២
នាវរាក្លាយ្សទុតខ្លៃហោងាន់
១ កើតនទ្រីទឹងឞ៝ន់គុញជ្រាង់ងាន់ហ៝ៈ អ៝ន់អ្យាត់ងាន់នាវនតុមនតីអីឞ៝ន់លែៈតាង់នៃ ក្លាចលាសជ៝ៈៗនាវអីឞ៝ន់លែៈនតុមនតីនៃលើមារ៝ស។
២ កាល់អែនើសតោងពារ់អាបាៈមឞើសងក៝ចមាមោឆេ នាវវៃផូងអីឆ្រាអែល នើស នាវវៃអីនៃជេងនាវងាន់ទាទេ ជេសរីទឹងលែៈមពោលអីជានរាលាវ មោលាសមោអុចអ្យាត់អោសនាវវៃអីនៃ លែៈគែសតេៈទោយ្សជេសតឹមទីមានាវខាន់ពាង់ជាននើស។
៣ នាវរាក្លាយ្សឞើសនាវតេៈទោយ្ស កោរាញយេឆូ លែៈមឞើសងក៝ចល៝រឞូ ជេសរីផូងអីអ្យាត់នាវអីមឞើសងក៝ចអីនៃ មឞើសនាវអីនៃមាឞ៝ន់។ នាវរាក្លាយ្សអីនៃទុតអ្វែសងាន់ យើនមាលាសឞ៝ន់រាលាច់មោអោសឆ៝ៈទើននាវរាក្លាយ្សអីនៃអីកោរាញយេឆូ នើមលែៈមឞើសមាឞ៝ន់នើស មើមទឹងឞ៝ន់ទើយក្លាយ្សឞើសនាវកោរាញឞ្រាសតេៈទោយ្ស?
៤ គៃមាឞ៝ន់គឹតនាវអីនៃតាៈឞើសកោរាញឞ្រាសងាន់ កោរាញឞ្រាសអ៝ន់នាវមឞេន នទើក្វ៝ង់ នអ៝ប់មានទើទុតនាវងាន់អេងៗ នទ្រែលមាពាៈអ៝ន់ទើមទាមនាវអេងៗតាៈឞើសឞ្រាសហ្វេងអ្វែសអីក្ល៝សអ្វែស តឹងពាង់នើមអុច។
៥ ជឹតនាប់តៃកោរាញឞ្រាសមរាញជេងនែសនតូមហែ ពាង់មោអោសដាៈផូងតោងពារ់ម៝ត់អ្វាញ់នែសនតូមហែអីនៃ។
៦ យើនមាគែសទូហ្វេលែៈគែសញចីសតាទូនតុកតានាវកោរាញឞ្រាសងើយលាសកើតនអា៖
«អើកោរាញឞ្រាស អាមើមឞូនុយ្ស ទឹងមៃហោមមឹនមាពាង់?
ទាសន៝ម់ក្វ៝ង់ក៝នឞូក្លោឞូនុយ្ស ទឹងនូយ្សនហ៝ម់មៃអុចមាពាង់?
៧ មៃជានពាង់គែសនាវទើយតាន៝ម់ផូងតោងពារ់ដេៈទើម
មៃអ៝ន់ពាង់នាវច្រេកលើប នទ្រែលមាអ៝ន់ឞូយើកមាពាង់ តឹមឞានមាអ៝ន់នទោមោកកាដាច់តាពាង់។
៨ មៃដាៈទឹងលែៈរាងោចនទើអ៝ន់គុតាន៝ម់ជ៝ង់ឞូនុយ្សទាទេ»។
លាសកោរាញឞ្រាសអ៝ន់ទឹងលែៈរាងោចនទើគុតាន៝ម់ខាន់ពាង់ មោគែសអោសទូនតីលនទើមោគុតាន៝ម់ពាង់។ យើនមាអាបៃអ្យាឞ៝ន់អេហ៝ៈឆៃទឹងលែៈរាងោចនទើគុតាន៝ម់ពាង់។
៩ យើនមាឞ៝ន់លែៈគឹតមាឞ្រាសយេឆូ កោរាញឞ្រាសទែអ៝ន់ពាង់ជេងជេៈតាន៝ម់ផូងតោងពារ់ទូប្ល៝ត់ទើម។ យ៝រលាសពាង់លែៈឆ៝ៈទើននាវជេរជ៝ត់ត៝ត់ខឹត អាបៃអ្យាកោរាញឞ្រាសលែៈអ៝ន់ពាង់នាវច្រេកលើប នទ្រែលមាអ៝ន់ឞូយើកមាពាង់។ យ៝រមានាវអ្វែសកោរាញឞ្រាសនើម ពាង់ខឹតជេស គៃមានត្រ៝ៈទឹងលែៈរាងោចឞូនុយ្ស។
