នាវកោរាញឞ្រាសងើយតានាវងើយឞូន៝ង ឆ៝ម់បុតនាវនតើម 36

១ អ្យានាវងក៝ចយៅមាផូងក៝នឆៅអេឆាវ ឞូក្វាល់ពាង់ជេងអេដ៝ម់ដ៝ង់។* ២ អេឆាវឆ៝ៈអូរតាក៝នឞូអូរឞ្រីកានាន តានៃគែសអាដាអីក៝នអេលោនជេងផូងហេត គែសអោហោលីបាមាអីក៝នអានាអីឆៅឆីបៀនជេងផូងហីវី* ៣ នទ្រែលមាបាសមាតអីក៝នអីសមាអែល ជេងអីអ៝សនេបាយោត។* ៤ អាដាឞាៈអេលីផាសមាអេឆាវបាសមាតឞាៈរេហូល ៥ ជេសរីអោហោលីបាមាឞាៈយេអុស ឞាៈយាលាម នទ្រែលមាឞាៈកោរា។ ទឹងលែៈផូងនៃជេងក៝នឞូក្លោអេឆាវទែសតាឞ្រីកានាន។

៦ អេឆាវលែវអូរលែវក៝នពាង់ លែវទឹងលែៈឞូនុយ្សអីគុនទ្រែលពាង់ នទ្រែលមាមពោមពា(ឆ្យុម)ផូងពាង់ នអ៝ប់មាទឹងលែៈទ្រាប់នទើពាង់គែសទោលពាង់គុតាឞ្រីកានាននៃ ជេសរីពាង់ហាន់គុតាឞ្រីអេងជឹត ជេងតឹមបាសងាយដាសមាយាកោបអីអ៝សពាង់នើម។ ៧ ទឹងពាង់ហាន់កើតនៃ យ៝រលាសខាន់ពាង់នទ្រ៝ង់ងាន់ មពោមពា(ឆ្យុម)ផូងឞារហៃខាន់ពាង់នៃមោអោសត៝ង់មាគុនតុកនៃ កើតនទ្រីខាន់ពាង់គុនទ្រែលមោជេងអោស។* ៨ ជេសរីអេឆាវគុរ៝ៈយោកឆេអីរ។ អេឆាវនៃគែសរាញាអេដ៝ម់ដ៝ង់។

៩ អ្យាជេងមឞើសងក៝ចរាន៝យទែសផូងក៝នឆៅអេឆាវ ជេងចែតើមមាផូងអេដ៝ម់គុរ៝ៈឞ្រីយោកឆេអីរ។ ១០ គែសរាញាឆាក់ផូងក៝នឆៅឞូក្លោអេឆាវ៖ តានៃគែសអេលីផាសក៝នអាដាអូរអេឆាវ។ រេហូលក៝នបាសមាតអូរអេឆាវ។ ១១ អ្យាជេងផូងក៝នអេលីផាស៖ តានៃគែសថេមាន គែសអោមារ គែសឆេផោ គែសកាថាម នទ្រែលមាកេនាស។ ១២ អេលីផាសក៝នអេឆាវ ពាង់គែសអូរចោងរាញាថិមនាថិមនានៃទែសអាមាលេក។ ទឹងលែៈផូងនៃជេងក៝នអាដាអូរអេឆាវ។ ១៣ អ្យាជេងផូងក៝នឞូក្លោរេហូល៖ តានៃគែសនាហាត គែសឆេរាស គែសឆាម់មា នទ្រែលមាមីឆា។ ទឹងលែៈផូងនៃជេងក៝នឆៅបាសមាតអូរអេឆាវដ៝ង់។ ១៤ អ្យាជេងផូងក៝នឞូក្លោអោហោលីបាមាអីអូរអេឆាវក៝នអានាឆៅឆីបៀន៖ ពាង់ឞាៈក៝ន តានៃគែសយេអុសយាលាម នទ្រែលមាកោរា។

១៥ អ្យាជេងមពោលកោរាញតាផូងក៝នឆៅអេឆាវ។ ជេសរីមពោលកោរាញតាផូងក៝នឆៅអេលីផាសក៝នទាកឞោកអេឆាវ៖ តានៃគែសថេមាន គែសអោមារ គែសឆេផោ គែសកេនាស‌ ១៦ គែសកោរា គែសកាថាម នទ្រែលមាអាមាលេក។ ទឹងលែៈមពោលកោរាញនៃជេងក៝នអេលីផាសតាឞ្រីអេដ៝ម់ ជេងក៝នឆៅអាដាទាទេ។ ១៧ អ្យាជេងមពោលកោរាញតាផូងក៝នឆៅរេហូលក៝នអេឆាវ៖ តានៃគែសនាហាត គែសឆេរាស គែសឆាម់មា គែសមីឆា។ ទឹងលែៈមពោលកោរាញនៃជេងក៝នរេហូលតាឞ្រីអេដ៝ម់ ជេងក៝នឆៅបាសមាតអូរអេឆាវ។

១៨ អ្យាជេងមពោលកោរាញតាផូងក៝នឆៅអោហោលីបាមាអូរអេឆាវ៖ តានៃគែសយេអុស គែសយាលាម នទ្រែលមាគែសកោរា។ ទឹងលែៈមពោលកោរាញនៃជេងក៝នឆៅអោហោលីបាមាអូរអេឆាវ ក៝នអានា។ ១៩ ទឹងលែៈមពោលនៃជេងក៝នឆៅអេឆាវ នទ្រែលមាជេងកោរាញខាន់ពាង់។ អេឆាវនៃពាង់រាញាអេដ៝ម់ដ៝ង់។

