៨
ឞូលែវឞូអូរជានតីសមាឞ្រាសយេឆូ
១ [ជេសរីឞ្រាសយេឆូ ហាវតាកាលើយោកតើមអោលីវ គុឞិចតានៃ។
២ ត៝ត់អើមអោយពាង់ព្លឹតៃតាជ៝ង់គូងញីសជានឞ្រាសមាកោរាញឞ្រាស គែសទឹងលែៈផូងប៝នលានហាន់ម៝ប់ពាង់ ជេសរីពាង់គុរាគើបនតុមនតីខាន់ពាង់។
៣ នោកនៃផូងនើមនតីនាវវៃផូងអីឆ្រាអែល នទ្រែលមាផូងផារីឆី លែវទូហ្វេឞូអូរឞូឞានពាង់គុឞិចដាសឞូក្លោអីមោទីឆាយពាង់នើម។ ឞូតេកឞូអូរអីនៃគុតាងក្លាងងគូលផូងគុតានៃ
៤ ជេសរីខាន់ពាង់លាសមាឞ្រាសយេឆូ ៖ “អើនើមនតី ឞូអូរអ្យាហេនឞានពាង់តឹមល៝ម់អូរឆាយ។
៥ តានាវវៃមោឆេ លែៈដាៈឞ៝ន់នតុបឞូអូរជានតីសកើតនអាមាលុអ៝ន់ខឹត។ លាសនទ្រីមៃ មើមមៃលាសមេស?”
៦ ខាន់ពាង់អោបរាល៝ងឞ្រាសយេឆូ កើតនៃ អុចជ៝យនាវនតោនពាង់។ យើនមាឞ្រាសយេឆូ គុចុនជឹតនែស ជេសរីញចីសនាវតានែសមោយមាលាវតី។
៧ យ៝រមាផូងនៃជ៝ល់ក៝អោបឞ្រាសយេឆូ ពាង់ងគឹល ជេសរីលាស៖ “តាផូងខាន់មៃ ឞូម៝សអីមោគែសជានតីស អ៝ន់ពាង់អីនៃនតុបឞូអូរអីអ្យាមាលុល៝រឞូទោ!”
៨ ជេសរីពាង់ចុនញចីសតៃតានែសមោយនៃជឹត។
៩ ត៝ត់មាខាន់ពាង់តាង់នាវឞ្រាសយេឆូ លាសកើតនៃ ជេសរីខាន់ពាង់នតើមទូលោសឞើសនតុកនៃទែមរោច នតើមឞើសឞូរាញនហ៝មាត៝ត់លែៈ។ ហោមអែតានៃឞ្រាសយេឆូ នទ្រែលមាឞូអូរអីនៃនើសទើម។
១០ ឞ្រាសយេឆូ ងគឹល ជេសរីលាសមាឞូអូរអីនៃ៖ “អើយោស អាសហាន់ផូងខាន់ពាង់យ៝តរាងាត់? មោគែសទូហ្វេអុចតេៈទោយ្សអៃ?”
១១ ឞូអូរអីនៃអើស៖ “មោគែសអោស កោរាញ”។ ឞ្រាសយេឆូ លាសមាពាង់៖ “គ៝ប់មោដ៝ង់តេៈទោយ្សអៃ អៃឆឹតទោ យើនមានតើមឞើសនារអ្យា អៃលើយហោមអោសជានតីស”។]
ឞ្រាសយេឆូ ជេងនាវអាងមានែសនតូ
១២ ឞ្រាសយេឆូ ងើយតៃមាផូងប៝នលាន៖ “គ៝ប់អ្យាជេងតឹមឞានមានាវអាងមាទឹងលែៈឞូនុយ្សតានែសនតូអ្យា ឞូម៝សតឹងគ៝ប់ ពាង់មោហោមអោសគុរេសតានាវង៝ យ៝រលាសពាង់មរាគែសនាវអាងអីអ៝ន់នាវរេស”។
