9
នទើទីមាមពោលកោរាញអ៝សម៝នអោប
1 អាសគ៝ប់អ្យាអើមមោគែសបាសជេងក៝នមែ? អាសគ៝ប់អ្យាអើមមោទីបាសជេងកោរាញអ៝សម៝ន? អាសគ៝ប់អ្យាអើមមោបាសឆៃឞ្រាសយេឆូ អីកោរាញឞ៝ន់នើម? អាសខាន់អៃមៃអីនៃអើមមោទីបាស គែសនាវរាក្លាយ្សជេងប៝នលានកោរាញឞ្រាស តាៈឞើសនាវគ៝ប់មឞើសងក៝ច?
2 ឞ៝លលាសគែសឞូអាអេងមោកើបគ៝ប់ជេងកោរាញអ៝សម៝នកាដោយ យើនមាគ៝ប់ជេងកោរាញអ៝សម៝នអ៝ន់មាខាន់អៃមៃងាន់ យ៝រមាឞូទើយគឹតឆៃគ៝ប់ជេងកោរាញអ៝សម៝នងាន់ តាៈឞើសខាន់អៃមៃញឆីងមាកោរាញយេឆូ អីគ៝ប់មឞើសងក៝ច។
3 យើនមាគ៝ប់អុចអើសមាផូងអីលាសគ៝ប់មោជេងកោរាញអ៝សម៝នកើតនអា៖
4 អាសគ៝ប់ នទ្រែលមានោបារនាបាស អើមមោទីបាសទើយមាឆ៝ៈទើននទើឆោងឆាឞើសឞូនុយ្សអីហេននតុមនតី?
5 អាសហេនអ្យាអើមមោទីបាសទើយមាលែវទូហ្វេអូរអីញឆីងហាន់នទ្រែល កើតមពោលកោរាញអ៝សម៝នអាបាៈអេង កើតអ៝សៗកោរាញយេឆូ កើតពេត្រោស ដ៝ង់?
6 មោលាសអើមគែសហេនទើមលាសអីអ្យាត់មាជានការឆ្យាម់អេងនាវរេសហេននើមនោកនតុមនតីឞូ?
7 អើមគែសលាសឞូនុយ្សជានតាហែនឆ៝ៈទ៝ង់ព្រាក់ពាង់នើម? អើមគែសលាសឞូនុយ្សតាម់តើមព្លៃយុងយារប៝នទូលោកមីរ ជេសរីមោអោសឆ៝ៈឆាអីព្លៃនៃ? អើមគែសលាសឞូនុយ្សច្យាប់ទូផូងឞែឞ្យាប់ ជេសរីមោអោសឆ៝ៈញេតអីទាកត៝សពាង់នៃ?
8 នាវគ៝ប់ងើយអីនៃមោអោសទើនតាៈនាវមឹនឞូនុយ្សទើម យើនមាតានាវវៃមោឆេ អីតាៈឞើសកោរាញឞ្រាសលែៈគែសញចីសលាសកើតនៃដ៝ង់។
9 យ៝រលាសតានាវវៃមោឆេ លែៈគែសញចីសលាស៖ «លើយអោសងគ្រេបមឞូងនទ្រោកនោកពាង់ជ៝តព្លេនឞា»។ នទើអីនៃកោរាញឞ្រាសលាសទើនមានទ្រោកទើមឞើស? មោអោស!
10 កោរាញឞ្រាសមោអោសលាសមានទ្រោកទើម ពាង់លាសមាឞ៝ន់ដ៝ង់។ នាវអីនៃគែសញចីស គៃមាឞូនុយ្សអីច្វ៝រ់ឆ្រែគែសនាវរានើមគែសឞាឞើសឆ្រែអីនៃ ជេសរីឞូនុយ្សអីរាពាត់ព្លេនគែសនាវរានើមគែសឞាឞើសអីពាង់រាពាត់ព្លេនអីនៃដ៝ង់។
11 លាសហេនលែៈនតីខាន់អៃមៃតឹមឞានមាលែៈតូចជេសគារ់មពែសឞើសឞ្រាសហ្វេងអ្វែសអ៝ន់តាខាន់អៃមៃ លាសនទ្រីអាមើមទឹងមោទីលាសហេនឆ៝ៈនទើឞើសខាន់អៃមៃមាឆ្យាម់ឆាក់អីតឹមឞានមារែក?
