2
1 អើផូងអ៝សនោតានាវញឆីងអីតឹមឞានមាក៝នឆៅគ៝ប់ គ៝ប់អុចញចីសទឹងលែៈនាវអ្យាអ៝ន់ខាន់អៃមៃ គៃមាខាន់អៃមៃមោអោសជានតីស។ យើនមាលាសឞូម៝សអីហោមជានតីស ឞ៝ន់លែៈគែសជេសទូហ្វេនើមឆើមកើលក៝សឞ៝ន់តានាប់មាត់កោរាញឞ្រាសឞឹ នើមអីនៃឞ្រាសយេឆូក្រីស អីនើមឆ៝ង់ងាន់។
2 ពាង់នើមលែៈជានឞ្រាសមាឆាក់ពាង់នើម គៃមាច្វាយឞ៝ន់ឞើសនាវអីកោរាញឞ្រាសមរាតេៈទោយ្សយ៝រមានាវតីសឞ៝ន់ ជេសរីមោអោសទើនមាច្វាយឞ៝ន់ទើម នអ៝ប់មាច្វាយទឹងលែៈឞូនុយ្សតានែសនតូអ្យាដ៝ង់។
នាវវៃមហែ
3 លាសឞ៝ន់លែៈញអោតនាវកោរាញឞ្រាសនើមដាៈ នទ្រីមើឞ៝ន់គឹតនហេលនានេៈងាន់លាស ឞ៝ន់លែៈនាល់កោរាញឞ្រាស។
4 ឞូម៝សលាស៖ “គ៝ប់លែៈនាល់កោរាញឞ្រាស” យើនមាមោអោសញអោតនាវពាង់ដាៈ ឞូនុយ្សអីនៃងើយមរោសទើម នាវងាន់មោអោសគុតាឆាក់ពាង់។
5 យើនមាឞូម៝សអីញអោតតឹងនាវកោរាញឞ្រាស នាវរ៝ង់កោរាញឞ្រាសគុតាឞូនុយ្សអីនៃងាន់រ៝។ មើមទឹងឞ៝ន់ទើយគឹតឞ៝ន់លែៈគុនទ្រែលកោរាញឞ្រាស?
6 ឞូម៝សអីលាសឆាក់ពាង់នើមលែៈគុនទ្រែលកោរាញឞ្រាស ជេសរីគុងាវជានតឹងឞ្រាសយេឆូ ងាន់ រីមើឞ៝ន់ទើយគឹតពាង់លែៈគុនទ្រែលកោរាញឞ្រាស។
7 អើផូងអីគ៝ប់រ៝ង់ គ៝ប់មោគែសអោសញចីសនាវដាៈមហែអ៝ន់មាខាន់អៃមៃ គ៝ប់ញចីសនាវដាៈអើម ជេងនាវដាៈអីខាន់អៃមៃលែៈនាល់ឞើសនតើម។ ជេសរីនាវដាៈអើមអីនៃ ដាៈអ៝ន់រ៝ង់មាឞូ ជេងនាវមឞើសងក៝ចអីខាន់អៃមៃលែៈវៃតាង់ជេស។
8 យើនមានាវដាៈអីនៃមហែដ៝ង់។ នាវងាន់តានាវដាៈអីនៃឆៃតាឞ្រាសក្រីស នទ្រែលមាអីឆៃតានាវរេសផូងខាន់អៃមៃដ៝ង់ យ៝រលាសនាវង៝លើមារ៝ស ជេសរីនាវអាងអីងាន់លែៈអាងជេស។
9 ឞូម៝សអីកើបអេងឆាក់ពាង់នើមគុតានាវអាង យើនមាជីឞ្យាញ់មាទូហ្វេអ៝សនោតានាវញឆីង ឞូនុយ្សអីនៃហោមគុតានាវង៝កើតអើម។
10 ឞូម៝សអីរ៝ង់មាអ៝សនោតានាវញឆីង ឞូនុយ្សអីនៃគុតានាវអាង ជេសរីមោគែសអោសនទើលែវអ៝ន់ពាង់ជាននាវតីស។
11 យើនមាឞូម៝សអីជីឞ្យាញ់ដាសមាទូហ្វេអ៝សនោតានាវញឆីង ឞូនុយ្សអីនៃហោមគុតានាវង៝ ជេសរីឞ្រោៈតានាវង៝ នហ៝មាមោគឹតអោសអាសត្រ៝ងមាហាន់ យ៝រលាសនាវង៝លែៈងកុមលើយត្រោមមាត់ពាង់ ពាង់តឹមឞានមាចែសមាត់។
12 អើផូងក៝នឆែ គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ
យ៝រលាសកោរាញឞ្រាសលែៈយោៈជេសនាវតីសខាន់អៃមៃ មោហោមកើបនាវតីសខាន់អៃមៃ យ៝រមាឞ្រាសយេឆូ ។