១៣ ផូងផារីឆី លាសមាឞ្រាសយេឆូ ៖ “នាវមៃងើយអីនៃលោសអេងតាៈឞើសមៃនើមទើម មោគែសឞូនុយ្សអាអេងមឞើសនាវមៃងើយអីនៃ លាសនទ្រីនាវមៃងើយអីនៃមោអោសកើបគែសនាវខ្លៃ”។
១៤ ឞ្រាសយេឆូ លាស៖ “ឞ៝លលាសនាវគ៝ប់ងើយអ្យាលោសអេងតាៈឞើសឆាក់គ៝ប់នើមទើមកាដោយ នាវគ៝ប់ងើយអ្យាហោមគែសនាវខ្លៃ យ៝រលាសគ៝ប់គឹតឆាក់គ៝ប់នើមឞើសតាៈ ជេសរីគឹតដ៝ង់នតុកគ៝ប់ហាន់។ យើនមាផូងខាន់មៃនើសមោអោសគឹតគ៝ប់ឞើសតាៈ ជេសរីមោដ៝ង់គឹតអាសនតុកគ៝ប់ហាន់។
១៥ ខាន់មៃផាតទោយ្សតឹងនាវវៃផូងឞូនុយ្ស។ គ៝ប់មោអោសផាតទោយ្សឞូ ទូហ្វេមោអើម។
១៦ លាសគ៝ប់ផាតទោយ្សឞូ នាវគ៝ប់ផាតទោយ្សអីនៃជេងទីងាន់ យ៝រលាសគ៝ប់មោអោសផាតទោយ្សអេងគ៝ប់នើមទើម គែសឞឹគ៝ប់នើមតើមញជ្វាល់គ៝ប់ដ៝ង់គុនទ្រែលគ៝ប់។
១៧ តានាវវៃខាន់មៃលែៈគែសញចីស៖ «លាសគែសឞារហៃឞូនុយ្សមឞើសងក៝ច រីមើកើបនាវអីនៃគែសនាវខ្លៃ»។
១៨ គ៝ប់មឞើសងក៝ចនាវឆាក់គ៝ប់នើមអ្យា ជេសរីគែសឞឹគ៝ប់នើមតើមញជ្វាល់គ៝ប់វាច់ដ៝ង់ មឞើសងក៝ចនាវឆាក់គ៝ប់នើមអ្យា”។
១៩ ឞូអោបឞ្រាសយេឆូ ៖ “អាសឞឹមៃ?” ពាង់អើស៖ “ខាន់មៃមោគឹតនាល់គ៝ប់ ខាន់មៃមោដ៝ង់គឹតនាល់ឞឹគ៝ប់។ លាសខាន់មៃគឹតនាល់គ៝ប់ រីមើខាន់មៃគឹតនាល់ឞឹគ៝ប់ដ៝ង់”។
២០ ឞ្រាសយេឆូ ងើយនាវនៃ នោកពាង់គុនតីលាសឞូតាជ៝ង់គូងញីសជានឞ្រាស ទាច់កេងនតុកអ៝ន់ហុបព្រាក់ យើនមាមោគែសអោសឞូនុយ្សឞាញ់ញុបពាង់ យ៝រលាសអេហ៝ៈត៝ត់ទីម៝ង។
នាវទើយឞ្រាសយេឆូ
២១ ឞ្រាសយេឆូ លាសតៃខាន់ពាង់៖ “គ៝ប់តៃទូ ខាន់មៃតៃជ៝យគ៝ប់ យើនមាខាន់មៃខឹតនអ៝ប់មានាវតីសខាន់មៃនើម។ នតុកគ៝ប់ហាន់ ខាន់មៃមោអោសទើយហាន់”។
២២ មពោលកោរាញផូងអីឆ្រាអែល តឹមលាសនទ្រាង់ខាន់ពាង់៖ “ម៝សគែសនាវខ្លៃលាសព្រែនៃ៖ «នតុកគ៝ប់ហាន់ ខាន់មៃមោអោសទើយហាន់»? គឹតពាង់ងខឹតអេងឆាក់ពាង់នើម?”
