២៦
នាវកោរាញឞ្រាសត៝នមាអីឆាក់
១ នោកនៃគែសនាវជីឆ៝ត់ជីង៝តក្វ៝ង់តាឞ្រីនៃទូតឹជឹត តឹមឞានមាលែៈគែសតារានោកអាឞ្រាហាម់ នើសដ៝ង់។ នទ្រីអីឆាក់ ហាន់តាប៝នកេរារ គៃមាទាន់គុនទ្រែលកាដាច់អាបីមាលិច ជេងកាដាច់ផូងផាលីសតីន ។
២ ជេសរីឞ្រាសយេហោវាតឹមមពើលមាអីឆាក់ លាសមាពាង់៖ “មៃលើយអោសទូតាឞ្រីអេឆីប អ៝ន់មៃគុតានតុកឞ្រីគ៝ប់មឞើសមាមៃហ៝ៈ។
៣ អ៝ន់មៃគុតាឞ្រីអីមោអោសទីឞ្រីមៃនើមអ្យាហ៝ៈ គ៝ប់មរាគុនទ្រែលមាមៃ គ៝ប់មរាអ៝ន់គែសជេងមាមៃ គ៝ប់មរាអ៝ន់ទឹងលែៈឞ្រីអ្យាមាមៃនហ៝មាត៝ត់ក៝នត៝ត់ឆៅមៃ គ៝ប់មរាជានងាន់កើតនាវគ៝ប់លែៈត៝នមាអាឞ្រាហាម់ ឞឹមៃនើស។
៤ គ៝ប់មរាអ៝ន់ក៝នឆៅមៃឞឹករឹអ៝ក់តឹមឞានមាមាញ់កាលើត្រោក គ៝ប់មរាអ៝ន់ទឹងលែៈឞ្រីទាកអ្យាមាក៝នឆៅមៃ ជេសរីទឹងលែៈឞូនុយ្សលាមនែសនតូអ្យាឞូមរាឆ៝ៈទើនគែសជេងយ៝រមាតាៈឞើសក៝នឆៅមៃទាទេ។
៥ គ៝ប់មរាជានទឹងលែៈនទើអីនៃ យ៝រលាសអាឞ្រាហាម់ អ្យាត់នាវគ៝ប់នើស ពាង់ជានតឹងនាវគ៝ប់ដាៈគ៝ប់លាស នទ្រែលមាជានតឹងនាវវៃគ៝ប់”។
អីឆាក់ នទ្រែលមាកាដាច់អាបីមាលិច
៦ ជេសរីអីឆាក់គុតាប៝នកេរារនៃ។
៧ លាសឞូនុយ្សតាប៝ននៃអោបពាង់មានាវអូរពាង់នៃ៖ “ឞូម៝សឞូអូរអ្យា?” ពាង់មឞើសមាឞូលាស៖ “អ៝សគ៝ប់”។ ពាង់មោអោសឞាញ់មឞើសមាឞូលាសអូរពាង់ យ៝រលាសពាង់គឹតលាស៖ “គ៝ប់ក្លាចឞូក្លោតាប៝នអ្យាងខឹតគ៝ប់ គៃមាឆ៝ៈអូរគ៝ប់ យ៝រលាសអូរគ៝ប់អ្វាញ់អ្វែសរែសងាន់”។
៨ ត៝ត់ពាង់គុតាប៝ននៃលែៈជ៝ៈងាន់ គែសទូនារកាដាច់អាបីមាលិចជេងកាដាច់ផូងផាលីសតីន ពាង់អ្វាញ់ឞើសមពោងឞ្ល៝សរី ឆៃអីឆាក់នទ្រែលមារេបេកាអីអូររីតឹមអូតតឹមលោរ។
៩ ជេសរីកាដាច់អាបីមាលិចដាៈឞូក្វាល់អីឆាក់ លាសពាង់៖ “ពាង់អូរមៃងាន់ មើមទឹងមៃលាស «ពាង់អ៝សគ៝ប់»?” អីឆាក់អើស៖ “ទឹងគ៝ប់លាសកើតនៃ យ៝រលាសគ៝ប់ក្លាចឞូងខឹតយ៝រមាអូរគ៝ប់នៃ”។
១០ កាដាច់អាបីមាលិចលាសមាពាង់៖ “ម៝សទឹងមៃជានមាហេនកើតនៃ? លាសគែសទូហ្វេតាផូងប៝នលានគ៝ប់ឞិចនទ្រែលមាអូរមៃ លាសនទ្រីមៃញឆុកផូងហេនជេងតីស”។
