នាវ
រូត
អីឞូអូរឞ្រីមោអាប់ជេងអីអូកាដាច់ដាវីត
នាវឞោកអ៝ន់ឞូគឹតល៝រ
ឞ៝ន់មោគឹតអោសឞូម៝សអីនាក់ញចីសឆ៝ម់បុតរូតអ្យា យើនមាឞូមឹនលាស ឞូញចីសឆ៝ម់បុតអ្យាឞើសកើយកាដាច់ដាវីតលែៈជានកាដាច់ ជេងតានាម់ ១០១០ អេល៝រមាឞ្រាសយេឆូទែស។
ទឹងលែៈនាវងក៝ចតាឆ៝ម់បុតអ្យាគែសតារានោកផូងអីឆ្រាអែលអេហ៝ៈគែសកាដាច់ តានោកឆ៝ម់បុតនាវកោរាញឞ្រាសងើយ«ផូងកោរាញផាតទោយ្ស»(រូត ១:១)។ ឆ៝ម់បុតអ្យាងើយមាអូចែកាដាច់ដាវីត ជេងនាវងក៝ចមានាវយោៈនអាច នាវរ៝ង់រាប់ជាប់ នអ៝ប់មានាវច្វាយ។ តាឆ៝ម់បុតអ្យា ឞូនុយ្សអាបាៈញហើនាវរ៝ង់រាប់ជាប់ នអ៝ប់មានាវយោៈនអាចអីកោរាញឞ្រាសគែសមាផូងប៝នលានពាង់នើម៖ ឞូអូររូតអីជេងផូងមោអាប់ញហើនាវអីនៃអ៝ន់មានាអោមីអីព៝ពាង់ ឞោអាស ញហើនាវអីនៃមារូត ជេសរីកោរាញឞ្រាសញហើនាវរ៝ង់រាប់ជាប់ពាង់នើមអ៝ន់មាខាន់ពាង់ទាទេ។ ឞ៝លលាសឞើសនតើមនើស កោរាញឞ្រាសមោអោសអ៝ន់ផូងមោអាប់លាប់ជេងផូងប៝នលានអីឆ្រាអែលអីផូងប៝នលានពាង់នើម(នាវវៃ ២៣:៣) កោរាញឞ្រាសហោមរ៝ងឞូអូររូត យ៝រមាពាង់គែសនាវរ៝ង់រាប់ជាប់។ ឞូអូររូតជេងនាវនតឹតអ្វែសមាទឹងលែៈឞូនុយ្សអីញឆីងមាកោរាញឞ្រាស យើនមាមោអោសទីផូងអីឆ្រាអែល។ នាវមឞើសងក៝ចតាឆ៝ម់បុតអ្យា អុចញហើលាស កោរាញឞ្រាសកើបខ្លៃមាឞូម៝សអីជានតឹងនាវអុចពាង់នើម ឞ៝លលាសឞូនុយ្សអីនៃមោទីផូងអីឆ្រាអែលកាដោយដ៝ង់ ជេសរីពាង់អ៝ន់នាវគែសជេងមាឞូម៝សអីរ៝ង់មាពាង់រាប់ជាប់។
នាវកោរាញឞ្រាសនទ្រាប់នាវរាក្លាយ្សមាទឹងលែៈឞូនុយ្ស
រូតគុអ៝សក៝នឞូក្លោ នាវអីនៃគែសទូនតីលនាវខ្លៃងាន់តានាវងក៝ចអ្យា យ៝រលាសជឹតនាប់តៃ អីក៝នពាង់នៃជេងអីចែកាដាច់ដាវីត ជេសរីកាដាច់ដាវីតជេងអីចែឞ្រាសយេឆូឞ្រាសយេឆូជេងនើមរាក្លាយ្សទឹងលែៈឞូនុយ្សឞើសនាវតីស។ យ៝រមានាវរ៝ង់រាប់ជាប់រូត កោរាញឞ្រាសយើកមាពាង់អីឞូអូរមោទីផូងអីឆ្រាអែល នអ៝ប់មាញចីសរាញារូតតានាវងក៝ចយៅផូងអូចែឞ្រាសយេឆូនើម (មាថាយ ១:៥)។
មឞើសនាវខ្លៃតាងកោៈតាឆ៝ម់បុតអ្យា
១:១-២២ រានាក់វ៝ល់ឞូអូរនាអោមីលោសឞើសឞ្រីអីឆ្រាអែល ហាន់តាឞ្រីមោអាប់ ជេសរីនាអោមីព្លឹឆឹតតាឞ្រីពាង់នើមនទ្រែលមារូតអីមាន់ពាង់។
២:១—៣:១៨ នាអោមី នអ៝ប់មារូតតាឞ្រីយូដា
៤:១-១២ នាវតឹមនអាប់រូតដាសឞោអាស
៤:១៣-២២ នាវងគ្លែៈទុត នទ្រែលមានាវងក៝ចយៅក៝នឆៅឞោអាស នទ្រែលមារូត
១
