5
នាវញឆីងមាឞ្រាសយេឆូ
1 ឞូម៝សអីអ្យាត់ឞ្រាសយេឆូ អីជេងឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់ ពាង់អីនៃជេងក៝នកោរាញឞ្រាសងាន់។ ជេសរីឞូម៝សអីរ៝ង់មាកោរាញឞ្រាសឞឹ ពាង់អីនៃរ៝ង់មាទឹងលែៈផូងក៝នកោរាញឞ្រាសដ៝ង់។
2 លាសឞ៝ន់លែៈរ៝ង់ជេសកោរាញឞ្រាស នទ្រែលមាលែៈញអោតទឹងលែៈនាវពាង់ដាៈ តាៈឞើសនាវអីនៃទឹងឞ៝ន់ទើយគឹត ឞ៝ន់លែៈរ៝ង់ជេសមាទឹងលែៈផូងក៝នពាង់។
3 លាសឞ៝ន់រ៝ង់មាកោរាញឞ្រាស ឞ៝ន់ញអោតទឹងលែៈនាវអីពាង់ដាៈនៃដ៝ង់។ ជេសរីនាវដាៈអីនៃមោអោសជ៝ក់ជេរ។
4 ទឹងលែៈឞូនុយ្សអីលែៈជេងក៝នកោរាញឞ្រាស ជេងផូងអីលែៈទើយជេសឞើសនាវអ្យើសតានែសនតូអ្យា ជេសរីនាវទើយឞើសនាវអ្យើសអីនៃតាៈឞើសនាវឞ៝ន់ញឆីងមាឞ្រាសក្រីស ។
5 លាសនទ្រីឞូម៝សអីទើយតឹមលើសដាសនាវអ្យើសតានែសនតូនៃ? គែសឞូនុយ្សអីអ្យាត់លាសឞ្រាសយេឆូ អីក៝នកោរាញឞ្រាសងាន់ ឞូនុយ្សអីនៃអីទើយតឹមលើសដាសនាវអ្យើសតានែសនតូអ្យា។
នាវរេសនហ៝រ៝
6 ឞ្រាសយេឆូក្រីស វាច់តានែសនតូអ្យាមាទាកជេងតានាវយុកបាប់តែមមាទាក នទ្រែលមាមហាមជេងនាវពាង់លែៈខឹតតាឆីតឹមរាកាង់ មោអោសទើនមាទាកទើម យើនមានអ៝ប់មាទាក នអ៝ប់មាមហាមដ៝ង់។ ឞ្រាសហ្វេងអ្វែសមឞើសនាវអីនៃជេងទីងាន់ ឞ្រាសហ្វេងអ្វែសអីនាវងាន់។
7 គែសពែនតីលនាវខ្លៃអីមឞើសងក៝ចមាឞ្រាសយេឆូក្រីស ជេងក៝នកោរាញឞ្រាស។
8 គែសឞ្រាសហ្វេងអ្វែស គែសទាកនាវបាប់តែមយុកមាទាក គែសមហាមឞ្រាសយេឆូអីហ៝ចតាឆីតឹមរាកាង់ លែៈពែអ្យាជេងទូនតោរនាវទើម។
9 ឞ៝ន់លែៈឆ៝ៈទើនជេសនាវមឞើសងក៝ចអីតាៈឞើសឞូនុយ្ស យើនមានាវមឞើសងក៝ចអីតាៈឞើសកោរាញឞ្រាសគែសនាវខ្លៃលើមារាលាវនៃជឹត ជេសរីកោរាញឞ្រាសលែៈមឞើសងក៝ចមាក៝នពាង់នើមជេស។
10 ឞូម៝សអីលែៈញឆីងមាក៝នកោរាញឞ្រាសនើម ពាង់អីនៃលែៈញអោតនាវមឞើសងក៝ចអីនៃតានូយ្សនហ៝ម់ពាង់នើម។ ឞូម៝សអីមោអោសញឆីង ពាង់កើបកោរាញឞ្រាសមរោស យ៝រលាសពាង់មោអោសអ្យាត់មានាវកោរាញឞ្រាសលែៈមឞើសងក៝ចមាក៝នពាង់នើមនៃ។
11 កោរាញឞ្រាសលែៈអ៝ន់ជេសនាវរេសនហ៝រ៝មាឞ៝ន់ ជេសរីនាវរេសអីនៃជេងគែសតាក៝នពាង់នើម នាវអីនៃជេងនទើកោរាញឞ្រាសមឞើសងក៝ចមាឞ៝ន់។