១១ ជេសរីកាដាច់អាបីមាលិចមឞើសទឹងលែៈផូងប៝នលាន ពាង់លាសកើតនអា៖ “ឞូម៝សជានអ្យើសឞូក្លោអ្យា មោលាសអីអូរពាង់ ងខឹតលើយឞូនុយ្សនៃ”។
អីឆាក់តឹមរាង្លាប់នទ្រែលកាដាច់អាបីមាលិច
១២ អីឆាក់គុតូចតាម់តាឞ្រីនៃ ត៝ត់ពាង់កាច់ពាង់រែកពាង់គែសរាហ្យាង់ យ៝រលាសឞ្រាសយេហោវាអ៝ន់គែសជេងមាពាង់។
១៣ ជេសរីត៝ត់ពាង់នទ្រ៝ង់ ត៝ត់ពាង់គែសទ្រាប់នទើលើមាអ៝ក់នហ៝មាជេងឞូនុយ្សទុតនទ្រ៝ង់ងាន់។
១៤ ពាង់គែសឞែឞ្យាប់ គែសនទ្រោកអ៝ក់ងាន់ នទ្រែលមាគែសឞូនុយ្សឆើមកើលជានការអ៝ក់ដ៝ង់ កើតនទ្រីផូងផាលីសតីនមោនាចមាអោឞាល់។
១៥ ទឹងលែៈនតូទាកមពោលឆើមកើលជានការឞឹពាង់អាឞ្រាហាម់ កុយ្សរានោកអាឞ្រាហាម់ ហោមរេសនើស ផូងផាលីសតីនឞ្រោយលែៈផ្យៅ។
១៦ ជេសរីកាដាច់អាបីមាលិចលាសអីឆាក់៖ “មៃទូឞើសនតុកអ្យាហ៝ម់ យ៝រលាសមៃគែសឞូនុយ្សគែសទ្រាប់នទើទុតអ៝ក់រាលាវហេន”។
១៧ ជេសរីអីឆាក់ទូឞើសនតុកនៃហាន់គុតាញជ៝ង់យោកកេរារ តេៈចូនឞ៝កគុតានតុកនៃ។
១៨ អីឆាក់ដាៈឞូក្វាយតៃទឹងលែៈនតូទាកអាឞ្រាហាម់ អីឞឹទែកុយ្សរីនើស យ៝រលាសលែៈផូងផាលីសតីនទែឞ្រោយលើយទាទេជេសខឹតអាឞ្រាហាម់ នៃនើស អីឆាក់តេៈតៃរាញាទឹងលែៈនតូទាកអីនៃតឹងកើតរាញាអីឞឹពាង់លែៈតេៈនើសដ៝ង់។
១៩ មពោលឆើមកើលជានការអីឆាក់កុយ្សទូនតូទាកតាញជ៝ង់យោកនៃ គែសទាកលោសហ៝ចនឹងឞើសនតូអីនៃ។
២០ យើនមាផូងច្យាប់តាឞ្រីកេរារនៃតឹមល៝ក់ដាសផូងច្យាប់អីឆាក់ ផូងនៃលាស៖ “អ្យាជេងនតូទាកហេន” ជេសរីអីឆាក់តេៈរាញានតូនៃ «អេឆេក» គែសនាវខ្លៃលាស«នាវតឹមរាលាច់» យ៝រលាសផូងនៃលែៈតឹមល៝ក់ដាសពាង់។
២១ មពោលឆើមកើលជានការអីឆាក់កុយ្សតៃទូមល៝ម់នតូទាកជឹត យើនមាផូងច្យាប់តឹមល៝ក់ដាសពាង់ដ៝ង់ នទ្រីអីឆាក់តេៈរាញានតូទាកនៃ «ឆិតនា» គែសនាវខ្លៃលាស«តឹមរាទ៝ង់»។
២២ ជេសរីពាង់ទូនតុកអេង ពាង់កុយ្សតៃទូមល៝ម់នតូទាកជឹត នតូទាកនៃមោហោមអោសឆៃឞូតឹមពីត នទ្រីទឹងពាង់តេៈរាញានតូទាកនៃ «រេហោបោត» គែសនាវខ្លៃលាស«ហ្វី» ពាង់លាស៖ “អាបៃអ្យាឞ្រាសយេហោវាលែៈអ៝ន់នតុកហ្វីមាហេនជេស អ៝ន់ហេនគែសទ្រាប់នទើនទ្រ៝ង់តាឞ្រីអ្យា”។
២៣ ជេសរីពាង់ទូឞើសនតុកនៃហាន់គុតាប៝នបេរឆេបា។
