3
ឆ៝ម់បុតញជ្វាល់អ៝ន់ផូងញឆីងតាប៝នឆារដីស
1 ជេសរីពាង់លាសជឹត៖ “អ៝ន់មៃញចីសញជ្វាល់អ៝ន់មាកោរាញផូងញឆីងតាប៝នឆារដីស លាសកើតនអា៖ «ពាង់អីគែសឞ្រាសហ្វេងអ្វែសកោរាញឞ្រាសនើម នទ្រែលមាគែសពើសអឹមាញ់លាស៖ «គ៝ប់គឹតនាល់នទើអីមៃជាននៃ ឆាក់មៃឞូលឺរេសងាន់ តីសមាមៃតឹមឞានមាលែៈខឹត!
2 អ៝ន់មៃកាសរាងាល់ហ៝ម់! អ៝ន់កាសគឹតមានទើអីគែសនាវខ្លៃមាគ៝ប់ អ៝ន់នាវញឆីងមៃអីលែៈឞើយមារ៝សនៃ អ៝ន់គែសនាវទាង់មហែតៃទូតឹជឹត យ៝រលាសគ៝ប់អេហ៝ៈឆៃអោសនទើអីមៃជាននៃជេងទីកែសតាឞើសនាប់មាត់កោរាញឞ្រាសអីឞឹគ៝ប់។
3 លាសនទ្រីអ៝ន់មៃកាសគឹតឆាក់ហ៝ម់ នទើអីមៃលែៈឆ៝ៈទើនជេស នទើអីមៃលែៈតាង់ជេស ជេសរីអ៝ន់មៃតឹងជានទោ នទ្រែលមារាគ៝ល់លើយហ៝ម់នូយ្សនហ៝ម់អ្យើស។ លាសមៃមោអោសកាសរាងាល់ គ៝ប់មរាវាច់ផាតទោយ្សអាមៃមោគឹតអោសម៝សម៝ង តឹមឞានមាឞូមោគឹតដ៝ង់ម៝សម៝ងឞូនុយ្សនតុងហាន់នតុង។
4 យើនមាតាប៝នឆារដីស ហោមគែសឞូនុយ្សអាបាៈតាផូងខាន់អៃមៃមោគែសអោសជានតីសតឹមឞានមាជានខ៝អាវបឹរាមាវ ខាន់ពាង់មរាហាន់នទ្រែលគ៝ប់ នអ៝ប់មាញឆ៝សខ៝អាវងលាង យ៝រលាសខាន់ពាង់អីនៃជេងទីមាញឆ៝សខ៝អាវអីនៃ។
5 ឞូម៝សអីទើយមានាវអ្យើស ពាង់អីនៃមរាញឆ៝សខ៝អាវងលាងកើតខាន់ពាង់ដ៝ង់។ នហ៝មាគ៝ប់មោមរាជូតរាញាពាង់ឞើសឆ៝ម់បុតនាវរេសនហ៝រ៝ គ៝ប់មរាមឞើសពាង់អីនៃជេងអ៝សម៝នគ៝ប់តាឞើសនាប់ឞឹគ៝ប់ នទ្រែលមាតាឞើសនាប់មាត់ផូងតោងពារ់ឞឹគ៝ប់នើមដ៝ង់។
6 ឞូម៝សអីគែសតោរអ៝ន់ពាង់អ្យាត់ងាន់ហ៝ម់នាវឞ្រាសហ្វេងអ្វែសទែងើយអ៝ន់មាទឹងលែៈផូងញឆីងអាប់នតុក»»”។
ឆ៝ម់បុតញជ្វាល់អ៝ន់មាផូងញឆីងតាប៝នផីលាដិលផៀ
7 ជេសរីពាង់លាសជឹត៖ “អ៝ន់មៃញចីសញជ្វាល់អ៝ន់មាកោរាញផូងញឆីងតាប៝នផីលាដិលផៀ លាសកើតនអា៖
«នើមអីក្ល៝សអ្វែស នើមអីរាប់ជាប់
ពាង់អីញអោតក៝នឆ៝កាដាច់ដាវីត អីញហើពាង់គែសនាវទើយមាម៝ត់អ្វាញ់
លាសពាង់ពើកមពោង មោគែសអោសទូហ្វេទើយនតឹល
ជេសរីលាសពាង់នតឹលមោគែសដ៝ង់ទូហ្វេទើយពើក ពាង់លាស៖