២៣ ឞ្រាសយេឆូ លាសតៃ៖ “ខាន់មៃតាៈឞើសនែសនតូអ្យា យើនមាគ៝ប់តាៈឞើសកាលើត្រោកអីនតុកកោរាញឞ្រាសនើម។ ខាន់មៃជេងនទើនែសនតូអ្យា យើនមាគ៝ប់គ៝ប់មោអោសជេងនទើនែសនតូអ្យា។
២៤ គ៝ប់លែៈមឞើសមាខាន់មៃ៖ «ខាន់មៃខឹតនអ៝ប់មានាវតីសខាន់មៃនើម» យ៝រលាស លាសខាន់មៃមោអោសអ្យាត់នាវគ៝ប់មឞើសងក៝ចនាវឆាក់គ៝ប់នើមអ្យា ខាន់មៃខឹតហោមនអ៝ប់មានាវតីសខាន់មៃនើមងាន់រ៝ មោអោសគែសយោៈនាវតីស”។
២៥ ឞូអោបឞ្រាសយេឆូ ៖ “លាសនទ្រីមៃឞូម៝ស?” ឞ្រាសយេឆូ អើស៖ “គ៝ប់លែៈអើមមឞើសជេសមាខាន់មៃ។
២៦ គ៝ប់គែសអ៝ក់ងាន់នាវគៃមាអុចមឞើសងក៝ចអ៝ន់មាខាន់មៃ នអ៝ប់មាផាតទោយ្សខាន់មៃ យើនមាគ៝ប់មោអុចអោសមឞើសងក៝ច យ៝រលាសកោរាញឞ្រាសនើមតើមញជ្វាល់គ៝ប់ពាង់ជានតឹងនាវពាង់មឞើសនឹង ជេសរីម៝សនាវគ៝ប់តាង់តាៈឞើសពាង់ នាវអីនៃទើមគ៝ប់មឞើសងក៝ចអ៝ន់មាឞូនុយ្សតានែសនតូអ្យា”។
២៧ យើនមាផូងខាន់ពាង់មោវ៝ត់អោសនាវឞ្រាសយេឆូ មឞើសងក៝ចកោរាញឞ្រាសឞឹពាង់អ៝ន់មាខាន់ពាង់នៃ។
២៨ ឞ្រាសយេឆូ លាសមាខាន់ពាង់៖ “តានារខាន់មៃនហាវគ៝ប់អីក៝នឞូនុយ្សតាៈឞើសកោរាញឞ្រាសរីតៃ តារីមើខាន់មៃគឹតលាសគ៝ប់អ្យាឞូម៝ស គឹតលាសនទើគ៝ប់ជាន មោគែសអោសជានតឹងឆាក់គ៝ប់នើមអុច។ គ៝ប់ងើយនាវអីនៃតឹងនាវឞឹគ៝ប់ដាៈមាគ៝ប់។
២៩ កោរាញឞ្រាសនើមតើមញជ្វាល់គ៝ប់ពាង់មោអោសនត្លើយគ៝ប់គុអេង ពាង់គុនទ្រែលគ៝ប់ យ៝រលាសទឹងលែៈនទើគ៝ប់ជានអ៝ន់ពាង់រាម់មអាកមរ៝”។
៣០ នោកឞ្រាសយេឆូ ងើយនៃ គែសអ៝ក់ឞូនុយ្សឆឹតញឆីងមាពាង់។
ឞូនុយ្សអីប៝នលានកោរាញឞ្រាសងាន់
៣១ ជេសរីឞ្រាសយេឆូ ងើយមាផូងអីឆ្រាអែល អីលែៈញឆីងមាពាង់៖ “លាសខាន់អៃមៃគុន៝ប់តានាវគ៝ប់នតី ខាន់អៃមៃជេងអ៝សម៝នគ៝ប់ងាន់
៣២ ជេសរីខាន់អៃមៃគឹតនាល់នាវងាន់ ជេសរីនាវងាន់មរារាក្លាយ្សខាន់អៃមៃអ៝ន់ជេងឞូនុយ្សក៝នមែ”។
៣៣ ផូងខាន់ពាង់លាស៖ “មើមទឹងមៃលាសហេន៖ «ខាន់អៃមៃមរាជេងឞូនុយ្សក៝នមែ?» យ៝រលាសហេនអីអ្យាក៝នឆៅអាឞ្រាហាម់ អីចែទឹងលែៈផូងអីឆ្រាអែល ឞ៝ន់ ហេនមោព្រ៝តអោសគុជានទឹកឞូ”។
៣៤ ឞ្រាសយេឆូ លាសមាខាន់ពាង់៖ “គ៝ប់លាសនហេលនានេៈងាន់មាខាន់អៃមៃ ឞូម៝សជានតីស ពាង់អីនៃជេងតឹមឞានមាទឹកមានាវតីសមោឞ្លាវឞាសជានតីស។
៣៥ ឞូនុយ្សទឹកឞូ ពាង់មោអោសគុមរ៝តាជៃកោរាញពាង់នើម យើនមាក៝នកោរាញនើម ពាង់គុមរ៝តាជៃឞឹពាង់នើមនៃ។