២៤ តាមាង់នៃឞ្រាសយេហោវាតឹមមពើលមាពាង់ លាសមាពាង់កើតនអា៖ “មៃលើយអោសក្លាច យ៝រលាសគ៝ប់គុនទ្រែលមៃ គ៝ប់អ្យាអីឞ្រាសអាឞ្រាហាម់ ឞឹមៃយើកមឞាសនើស គ៝ប់អ៝ន់គែសជេងមាមៃ គ៝ប់ជានអ៝ន់មៃគែសក៝នគែសឆៅឞឹករឹ យ៝រលាសអាឞ្រាហាម់ នើសអីឞូនុយ្សឆើមកើលជានការមាគ៝ប់”។
២៥ ជេសរីពាង់ជានទូនតុកមាជានឞ្រាសតានតុកនៃ ពាង់យើកមឞាសឞ្រាសយេហោវាតានតុកនៃ។ ពាង់តេៈចូនឞ៝កពាង់នើមគុតានតុកនៃ ជេសរីមពោលឆើមកើលជានការពាង់កុយ្សនតូទាកតានតុកនៃដ៝ង់។
២៦ គែសទូនារកាដាច់អាបីមាលិចហាន់ម៝ប់អីឆាក់ ហាន់នទ្រែលពាង់គែសអាហូឆាតជេងឞូនុយ្សកើលពាង់ នទ្រែលមាផីកុលជេងកោរាញតាហែនពាង់ដ៝ង់។
២៧ អីឆាក់លាសមាកាដាច់នៃ៖ “ម៝សនាវខាន់មៃហោមអុចហាន់ម៝ប់គ៝ប់ យ៝រលាសខាន់មៃលែៈឞ្យាញ់មព្រើសគ៝ប់”។
២៨ កាដាច់អាបីមាលិចលាសមាអីឆាក់៖ “លែៈហេនគឹតឞ្រាសយេហោវាគុនទ្រែលមៃងាន់ កើតនទ្រីហេនមឹន ហេនអុចអ៝ន់ឞ៝ន់តឹមត៝នតឹមរាង្លាប់នទ្រែល។
២៩ អ៝ន់មៃត៝នមាហេន មៃមោលើសអ្យើសមាហេន កើតហេនមោលើសអ្យើសមាមៃ ជាននទើអ្វែសទើមមាមៃ លែៈអ៝ន់មៃឆឹតដាប់មពាន់នើស អាបៃអ្យាមៃលែៈឞ្រាសយេហោវាទែអ៝ន់គែសជេងដ៝ង់”។
៣០ អីឆាក់នទ្រាប់ញេតឆាក្វ៝ង់អ៝ន់មាកាដាច់ នទ្រែលមាលែៈផូងអីហាន់នទ្រែលពាង់នៃ ជេសរីខាន់ពាង់ញេតឆោងឆានទ្រែលតារីទាទេ។
៣១ ត៝ត់អោយតៃ ខាន់ពាង់ទ៝ក់អើមអោយតឹមត៝នឞាល់ ជេសរីអីឆាក់ញជុនកាដាច់អាបីមាលិច នទ្រែលមាផូងអីហាន់នទ្រែលពាង់នៃឆឹត ខាន់ពាង់ឆឹតដាប់មពាន់។
៣២ តានារនៃដ៝ង់ មពោលឆើមកើលជានការមាអីឆាក់ហាន់មឞើសមាពាង់នតូទាកអីខាន់ពាង់មហែកុយ្សនៃនើស ខាន់ពាង់លាស៖ “នតូហេនកុយ្សនើសលែៈគែសទាក”។
៣៣ អីឆាក់តេៈរាញានតូទាកនៃ «ឆីបា» គែសនាវខ្លៃលាស«នាវត៝ន» នទ្រីទឹងឞូនតើប៝ននៃ «បេរឆេបា» គែសនាវខ្លៃលាស«នតូទាកត៝ន» នហ៝មាត៝ត់អាបៃអ្យា។
៣៤ ត៝ត់អេឆាវលែៈគែស ៤០ នាម់ ពាង់ឆ៝ៈអូរឞារឞើសផូងហេត ទូហ្វេរាញាយូដីតអីក៝នបេរី អីទូហ្វេរាញាបាសមាតអីក៝នអេលោន។
៣៥ លែៈឞូអូរឞារហៃនៃជានអ៝ន់អីឆាក់ នទ្រែលមារេបេការាង៝តងាន់។