៧
នាវវៃអើមឞើសឞូរាញឞើសកាល់អែនើស
(មថ ១៥:១-៩)
១ គែសទូនាររីផូងផារីឆី នទ្រែលមានើមនតីអាបាៈតាៈឞើសប៝នក្វ៝ង់យេរូឆាលឹម ហាន់ម៝ប់ឞ្រាសយេឆូ ។
២ ត៝ត់តានៃខាន់ពាង់ឆៃមពោលអ៝សម៝នឞ្រាសយេឆូ ឆោងឆាមាតីអីខាន់ពាង់កើបមោក្ល៝សតឹងមានាវវៃអើមដាៈ យ៝រមាមពោលអ៝សម៝នអីនៃមោរាវតីល៝រឆោងឆា។
៣ ផូងផារីឆី នទ្រែលមាផូងអីឆ្រាអែល ទឹងលែៈញអោតតឹងនាវវៃអើមឞើសឞូរាញខាន់ពាង់នើមកាល់អែនើស អេល៝រមាឆោងឆាខាន់ពាង់រាវតី រីមើឆោងឆា។
៤ គែសដ៝ង់ឆឹតតាៈឞើសនតុកឞូតាច់ទ្រាប់ លាសខាន់ពាង់ឆោងឆាមោគែសរាវតឹងនាវវៃល៝រ នទ្រីក្លាចកោរាញឞ្រាសមោឆ៝ៈទើន។ ខាន់ពាង់ញអោតមោនត្លើយនាវវៃអេងៗអ៝ក់ដ៝ង់ កើតមារាវកែវរាវនទ៝សរាវគ្លាសជានមាកោង[រាវគ្រែ]ដ៝ង់។
៥ នទ្រីផូងផារីឆី នទ្រែលមាផូងនើមនតីអោបឞ្រាសយេឆូ លាស៖ “ម៝សនាវមពោលអ៝សម៝នមៃមោញអោតតឹងនាវវៃអើមឞូរាញ ឆោងឆាមាតីមោក្ល៝សកើតនៃ?”
៦ ឞ្រាសយេឆូ លាសមាខាន់ពាង់៖ “នាវអេឆាយ អីឞូនុយ្សនតើយ្សនាវងើយកោរាញឞ្រាសលែៈញចីសកាល់អែនើស គ៝ប់លែៈឆៃពាង់ញចីសតឹមទីដាសខាន់មៃ។ ខាន់មៃជានអ្យាត់នាវកោរាញឞ្រាសទើម អេឆាយ លែៈញចីសលាស៖
«កោរាញឞ្រាសលាស៖ «ផូងប៝នលានអ្យាយើកមឞាសគ៝ប់មាឞ៝រ់មឞូងទើម
តានូយ្សនហ៝ម់ខាន់ពាង់គុងាយដាសគ៝ប់។
៧ ខាន់ពាង់យើកមឞាសមាគ៝ប់មោគែសអោសនតីលខ្លៃ ដេៈមោអើម
យ៝រមាខាន់ពាង់នតុមនតីឆ៝ៈនាវវៃតាៈឞើសឞូនុយ្សទើម។ តីសមាខាន់ពាង់លាសមរោសនាវវៃអីនៃតាៈឞើសគ៝ប់ដាៈ»»។
៨ នាវវៃអីតាៈឞើសកោរាញឞ្រាសខាន់មៃមអារ់លើយ បេងមាញអោតតឹងនាវវៃឞូនុយ្ស”។
៩ ពាង់លាសជឹត៖ “ខាន់មៃឞ្លាវងាន់តឹងនាវវៃឞូនុយ្សនហ៝មាមោហោមអ្យាត់នាវវៃកោរាញឞ្រាស។
១០ នតឹតលាសមោឆេ លែៈញចីសកាល់អែនើសលាស៖ «អ៝ន់ខាន់អៃមៃយើកមឞាសហ៝ម់មាមេៈឞឹ» ជេសរី «ឞូម៝សរាកឆ្វាយមាមេៈឞឹពាង់នើម ពាង់អីនៃគែសទោយ្សត៝ត់ឞូងខឹតរ៝»។
១១ តីសមាខាន់មៃលាសនអា៖ «លាសទូហ្វេឞូនុយ្សងើយមាអីមេៈឞឹលាស ម៝សនទើអីគ៝ប់អុចកើលមាមេៈឞឹ នទើអីនៃលាសលែៈកោរបាន់ » - នាវ «កោរបាន់ » អ្យារាឞ្លាងលាស «នទើញហើរមាកោរាញឞ្រាស»។
