9
ឞ្រាសយេឆូ ជានឞាសទូហ្វេឞូនុយ្សរាវែន
(មក ២:១-១២; លក ៥:១៧-២៦)
1 ជេសរីឞ្រាសយេឆូ ញច៝ទូកព្លឹឆឹតតាប៝នកាពើនិម នតុកប៝នពាង់គុ។
2 តានៃគែសឞូតូងទូហ្វេឞូនុយ្សរាវែនជ៝ង់រាវែនតីឞិចតាងក៝ៈហាន់តាឞ្រាសយេឆូ ។ ពាង់ឆៃខាន់ពាង់គែសនាវញឆីង ជេសរីលាសមាឞូនុយ្សរាវែនអីនៃ៖ “អើអ៝ស អ៝ន់មៃរាម់ហ៝ម់។ គ៝ប់លែៈយោៈមៃ មោហោមអោសកើបនាវតីសតាមៃ”។
3 តានៃគែសផូងនើមនតីនាវវៃផូងអីឆ្រាអែល អាបាៈលាសអេងតានូយ្សនហ៝ម់ខាន់ពាង់នើម៖ “មើមពាង់ងើយកើតនៃ ពាង់អីនៃមឺចរាម៝តកោរាញឞ្រាសងាន់ហៃ!”
4 ឞ្រាសយេឆូ លែៈឆៃនាវមឹនផូងអីនៃ ពាង់លាស៖ “មើមទឹងខាន់មៃគែសនាវមឹនអ្យើសកើតនៃ?
5 អ៝ន់ខាន់មៃគឹតនាវអ្យា លាសគ៝ប់លាសមាឞូនុយ្សរាវែនអីនៃ៖ «នាវតីសមៃលែៈគ៝ប់យោៈហើយ» មោលាស «មៃទ៝ក់ឞ្រោៈហ៝ម់» លាសនទ្រីម៝សនាវលាសអីទើសរាលាវហាៈ?
6 គ៝ប់អុចអ៝ន់ខាន់មៃគឹតឆៃគ៝ប់អីក៝នឞូនុយ្សតាៈឞើសកោរាញឞ្រាសទើយយោៈនាវតីសឞូនុយ្សតានែសនតូអ្យា”។ ជេសរីឞ្រាសយេឆូ អ្វាញ់ជឹតឞូនុយ្សរាវែនអីនៃលាស៖ “មៃទ៝ក់ហ៝ម់ ញអោតងក៝ៈមៃនៃឆឹតអាជៃមៃនើមរី”។
7 ជេសរីឞូនុយ្សរាវែនអីនៃទ៝ក់រ៝ ឆឹតអាជៃពាង់នើមរី។
8 ឆៃកើតនៃ ផូងប៝នលាននទ្រ៝ត់ហីសរាហ៝ល់ទាទេ ខាន់ពាង់រានេកោរាញឞ្រាស យ៝រលាសលែៈពាង់អ៝ន់នាវទើយកើតនៃមាឞូនុយ្សតានែសនតូ។
ឞ្រាសយេឆូ ក្វាល់មាថាយ អ៝ន់តឹងពាង់
(មក ២:១៣-១៧; លក ៥:២៧-៣២)
9 ជេសរីឞ្រាសយេឆូ ហាន់ឞើសនតុកនៃ ពាង់ឆៃមាថាយ គុក៝ប់ឆ៝ៈព្រាក់ប៝នលានមាអ៝ន់កោរាញម៝ត់អ្វាញ់។ ឞ្រាសយេឆូ លាសមាពាង់៖ “ហើយនោ ហោៈឞ្រោៈតឹងគ៝ប់”។ ពាង់ទ៝ក់ឞើសនៃ ជេសរីតឹងឞ្រាសយេឆូ រ៝។
10 តានារនៃមាថាយ ជាៈឞ្រាសយេឆូ ឆោងឆាតាជៃពាង់នើម។ គែសអ៝ក់ផូងឞូនុយ្សក៝ប់ឆ៝ៈព្រាក់ប៝នលានមាអ៝ន់កោរាញម៝ត់អ្វាញ់ នអ៝ប់មាផូងឞូនុយ្សជានតីសអេងហាន់គុឆោងឆានទ្រែលឞ្រាសយេឆូ នទ្រែលមាផូងអ៝សម៝នពាង់ដ៝ង់។
11 ត៝ត់មាផូងផារីឆី ឆៃកើតនៃ ខាន់ពាង់អោបផូងអ៝សម៝នឞ្រាសយេឆូ ៖ “មើមទឹងកោរាញខាន់មៃគុឆោងឆានទ្រែលឞូនុយ្សក៝ប់ឆ៝ៈព្រាក់ប៝នលាន នអ៝ប់មាផូងឞូនុយ្សជានតីសអេងកើតនៃ?”