12 លាសឞូអេងអីនតីខាន់អៃមៃលែៈទាសនៃទើយឆ៝ៈនទើមាឆ្យាម់ឆាក់ឞើសខាន់អៃមៃ លាសនទ្រីហេនលើហោរាលាវខាន់ពាង់អីនៃទើយឆ៝ៈ យើនមាហេនមោអោសទ៝ង់នាវទើយអីនៃ ក្លាចលាសងកីងឞូអ្យាត់នាវមហែមហានអ្វែសឞ្រាសក្រីស អ្វែសរាលាវហេនញឆ្រោយ្សជានការនអ៝ប់មាគុអ៝ត់ទឹងលែៈហ៝ៈ។
13 អើមខាន់អៃមៃមោគឹតបាស? ឞូម៝សអីជានការតាញីសជានឞ្រាសមាកោរាញឞ្រាស ពាង់អីនៃគែសនទើឆោងឆាតាៈឞើសនទើឞូញហើរតាញីសជានឞ្រាសអីនៃដ៝ង់ ជេសរីឞូម៝សអីជានការតាញឆឺងគុចពូរនទើជានឞ្រាស ពាង់អីនៃគែសនទើឆាតាៈឞើសនទើឞូញហើរតាញឆឺងអីនៃដ៝ង់។
14 កើតនទ្រីដ៝ង់កោរាញឞ្រាសលែៈដាៈជេស ឞូម៝សអីមឞើសងក៝ចនាវមហែមហានអ្វែស ទីមាពាង់ឆ្យាម់នាវរេសតាៈឞើសនាវជានការអីនៃដ៝ង់។
15 យើនមាគ៝ប់ គ៝ប់មោអោសទ៝ង់នាវទើយអីនៃ ជេសរីនាវគ៝ប់ញចីសអីអ្យា មោអោសគៃមាដាៈខាន់អៃមៃកើលគ៝ប់ជឹតនាប់តៃ។ អ្វែសរាលាវអ៝ន់គ៝ប់ខឹតលើយដាសមាអ៝ន់គ៝ប់ជាននាវទើយអីនៃ គៃមាគ៝ប់ហោមទើយនហីអេងឆាក់មានាវមឞើសងក៝ចនាវមហែមហានអ្វែសទើមទាម។
16 នាវគ៝ប់មឞើសងក៝ចនាវមហែមហានអ្វែសនៃ មោទីអោសគ៝ប់អ្យានហីអេងឆាក់គ៝ប់នើម យ៝រលាសនាវអីនៃតាៈឞើសកោរាញឞ្រាសដាៈគ៝ប់ជាន។ រេសរាញាល់ងាន់មាគ៝ប់ លាសគ៝ប់មោអោសមឞើសងក៝ចនាវមហែមហានអ្វែស!
17 លាសគ៝ប់មឞើសងក៝ចនាវមហែមហានអ្វែសនៃតាៈឞើសនូយ្សនហ៝ម់គ៝ប់នើមអុចទើម ជេងទីមាគ៝ប់គែសនទើងខោម យើនមានាវជានការអីអ្យាមោអោសទើនតាៈឞើសនូយ្សនហ៝ម់គ៝ប់នើមអុចទើម ជេងតាៈឞើសកោរាញឞ្រាសនើមជាវអ៝ន់មាគ៝ប់។
18 លាសនទ្រីម៝សបាៈនទើងខោមមាគ៝ប់គែស? នទើងខោមមាគ៝ប់ជេងនាវមឞើសងក៝ចនាវមហែមហានអ្វែសមោគែសឆ៝ៈខ្លៃ គ៝ប់មោអោសទ៝ង់នាវទើយតាៈឞើសនាវមឞើសងក៝ចនាវមហែមហានអ្វែស។
19 ឞ៝លលាសគ៝ប់មោអោសជេងទឹកឞូមោគែសឞូនុយ្សជានកោរាញគ៝ប់កាដោយ គ៝ប់ហោមជានតឹមឞានមាទឹកមាទឹងលែៈឞូនុយ្ស គៃមាលែវឞូនុយ្សអ៝ក់ងាន់អ៝ន់ឆឹតញឆីងមាឞ្រាសក្រីស ។
