12
ពោល ងក៝ចនាវតឹមឆៃ
1 ឞ៝លលាសនាវនហីអេងឆាក់គ៝ប់នើមមោគែសនាវខ្លៃកាដោយ ហោមអ្យាត់មាគ៝ប់ងើយមានទើអីកោរាញឞ្រាសលែៈញហើជេសមាគ៝ប់តានាវតឹមឆៃ នទ្រែលមានទើអីពាង់ពើកអ៝ន់គឹត។
2 គ៝ប់នាល់ទូហ្វេឞូក្លោអីញឆីងមាឞ្រាសក្រីស នោក ១៤ នាម់អាល៝រនើស កោរាញឞ្រាសពឺពាង់តាកាលើត្រោកអីនតុកកោរាញឞ្រាសនើមត៝ត់តានតុកពែទាប់ - យើនមាគ៝ប់មោគឹតលាសឆាក់ជាន់ហាវងាន់ មោលាសមានមាតឹមឆៃទើម កោរាញឞ្រាសទើមអីនាក់គឹត។
3 គ៝ប់គឹតកោរាញឞ្រាសពឺឞូក្លោអីនៃអាប៝នអ្វែស - យើនមាគ៝ប់មោគឹតអោសលាសឆាក់ជាន់ពាង់ហាវងាន់ មោលាសមានមាតឹមឆៃទើម កោរាញឞ្រាសទើមអីនាក់គឹត។
4 ពាង់តាង់នាវអីទុតនាវងាន់ យើនមាកោរាញឞ្រាសឞ្វៃមោអោសអ៝ន់ឞូនុយ្សអីឞ្លាវខឹតមឞើសងក៝ចនាវអីនៃមាឞូ។
5 គ៝ប់ងើយរានេអេងឆាក់មាឞូក្លោអីនៃ យើនមាគ៝ប់មោអោសរានេអេងឆាក់គ៝ប់នើម គ៝ប់មានមារានេម៝សនទើអីរាអ្យាតាឆាក់គ៝ប់នើមទើម។
6 លាសគ៝ប់អុចរានេអេងឆាក់ គ៝ប់ក៝ៈមោដ៝ង់ជេងឞូនុយ្សរាលូកម៝ល់ យ៝រលាសនាវអីគ៝ប់ងើយនៃជេងនាវងាន់។ យើនមាគ៝ប់មោហោមអោសងើយមានាវអីគ៝ប់លែៈតឹមឆៃនៃនើស ក្លាចលាសឞូកើបគ៝ប់អ្យាក្វ៝ង់រាលាវឞើសនទើអីខាន់ពាង់លែៈឆៃតានាវគុងាវគ៝ប់ លែៈតាង់តានាវគ៝ប់នតីនៃ។
7 កោរាញឞ្រាសអ៝ន់ទូនតីលនទើតាឆាក់ជាន់គ៝ប់អីតឹមឞានមាល៝ក តឹមឞានមាគែសតោងពារ់ឆាតាង់ អីកោរាញមពោលឞ្រាសអ្យើសមាក៝ប់ងក្រីតតាឆាក់ជាន់គ៝ប់ កោរាញឞ្រាសជានកើតនៃគៃមាគ៝ប់មោអោសកើបអេងឆាក់គ៝ប់នើមក្វ៝ង់អីរតាៈឞើសនទើទុតនាវងាន់អីកោរាញឞ្រាសលែៈអ៝ន់គ៝ប់ឆៃនើស។
8 លែៈពែតឹគ៝ប់ទាន់កោរាញឞ្រាសហោងាន់ តាក់លើយល៝កអីនៃឞើសឆាក់ជាន់គ៝ប់