12 ឞ្រាសយេឆូ តាង់កើតនៃ ជេសរីអោបខាន់ពាង់៖ “ឞូនុយ្សគែសឆាក់ជាន់អ្វែសមោអុចអោសមាកោរាញទាកឆី ឞូនុយ្សអីគែសនាវជីទើមអុច។
13 អ៝ន់ខាន់មៃវ៝ត់តាត្រ៝ងលែៈញចីសកើតនអា៖ «គ៝ប់អុចឞូនុយ្សឞ្លាវយោៈនអាច មោអុចអោសមានទើជានឞ្រាស»។ គ៝ប់វាច់តាអ្យាមោអោសគៃមាក្វាល់ឞូនុយ្សឆ៝ង់ អុចក្វាល់ឞូនុយ្សតីស គៃមាកើលខាន់ពាង់”។
នាវអ៝ត់ឆោងឆា
(មក ២:១៨-២២; លក ៥:៣៣-៣៨)
14 នោកនៃគែសមពោលអ៝សម៝នយោហាន-បាប់តែម ហាន់ម៝ប់ឞ្រាសយេឆូ អោបពាង់៖ “ហេន នទ្រែលមាផូងផារីឆី គែសនាវវៃអ៝ត់ឆោងឆាអ៝ក់នារគៃមាមឞើសឆើម មើមទឹងមពោលអ៝សម៝នមៃមោជានកើតនៃ?”
15 ឞ្រាសយេឆូ អើសមាខាន់ពាង់៖ “នោកតឹមនអាប់អូរឆាយ ឞូនាច់វៃគុរាង៝តអ៝ត់ឆោងឆាដ៝ង់ឞើស? មោវៃអោស។ គ៝ប់តឹមឞានមាឞូក្លោនអាប់អូរឆាយ។ ត៝ត់ទីនាររីតៃឞូតឹមងខាសគ៝ប់ដាសមពោលអ៝សម៝នគ៝ប់ រីមើខាន់ពាង់អ៝ត់ឆោងឆា។
16 ឞូមោវៃអោសឆ៝ៈឞ៝កមហែអេហ៝ៈពីសមឞោលតាអាវលែៈឆាត។ លាសជានកើតនៃឞ៝កអីឆាតរីលើមាហោហេករាលាវអើមងាន់ យ៝រមាអីឞ៝កមហែនៃជេងរោតនោកជេសពីស។
17 កើតនទ្រីដ៝ង់ ឞូមោវៃអោសតេៈនទ្រាញ់ព្លៃយុងយារប៝នមហែតាទុងនតោអើម លាសជានកើតនៃនទ្រាញ់ព្លៃយុងយារប៝នមហែជានអ៝ន់ទុងនតោអីនៃព្រែក នទ្រាញ់ហុកដ៝ង់ ជេសរីទុងនតោអីនៃជេងឆាតដ៝ង់ យ៝រលាសទុងនតោអើមមោហោមអោសត៝ច។ ឞូតេៈនទ្រាញ់ព្លៃយុងយារប៝នមហែតាទុងនតោមហែ នទ្រីនទើឞារអឹនៃហោម”។
ឞ្រាសយេឆូ ជានឞាសឞូអូរជីរីស នទ្រែលមាជានក៝នឞូអូរយៃរុស អ៝ន់ទ៝ក់រេស
