11
នាវញឆីង
1 លាសឞ៝ន់ញឆីងមាកោរាញឞ្រាស ឞ៝ន់ញអោតទុតន៝ប់មានទើអីឞ៝ន់រានើមមរាគែសងាន់រ៝ ជេសរីឞ៝ន់គឹតនហេលនានេៈងាន់ នទើអីឞ៝ន់អ្វាញ់មោឆៃ យើនមាគែសងាន់។
2 ផូងអូចែឞ៝ន់កាល់អែនើសគែសនាវញឆីងមាកោរាញឞ្រាស នទ្រីទឹងកោរាញឞ្រាសរានេខាន់ពាង់។
3 យ៝រមាឞ៝ន់ញឆីង ឞ៝ន់គឹតទឹងលែៈនទើគែសញជេង ជេងតាៈឞើសនាវងើយកោរាញឞ្រាសនើម។ កើតនទ្រីទឹងលែៈនទើអីឞ៝ន់អ្វាញ់ឆៃអ្យា មោអោសទីគែសឞើសនទើអីលែៈឆៃ។
4 យ៝រមានាវញឆីង ទឹងនទើជានឞ្រាសអាបែល ញហើរមាកោរាញឞ្រាស កោរាញឞ្រាសឆ៝ៈទើន តីសមានទើជានឞ្រាសកាអីន អីនោអាបែល នើស កោរាញឞ្រាសមោអោសឆ៝ៈទើន។ យ៝រមានាវញឆីងអីនៃកោរាញឞ្រាសរានេអាបែល កើបពាង់ជេងឞូនុយ្សឆ៝ង់។ ជេសរីកោរាញឞ្រាសរានេមានទើញហើរពាង់។ នទ្រីនាវញឆីងពាង់នៃអ៝ន់ឞ៝ន់ហោមកាសគឹតមានាវខ្លៃតានាវញឆីង ឞ៝លលាសពាង់លែៈខឹតកាដោយ។
5 យ៝រមានាវញឆីង ទឹងកោរាញឞ្រាសពឺហេនុក ហាវតាកាលើត្រោកអីនតុកកោរាញឞ្រាសនើម ពាង់មោខឹតអោស ឞូមោហោមឆៃពាង់ដ៝ង់ យ៝រលាសលែៈកោរាញឞ្រាសទែពឺ។ លែៈគែសញចីសតានាវកោរាញឞ្រាសងើយលាស អេល៝រមាកោរាញឞ្រាសពឺពាង់ហាវតាកាលើ កោរាញឞ្រាសរាម់មាពាង់។
6 ឞូនុយ្សអីមោអោសគែសនាវញឆីង កោរាញឞ្រាសមោអោសរាម់។ ឞូនុយ្សអីហាន់អាកោរាញឞ្រាស អ្យាត់មាញឆីងលាសគែសកោរាញឞ្រាសងាន់ ជេសរីញឆីងកោរាញឞ្រាសអ៝ន់នទើងខោមមាឞូម៝សអីជ៝យពាង់។
7 យ៝រមានាវញឆីង នោអេ ជានទូមល៝ម់ទូកទុតក្វ៝ង់គៃមារាក្លាយ្សរានាក់វ៝ល់ពាង់នើមឞើសទាកលេងទាកទើង ពាង់ក្លាចយើក ពាង់អ្យាត់ងាន់នាវកោរាញឞ្រាសមឞើសងក៝ចអ៝ន់ពាង់គឹតល៝រ ជេសរីជានតឹង ឞ៝លលាសអេហ៝ៈឆៃនាវអីមឞើសងក៝ចនៃកាដោយ។ នាវពាង់ញឆីងកើតនៃ ញហើទីមាកោរាញឞ្រាសតេៈទោយ្សទឹងលែៈឞូនុយ្សតានែសនតូ យ៝រលាសខាន់ពាង់មោអោសញឆីងមានាវនោអេ មឞើសងក៝ច ជេសរីកោរាញឞ្រាសកើបនោអេ ជេងឆ៝ង់យ៝រនាវពាង់ញឆីង។
8 យ៝រមានាវញឆីង អាឞ្រាហាម់ អ្យាត់នាវកោរាញឞ្រាសដាៈ នោកកោរាញឞ្រាសដាៈពាង់លោសឞើសឞ្រីពាង់នើមហាន់ជឹតឞ្រីអេង ឞ៝លលាសពាង់មោអោសគឹតនតុកឞ្រីពាង់ហាន់ កោរាញឞ្រាសមានមាមឞើសងក៝ចមរាអ៝ន់ឞ្រីអាអេងមាពាង់ជេងនទើពាង់នើម ងក្រែមាត៝ត់ក៝នត៝ត់ឆៅពាង់។