១២ ជេសរីឞូនុយ្សអីងើយកើតនអៃ ខាន់មៃមោហោមអោសអ៝ន់ពាង់កើលមាមេៈឞឹ។
១៣ នទ្រីទឹងខាន់មៃជូតលើយនាវវៃកោរាញឞ្រាស ងខើងមាឆ៝ៈនាវវៃអើមឞើសឞូរាញ។ ខាន់មៃជាននទើអេងៗអ៝ក់ងាន់ កើតនទើអីនៃដ៝ង់”។
នាវអីជានឞូនុយ្សមោហោមក្ល៝ស
(មថ ១៥:១០-២០)
១៤ ជេសរីឞ្រាសយេឆូ ក្វាល់លែៈផូងប៝នលានអីគុទាច់តានៃ លាសមាខាន់ពាង់៖ “លែៈអ៝សនោកោញវាអ្យាត់នាវគ៝ប់លែរងែរប៝ត់អ៝ន់គឹតវ៝ត់នាវអ្យា៖
១៥ លែៈនទើឞើសទីសអីលាប់តាត្រោមឆាក់ឞូនុយ្ស មោទើយអោសជានអ៝ន់ឞូនុយ្សជេងមោក្ល៝ស លែៈនទើអីលោសឞើសឞូនុយ្ស នទើអីនៃទើយជានអ៝ន់ជេងមោក្ល៝ស។
១៦ [ឞូម៝សតាង់នាវគ៝ប់ងើយអ្យា អ៝ន់ពាង់មឹនអេងតាឆាក់!]”
១៧ ជេសរីឞ្រាសយេឆូ លោសឞើសផូងប៝នលានហាន់លាប់តាត្រោមជៃ តានៃមពោលអ៝សម៝នពាង់លែវឞាល់អោបពាង់មានាវនតីអីនៃ។
១៨ ពាង់លាសមាខាន់ពាង់៖ “នទ្រីខាន់មៃមោហ៝ៈគឹតវ៝ត់ដ៝ង់បាស? អ៝ន់ខាន់មៃគឹតវ៝ត់នាវអ្យា លែៈនទើតាៈឞើសទីសអីលាប់តាឆាក់ឞូនុយ្សមោទើយអោសជានអ៝ន់ឞូនុយ្សអីនៃជេងមោក្ល៝ស
១៩ យ៝រមានទើអីនៃមោគែសអោសលាប់តាត្រោមនូយ្សនហ៝ម់ លាប់តាត្រោមនទុលទើម ជេសរីលោសលែៈផ្យៅ”។ - នទ្រីពាង់មឞើសលាសលែៈនទើឆោងឆាជេងទីមាឆាទាទេងាន់។ -
២០ ពាង់លាសជឹត៖ “គែសនទើអីលោសឞើសឞូនុយ្សទើមទើយជានអ៝ន់ឞូជេងមោក្ល៝ស
២១ យ៝រលាសទឹងលែៈនាវមឹនអ្យើសអ្យើតលោសតាៈឞើសនូយ្សនហ៝ម់ឞូនុយ្ស នាវមឹនអីនៃលែវជេងខើសក្លែរ នតុងឞូ ងខឹតឞូ
២២ ល៝ម់អូរល៝ម់ឆាយ រាវានកើញគែសមាទ្រាប់នទើ ជាននទើអ្យើស មរោសឞូ មោគែសនាវដីត អុចមានាវតឹមពីត ងើយញចើត នាវហឺន នទ្រែលមានាវមោហោមអោសគឹតនទើអ្វែសនទើអ្យើស។
២៣ លែៈនាវអ្យើសអីនៃលោសតាៈឞើសនូយ្សនហ៝ម់ឞូនុយ្ស ជានអ៝ន់ជេងមោក្ល៝ស”។
ទូហ្វេឞូអូរឞ្រីអេងញឆីងមាឞ្រាសយេឆូ
២៤ ជេសរីឞ្រាសយេឆូ នទ្រែលមាអ៝សម៝នពាង់លោសឞើសនតុកនៃ ហាន់តាឞ្រីអីទាច់ដាសប៝នក្វ៝ង់តីរុស [នទ្រែលមាប៝នក្វ៝ង់ឆីដោន ]រី។ ត៝ត់តាទូប៝នខាន់ពាង់លាប់គុតាទូមល៝ម់ជៃ មោអុចអោសអ៝ន់ឞូគឹតលាសពាង់គុតានៃ តីសមាមោអោសទើយនទ៝ប់។
២៥ ទូនទ៝ម់គែសទូហ្វេឞូអូរតាង់ឞូងក៝ចឞ្រាសយេឆូ គុតានៃ។ អីក៝នឞូអូរពាង់រីឞ្រាសអ្យើសលាប់ ជេសរីពាង់ហាន់តាជៃអីនៃពាន់តាជ៝ង់ឞ្រាសយេឆូ ។