៣៦ លាសនទ្រី លាសគ៝ប់អីក៝នកោរាញឞ្រាសរាក្លាយ្សខាន់អៃមៃ ខាន់អៃមៃជេងឞូនុយ្សក៝នមែងាន់រ៝។
៣៧ គ៝ប់លែៈគឹតខាន់អៃមៃផូងក៝នឆៅអាឞ្រាហាម់ យើនមាខាន់អៃមៃអុចងខឹតគ៝ប់ យ៝រលាសទឹងលែៈនាវគ៝ប់ងើយ នូយ្សនហ៝ម់ខាន់អៃមៃមោអោសឆ៝ៈទើន។
៣៨ ម៝សនាវគ៝ប់មឞើសងក៝ចមាខាន់អៃមៃ ជេងនទើគ៝ប់លែៈឆៃតាឞឹគ៝ប់នើម យើនមាខាន់អៃមៃជានតឹងនាវឞឹខាន់អៃមៃនើមមឞើស”។
៣៩ ខាន់ពាង់លាសមាឞ្រាសយេឆូ ៖ “ឞឹហេនអាឞ្រាហាម់ ”។ ឞ្រាសយេឆូ លាស៖ “លាសខាន់អៃមៃផូងក៝នឆៅអាឞ្រាហាម់ ងាន់ ខាន់អៃមៃជាននទើកើតអាឞ្រាហាម់ លែៈជានដ៝ង់។
៤០ អាបៃអ្យាគ៝ប់មឞើសងក៝ចមាខាន់អៃមៃនាវងាន់ នាវអីគ៝ប់តាង់តាៈឞើសកោរាញឞ្រាស តីសមាខាន់អៃមៃអុចងខឹតគ៝ប់។ យើនមាអាឞ្រាហាម់ មោអោសជានកើតនអៃ។
៤១ ខាន់អៃមៃជាននទើឞឹខាន់អៃមៃនើមជាន”។ ខាន់ពាង់លាសមាឞ្រាសយេឆូ ៖ “ហេនអ្យាក៝នមែគ្លែអាល់ងាន់ ឞឹហេនកោរាញឞ្រាសទូហ្វេទើម”។
៤២ ឞ្រាសយេឆូ លាសតៃមាខាន់ពាង់៖ “លាសកោរាញឞ្រាសឞឹខាន់អៃមៃងាន់ ទីលាសខាន់អៃមៃរ៝ង់មាគ៝ប់ដ៝ង់ យ៝រលាសគ៝ប់អ្យាលោសតាៈឞើសកោរាញឞ្រាសវាច់តាអ្យា។ គ៝ប់មោអោសលោសតឹងឆាក់គ៝ប់នើមអុច កោរាញឞ្រាសនើមញជ្វាល់គ៝ប់វាច់តាអ្យា។
៤៣ មើមទឹងខាន់អៃមៃមោវ៝ត់នាវគ៝ប់នតី? យ៝រលាសខាន់អៃមៃមោឞ្លាវអ្យាត់នាវគ៝ប់នតី។
៤៤ ឞឹខាន់អៃមៃនើសឆាតាង់ អីកោរាញមពោលឞ្រាសអ្យើស ខាន់អៃមៃអុចជានតឹងនាវពាង់អុច។ ពាង់ងខឹតឞូនុយ្សឞើសនតើមឆាអើមងាន់ ពាង់អីនើមមរោស នទ្រែលមាពាង់មោអោសងើយនាវងាន់ យ៝រលាសតានូយ្សនហ៝ម់ពាង់មោគែសអោសនាវងាន់។ ទោលពាង់មឞើសងើយមរោស ពាង់តឹមទីមានូយ្សនហ៝ម់ពាង់នើមរ៝ យ៝រលាសពាង់នើសជេងនើមមរោស នទ្រែលមាជេងនើមតើមទឹងលែៈនាវមរោសដ៝ង់។
៤៥ នទ្រីទឹងខាន់អៃមៃមោអោសអ្យាត់នាវគ៝ប់ យ៝រលាសគ៝ប់នតីនាវងាន់។
៤៦ តាផូងខាន់អៃមៃនៃ អើមគែសលាសទូហ្វេឞូនុយ្សទើយនតោនគ៝ប់គែសជាននាវតីស? លាសគ៝ប់នតីនាវងាន់ មើមទឹងខាន់អៃមៃមោអ្យាត់គ៝ប់?
៤៧ ឞូម៝សជេងប៝នលានកោរាញឞ្រាស ពាង់អីនៃអ្យាត់នាវកោរាញឞ្រាស។ ខាន់អៃមៃមោអោសជេងប៝នលានកោរាញឞ្រាស នទ្រីទឹងខាន់អៃមៃមោអ្យាត់នាវគ៝ប់នៃ”។
ឞ្រាសយេឆូ នទ្រែលមាអាឞ្រាហាម់
៤៨ មពោលកោរាញផូងអីឆ្រាអែល លាសឞ្រាសយេឆូ ៖ “ទីមោលាសមោ លាសហេនលាសមៃផូងឞ្រីឆាមារី គែសឞ្រាសអ្យើសគុតាមៃ?”