9 យើនមាពាង់លាសមាគ៝ប់៖ “គ៝ប់កើលមៃតាៈឞើសនាវអ្វែសគ៝ប់នើមលែៈគាប់ជេសមាមៃ យ៝រលាសនាវទើយគ៝ប់នើម លើមាហោឞូឆៃនហេលលាសគ៝ប់អ៝ន់មាឞូនុយ្សអីរាអ្យា”។ លាសនទ្រីគ៝ប់អុចរានេម៝សនទើអីរាអ្យាតាឆាក់គ៝ប់នើមនអ៝ប់មានូយ្សនហ៝ម់រាម់មអាក គៃមានាវទើយឞ្រាសក្រីស នើមគុតាគ៝ប់។
10 កើតនទ្រីគ៝ប់អ្វែសមអាកនោកគ៝ប់រាអ្យា នោកឞូរាកឆ្វាយគ៝ប់ នោកគ៝ប់គែសនាវជេរ នោកឞូជានជេរគ៝ប់ នោកគ៝ប់គែសនាវងក្ល៝ន់រាវៃ យ៝រមាគ៝ប់ជានការមាឞ្រាសក្រីស។ គ៝ប់អ្វែសមអាកនោកគ៝ប់រាអ្យា យ៝រលាសនោកនៃឞ្រាសក្រីសគុតាគ៝ប់មានាវទើយពាង់នើម។
ពោល រាវៃមាផូងញឆីងតាប៝នកោរិនតោ
11 គ៝ប់រានេអេងឆាក់កើតនៃតឹមឞានមាឞូនុយ្សអីរាលូកម៝ល់ យ៝រមាខាន់អៃមៃញច៝ប់គ៝ប់ជាន។ ទីលាសខាន់អៃមៃក៝សគ៝ប់រានេគ៝ប់។ ឞ៝លលាសគ៝ប់អីឞូនុយ្សមោខ្លៃកាដោយ ក៝ៈគ៝ប់មោដ៝ង់ជេៈតាន៝ម់មពោលអីឞូនុយ្សអាបាៈកើបលាសកោរាញអ៝សម៝នអីទុតក្វ៝ង់អីនៃ។
12 នោកគ៝ប់គុនទ្រែលខាន់អៃមៃនើស គ៝ប់ជាននាវមឞេនអេងៗអីអ៝ន់គឹតនហេលលាសគ៝ប់អីអ្យាជេងកោរាញអ៝សម៝នងាន់ គែសនាវមឞេន គែសនាវជានទុតនាវងាន់ គែសញហើនាវទើយកោរាញឞ្រាស នទ្រែលមាគែសនាវអ៝ត់នូយ្សទុតហោ។
13 ម៝សបាៈគ៝ប់ជានតីសតាខាន់អៃមៃ? គ៝ប់កើលខាន់អៃមៃតឹមឞានមាគ៝ប់កើលមាផូងញឆីងតានតុកអេងៗ យើនមាគ៝ប់មោអោសអ៝ន់ខាន់អៃមៃគែសនាវជេរមាកើលគ៝ប់ លាសគ៝ប់ជានតីសមោអ៝ន់ខាន់អៃមៃកើលគ៝ប់ ទាន់ខាន់អៃមៃយោៈមាគ៝ប់បាៈ!
14 អាបៃអ្យាគ៝ប់នទ្រាប់ហាន់អាខាន់អៃមៃលែៈពែតឹមាអ្យា ជេសរីគ៝ប់ក៝ៈមោដ៝ង់អ៝ន់ខាន់អៃមៃគែសនាវជេរមាកើលគ៝ប់ យ៝រលាសគ៝ប់មោអោសនអើរអុចគែសទ្រាប់នទើខាន់អៃមៃ គ៝ប់អុចខាន់អៃមៃជានតឹងនាវឞ្រាសក្រីសអុចមាលែៈនូយ្សនហ៝ម់ នអ៝ប់មាអ្យាត់គ៝ប់ដ៝ង់។ មោទីអោសអ៝សក៝នឆើមរាគូមព្រាប់ទ្រាប់នទើមាអ៝ន់មេៈឞឹ មេៈឞឹអីទីឆើមរាគូមព្រាប់ទ្រាប់នទើមាអ៝ន់អ៝សក៝ន!