8 «គ៝ប់គឹតនាល់នទើអីមៃជាននៃ។ ល៝ង់ គ៝ប់លែៈពើកមពោងឞើសនាប់មៃជេស មោគែសអោសទូហ្វេទើយនតឹល។ ឞ៝លលាសមៃគែសនាវទើយដេៈទើម មៃហោមញអោតនាវគ៝ប់ដ៝ង់ មៃមោអោសរាលាច់លាសមោគឹតនាល់គ៝ប់។
9 ផូងឞូនុយ្សតាញីសរាបុនផូងអីឆ្រាអែល ញីសរាបុនអីនៃជេងនទើឆាតាង់ អីកោរាញមពោលឞ្រាសអ្យើស ជេសរីផូងអីនៃលាសអេងឆាក់ខាន់ពាង់នើមជេងផូងអីឆ្រាអែល យើនមាខាន់ពាង់មោអោសជេងផូងអីឆ្រាអែល ងាន់ ខាន់ពាង់មរោស។ គ៝ប់មរាអ៝ន់ទឹងលែៈខាន់ពាង់អីនៃហាន់ពាន់តាជ៝ង់មៃ ជេសរីខាន់ពាង់មរាគឹតលាសគ៝ប់លែៈរ៝ង់ងាន់មាមៃ។
10 យ៝រមាមៃលែៈអ្យាត់នាវគ៝ប់ដាៈអ៝ន់មៃញឆ្រោយ្សទើននាវជេរ គ៝ប់មរាញជ្រាង់មៃអ៝ន់ទើយតានារគែសនាវជេរលាមនែសនតូអ្យា នាវជេរអីនៃគៃមារាល៝ងទឹងលែៈឞូនុយ្សតានែសនតូអ្យា។
11 គ៝ប់មរាវាច់គើញ ម៝សនាវអីមៃលែៈគែស អ៝ន់មៃញអោតអ៝ន់ន៝ប់ គៃមាលើយអោសអ៝ន់ឞូពីតនទើងខោមមៃនើម។
12 ឞូម៝សអីទើយឞើសនាវអ្យើស គ៝ប់អ៝ន់ពាង់អីនៃជេងទូមល៝ម់មែសតាញីសជានឞ្រាសកោរាញឞ្រាសឞឹគ៝ប់នើម ជេសរីពាង់គុតានតុកនៃនហ៝រ៝ មោអោសខាច់លោសជឹត។ គ៝ប់មរាញចីសរាញាកោរាញឞ្រាសឞឹគ៝ប់នើមតាឆាក់ពាង់ នទ្រែលមាញចីសរាញាប៝នកោរាញឞ្រាសឞឹគ៝ប់នើមតាពាង់ដ៝ង់។ ប៝នអីនៃជេងប៝នយេរូឆាលឹម មហែតាៈឞើសកាលើត្រោកនតុកកោរាញឞ្រាសឞឹគ៝ប់នើម។ ជេសរីគ៝ប់ញចីសរាញាមហែគ៝ប់នើមតាពាង់អីនៃដ៝ង់។
13 ឞូម៝សអីគែសតោរ អ៝ន់ពាង់អ្យាត់ងាន់ហ៝ម់នាវឞ្រាសហ្វេងអ្វែសទែងើយអ៝ន់មាទឹងលែៈផូងញឆីងអាប់នតុក»»”។
ឆ៝ម់បុតញជ្វាល់អ៝ន់ផូងញឆីងតាប៝នលាវដីឆេ
14 ជេសរីពាង់លាសជឹត៖ “អ៝ន់មៃញចីសញជ្វាល់អ៝ន់មាកោរាញផូងញឆីងតាប៝នលាវដីឆេ លាសកើតនអា៖ «អ្យានាវងើយនើមអីឞូក្វាល់«អាមែន »ដ៝ង់ នើមអីរាប់ជាប់មឞើសងក៝ចនាវងាន់ទើម ពាង់ជានកោរាញមាទឹងលែៈនទើអីកោរាញឞ្រាសលែៈញជេង ពាង់លាស៖
15 «គ៝ប់គឹតនាល់នទើអីមៃជាននៃ មៃតឹមឞានមាទាកពាសព៝ត់ពាសឞ្លាទោសមានអីក គែសនាវខ្លៃលាស មៃមោអោសតឹមរាទ៝ង់មាគ៝ប់ មៃមោដ៝ង់ញឆីងមាគ៝ប់លែៈនូយ្សនហ៝ម់។ គ៝ប់អុចងាន់មៃទោសមោលាសនអីក!