(មក ៥:២១-៤៣; លក ៨:៤០-៥៦)
18 នោកឞ្រាសយេឆូ ហោមងើយនាវអីនៃ ទោមាគែសទូហ្វេកោរាញញីសរាបុនផូងអីឆ្រាអែល ហាន់ច៝នកោម៝ក់ឞើសនាប់ឞ្រាសយេឆូ លាសមាពាង់៖ “ក៝នឞូអូរគ៝ប់មហែខឹតនទើសនើសពើ។ ទាន់មៃហាន់ពាសតីតាពាង់អើ ជេសរីពាង់ទ៝ក់រេសរ៝”។
19 ឞ្រាសយេឆូ ទ៝ក់ហាន់នទ្រែលពាង់ មពោលអ៝សម៝នឞ្រាសយេឆូ ហាន់ដ៝ង់។
20-21 រ៝ៈត្រ៝ងនៃគែសទូហ្វេឞូអូរជីរីសលែៈជ៝ៈ ១២ នាម់ ពាង់លាសអេងតាឆាក់ពាង់នើម៖ “លាសគែសពាសអាវពាង់អីនៃ គ៝ប់ឞាសរ៝”។ ជេសរីពាង់តឹងឞ្រាសយេឆូ ឞើសកើយ ពាសតាច្យាង់អាវពាង់រី។
22 ឞ្រាសយេឆូ ងគឹលជឹតកើយ ឆៃឞូអូរអីនៃ ជេសរីលាសមាពាង់៖ “អៃរាម់ហ៝ម់អើអ៝ស នាវអៃញឆីងជានឞាសអៃហើយ”។ នាវជីរីសពាង់ឞាសតានៃរ៝។
23 ជេសរីឞ្រាសយេឆូ ត៝ត់តាជៃកោរាញញីសរាបុននៃ ពាង់ឆៃផូងគែសនាវរាង៝តអោសនហោមអោសរាលែតគ្រុគ្រាៈយាៈយ៝រ់ងាន់
24 ពាង់លាសមាផូងអីនៃ៖ “ខាន់អៃមៃទូលោសអាទីស! មោខឹតអោសក៝នឆែឞូអូរអ្យា មានមាហាក់ឞិចទើម”។ ទឹងលែៈឞូតានៃគើមមឺចមាឞ្រាសយេឆូ ទាទេ។
25 ត៝ត់លោសលែៈផ្យៅផូងអីនៃអាទីស ឞ្រាសយេឆូ លាប់តាត្រោមជៃ ញុបតីក៝នឆែឞូអូរអីនៃ ជេសរីក៝នឆែអីនៃទ៝ក់រ៝។
26 ជេសរីនាវអីនៃលឺលាមឞ្រីអីនៃងាន់រ៝។
ឞ្រាសយេឆូ ជានឞាសឞារហៃឞូនុយ្សចែសមាត់
27 នោកឞ្រាសយេឆូ ហាន់ឞើសនតុកនៃ គែសឞារហៃឞូនុយ្សចែសមាត់តឹងឞើសកើយឞ្រាសយេឆូ ខាន់ពាង់នតែរ៖ “អើក៝នឆៅកាដាច់ដាវីត ! យោៈនអាចហេនបាៈអើ!”