១០ កោរាញឞ្រាសលែៈរាហាក់ញជេងទឹងលែៈរាងោចនទើ គៃមាទឹងលែៈនទើអីនៃគែសខ្លៃមាពាង់នើម។ ជេសរីពាង់អ៝ន់ឞ្រាសយេឆូ គែសនាវជេរជ៝ត់ តាៈឞើសនាវជេរជ៝ត់អីនៃទឹងឞ្រាសយេឆូ ជេងកោរាញទុតអ្វែសងាន់។ ទីមាកោរាញឞ្រាសជានកើតនៃ គៃមាពាង់ជេងនើមលែវអ៝ក់ឞូនុយ្សគែសនាវច្រេកលើប នអ៝ប់មាគែសនាវរាក្លាយ្សឞើសនាវតេៈទោយ្សយ៝រមានាវតីស។ ផូងឞូនុយ្សអីនៃជេងក៝នពាង់នើម។
១១ ឞ្រាសយេឆូ អីនើមជានអ៝ន់ឞ៝ន់ជេងក្ល៝សអ្វែស នទ្រែលមាផូងឞូនុយ្សអីពាង់លែៈជានអ៝ន់ក្ល៝សអ្វែស គែសទូហ្វេឞឹទើម។ កើតនទ្រីទឹងឞ្រាសយេឆូ មោអោសដីតព្រេងក្វាល់ឞ៝ន់ផូងអ៝សពាង់នើម។
១២ ឞ្រាសយេឆូ លាសមាកោរាញឞ្រាសកើតនអា៖
«គ៝ប់មរាមឞើសងក៝ចមៃអ៝ន់មាផូងអ៝សនោគ៝ប់
គ៝ប់មរាមព្រើរានេមៃតានោកផូងប៝នលានមៃគុរាបុន»។
១៣ ពាង់លាសជឹត៖
«គ៝ប់ញឆីងមាមៃងាន់»
ជេសរីពាង់លាសជឹត៖
«អ្យាគ៝ប់ នទ្រែលមាផូងក៝នអីមៃលែៈអ៝ន់គ៝ប់ម៝ត់អ្វាញ់»។
១៤ យ៝រមាផូងក៝នអីនៃគែសឆាក់ជាន់គែសមហាមឞ្លាវខឹត ទឹងឞ្រាសយេឆូ ឆ៝ៈទើនឆាក់ជាន់កើតឞូនុយ្ស ជេសរីខឹតកើតឞូនុយ្សដ៝ង់ គៃមាតាៈឞើសនាវពាង់ខឹតនៃនើស ពាង់ទើយលើសហេងលើយនើមអីលែវឞូនុយ្សគែសនាវខឹត ជេងឆាតាង់ អីកោរាញមពោលឞ្រាសអ្យើស។ អាបៃអ្យាឆាតាង់អីតើមអ៝ន់ឞូនុយ្សខឹតមោហោមអោសគែសនាវទើយ
១៥ នទ្រីឞ្រាសយេឆូ លែៈរាក្លាយ្សផូងឞូនុយ្សអីហោក្លាចមានាវខឹត យ៝រលាសក្លាចមានាវខឹតទូឞោងនាវរេស។
១៦ ឞ៝ន់លែៈគឹតនហេលជេសឞ្រាសយេឆូ មោអោសវាច់គៃមាកើលផូងតោងពារ់ ពាង់វាច់គៃមាកើលរាន៝យទែសអាឞ្រាហាម់ ។
១៧ លាសនទ្រីកោរាញឞ្រាសអ៝ន់ពាង់ជេងឞូនុយ្សងាន់តឹមឞានមាឞ៝ន់អីផូងអ៝សពាង់ មោគែសទូនតីលតឹមតីសឞាល់ គៃមាពាង់ជេងកោរាញជានឞ្រាសទុតក្វ៝ង់មាឞ៝ន់ គែសនាវយោៈនអាច ឆើមកើលជានការមាកោរាញឞ្រាសអ៝ន់រាប់ជាប់ គៃមាញហើរនទើជានឞ្រាសអីឆ៝ៈលើយទឹងលែៈនាវតីសផូងប៝នលាន ជេសរីកោរាញឞ្រាសមោហោមតេៈទោយ្សមាខាន់ពាង់អីនៃ។
១៨ យ៝រលាសពាង់លែៈម៝ប់ជេសនាវជេរ នអ៝ប់មានាវនទើមនើស នទ្រីទឹងពាង់ឞ្លាវកើលឞូម៝សអីគែសនាវនទើមមោអោសអ៝ន់ឞូនុយ្សអីនៃតុបតានាវនទើម។