16 យ៝រមាមៃពាសព៝ត់ពាសឞ្លា ទោសមោទោស នអីកមោនអីកកើតនៃ កើតនទ្រីគ៝ប់មរាជ្រីសលើយមៃឞើសមឞូងគ៝ប់រ៝។
17 មៃកើបនហីអេងឆាក់ «អោ! គ៝ប់ជេងឞូនុយ្សនទ្រ៝ង់ងាន់ គ៝ប់គែសទ្រាប់នទើទុតអ៝ក់ គ៝ប់មោហោមអោសខាច់មានទើជឹត»។ យើនមាមៃមោអោសគឹតឆាក់មៃគែសនាវរេសរាញាល់ អីទីមាយោៈនអាច ក្រ៝អ៝អាចងាន់ ចែសមាត់ គុលាហោក។
18 នទ្រីទឹងគ៝ប់លាសមាមៃ៖ អ៝ន់មៃរាវាត់មាយ្សឞើសគ៝ប់ហ៝ៈ មាយ្សទុតអ្វែសអីលែៈជេសគុចងក្រែតតាអុញ គៃមាមៃជេងឞូនុយ្សនទ្រ៝ង់ងាន់ ជេសរីរាវាត់ឞ៝កអាវគ៝ប់ឞាសដីតឞូគុលាហោក នទ្រែលមារាវាត់ទាកឆីតេៈមាត់ឞើសគ៝ប់ដ៝ង់ គៃមាមៃអ្វាញ់ឆៃក្ល៝សរាសវាស។
19 ទឹងលែៈឞូនុយ្សអីគ៝ប់រ៝ង់ គ៝ប់នទុយ្សខាន់ពាង់ គ៝ប់នតុមនតីនអ៝ប់មាកើលជានតឹងនាវគ៝ប់ដាៈ។ លាសនទ្រីអ៝ន់គើយ្សហ៝ម់ ជេសរីរាគ៝ល់លើយនូយ្សនហ៝ម់អ្យើស!
20 ល៝ង់គ៝ប់គុឞើសទីសមពោង នអ៝ប់មាក្វាល់ដ៝ង់ លាសឞូម៝សតាង់ឞ៝រ់គ៝ប់ ពើកមពោងអ៝ន់គ៝ប់គ៝ប់លាប់គុនទ្រែលពាង់ ជេសរីឆោងឆានទ្រែលពាង់ ពាង់នទ្រែលគ៝ប់ដ៝ង់។
21 ឞូម៝សអីទើយមានាវអ្យើស គ៝ប់អ៝ន់ពាង់គុតារានើលកាដាច់នទ្រែលគ៝ប់ តឹមឞានមាគ៝ប់លែៈទើយជេស ជេសរីគុតារានើលកាដាច់នទ្រែលឞឹគ៝ប់ដ៝ង់។
22 ឞូម៝សអីគែសតោរ អ៝ន់ពាង់អ្យាត់ងាន់ហ៝ម់នាវឞ្រាសហ្វេងអ្វែសទែងើយអ៝ន់មាទឹងលែៈផូងញឆីងអាប់នតុក»»”។