13 អើផូងឞូរាញអីគែសអ៝សគែសក៝ន គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ
យ៝រលាសខាន់អៃមៃលែៈនាល់ជេសឞ្រាសយេឆូក្រីស អីលែៈអើមគែសឞើសនតើមញជេងនែសនតូនើសងាន់។
អើផូងទ្រោសនទាម់ គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ
យ៝រលាសខាន់អៃមៃលែៈទើយជេសដាសនើមអ្យើស។
14 អើផូងក៝នឆែ គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ
យ៝រលាសខាន់អៃមៃលែៈនាល់ជេសកោរាញឞ្រាសឞឹ។
អើផូងឞូរាញ គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ
យ៝រលាសខាន់អៃមៃលែៈនាល់ជេសឞ្រាសយេឆូក្រីស អីលែៈអើមគែសឞើសនតើមញជេងនែសនតូនើសងាន់។
អើផូងទ្រោសនទាម់ គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ
យ៝រលាសខាន់អៃមៃគែសនហ៝ម់ឆ្វានទាង់
ជេសរីនាវកោរាញឞ្រាសគុតាខាន់អៃមៃ
ខាន់អៃមៃលែៈទើយជេសដាសនើមអ្យើស។
15 លើយអោសរ៝ង់នាវគុងាវឞូនុយ្សអីមោគឹតនាល់កោរាញឞ្រាស នទ្រែលមានទើតានែសនតូអ្យា។ ឞូម៝សអីរ៝ង់នាវគុងាវឞូនុយ្សអីមោគឹតនាល់កោរាញឞ្រាស នាវរ៝ង់កោរាញឞ្រាសឞឹមោអោសគុតាពាង់អីនៃ។
16 តានែសនតូអ្យា គែសនាវនូយ្សនហ៝ម់ឞូនុយ្សកើញជានហោអីរ គែសនាវនូយ្សនហ៝ម់កើញយ៝រមាត្រោមមាត់ឆៃ នទ្រែលមាគែសនាវនហីអេងឆាក់យ៝រមាទ្រាប់នទើពាង់នើម។ ទឹងលែៈនាវអ្យើសអីនៃមោអោសតាៈឞើសកោរាញឞ្រាសឞឹ ជេងតាៈឞើសនាវមឹនអីមោគឹតនាល់កោរាញឞ្រាស។
17 ជេសរីនែសនតូអ្យា នទ្រែលមានាវអុចនាវកើញហោអីរលែៈនតើមរ៝សជេស។ យើនមាឞូម៝សអីជានតឹងនាវកោរាញឞ្រាសនើមអុច មរាហោមគុរេសនហ៝រ៝។
ឞូនុយ្សអីតឹមរាទ៝ង់ដាសឞ្រាសក្រីស
18 អើផូងអ៝សនោតានាវញឆីងអីតឹមឞានមាក៝នឆៅគ៝ប់ អ្យាជេងម៝ងងគ្លែៈទុតអេល៝រមាឞ្រាសយេឆូក្រីស ព្លឹវាច់។ ខាន់អៃមៃលែៈតាង់ជេស គែសទូហ្វេកោរាញអីតឹមរាទ៝ង់ដាសឞ្រាសក្រីស អីវាច់។ ជេសរីអាបៃអ្យាឞូនុយ្សអីតឹមរាទ៝ង់ដាសឞ្រាសក្រីស នៃលែៈអ៝ក់ងាន់វាច់ នទ្រីទឹងឞ៝ន់គឹត អ្យាជេងម៝ងងគ្លែៈទុត។
19 ខាន់ពាង់អីនៃលែៈទូលោសឞើសឞ៝ន់ យើនមាខាន់ពាង់អីនៃលែៈអើមមោអោសទីមពោលឞ៝ន់ងាន់។ លាសខាន់ពាង់ជេងមពោលឞ៝ន់ងាន់ ខាន់ពាង់ហោមគុនទ្រែលឞ៝ន់មរ៝រ៝។ យើនមាខាន់ពាង់លែៈទូលោសជេសឞើសឞ៝ន់ នទ្រីទឹងឞ៝ន់ឆៃខាន់ពាង់មោអោសទីមពោលឞ៝ន់។