២០ អ្យាជេងមពោលក៝នឞូក្លោឆេអីរផូងហោរីអីគុតាឞ្រីអេដ៝ម់នៃ៖ តានៃគែសលោថាន គែសឆោបាល គែសឆីបៀន គែសអានា‌* ២១ គែសដីឆ៝ន គែសអេឆើរ នទ្រែលមាដីឆាន។ ទឹងលែៈមពោលកោរាញនៃជេងក៝នឆៅឆេអីរផូងហោរីតាឞ្រីអេដ៝ម់ទាទេ។ ២២ ក៝នឞូក្លោលោថាន៖ តានៃគែសហោរី នទ្រែលមាហេមាម។ ជេសរីអីអ៝សឞូអូរលោថានរាញាថិមនា។ ២៣ អ្យាជេងមពោលក៝នឞូក្លោឆោបាល៖ តានៃគែសអាលវាន គែសមានាហាត គែសអេបាល គែសឆេផោ នទ្រែលមាអោនាម។ ២៤ អ្យាជេងមពោលក៝នឞូក្លោឆីបៀន៖ តានៃគែសអៃយា នទ្រែលមាអានាអានាអ្យាឆៃទាកតូតាឞ្រីរាទាស ទាកអីនៃទោស ទោលពាង់ច្យាប់ឆែសលៀឆីបៀនឞឹពាង់នើម។ ២៥ អ្យាជេងមពោលក៝នអានា៖ តានៃគែសដីឆ៝ន នទ្រែលមាអោហោលីបាមាជេងក៝នឞូអូរ។ ២៦ អ្យាជេងមពោលក៝នឞូក្លោដីឆ៝ន៖ តានៃគែសហែមដាន គែសអែសបាន គែសយិតរាន នទ្រែលមាកេរាន។ ២៧ អ្យាជេងមពោលក៝នឞូក្លោអេឆើរ៖ តានៃគែសបិលហាន គែសឆាវាន នទ្រែលមាអាកាន។ ២៨ អ្យាជេងមពោលក៝នឞូក្លោដីឆាន៖ តានៃគែសអុស នទ្រែលមាអារាន។ ២៩ អ្យាជេងមពោលកោរាញតាផូងហោរី៖ តានៃគែសលោថាន គែសឆោបាល គែសឆីបៀន គែសអានា‌ ៣០ គែសដីឆ៝ន គែសអេឆើរ នទ្រែលមាដីឆាន។ ទឹងលែៈមពោលនៃជេងកោរាញមាផូងហោរីតាឞ្រីឆេអីរ។

៣១ នោកផូងក៝នឆៅអីឆ្រាអែលមោហ៝ៈអោសគែសកាដាច់ម៝ត់អ្វាញ់ អ្យាជេងមពោលកាដាច់លែៈគែសតាឞ្រីអេដ៝ម់៖ ៣២ បេលាក៝នបេអ៝រពាង់ជេងកាដាច់ម៝ត់អ្វាញ់ឞ្រីអេដ៝ម់ គុតាប៝នដីនហាបា។ ៣៣ ត៝ត់លែៈខឹតបេលា គែសយោបាបក៝នឆេរាសតាៈឞើសប៝នបោសរាពាង់ត្រ៝ៈជេងកាដាច់។ ៣៤ ត៝ត់លែៈខឹតយោបាប គែសហូឆាមតាៈឞើសឞ្រីផូងថេមានពាង់ត្រ៝ៈជេងកាដាច់។ ៣៥ ត៝ត់លែៈខឹតហូឆាម គែសហាដាតក៝នបេដាតពាង់ត្រ៝ៈជេងកាដាច់ រាញាប៝នពាង់អាវីត កាដាច់អីនៃតឹមលើសដាសផូងមីដៀនតាឞ្រីមោអាប់ទើយពាង់។ ៣៦ ត៝ត់លែៈខឹតហាដាត គែសឆាម់លាតាៈឞើសប៝នមាសរេកាពាង់ត្រ៝ៈជេងកាដាច់។ ៣៧ ត៝ត់លែៈខឹតឆាម់លា គែសឆោលតាៈឞើសប៝នរេហោបោតទាច់ដាសទាករាលាយអើប្រាត*ពាង់ត្រ៝ៈជេងកាដាច់។ ៣៨ ត៝ត់លែៈខឹតឆោល គែសបាលហានានអីក៝នអាសប៝រពាង់ត្រ៝ៈជេងកាដាច់។ ៣៩ ត៝ត់លែៈខឹតបាលហានានអីក៝នអាសប៝រ គែសហាដារពាង់ត្រ៝ៈជេងកាដាច់ រាញាប៝នពាង់ពាវ។ រាញាអូរកាដាច់នៃ មហេថាបែលអីក៝នមាតរេត អីឆៅមេឆាហាប។

៤០ អ្យាជេងរាញាមពោលកោរាញតាផូងក៝នឆៅអេឆាវ តឹងនទុលមពោលខាន់ពាង់នើម តឹងឞ្រីខាន់ពាង់នើមគុ៖ តានៃគែសថិមនា គែសអាលវា គែសយេថេត ៤១ គែសអោហោលីបាមា គែសអេលា គែសពីនោន ៤២ គែសកេនាស គែសថេមាន គែសមិបឆារ‌ ៤៣ គែសមាក់ដៀល នទ្រែលមាអីរាម។ ទឹងលែៈមពោលនៃជេងកោរាញមាផូងអេដ៝ម់ តឹងនតុកខាន់ពាង់គុ តឹងឞ្រីខាន់ពាង់គុ អេឆាវអ្យាជេងចែតើមមាផូងអេដ៝ម់នៃ។