៤៩ ឞ្រាសយេឆូ អើស៖ “គ៝ប់មោអោសគែសឞ្រាសអ្យើសគុតាគ៝ប់គ៝ប់យើកមាឞឹគ៝ប់នើម តីសមាខាន់មៃមឺចរាម៝តគ៝ប់ច្រាវ។
៥០ គ៝ប់មោអោសជ៝យគៃមាលឺអេងឆាក់គ៝ប់នើម យើនមាគែសទូហ្វេឆើមជ៝យអ៝ន់លឺគ៝ប់ពាង់អីកោរាញផាតទោយ្សឆ៝ង់ដ៝ង់។
៥១ គ៝ប់លាសនហេលនានេៈងាន់មាខាន់មៃ ឞូម៝សញអោតតឹងនាវគ៝ប់នតី ពាង់មោគែសខឹតអោស”។
៥២ មពោលកោរាញផូងអីឆ្រាអែល លាសឞ្រាសយេឆូ ៖ “អាបៃអ្យាហេនលែៈគឹតមៃគែសឞ្រាសអ្យើសគុតាមៃងាន់រ៝ យ៝រលាសអាឞ្រាហាម់ នទ្រែលមាមពោលឞូនុយ្សនតើយ្សនាវងើយកោរាញឞ្រាសកាល់អែនើសលែៈខឹតលែៈផ្យៅ យើនមាមៃមៃលាស៖ «ឞូម៝សញអោតតឹងនាវគ៝ប់នតី ពាង់មោគែសខឹតអោស»។
៥៣ អើមមៃក្វ៝ង់រាលាវចែហេនអាឞ្រាហាម់ បាស? យ៝រលាសពាង់ នទ្រែលមាមពោលឞូនុយ្សនតើយ្សនាវងើយកោរាញឞ្រាសកាល់អែនើសលែៈខឹតលែៈផ្យៅ។ លាសនទ្រីមៃអីនៃ មើមមៃកើបឆាក់មៃនើមមេស?”
៥៤ ឞ្រាសយេឆូ លាស៖ “លាសគ៝ប់ជ៝យគៃមាលឺអេងឆាក់គ៝ប់នើម នាវលឺអីនៃមោអោសគែសនាវខ្លៃ។ យើនមាឞឹគ៝ប់នើមអុចឞូលឺឆាក់គ៝ប់ពាង់អីកោរាញឞ្រាសអីខាន់មៃលាសយើកមឞាសនៃនើស។
៥៥ ខាន់មៃមោអោសគឹតនាល់ពាង់ យើនមាគ៝ប់គ៝ប់គឹតនាល់ពាង់។ លាសគ៝ប់លាស គ៝ប់មោអោសគឹតនាល់ពាង់គ៝ប់ជេងឞូនុយ្សងើយមរោសតឹមឞានមាខាន់មៃដ៝ង់។ យើនមាគ៝ប់លែៈនាល់ពាង់ងាន់ នទ្រែលមាញអោតនាវពាង់ងើយជឹត។
៥៦ អាឞ្រាហាម់ ចែខាន់មៃ ពាង់រាម់មអាកងាន់នោកកោរាញឞ្រាសអ៝ន់ពាង់គឹតល៝រ ពាង់មរាឆៃនាវគ៝ប់វាច់។ ពាង់លែៈឆៃគ៝ប់វាច់ងាន់រ៝ ជេសរីពាង់រាម់មអាកហោងាន់”។
៥៧ មពោលកោរាញផូងអីឆ្រាអែល លាសឞ្រាសយេឆូ ៖ “មៃអេហ៝ៈត៝ត់ ៥០ នាម់! មើមទឹងមៃលាសលែៈឆៃអាឞ្រាហាម់ ?”
៥៨ ឞ្រាសយេឆូ លាស៖ “គ៝ប់លាសនហេលនានេៈងាន់មាខាន់មៃ នោកអាឞ្រាហាម់ អេហ៝ៈទែស គ៝ប់លែៈអើមគែសជេស”។
៥៩ កើតនទ្រីទឹងខាន់ពាង់ទោញលុគៃមានតុបងខឹតឞ្រាសយេឆូ យើនមាពាង់ក្រាបឞើសខាន់ពាង់នៃ ជេសរីលោសឞើសជ៝ង់គូងញីសជានឞ្រាសរី។