20 ល៝ង់ផូងខាន់អៃមៃនៃ លែៈកោរាញឞ្រាសទែអ៝ន់ឞ្រាសហ្វេងអ្វែសគុតាខាន់អៃមៃ ជេសរីទឹងលែៈខាន់អៃមៃលែៈគឹតនាវងាន់ទាទេ។
21 គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ មោទីអោសយ៝រលាសខាន់អៃមៃអេហ៝ៈគឹតនាល់នាវងាន់ យើនមាគ៝ប់ញចីសយ៝រមាខាន់អៃមៃលែៈគឹតនាល់ជេសនាវងាន់ ជេសរីខាន់អៃមៃលែៈគឹតជេសនាវងាន់មោអោសលោសជេងនាវមរោស។
22 លាសនទ្រីឞូម៝សឞូនុយ្សអីនាក់មរោស? អើមមោទីលាសផូងអីរាលាច់លាសឞ្រាសយេឆូ មោទីឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់។ ឞូម៝សអីរាលាច់មោអោសរ៝មកោរាញឞ្រាសឞឹ នអ៝ប់មាក៝នពាង់នើម ឞូនុយ្សអីនៃជេងឞូនុយ្សអីតឹមរាទ៝ង់ដាសឞ្រាសក្រីស ។
23 ឞូម៝សអីរាលាច់លាសឞ្រាសយេឆូ មោទីអីក៝នកោរាញឞ្រាស ឞូនុយ្សអីនៃមោគែសអោសកោរាញឞ្រាសឞឹគុនទ្រែល។ យើនមាលាសឞូម៝សអីឆ៝ៈទើនមឞើសលាសឞ្រាសយេឆូ អីក៝នកោរាញឞ្រាស ឞូនុយ្សអីនៃគែសកោរាញឞ្រាសឞឹគុនទ្រែលដ៝ង់។
24 លាសនទ្រីទឹងលែៈនាវអីខាន់អៃមៃលែៈតាង់ជេសឞើសនតើមខាន់អៃមៃញឆីងមាឞ្រាសក្រីស នើស ទាន់នាវអីនៃហោមការ់តានូយ្សនហ៝ម់ខាន់អៃមៃ។ លាសទឹងលែៈនាវអីខាន់អៃមៃលែៈតាង់ជេសឞើសនតើមខាន់អៃមៃញឆីងមាឞ្រាសក្រីស នើសហោមការ់តាខាន់អៃមៃងាន់ លាសនទ្រីខាន់អៃមៃហោមគុន៝ប់នទ្រែលក៝នកោរាញឞ្រាសនើម នទ្រែលមាកោរាញឞ្រាសឞឹនើមដ៝ង់។
25 ពាង់លែៈត៝នអ៝ន់នាវរេសនហ៝រ៝មាឞ៝ន់។
26 គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ យ៝រមាឞូអុចមរោសរាលាម់ខាន់អៃមៃ ជានអ៝ន់ខាន់អៃមៃហ្យើត។
27 ឞ្រាសហ្វេងអ្វែសអីកោរាញឞ្រាសលែៈអ៝ន់ជេសមាខាន់អៃមៃ ពាង់ហោមគុតាខាន់អៃមៃ នទ្រីខាន់អៃមៃមោហោមខាច់អោសអ៝ន់ឞូអេងនតុមនតីខាន់អៃមៃជឹត។ ឞ្រាសហ្វេងអ្វែសមោមរោសអោស ពាង់ជេងនាវងាន់។ ឞ្រាសហ្វេងអ្វែសនតុមនតីមាអាប់នតីលនទើអ៝ន់មាខាន់អៃមៃទាទេ។ លាសនទ្រីអ៝ន់ខាន់អៃមៃគុន៝ប់ហ៝ម់តាឞ្រាសក្រីស កើតឞ្រាសហ្វេងអ្វែសលែៈនតុមនតីជេសមាខាន់អៃមៃ។
28 អើក៝នឆៅ អាបៃអ្យា អ៝ន់ខាន់អៃមៃហោមគុន៝ប់តាឞ្រាសក្រីស ទោ គៃមាតានារពាង់វាច់ញឆោសឆាក់ ឞ៝ន់គែសនូយ្សនហ៝ម់ឞាញ់ មោអោសគែសនាវដីតព្រេងតានាប់ពាង់។
29 ខាន់អៃមៃលែៈគឹតជេសពាង់ជេងនើមឆ៝ង់ លាសនទ្រីខាន់អៃមៃទើយគឹតនហេលដ៝ង់ ឞូម៝សអីជានការឆ៝ង់ លែៈជេងក៝នកោរាញឞ្រាសទាទេដ៝ង់។