នាវកោរាញឞ្រាសងើយតានាវងើយឞូន៝ង ឆ៝ម់បុតនាវនតើម 47

១ យោឆែបហាន់មឞើសងក៝ចមាកាដាច់ផារ៝ន៖ “ឞឹគ៝ប់ នទ្រែលមាអ៝សនោគ៝ប់ ខាន់ពាង់លែៈលោសតាៈឞើសឞ្រីកានាន លែវនអ៝ប់មានទ្រោក មាឞែឞ្យាប់ នទ្រែលមាទឹងលែៈនទើខាន់ពាង់គែស អាបៃអ្យាខាន់ពាង់លែៈត៝ត់តាឞ្រីកោឆែន”។ ២ យោឆែបលែវអ៝សនោពាង់ព្រាម់នុយ្សហាន់ម៝ប់កាដាច់ផារ៝ន។ ៣ ផារ៝នអោបខាន់ពាង់៖ “ម៝សនទើខាន់មៃវៃជាន?” ខាន់ពាង់អើស៖ “អើកោរាញ ហេនជេងផូងច្យាប់កើតផូងចែហេនកាល់អែនើសដ៝ង់”។* ៤ ខាន់ពាង់ងើយតៃមាកាដាច់៖ “អើកោរាញ ហេនទាន់គុតាឞ្រីអ្យាទូប្ល៝ត់ យ៝រលាសតាឞ្រីកានានគែសនាវជីង៝តក្វ៝ង់ រេបជាមាអ៝ន់មពោមពា(ឆ្យុម)ឆាមោហោមគែសដ៝ង់។ កើតនទ្រីហេនទាន់មៃរ៝មហេនអ៝ន់ហេនគុតាឞ្រីកោឆែន”។ ៥ ផារ៝នលាសមាយោឆែប៖ “ឞឹមៃ នទ្រែលមាអ៝សនោមៃលែៈត៝ត់តាមៃ។ ៦ អ៝ន់មៃកើយ្សឞ្រីអីអ្វែសរាលាវឞូអ៝ន់មាឞឹមៃ នទ្រែលមាអ៝សនោមៃ ម៝សឞ្រីអីមៃអុច លាសមៃអុច អ៝ន់ខាន់ពាង់គុតាឞ្រីកោឆែននៃទោ។ តាផូងខាន់ពាង់អីនៃឞូម៝សមៃឆៃអីឞ្លាវ អ៝ន់ពាង់ជានកោរាញម៝ត់អ្វាញ់មាមពោមពា(ឆ្យុម)គ៝ប់នើមដ៝ង់”។

៧ ជេសរីយោឆែបលែវឞឹពាង់ហាន់ម៝ប់កាដាច់ផារ៝នដ៝ង់ យាកោបទាន់នាវគែសជេងកោរាញឞ្រាសអ៝ន់មាផារ៝ន។ ៨ ផារ៝នអោបយាកោប៖ “ទាសអ៝ក់នាម់មៃចែ?” ៩ យាកោបមឞើសងក៝ចមាកាដាច់ផារ៝ន៖ “នាម់គ៝ប់គុរេសអាបៃអ្យាលែៈគែស ១៣០ នាម់។ នាម់គ៝ប់ដេៈទើម នាវរេសគ៝ប់មោគែសនាវអ្វែសដ៝ង់ គ៝ប់រេសមោអោសជ៝ៈជ៝ងកើតផូងចែគ៝ប់”។ ១០ យាកោបទាន់នាវគែសជេងកោរាញឞ្រាសអ៝ន់មាផារ៝នទូតឹជឹត ជេសរីពាង់លោសឞើសនតុកនៃ។ ១១ ជេសរីយោឆែបអ៝ន់នែសទុតអ្វែសតាឞ្រីអេឆីប អ៝ន់មាឞឹពាង់ នទ្រែលមាអ៝សនោពាង់ ជេងនទើមាខាន់ពាង់នើម ពាង់អ៝ន់ខាន់ពាង់គុតាឞ្រីកោឆែនទាច់កេងប៝នរាម់ឆែស កើតនាវផារ៝នទែលាស។ ១២ យោឆែបម៝ត់ឆ្យាម់ឞឹពាង់ នទ្រែលមាអ៝សនោពាង់ នអ៝ប់មាទឹងលែៈឞូនុយ្សគុតារានាក់វ៝ល់ខាន់ពាង់រី តឹងអ៝ក់ឞូនុយ្សខាន់ពាង់។