9 យ៝រមានាវញឆីង ពាង់គុតាឞ្រីនតុកកោរាញឞ្រាសលែៈជេសត៝នអ៝ន់មាពាង់ ពាង់គុតាចូនឞ៝ក តឹមឞានមាគុវែសឞិចតាឞ្រីឞូអេង យ៝រលាសកោរាញឞ្រាសអេហ៝ៈអ៝ន់ងាន់ឞ្រីទាកអីនៃមាពាង់ យើនមាពាង់ញឆីងងាន់កោរាញឞ្រាសមរាអ៝ន់ជឹតនាប់តៃ។ ក៝នពាង់អីឆាក់ នទ្រែលមាយាកោប អីឆៅពាង់ហោមគុតាចូនឞ៝កគែសនាវញឆីងកើតនៃដ៝ង់ យ៝រលាសកោរាញឞ្រាសលែៈជេសត៝នអ៝ន់មាខាន់ពាង់ដ៝ង់។
10 អាឞ្រាហាម់ គុកើតនៃយ៝រមាពាង់លែៈគឹតនហេលនានេៈងាន់នារជឹតនាប់តៃពាង់គុតាប៝នអ្វែសតាកាលើអីនហ៝រ៝ អីកោរាញឞ្រាសនើមលែៈនទ្រាប់ លែៈរាទ៝ក់ញជេង។
11 យ៝រមានាវញឆីង ឆារា អីអូរអាឞ្រាហាម់ ហោមឞាៈក៝ន ឞ៝លលាសពាង់លែៈរាញងាន់កាដោយ នអ៝ប់មាជេងឞូអូរមោឞាៈក៝ន។ យ៝រលាសពាង់ញឆីងមានាវកោរាញឞ្រាសលែៈជេសត៝ន ញឆីងមាកោរាញឞ្រាសអីរាប់ជាប់ កោរាញឞ្រាសជានកើតនៃងាន់ដ៝ង់។
12 ជេសរីតាៈឞើសអាឞ្រាហាម់ អីលែៈរាញឞើយមាខឹតនៃ ជេងគែសឞូនុយ្សទូផូងទុតអ៝ក់តឹមឞានមាអ៝ក់មាញ់កាលើត្រោក នទ្រែលមាតឹមឞានមាអ៝ក់ច៝យ្សរាគ៝ៈទាកវាច់ទាកវារ់ មោហោមឞ្លាវកើប។
13 ទឹងលែៈខាន់ពាង់អីនៃខឹតលែៈផ្យៅនអ៝ប់មាហោមគែសនាវញឆីងកើតអើមមរាឆ៝ៈទើននទើកោរាញឞ្រាសលែៈត៝ន ឞ៝លលាសខាន់ពាង់អេហ៝ៈអោសគែសឆ៝ៈទើនតានែសនតូអ្យា។ ខាន់ពាង់មានមាគឹតល៝រនទើអីនៃមរាគែសងាន់ ខាន់ពាង់តឹមឞានមាឆៃនទើអីនៃឞើសងាយ ជេសរីរាម់មអាកនទើអីនៃ។ ខាន់ពាង់ញហើឆាក់ខាន់ពាង់នើមគុរេសតានែសនតូអ្យាជេងតឹមឞានមាឞូនុយ្សឞូនាច់ឞ្រីអេងវែសឞិចទើម។
14 ឞូម៝សអីគុរេសកើតនៃ ជេងញហើពាង់ហោមជ៝យឞ្រីមាពាង់នើម។
15 លាសខាន់ពាង់ហោមងក្ល៝ន់អុចព្លឹឆឹតតៃតាឞ្រីខាន់ពាង់នើមលែៈលោសនៃនើស ខាន់ពាង់ហោមទើយព្លឹ។
16 យើនមាខាន់ពាង់ហោមជ៝យទូនតុកអីអ្វែសរាលាវ ជេងប៝នអ្វែសតាកាលើ។ កើតនទ្រីទឹងកោរាញឞ្រាសមោអោសដីតព្រេងខាន់ពាង់ក្វាល់ពាង់អីឞ្រាសមាខាន់ពាង់ យ៝រលាសលែៈពាង់នទ្រាប់ជេសទូមល៝ម់ប៝នអ៝ន់មាខាន់ពាង់អីនៃគុ។
17 យ៝រមានាវញឆីង អាឞ្រាហាម់ ឆ៝ៈក៝នពាង់នើមអីឆាក់ មាជានឞ្រាសញហើរមាកោរាញឞ្រាស នោកកោរាញឞ្រាសរាល៝ងពាង់។ កោរាញឞ្រាសលែៈអើមត៝នក៝នអីនៃមាពាង់ យើនមាពាង់លែៈអុចញហើរក៝នពាង់នើមអើមង្វាយអឹទើម