20 នោកគ៝ប់គុនទ្រែលផូងអីឆ្រាអែល គ៝ប់គុងាវតឹមឞានមាផូងអីឆ្រាអែល គៃមាលែវខាន់ពាង់ញឆីងមាឞ្រាសក្រីស ។ គ៝ប់មោអោសជេងឞូនុយ្សអីអ្យាត់មាជានតឹងនាវវៃមោឆេ យើនមានោកគ៝ប់គុនទ្រែលផូងអីញអោតនាវវៃអីនៃ គ៝ប់ជានតឹងនាវវៃ គៃមាលែវខាន់ពាង់ញឆីងមាឞ្រាសក្រីស ។
21 នោកគ៝ប់គុនទ្រែលផូងអីមោទីផូងអីឆ្រាអែល អីមោញអោតនាវវៃមោឆេ គ៝ប់គុងាវតឹមឞានមាផូងអីនៃដ៝ង់ គៃមាលែវខាន់ពាង់ញឆីងមាឞ្រាសក្រីស គ៝ប់មោអោសមអារ់លើយនាវវៃមោឆេ អីតាៈឞើសកោរាញឞ្រាស យើនមាគ៝ប់លែៈញអោតនាវវៃឞ្រាសក្រីស ។
22 នោកគ៝ប់គុនទ្រែលឞូនុយ្សអីរាអ្យា គ៝ប់ជានតឹមឞានមាឞូនុយ្សរាអ្យាអីនៃដ៝ង់ គៃមាលែវខាន់ពាង់ញឆីងមាឞ្រាសក្រីស ។ គ៝ប់គុនទ្រែលទឹងលែៈឞូនុយ្ស គ៝ប់ជានអ៝ន់តឹមឞានមាខាន់ពាង់អីនៃដ៝ង់ គៃមាគែសរាក្លាយ្សឞូនុយ្សអាបាៈ។
23 យ៝រមានាវមហែមហានអ្វែសនៃ គ៝ប់ញឆ្រោយ្សជានទឹងលែៈនទើអីនៃ គៃមាឆ៝ៈទើននទ្រែលឞូនទើអ្វែសអីតាៈឞើសនាវមហែមហានអ្វែសអីនៃដ៝ង់។
24 ខាន់អៃមៃលែៈគឹតជេស ទឹងលែៈផូងអីព៝ល់តឹមរាល៝ងញច្វាត់ ខាន់ពាង់ញច្វាត់ទឹងលែៈមាឞាល់ យើនមាគែសទូហ្វេទើមអីគែសនទើងខោម។ លាសនទ្រីដាៈខាន់អៃមៃគុរេសតឹមឞានមាព៝ល់តឹមរាល៝ងញច្វាត់អ៝ន់កើតពាង់អីទូហ្វេនៃទោ គៃមាគែសនទើងខោមឞើសកោរាញឞ្រាស។
25 ទឹងលែៈផូងអីព៝ល់តឹមរាល៝ងអីនៃ ខាន់ពាង់ខ៝ម់ញឆ្រោយ្សទុតហោងាន់ គៃមាគែសនទើងខោមអីហោមឞ្លាវអោមរ៝សលេកមោអោសហោមនហ៝រ៝។ ល៝ង់ឞ៝ន់ ឞ៝ន់ខ៝ម់ញឆ្រោយ្សគៃមាគែសនទើងខោមអីហោមគែសនហ៝រ៝មោអោសឞ្លាវអោមរ៝សលេក។
26 នទ្រីទឹងគ៝ប់គុរេសតឹមឞានមាញច្វាត់អ៝ន់កើតនៃ គ៝ប់មោអោសញច្វាត់ព៝ល់ទើម គ៝ប់តឹមឞានមាឞូនុយ្សតឹមថុកឞាល់គៃមាទើយ មោទីតឹមថុកដាសឆ្យាលទើម។
27 គ៝ប់ញឆ្រោយ្សញឆ្រាមដាប់ឆាក់ជាន់គ៝ប់នើមអ៝ន់ទុតហោងាន់ ជេសរីជានកោរាញមាឆាក់គ៝ប់នើម គៃមាលើយអោសជេសគ៝ប់មឞើសងក៝ចនាវមហែមហានអ្វែសអ៝ន់មាឞូអេងៗ ជេសរីបេងមាកោរាញឞ្រាសមអារ់គ៝ប់។