១៣ នាវជីង៝តក្វ៝ង់ហោងាន់ លាមឞ្រីទាកមោអោសគែសព្យាង់ឆោង ឞូនុយ្សតាឞ្រីអេឆីប នទ្រែលមាតាឞ្រីកានានគែសនាវជេរជ៝ត់ហោងាន់ យ៝រមាជីង៝តក្វ៝ង់អីនៃ។ ១៤ យោឆែបលែៈតាច់ឞាអ៝ន់មាឞ្រីអេឆីប នទ្រែលមាឞ្រីកានាន ពាង់រាគូមទឹងលែៈព្រាក់តាច់ឞាអីនៃ ជេសរីញជុនតាជៃកាដាច់ផារ៝ន ត៝ត់មាមោហោមអោសគែសព្រាក់តាទឹងលែៈឞ្រីអីនៃ។ ១៥ ព្រាក់មារាវាត់ឞាមោហោមអោសតាឞ្រីអេឆីប នទ្រែលមាតាឞ្រីកានានលែៈផ្យៅ ទឹងលែៈផូងប៝នលានអេឆីប ខាន់ពាង់ហាន់ម៝ប់មាយោឆែបទាទេ ងើយដាសពាង់៖ “ទាន់មៃអ៝ន់ព្យាង់ឞាមាហេន លាសមៃមោអ៝ន់ ហេនខឹតតានាប់មៃងាន់រ៝ យ៝រលាសហេនមោហោមគែសព្រាក់មារាវាត់”។ ១៦ យោឆែបអើសមាខាន់ពាង់៖ “លាសខាន់មៃមោហោមគែសព្រាក់ ខាន់មៃអ៝ន់មពោមពា(ឆ្យុម)ខាន់មៃមាគ៝ប់ តៃគ៝ប់អ៝ន់ព្យាង់ឞាមាខាន់មៃឆោង”។ ១៧ ជេសរីខាន់ពាង់លែវមពោមពា(ឆ្យុម)ខាន់ពាង់នើមអ៝ន់មាយោឆែបយោឆែបអ៝ន់ព្យាង់ឞាមាខាន់ពាង់ តឹមរាគ៝ល់ដាសឆែស ដាសឞែឞ្យាប់ ដាសនទ្រោក ដាសឆែសលៀ។ យោឆែបអ៝ន់ព្យាង់ឞាមាខាន់ពាង់នាម់នៃ តឹមរាគ៝ល់ដាសមពោមពា(ឆ្យុម)ខាន់ពាង់។ ១៨ នាម់នៃលែៈលោចជេស លាប់នាម់អេង ខាន់ពាង់ហាន់ម៝ប់តៃយោឆែបទូតឹជឹត ខាន់ពាង់ងើយដាសពាង់៖ “អើកោរាញ ហេនទាន់មឞើសងក៝ចមាមៃ ហេនមោអោសពោនម៝ ព្រាក់តាឆាក់ហេនលែៈផ្យៅ មពោមពា(ឆ្យុម)ហេនលែៈហេនញជុនអ៝ន់មៃលែៈផ្យៅដ៝ង់ ហេនមោហោមអោសគែសនទើទូនតីល ហោមអែនែស នទ្រែលមាឆាក់ហេននើមទូរីទើមហោម។ ១៩ អើកោរាញ គៃមាហេនហោមរេស ទាន់មៃរាវាត់នែសហេន នទ្រែលមាឆាក់ហេននើមតឹមរាគ៝ល់ដាសព្យាង់ឞាមៃនៃ អ៝ន់ហេនគុជានទឹកផារ៝ន នទ្រែលមានែសហេនអ៝ន់ជេងទ្រាប់នទើពាង់ យ៝រលាស លាសហេនខឹតលែៈផ្យៅនែសហេននៃឞូម៝សមានទើន? ទាន់កោរាញអ៝ន់ឞានតីលមាហេន គៃមាហេនហោមរេស មោខឹត លើយអោសអ៝ន់ឞ្រីទាករាង៝តរាងាត់”។