18 ឞ៝លលាសកោរាញឞ្រាសលែៈជេសលាសមាពាង់កើតនអា៖ «រាន៝យទែសអ៝ក់អីគ៝ប់ត៝នមាមៃ ជេងតាៈឞើសអីឆាក់ »កាដោយ។
19 ពាង់គឹតកោរាញឞ្រាសទើយជានឞូនុយ្សខឹតអ៝ន់ទ៝ក់រេស ជេសរីពាង់ឆ៝ៈតៃក៝នអីនៃតឹមឞានមាតាៈឞើសខឹត។
20 យ៝រមានាវញឆីង អីឆាក់ មឞើសមាឞារហៃក៝នពាង់នើម យាកោប នទ្រែលមាអេឆាវ កោរាញឞ្រាសមរាអ៝ន់នាវគែសជេងមាខាន់ពាង់តានារជឹតនាប់តៃ។
21 យ៝រមានាវញឆីង យាកោប មឞើសមាឞារហៃអីឆៅជេងអីក៝នយោឆែប កោរាញឞ្រាសមរាអ៝ន់នាវគែសជេងមាខាន់ពាង់តានារជឹតនាប់តៃ នោកនៃយាកោប ឞើយខឹត ពាង់យើកមឞាសកោរាញឞ្រាសនអ៝ប់មាក្វាន់រាទ៝ង់ម៝ង់ជ្រាពាង់នើម។
22 យ៝រមានាវញឆីង យោឆែប នតិញលើយផូងអីឆ្រាអែល មានាវខាន់ពាង់មរាលោសឞើសឞ្រីអេឆីប ដាៈខាន់ពាង់ញអោតនតីងពាង់ដ៝ង់ នោកនៃពាង់ឞើយមាតាច់នហ៝ម់។
23 យ៝រមានាវញឆីង មេៈឞឹមោឆេ ពោនពាង់ជេសគុពាង់ពែខៃ យ៝រមាឆៃពាង់អ្វែសរាម៝ង់ងាន់ មោក្លាចអោសនាវកាដាច់លែៈដាៈអ៝ន់ងខឹតលើយទឹងលែៈអ៝សឞេឞូក្លោ។
24 យ៝រមានាវញឆីង មោឆេ នោកពាង់លែៈនទាម់ ពាង់រាលាច់មោអោសអ៝ន់ឞូក្វាល់ពាង់អីក៝ន ក៝នឞូអូរផារ៝ន អីកាដាច់ផូងអេឆីប ។
25 ពាង់អុចរាលាវឆ៝ៈទើននាវជេរជ៝ត់នទ្រែលផូងអីឆ្រាអែល អីប៝នលានកោរាញឞ្រាសនើម ដាសមាគែសនាវរាម់មអាកគុរេសតានែសនតូទើម។
26 ពាង់អុចនាវឞូមឺចរាម៝តយ៝រមាពាង់ញឆីងកោរាញឞ្រាសមរាដាៈទូហ្វេឞ្រាសក្រីស វាច់តានារជឹតនាប់តៃ រាលាវមាគែសទឹងលែៈទ្រាប់នទើតាឞ្រីអេឆីប យ៝រលាសពាង់គឹតមានទើងខោមកោរាញឞ្រាសមរាអ៝ន់មាពាង់តានារជឹតនាប់តៃ។
27 យ៝រមានាវញឆីង ពាង់ទូលោសឞើសឞ្រីអេឆីប មោក្លាចអោសកាដាច់ជីនូយ្ស ពាង់គុន៝ប់ឞ៝លលាសគែសនាវជេរ តឹមឞានមាអ្វាញ់កោរាញឞ្រាសឆៃ អីឞូនុយ្សអ្វាញ់មោទើយឆៃ។
28 យ៝រមានាវញឆីង ពាង់ដាៈផូងអីឆ្រាអែល ជានបុននហ៝ត នអ៝ប់មាហឹងមហាមតាឞោកមពោងជៃគៃមាលើយអ៝ន់នើមងគ្រ៝សលាប់ងខឹតលើយក៝នឞូក្លោឞោកទាកខាន់ពាង់នើម។
29 យ៝រមានាវញឆីង ផូងប៝នលានអីឆ្រាអែល ហាន់លាប់រ៝ៈទាកវាច់ទាកវារ់ចាង់ តឹមឞានមាហាន់រ៝ៈកើស ល៝ង់ផូងអេឆីប រាល៝ងលាប់ដ៝ង់ តីសមារាម៝កទាកឞុកលែៈផ្យៅ។
30 យ៝រមានាវញឆីង ផូងអីឆ្រាអែល លែវឞាល់ហាន់ជុមប៝នយេរីខោ ពើសនារ ជេសរីមពេរប៝នអីនៃរាល៝ម់លែៈផ្យៅ។