គែសនាវត៝ត់ជេរតារានាក់វ៝ល់អេលីមាលេក
១ រានោកកាល់អែតាឞ្រីអីឆ្រាអែល អេល៝រមាគែសកាដាច់ គែសកោរាញផាតទោយ្សទើមកើលម៝ត់អ្វាញ់ប៝នលានតាឞ្រីអីនៃ។ នោកនៃគែសឞារហៃអូរឆាយគុតាប៝នបេតលេហឹម តាឞ្រីយូដា ។ តាឞ្រីនៃគែសនាវត៝ត់ជីឆ៝ត់ជីង៝តក្វ៝ង់ឞេងឞ្រីងាន់។ យ៝រមាគែសនាវជីឆ៝ត់ជីង៝តក្វ៝ង់អីនៃខាន់ពាង់លែវឞារហៃក៝នឞូក្លោខាន់ពាង់ទូឞើសឞ្រីយូដា ហាន់គុជឹតឞ្រីមោអាប់ ។
២ អីឆាយនៃរាញាអេលីមាលេក អីអូរពាង់រាញានាអោមី អីក៝នពាង់រាញាមាលោន នទ្រែលមាកីលីយោន ខាន់ពាង់តាៈឞើសឞាល់មពោលអេព្រាតា តាប៝នបេតលេហឹម តាឞ្រីយូដា ជេសរីខាន់ពាង់គុតាឞ្រីមោអាប់ ។
៣ ត៝ត់អាកើយរី អេលីមាលេក ខឹត នត្លើយអូរនទ្រែលមាក៝នពាង់ឞារហៃអីនៃ។
៤ ជេសរីក៝នពាង់ឞារហៃអីនៃឆ៝ៈអូរឞើសផូងមោអាប់ ទូហ្វេរាញាអោរពា ទូហ្វេជឹតរាញារូត ខាន់ពាង់គុតាឞ្រីអីនៃក្លាប់លាសគែសជឹតនាម់។
៥ ជេសរីមាលោន នទ្រែលមាកីលីយោន នៃខឹតដ៝ង់ នត្លើយអីមេៈគុទូហ្វេអេង ខឹតលែៈក៝នលែៈឆាយរ៝។
នាអោមី នទ្រែលមាន់ពាង់ព្លឹឆឹតតៃតាប៝នបេតលេហឹម
៦ គែសទូនាររីនាអោមី លឺតាង់ឞូងក៝ចលាសឞ្រាសយេហោវា លែៈកើលប៝នលានផូងអីឆ្រាអែល អីប៝នលានពាង់នើមអ៝ន់គែសជេងគែសនទើឆោងឆាត៝ង់តាឞ្រីយូដា ។ ជេសរីពាង់នទ្រែលឞារហៃអីមាន់នៃនទ្រាប់នទ៝សនទើព្លឹឆឹតជឹតប៝នពាង់នើមរី។
៧ ពែនុយ្សខាន់ពាង់ទូឞើសនតុកនៃហាន់រ៝ៈត្រ៝ងងាយឆឹតតៃតាឞ្រីយូដា ។
៨ ជេសរីនាអោមី លាសមាអីមាន់ពាង់ឞារហៃនៃ៖ “ខាន់បែហាន់ឆឹតតឹងមេៈឞឹខាន់បែនើមអារីទោស! ខាន់បែនើសលែៈជាននាវអ្វែសមាក៝នគ៝ប់លែៈខឹត នទ្រែលមាគ៝ប់នើមដ៝ង់។ គ៝ប់ទាន់ឞ្រាសយេហោវាជាននាវអ្វែសមាខាន់បែកើតនៃដ៝ង់។
៩ គ៝ប់ទាន់ឞ្រាសយេហោវាអ៝ន់ខាន់បែឞារហៃអ្យាគែសឆាយតៃ រេសជេងអ្វែសដាប់មពាន់តារានាក់វ៝ល់”។ ជេសរីអីព៝ចុមនតិញអីមាន់ពាង់ឞារហៃនៃតឹងមានាវវៃខាន់ពាង់។ ខាន់ពាង់ឞារហៃនៃញុមលុងងាន់
១០ ងើយមាអីព៝ពាង់លាស៖ “ហេនមោអុចអោសតឹមងខាស! ហេនអុចតឹងគុនទ្រែលបែ នទ្រែលមាប៝នលានបែដ៝ង់”។
១១ តីសមានាអោមី មោរ៝ម៖ “ហើយក៝ន! ខាន់បែព្លឹឆឹតអារីហ៝ម់ ម៝សនាវខាន់បែអុចឞ្រោៈនទ្រែលគ៝ប់? គ៝ប់លែៈអ៝ក់នាម់ហើយ មោហោមអោសឞាៈក៝នមានត្រ៝ៈឆាយខាន់បែតឹងនាវវៃឞ៝ន់។
១២ ព្លឹឆឹតអារីហ៝ម់! យ៝រលាសគ៝ប់លែៈរាញហើយ្សលិចហោមគែសឆាយតៃអោស។ ឞ៝លលាសគ៝ប់ហោមរានើមគែសក៝ន លាសគែសឆាយគុដាសគ៝ប់តាមាង់អ្យា ជេសរីគែសឞារហៃក៝នឞូក្លោ