12 ឞូម៝សអីគុតឹមរាង្លាប់នទ្រែលក៝នកោរាញឞ្រាសនើម ពាង់អីនៃគែសនាវរេសនហ៝រ៝ដ៝ង់ យើនមាឞូម៝សអីមោអោសគុតឹមរាង្លាប់នទ្រែលក៝នកោរាញឞ្រាសនើម ពាង់អីនៃមោអោសគែសនាវរេសនហ៝រ៝។
13 គ៝ប់ញចីសឆ៝ម់បុតអ្យាញជ្វាល់អ៝ន់ខាន់អៃមៃ គៃមាអ៝ន់ខាន់អៃមៃគឹតអីលែៈញឆីងជេសមាក៝នកោរាញឞ្រាសនើម ខាន់អៃមៃលែៈគែសនាវរេសនហ៝រ៝ជេស។
14 កើតនទ្រីទឹងឞ៝ន់គែសនូយ្សនហ៝ម់ឞាញ់តានាប់មាត់កោរាញឞ្រាស លាសម៝សនទើអីឞ៝ន់ទាន់តឹងនាវពាង់អុច ពាង់អ្យាត់កើតនាវឞ៝ន់ទាន់នៃងាន់រ៝។
15 លាសឞ៝ន់លែៈគឹតជេសពាង់អ្យាត់កើតនាវអីឞ៝ន់ទាន់នៃ លាសនទ្រីម៝សនទើអីឞ៝ន់ទាន់តាៈឞើសពាង់ ឞ៝ន់លែៈគឹតដ៝ង់គែសនទើអីនៃងាន់រ៝។
16 លាសឞូម៝សអីឆៃតាផូងអ៝សនោអីញឆីងមាឞ្រាសក្រីស គែសជានតីសអីកោរាញឞ្រាសហោមយោៈនអាចមោអោសត៝ត់គុតានទ្រូងអុញនហ៝រ៝ អ៝ន់ពាង់អីឆៃនៃទាន់ហ៝ម់មាកោរាញឞ្រាស ជេសរីកោរាញឞ្រាសមរាអ៝ន់នាវរេសមាឞូនុយ្សអីនៃរ៝។ នាវតីសអីគ៝ប់ងើយនៃជេងនាវតីសអីកោរាញឞ្រាសហោមយោៈនអាចទើម។ យើនមាគែសនាវតីសអីអេងអីកោរាញឞ្រាសមោហោមយោៈនអាច។ នាវតីសអីនៃគ៝ប់មោអោសអ៝ន់ខាន់អៃមៃទាន់។
17 ទឹងលែៈនតីលនាវអ្យើស ជេងនាវតីសទាទេ យើនមាគែសនាវតីសអីកោរាញឞ្រាសហោមយោៈនអាច។
18 ឞ៝ន់លែៈគឹតជេស ឞូម៝សអីលែៈជេងក៝នកោរាញឞ្រាស ពាង់អីនៃមោអោសជានតីស យ៝រលាសឞ្រាសយេឆូក្រីស នើមញជ្រាង់ពាង់អីនៃ ជេសរីអីកោរាញមពោលឞ្រាសអ្យើសមោហោមអោសគែសនាវទើយមាពាង់អីនៃជឹត។
19 ឞ៝ន់លែៈគឹតជេស ឞ៝ន់ជេងក៝នកោរាញឞ្រាស យើនមាទឹងលែៈឞូនុយ្សអីមោញឆីងមាឞ្រាសក្រីស ជេងគុតាន៝ម់នាវទើយអីកោរាញមពោលឞ្រាសអ្យើសនៃទាទេ។
20 ឞ៝ន់លែៈគឹតដ៝ង់ ឞ្រាសយេឆូក្រីស អីក៝នកោរាញឞ្រាសនើមលែៈវាច់តាអ្យា ពាង់អ៝ន់នាវគឹតឞ្លាវគៃមាឞ៝ន់គឹតនាល់កោរាញឞ្រាសអីងាន់ងេន។ ឞ៝ន់គុនទ្រែលពាង់អីក៝នកោរាញឞ្រាសនើម ពាង់អីឞ្រាសនានេៈងាន់ នអ៝ប់មាពាង់អីតើមនាវរេសនហ៝រ៝។
21 អើផូងក៝នឆៅ អ៝ន់ខាន់អៃមៃទែរអ៝ន់ងាយលើយអោសយើកមឞាសឞ្រាសងក្លាៈ៕៚