31 យ៝រមានាវញឆីង ឞូអូរវាង់តឹររាញាពាង់រាហាប់ តាប៝នយេរីខោ នៃ មោអោសខឹតរ៝សហេងនទ្រែលផូងប៝នអីនៃអីតឹមរាទ៝ង់ដាសកោរាញឞ្រាស យ៝រលាសពាង់លែៈរ៝មឞារហៃផូងអីឆ្រាអែល អីហាន់អ្វាញ់នតុងតាឞ្រីនៃគៃមានទ្រាប់លើស។
32 គ៝ប់មោហោមអោសទើយមឞើសងក៝ចនាវឞូនុយ្សអេងជឹត មោគែសម៝ងមាមឞើសងក៝ចនាវកេដៀន នាវបារាក់ នាវឆាម់ឆុន នាវយែបថា នាវកាដាច់ដាវីត នាវឆាម់មោអែល នទ្រែលមានាវមពោលឞូនុយ្សនតើយ្សនាវងើយកោរាញឞ្រាស។
33 យ៝រមានាវញឆីង ទឹងលែៈខាន់ពាង់អីនៃគែសនាវទើយអេងៗឞាល់ លែៈទើយតឹមលើសដាសឞ្រីទាកអេងៗ ម៝ត់អ្វាញ់ឞូមានាវឆ៝ង់ ឆ៝ៈទើននទើកោរាញឞ្រាសលែៈត៝ន ហោមរេសឞ៝លលាសគុដាសយៅមុរផូង
34 លែៈញហាត់អុញហីតទុតហោ លែៈក្លាយ្សឞើសមាត់ដាវ លែៈគែសឆ្វានទាង់ទោលមោហោមគែសនហ៝ម់ឆ្វាន លែៈទើយនោកតឹមលើស ជានអ៝ន់ផូងតាហែនផូងរាលាង់ញច្វាត់ចាសច្រាយលែៈផ្យៅ។
35 គែសឞូអូរអាបាៈឆៃអីនទុលមពោលខាន់ពាង់នើមលែៈខឹតនៃលែៈទ៝ក់រេសតៃ។ ឞូនុយ្សអាបាៈឞូជានជេរជ៝ត់ត៝ត់ខឹតយ៝រមាញឆីងមាកោរាញឞ្រាស ខាន់ពាង់មោអោសនត្លើយនាវញឆីងអីនៃគៃមាឞូបើក យ៝រលាសខាន់ពាង់រានើមមរាគែសនាវរេសអីអ្វែសរាលាវជេសទ៝ក់រេសតៃ។
36 ឞូនុយ្សអាបាៈជឹតឞូគើមមឺចរាម៝ត នអ៝ប់មាឞូមឞាងមាម៝ង់រាឆែ ឞូនុយ្សអាបាៈជឹតឞូងកោងតេៈត្រោមនទ្រូង។
37 ឞូនុយ្សអាបាៈឞូងខឹតនតុបមាលុ អាបាៈឞូងខឹតក៝សមារានាតាច់ងគូលឆាក់ អាបាៈឞូងខឹតមាដាវ។ អាបាៈទូទែងគ្លាៈទែងគ្លើត ឆ៝ៈនតោឞែឞ្យាប់ នទ្រែលមានតោឞែទើមញឆ៝សងគូត ក្រ៝អ៝អាចហោងាន់ ឞូតុនជ៝តឞូលើសអ្យើស។
38 ខាន់ពាង់ទាសមាទូទែងគ្លាៈទែងគ្លើតរ៝ៈឞ្រីរាទាស រ៝ៈយោក គុនទែរ៝ៈត្រោមយោកត្រោមនែស។ ផូងឞូនុយ្សអីមោញឆីងមាកោរាញឞ្រាសតានែសនតូអ្យាមោអោសទីមាគុនទ្រែលខាន់ពាង់។
39 កោរាញឞ្រាសរាម់មអាកមាទឹងលែៈឞូនុយ្សអីនៃ យ៝រមានាវខាន់ពាង់ញឆីង យើនមាទឹងលែៈខាន់ពាង់អីនៃមោអោសឆ៝ៈទើននាវអីកោរាញឞ្រាសលែៈត៝ននៃ
40 យ៝រលាសកោរាញឞ្រាសលែៈជេសនទ្រាប់នទើអីអ្វែសរាលាវ នទើអីនៃពាង់អុចអ៝ន់មាឞ៝ន់នទ្រែលខាន់ពាង់ទឹងលែៈមាឞាល់តានារជឹតនាប់តៃ នទ្រីទឹងពាង់ក៝ប់ត៝ត់ឞ៝ន់ទីមាឆ៝ៈទើននទើអីនៃនទ្រែលខាន់ពាង់ដ៝ង់។