១៣ លាសនទ្រីអើមខាន់បែអុចក៝ប់ខាន់ពាង់ត្រុយ្សក្វ៝ង់លាស? អើមខាន់បែអុចគុទើមលិចអុចឆ៝ៈឆាយលាស? មោអោស! ជានកើតរីលិចទីអោស! ឞ្រាសយេហោវាលែៈតឹមរាទ៝ង់ដាសគ៝ប់ជានអ៝ន់នាវរេសគ៝ប់អ៝តនូយ្សអ៝តនហ៝ម់រាលាវមាខាន់បែនៃជឹត”។
១៤ ជេសរីឞារហៃអីមាន់ពាង់នៃញុមលុងទូតឹជឹត អីមាន់រាញាអោរពា នៃចុមនតិញព៝ពាង់ទូតឹជឹត យ៝រមាពាង់លែៈអុចព្លឹឆឹតតារានាក់វ៝ល់ពាង់នើម យើនមាអីមាន់រាញារូត នៃក្វាន់រាទ៝ង់ព៝ពាង់ហោងាន់ មោអុចអោសងខាសដាសពាង់។
១៥ នាអោមី ងើយមារូត ៖ “ហើយមាន់ មាន់បែលែៈព្លឹឆឹតជ៝យនទុលមពោលពាង់នើម ព្លឹឆឹតយើកមឞាសឞ្រាសពាង់នើមដ៝ង់។ អ៝ន់បែតឹងមាន់បែអារីហ៝ម់!”
១៦ ជេសរីរូត អើស៖
“ទាន់បែលើយអោសនត្រុតគ៝ប់ទូឞើសបែ
លើយអោសឞ្វៃគ៝ប់តឹងបែ!
អាសនតុកបែហាន់ គ៝ប់ហាន់តារីដ៝ង់
អាសនតុកបែគុ គ៝ប់គុតារីដ៝ង់
ផូងប៝នលានបែជេងផូងប៝នលានគ៝ប់
ឞ្រាសអីបែយើកមឞាសជេងឞ្រាសអីគ៝ប់យើកមឞាសដ៝ង់។
១៧ អាសនតុកបែខឹត គ៝ប់ខឹតតារីដ៝ង់
ជេសរីឞូត៝ប់គ៝ប់តានតុកនៃដ៝ង់។
នាវខឹតទើមទើយតឹមងខាសគ៝ប់ឞើសបែ
លាសមោងាន់
ទាន់ឞ្រាសយេហោវា តេៈទោយ្សក្វ៝ង់មាគ៝ប់ទោស!”
១៨ ត៝ត់តាង់អីមាន់ពាង់អុចគុនទ្រែលទុតហោកើតនទ្រី នាអោមី រ៝ម ជេសរីគុអ្យាត់ឆាក់រាក្លាក់។
១៩ ជេសរីខាន់ពាង់ឞ្រោៈត៝ត់តាប៝នបេតលេហឹម។ នោកខាន់ពាង់ឞារហៃត៝ត់តាប៝ននៃលែៈរាងោចប៝នលាននទ្រ៝ត់ទាទេ ជេសរីគែសផូងឞូអូរតឹមអោបលាស៖ “យោសអីនៃ នាអោមី ងាន់លាសហ្យាស?”
២០ យើនមាពាង់អើសលាស៖
“លើយហោមក្វាល់គ៝ប់«នាអោមី »ជឹតអោស
ក្វាល់គ៝ប់«មារា »ហ៝ៈ
យ៝រលាសនាអោមី គែសនាវខ្លៃ«នាវរាម់មអាក» តីសមាមារា គែសនាវខ្លៃ«នទើតាង់ខែរងាន់»។ យ៝រលាសកោរាញឞ្រាសអីគែសនាវទើយទុតព្រេសទុតក្វ៝ង់ជានអ៝ន់នាវរេសគ៝ប់អ៝តនូយ្សអ៝តនហ៝ម់។
២១ គ៝ប់ទូតាៈឞើសអ្យានើសគែសនទើអាប់នតីល
តីសមាឞ្រាសយេហោវាអ៝ន់គ៝ប់ព្លឹឆឹតតាអ្យាជ៝ង់លាងមពាងតីទើម
ម៝សនាវហោមក្វាល់គ៝ប់ «នាអោមី »?
ឞ្រាសយេហោវា តឹមរាទ៝ង់ដាសគ៝ប់
ជេងកោរាញឞ្រាសអីគែសនាវទើយទុតព្រេសទុតក្វ៝ង់អ៝ន់គែសនាវជេរជ៝ត់មាគ៝ប់!”
២២ នទ្រីនាវនាអោមី ព្លឹឆឹតតាប៝នពាង់នើម លែវនអ៝ប់មាអីមាន់ពាង់តាៈឞើសឞ្រីមោអាប់ ឆឹតនហាញដ៝ង់។ ខាន់ពាង់ឞារហៃត៝ត់តាប៝នបេតលេហឹម តាខៃនតើមរែកឞាព្រាង់ ។