28 ត៝ត់ឞ្រាសយេឆូ លែៈលាប់ទូមល៝ម់ជៃ ឞារហៃឞូនុយ្សចែសមាត់នៃហាន់អាពាង់។ ជេសរីឞ្រាសយេឆូ អោបខាន់ពាង់៖ “អាសខាន់មៃលែៈញឆីងមាគ៝ប់ដ៝ង់ គ៝ប់ទើយជានត្រោមមាត់ខាន់មៃអ៝ន់ឆៃអាង?” ខាន់ពាង់អើស៖ “អើ ហេនលែៈញឆីង កោរាញ”។
29 ជេសរីឞ្រាសយេឆូ ពាសតាត្រោមមាត់ខាន់ពាង់រីលាស៖ “អ៝ន់គែសងាន់ កើតនាវខាន់មៃលែៈញឆីង”។
30 ជេសរីត្រោមមាត់ខាន់ពាង់ឆៃអាងងាន់រ៝។ ឞ្រាសយេឆូ ឞ្វៃទាង់ងាន់មាខាន់ពាង់៖ “លើយអោសអ៝ន់ឞូគឹតនាវអ្យា”។
31 យើនមាឞារហៃខាន់ពាង់អីនៃ ហាន់មឞើសងក៝ចនាវនៃមាឞូលាមឞ្រីនៃងាន់។
ឞ្រាសយេឆូ ជានឞាសទូហ្វេឞូនុយ្សមល៝អ៝ន់ឞ្លាវងើយ
32 នទុតឆឹតឞារហៃខាន់ពាង់នៃ គែសឞូលែវទូហ្វេឞូនុយ្សមល៝ឞ្រាសអ្យើសលាប់ហាន់អាឞ្រាសយេឆូ ។
33 ត៝ត់ឞ្រាសយេឆូ លែៈមព្រើសឞ្រាសអ្យើសលែៈទូលោសឞើសឞូនុយ្សមល៝អីនៃ ឞូនុយ្សអីនៃឞ្លាវងើយរ៝។ ល៝ង់ផូងប៝នលានអីគុតារីនទ្រ៝ត់ហីសរាហ៝ល់លែៈនាវងាន់ ខាន់ពាង់លាស៖ “នតើមឞើសកាល់អែនើសមោអោសព្រ៝តឆៃគែសនាវឞ្រាសកើតនៃតាឞ្រីអីឆ្រាអែល អ្យា”។
34 យើនមាផូងផារីឆី លាស៖ “ទឹងពាង់ទើយមព្រើសឞ្រាសអ្យើសនៃ អាចមាកោរាញមពោលឞ្រាសអ្យើសអ៝ន់នាវទើយតាពាង់”។
ឞ្រាសយេឆូ យោៈនអាចផូងប៝នលាន
35 ជេសរីឞ្រាសយេឆូ ហាន់រ៝ៈប៝នក្វ៝ង់ប៝នជេៈ នតុមនតីឞូតាញីសរាបុនខាន់ពាង់នើម នទ្រែលមាមឞើសងក៝ចនាវមហែមហានអ្វែសមានាវកោរាញឞ្រាសម៝ត់អ្វាញ់ នអ៝ប់មាជានឞាសទឹងលែៈនាវជីអាប់នតីលដ៝ង់។
36 ត៝ត់មាឆៃផូងប៝នលាន ឞ្រាសយេឆូ គែសនាវយោៈនអាចមាខាន់ពាង់ទុតហោ យ៝រលាសខាន់ពាង់រាវៃតានូយ្សនហ៝ម់មោហោមគែសឆ្វាន តឹមឞានមាផូងឞែឞ្យាប់អីមោគែសឞូនុយ្សម៝ត់អ្វាញ់។
37 ជេសរីឞ្រាសយេឆូ លាសមាមពោលអ៝សម៝នពាង់៖ “ហើយអ៝សម៝ន គែសអ៝ក់ឞូនុយ្សអុចអ្យាត់នាវមហែមហានអ្វែស ខាន់ពាង់តឹមឞានមាឞាលែៈទុមអីអ៝ក់ងាន់។ ឞូនុយ្សមឞើសងក៝ចនាវមហែមហានអ្វែសតឹមឞានមាឞូនុយ្សរែក តីសមាឞូនុយ្សអីនៃដេៈទើម។
38 លាសនទ្រីទាន់កោរាញឞ្រាសនើមអីតើមឞានៃញជ្វាល់ឞូនុយ្សអាអេងជឹត កើលរែកឞាទុមអីនៃ”។