២០ យោឆែបរាវាត់លែៈផ្យៅនែសតាឞ្រីអេឆីប អ៝ន់មាកាដាច់ផារ៝ន ទឹងលែៈផូងអេឆីប តាច់នែសមីរខាន់ពាង់នើមយ៝រមានាវជីង៝តក្វ៝ង់អីនៃលើមាហោងាន់ កើតនទ្រីនែសលាមឞ្រីអីនៃជេងនែសផារ៝នទាទេ។ ២១ ជេសរីទឹងលែៈផូងប៝នលានលាមឞ្រីអេឆីប នៃជេងទឹកទាទេ។ ២២ នែសផូងឞូនុយ្សជានឞ្រាសទើមយោឆែបមោរាវាត់ យ៝រលាសផូងអីនៃគែសផារ៝នឆើមអ៝ន់ព្យាង់ឞា កើតនទ្រីទឹងនែសខាន់ពាង់មោតាច់។

២៣ យោឆែបលាសមាផូងប៝នលាន៖ “នារអ្យាលែៈគ៝ប់រាវាត់ជេសឆាក់ខាន់មៃនើម នទ្រែលមានែសខាន់មៃអ៝ន់មាកាដាច់ផារ៝ន។ អាបៃអ្យាគ៝ប់អ៝ន់នតីលឞាមាខាន់មៃ ខាន់មរែមាតូចតាម់។ ២៤ ត៝ត់ខៃលែៈកាច់លែៈរែកតៃ ខាន់មៃអ៝ន់ទូកោៈតឹមព្រាម់(១/៥)មាផារ៝ន ជេសរីព្វាន់កោៈមាខាន់មៃនើម គៃមាគែសនតីល នទ្រែលមានទើឆោងឆាមាខាន់មៃនើម មាអ៝សក៝នខាន់មៃ នអ៝ប់មាឞូនុយ្សគុតាញីសជៃខាន់មៃដ៝ង់”។ ២៥ ផូងប៝នលានលាសមាយោឆែប៖ “មៃលែៈរាក្លាយ្សនាវរេសផូងហេន។ លាសមៃអុច តៃហេនគុជានទឹកមាផារ៝ន”។ ២៦ យោឆែបអ៝ន់នាវវៃតាឞ្រីអេឆីប នហ៝មាត៝ត់អាបៃអ្យា ដាៈផូងអេឆីប អ៝ន់មាផារ៝នទូកោៈតឹមព្រាម់នទើខាន់ពាង់គែសតាៈឞើសនែសនៃ នែសផូងឞូនុយ្សជានឞ្រាសទើមមោជេងនទើផារ៝ន។*

២៧ ផូងអីឆ្រាអែលគុរេសតាឞ្រីអេឆីប ខាន់ពាង់គុតានតុកកោឆែន គែសនែសតានតុកនៃ ខាន់ពាង់ឞាៈអ៝សឞាៈក៝នអ៝ក់ឞឹករឹងាន់តានតុកនៃ។ ២៨ យាកោបគុរេសតាឞ្រីអេឆីប គែស ១៧ នាម់។ ទឹងលែៈនាម់ពាង់រេសគែស ១៤៧ នាម់។ ២៩ ត៝ត់អីឆ្រាអែលអីឞូក្វាល់យាកោបដ៝ង់ ឞើយមាខឹត ពាង់ក្វាល់ក៝នពាង់យោឆែប នតិញមាពាង់៖ “អើនោ លាសមៃរ៝ង់មាគ៝ប់ មៃតេៈតីមៃអីនៃតាន៝ម់តឹមឞ្លូគ៝ប់អ្យា នអ៝ប់មាត៝ន អ៝ន់មៃជានអ្វែស ជានឆ៝ង់មាគ៝ប់ មៃលើយអោសត៝ប់គ៝ប់តាឞ្រីអេឆីប អ្យា!* ៣០ មៃត៝ប់គ៝ប់តានតុកត៝ប់ផូងចែគ៝ប់ មៃរាទែងគ៝ប់លោសឞើសឞ្រីអេឆីប អ្យា ជេសរីត៝ប់គ៝ប់តានតុកមោចផូងចែគ៝ប់នើម”។ យោឆែបអើសមាពាង់៖ “តៃគ៝ប់ជានកើតនាវមៃលាសឞឹ”។* ៣១ យាកោបលាសតៃមាពាង់៖ “លាសនទ្រីមៃត៝នមាគ៝ប់” នទ្រីយោឆែបត៝នមាពាង់។ ជេសរីយាកោបអីឞូក្វាល់អីឆ្រាអែលដ៝ង់យើកមឞាសកោរាញឞ្រាសតាឞោកឞិចពាង់នើមរី។