២៦ ឞូអូរអីនៃមោអោសទីផូងអីឆ្រាអែល អីប៝នតើមពាង់ទាច់មាប៝នផេនីសី តាឞ្រីឆីរី ។ ជេសរីពាង់ឞ៝ញដាៈឞ្រាសយេឆូ មព្រើសឞ្រាសអ្យើសអីនៃអ៝ន់លោសឞើសអីក៝នពាង់រី។
២៧ ឞ្រាសយេឆូ ងើយនតឹតមាពាង់៖ “អ៝ន់អ៝សក៝នឆោងឆាហើមប៝ត់ មោទីអោសឆ៝ៈព្យាង់ត្រាវអ៝សក៝នមអារ់អ៝ន់ឆ៝ឆាច្រាវ”។
២៨ ឞូអូរអីនៃអើសលាស៖ “ងាន់កោរាញមេ! ឞ៝លលាសមោមអារ់ព្យាង់ត្រាវកាដោយ ឆ៝ហោមគុតាន៝ម់គ្រែនតេរឆាព្យាង់ត្រាវនទាក់អីអ៝សក៝នគែសតុបនើសដ៝ង់”។
២៩ ត៝ត់តាង់នាវឞូអូរលាសនៃឞ្រាសយេឆូ លាសមាពាង់៖ “យ៝រមាអៃងើយនទ្រី ឞ្រាសអ្យើសលែៈលោសឞើសក៝នអៃហើយ អៃព្លឹឆឹតអារីទោស”។
៣០ ពាង់ឆឹតត៝ត់តាជៃឆៃអីក៝នពាង់ឞិចអ្វែសកាលើគ្រែរី ឞ្រាសអ្យើសលែៈលោសឞើសក៝នពាង់នៃជេស។
ឞ្រាសយេឆូ ជានឞាសទូហ្វេឞូក្លោតឹកតោរ
៣១ ជេសរីឞ្រាសយេឆូ លោសឞើសឞ្រីអីទាច់ដាសប៝នក្វ៝ង់តីរុស ហាន់គ្លាត់រ៝ៈប៝នក្វ៝ង់ឆីដោន នហ៝មាត៝ត់តាឞ្រីដេកាពោលីស អីទាច់មាទាកងលៅក្វ៝ង់កាលីលេ រី។
៣២ ជេសរីតានៃឞូលែវទូហ្វេឞូក្លោតឹកតោរហាន់តាឞ្រាសយេឆូ ។ ឞូក្លោអីនៃមោលាង់ឞ្លាវងើយដ៝ង់។ ឞូឞ៝ញពាង់ដាៈតេៈតីតាឞូក្លោអីតឹកតោរនៃ គៃមាឞាសនាវជីឞូក្លោអីនៃ។
៣៣ ជេសរីឞ្រាសយេឆូ លែវឞូក្លោអីនៃហាន់គុនតុកអេងបាសដេៈមាផូងប៝នលាន ពាង់ល៝ក់លាវតីតាត្រោមតោរឞូក្លោអីនៃ ឆ៝សទាកទីវតាលាវតីពាង់នើមតេៈតាមព្យាត់ឞូក្លោអីនៃ។
៣៤ ជេសរីឞ្រាសយេឆូ ងគើរកាលើត្រោករី ញឆោរនហ៝ម់ក្វ៝ង់អ្យហូត ពាង់លាស៖ “អែបផាថា ” - រាឞ្លាងលាស «អ៝ន់ពើកហ៝ម់»។
៣៥ ទូនទ៝ម់ទោមាតោរឞូក្លោអីនៃអ្យាត់តាង់រ៝ មព្យាត់ឞ្លាវរាលាម់នហ៝មាងើយក្ល៝សរាសវាសងាន់រ៝។
៣៦ ជេសរីឞ្រាសយេឆូ ឞ្វៃខាន់ពាង់លើយអោសងក៝ចនាវអ្យាមាឞូ។ ពាង់ឞ្វៃលើយទឹងងក៝ចនាវអីនៃ យើនមាខាន់ពាង់លើមាហោងាន់ងក៝ចនាវអីនៃ។
៣៧ ទឹងលែៈឞូនុយ្សអីតាង់នាវអីនៃនទ្រ៝ត់ហីសរាហ៝ល់ងាន់ ជេសរីលាស៖ “លែៈនទើអីពាង់ជាននៃជេងអ្វែសទាទេងាន់ ឞ៝លលាសឞូនុយ្សតឹកតោរពាង់ជានអ៝ន់តាង់ ឞូនុយ្សមល៝ជេងឞ្លាវងើយដ៝ង់”។