15 គ៝ប់តឹមឞានមាមេៈឞឹខាន់អៃមៃ គ៝ប់អុចងាន់ឆ៝ៈទ៝ង់ទ្រាប់នទើអីគ៝ប់នើមគែស នអ៝ប់មាឆាក់គ៝ប់នើមឆើមជានការអ៝ន់មាខាន់អៃមៃ គ៝ប់ជានមានូយ្សនហ៝ម់រាម់មអាក។ លាសលែៈទាសនៃជេសនាវក្វ៝ង់គ៝ប់រ៝ង់មាខាន់អៃមៃ លាសនទ្រីមើមទឹងខាន់អៃមៃរ៝ង់មាគ៝ប់លើមាដេៈទើម?
16 ក្លាប់លាសគែសឞូនុយ្សអាបាៈតាផូងខាន់អៃមៃលាសគ៝ប់៖ “ពាង់មោអោសឆ៝ៈទ្រាប់នទើឞ៝ន់កាដោយ តីសមាពាង់ហោមមរោសរាលាម់ទ្រាប់នទើឞ៝ន់”។
17 អើមគ៝ប់ឆាញឆ្យាន់ទ្រាប់នទើខាន់អៃមៃតាៈឞើសឞូនុយ្សអីគ៝ប់ដាៈហាន់អាខាន់អៃមៃនើសឞើស?
18 គ៝ប់ទាន់តីតុស ហោងាន់ហាន់អាខាន់អៃមៃនើស ជេសរីគ៝ប់ដាៈទូហ្វេឞូក្លោជឹតហាន់នទ្រែលពាង់ដ៝ង់ លាសនទ្រីអើមតីតុស អីនៃឆាញឆ្យាន់ទ្រាប់នទើខាន់អៃមៃឞើស? អើមមោទីលាសហេនឞារហៃអ្យាជេងទូនតោរនាវទើម នទ្រែលមាហាន់តឹងតេលទូនតោរនាវឞើស?
19 ក្លាប់លាសខាន់អៃមៃមឹនលាសហេនញចីសទឹងលែៈនាវតាឆ៝ម់បុតអ្យាគៃមាព្លើងអើសខាន់អៃមៃទើម។ មោអោស ហេនញចីសជេងឞូនុយ្សឆើមកើលជានការមាឞ្រាសក្រីស ញចីសតានាប់មាត់កោរាញឞ្រាស។ អើអ៝សនោអីហេនរ៝ង់ ទឹងលែៈនទើហេនជាន ហេនជានគៃមារាទ៝ក់ញជេងខាន់អៃមៃ។
20 គ៝ប់ក្លាចនោកគ៝ប់ហាន់អាខាន់អៃមៃ គ៝ប់ឆៃខាន់អៃមៃអេងឞើសនាវអីគ៝ប់អុចឆៃ ជេសរីខាន់អៃមៃឆៃគ៝ប់អេងឞើសនាវអីខាន់អៃមៃអុចឆៃដ៝ង់។ គ៝ប់រាវៃក្លាចលាសតាខាន់អៃមៃគែសនាវតឹមរាទ៝ង់ តឹមមោនាច តឹមជីនូយ្ស តឹមងខាសមពោល តឹមងើយកែក តឹមងើយញចើត តឹមមឺច គែសនាវអុសអាស។
21 គ៝ប់ក្លាច នោកគ៝ប់ហាន់ជ៝ង់កើយអ្យា គ៝ប់មរាគែសនាវដីតព្រេងតានាប់មាត់កោរាញឞ្រាសអីឞ្រាសគ៝ប់យើកមឞាសនៃយ៝រមាខាន់អៃមៃ។ ជេសរីគ៝ប់ក្លាចគ៝ប់មរាញុមរាង៝ត យ៝រមាគែសអ៝ក់ឞូនុយ្សតាខាន់អៃមៃអីជានតីសអាល៝រនើស អេហ៝ៈអោសឞាសជានតីស មោអោសរាគ៝ល់លើយនូយ្សនហ៝ម់អ្យើសឞើសនាវជានអាប់នតីលនទើអ្យើស នាវខើសក្លែរ នទ្រែលមានាវតឹមទ៝ង់អីខាន់ពាង់វៃជាននៃនើស។