាន់អៃមៃមោហោមអោសនហីអេងឆាក់នើមយ៝រមាកើបទូហ្វេនើមនតីក្វ៝ង់រាលាវមាទូហ្វេអេងជឹត។
7 ម៝សបាៈនាវគែសអីជានអ៝ន់ទូហ្វេតាផូងខាន់អៃមៃអ្វែសរាលាវមាឞូអេង? ទឹងលែៈនាវអីខាន់អៃមៃលែៈគែស ជេងតាៈឞើសកោរាញឞ្រាសអ៝ន់! លាសខាន់អៃមៃលែៈឆ៝ៈទើនជេសទឹងលែៈនាវឞើសពាង់ មើមទឹងខាន់អៃមៃឞ្លាវនហីអេងឆាក់មានាវអីនៃជានតឹមឞានមាគែសអេង មោតាៈឞើសកោរាញឞ្រាសអ៝ន់?
8 ខាន់អៃមៃមឹនលាសខាន់អៃមៃលែៈគែសជេសទឹងលែៈនាវអីខាន់អៃមៃអុចឞើសនាវអីឞ្រាសហ្វេងអ្វែសអុចអ៝ន់។ ខាន់អៃមៃមឹនលាសខាន់អៃមៃលែៈក្វ៝ង់តានាវកោរាញឞ្រាសអីនៃ។ ខាន់អៃមៃមឹនលាសខាន់អៃមៃលែៈជេងតឹមឞានមាកាដាច់ម៝ត់អ្វាញ់នទ្រែលឞ្រាសក្រីស ជេស យើនមាខាន់អៃមៃមឹនលាសហេនមោអោសជេងកាដាច់។ តីសមាទឹងលែៈនាវអីនៃមោទីអោស។ គ៝ប់អុចងាន់ខាន់អៃមៃលែៈជេងកាដាច់កើតនៃងាន់ គៃមាហេនលែៈជានកាដាច់នទ្រែលខាន់អៃមៃ។
9 តឹងមាគ៝ប់មឹន កោរាញឞ្រាសអ៝ន់ហេនអីកោរាញអ៝សម៝នតឹមឞានមាជេៈតាន៝ម់ឞូ តឹមឞានមាឞូនុយ្សអីឞូតេៈទោយ្សងខឹត ជេសរីអ៝ន់ទឹងលែៈឞូនុយ្សមឺចរាម៝ត នអ៝ប់មាតោងពារ់ នអ៝ប់មាឞូនុយ្ស។
10 ឞូលាសហេនឞូនុយ្សរាលូកម៝ល់យ៝រមាហេនមឞើសងក៝ចនាវឞ្រាសក្រីស ល៝ង់ខាន់អៃមៃនៃកើបអេងជេងឞូនុយ្សអីគែសនាវមឹនគឹតឞ្លាវយ៝រមាគុនទ្រែលឞ្រាសក្រីស ។ ហេនតឹមឞានមាឞូនុយ្សអីមោគែសនហ៝ម់ឆ្វាន យើនមាខាន់អៃមៃនៃតឹមឞានមាឞូនុយ្សអីគែសឆ្វានទាង់ងាន់។ ខាន់អៃមៃឞូយើក តីសមាហេនឞូទែមឺចរាម៝ត។
11 នហ៝មាត៝ត់នារអ្យា ហេនហោមគុតានាវជីង៝តជីហីរ ហោមគុតានាវឞិចកោសលាហោក គុឞ្រែមារាពាត់មឞាង រេសទែងគ្លាៈទែងគ្លើត។
12 ហេនជានការរាអាសរាគាញ់ងាន់មាតីហេននើមគៃមាគែសនទើឆោងឆា។ នោកឞូរាកឆ្វាយហេន ហេនទាន់កោរាញឞ្រាសអ៝ន់នាវគែសជេងមាខាន់ពាង់ នោកឞូជានជេរជ៝ត់មាហេន ហេនហោមអែទើយញឆ្រោយ្សអ៝ត់
13 នោកឞូងើយញចើតហេន ហេនអើសមាខាន់ពាង់មានាវអ្វែស។ នហ៝មាត៝ត់នារអ្យាទឹងលែៈឞូនុយ្សអ្វាញ់ហេនតឹមឞានមានទ៝ក់មរ៝ម់អីឞូមអារ់ នទ្រែលមាឞូមោអោសអ្វាញ់គែសហេន។
14 គ៝ប់ញចីសនាវអីអ្យាអ៝ន់មាខាន់អៃមៃ មោអោសទីគៃមាអ៝ន់ខាន់អៃមៃគែសនាវដីតព្រេង យើនមាគ៝ប់អុចនតុមនតីខាន់អៃមៃតឹមឞានមាក៝នគ៝ប់នើមអីគ៝ប់រ៝ង់។
15 ឞ៝លលាសខាន់អៃមៃគែសនើមនតី ១០០០០ នុយ្សកាដោយឞើសកើយគ៝ប់គៃមានតុមនតីខាន់អៃមៃមានាវឞ្រាសក្រីស ក៝ៈមោគែសដ៝ង់អ៝ក់ឞូនុយ្សអីលែវខាន់អៃមៃឆឹតញឆីង។ កើតនទ្រីគ៝ប់តឹមឞានមាឞឹខាន់អៃមៃតាឞ្រាសក្រីសយេឆូ យ៝រលាសគ៝ប់អីនាក់លែវនាវមហែមហានអ្វែសអ៝ន់មាខាន់អៃមៃនើស។
16 លាសនទ្រីគ៝ប់ទាន់ហោងាន់ខាន់អៃមៃជានតឹងគ៝ប់ទោ។
17 យ៝រមានាវអីនៃគ៝ប់លែៈអ៝ន់តីមោថេ អីតឹមឞានមាក៝នអីគ៝ប់នើមរ៝ង់ អីឞូនុយ្សរាប់ជាប់ងាន់តាកោរាញយេឆូ អ៝ន់ពាង់ហាន់អាខាន់អៃមៃ គៃមាពាង់ងកាសខាន់អៃមៃនាវគ៝ប់គុងាវតាឞ្រាសក្រីសយេឆូ កើតនាវអីគ៝ប់នតុមនតីអ៝ន់មាទឹងលែៈផូងញឆីងតាអាប់នតុកនើស។
18 យើនមាគែសឞូនុយ្សអាបាៈកើបអេងឆាក់ខាន់ពាង់នើមក្វ៝ង់ មឹនលាសគ៝ប់មោអោសហាន់អាខាន់អៃមៃជឹត គៃមាលាសខាន់ពាង់។
19 យើនមាគ៝ប់មរាហាន់អាខាន់អៃមៃគើញរ៝ លាសកោរាញឞ្រាសអុច។ នោកនៃគ៝ប់មរាឆៃនហេលខាន់ពាង់អីនៃក្វ៝ង់មាមឞូងទើម មោលាសគែសនាវទើយតាៈឞើសកោរាញឞ្រាសងាន់។
20 យ៝រលាសនាវកោរាញឞ្រាសម៝ត់អ្វាញ់មោអោសទីងើយមាមឞូងទើម ជេងនអ៝ប់មាកោរាញឞ្រាសញហើនាវទើយនាវខ្លៃ។
21 លាសនទ្រីនោកគ៝ប់ហាន់អាខាន់អៃមៃតៃ ម៝សនទើអុចអ៝ន់គ៝ប់ញអោត? អុចគ៝ប់ញអោតម៝ង់ មោលាសអុចគ៝ប់ញអោតនាវរ៝ង់ នទ្រែលមាគែសនូយ្សនហ៝ម់មលែស?