12
Romio Jesús cũ'ana okoma'ña ro'vesi'ere kʉamʉ
(Mt 26.6-13; Mr 14.3-9)
1 Repaʉ Jesús seirepaumucujña pascuarʉmʉ tĩ'añe karatona Betania vʉ'ejoopona saisi'kʉa'mʉ, repaʉji vasoʉna Lázaro vajʉraisi'kʉ pa'ijoopona.
2 Sakʉna repajoopo cana, pãipi chi'i Jesuni pojoa'jʉ chini ãure cho'osinaa'me. Chi'irena Martapi ãure ãukona Jesuna'me ñu'ijʉ ãisinaa'me repana. Lázaro ũcuaja'che ũcuaʉna'me ñu'iʉ ãisi'kʉa'mʉ.
3 Ũcuarʉmʉ repao María trescientos gramos pa'ira'ka okoma'ñara'ka nardochi'a cho'osira'kajekʉ rʉa ro'isira'kapi Jesús cũ'ana ro've pi'ni repao rañapapi tʉ'nesõkaisi'koa'mo. Ro'veona vʉ'e peore ma'ñasʉsi'kʉa'mʉ.
4 Ũcuarʉmʉ Jesús neekʉ Judas Iscariote Jesuni cu'ache cho'oa'jʉ chini jo'kajaʉ i'kasi'kʉa'mʉ.
5 —¿Je'se pa'iʉna repao trescientorepare're ĩsisõjʉ kuri denariore're koorʉra'kare rupʉ jañosõo? Ira'kare ĩsisõ kuri koo chʉova'na pa'iva'nani ĩsirʉja'chere rurepapʉ cho'osõmʉ —chiisi'kʉa'mʉ repaʉ.
6 Chʉova'na pa'iva'nare oiche'te i'kamanesi'kʉa'mʉ repaʉ. Rupʉ ñaaʉjekʉ jã'aja'ñe i'kasi'kʉa'mʉ. Chʉkʉna Jesús neena chi'iche kuri paakaiʉ si'arʉmʉ te'ere'rechi'a siasõkaiʉ pa'isi'kʉa'mʉ repaʉ Judas.
7 Jã'aja'ñe i'kaʉna Jesús i'kasi'kʉa'mʉ.
—Iko cho'oche ʉ̃semanejʉ̃'ʉ. Chʉ'ʉpi jũnisõʉna chʉ'ʉre tãumucuse chʉ'ʉ ca'nivʉ'te ro'vejara'kare care'va paamo repao.
8 Chʉova'na pa'iva'na mʉsanʉkonare si'arʉmʉ ja'me pa'ijava'naa'me. Jã'ajekʉna repanare si'arʉmʉ re'oja'che cho'okaijʉ pa'ire'oja'mʉ mʉsanʉkonare. Chʉ'ʉta'ni mʉsanʉkonare si'arʉmʉ ja'me pa'imaneja'mʉ. Jã'ajekʉna chʉ'ʉre si'arʉmʉ jã'aja'ñe cho'okaicu'aja'mʉ mʉsanʉkonare —chiisi'kʉa'mʉ repaʉ.
Phairipãi Lázaro'te vanisõñu chiiche'te kʉamʉ
9 Ũcuarʉmʉ judíopãi jainʉko Jesús Betania vʉ'ejoopo pa'iche'te asa saniasome repaʉni ñañu chini. Ũcuachi'a jũnisõʉna Jesús vasosi'kʉni Lázaroni ñañu chiniasome repana.
10-11 Jesús repaʉ'te vasosi'ere asa judíopãi jainʉko Jesure cuasajʉ jovoasome. Jã'ajekʉna phairipãi chʉ̃'ʉna, “Mai che'choche pãi jainʉko ũhasõ Jesuni cuasajʉ jovome”, chini pe'rujʉ Lázaroni vanisõñu chiniasome, Jesure vanisõñu chiicheja'che.
Jerusalén vʉ'ejoopo Jesús sani tĩ'asi'ere kʉamʉ
(Mt 21.1-11; Mr 11.1-11; Lc 19.28-40)
12 Ũcuarʉmʉ judíopãi repana fiestaji pascuarʉmʉpi tĩ'api'rakʉna Jerusalén vʉ'ejoopona jainʉko maniasome. Mani pa'ijʉ jo'e apeñatatona Jesús raijache asaasome repana.
13 Asa pũti kare veri eta repaʉni tijña ʉjachʉ'opi ija'che i'kasinaa'me repana:
—Dios peore masikʉ'mʉ. Ikʉre Israelpãire chʉ̃'ʉa'kʉ chini repaʉ Raosi'kʉre re'oja'che cho'okaaʉ —chiisinaa'me repana.
14 Ũcuarʉmʉ repaʉ Jesús burrova'ʉre jñaa tuhisi'kʉa'mʉ. Dios chʉ'o aperʉmʉ tocha jo'kasi'e kʉache cho'osi'kʉa'mʉ. Ija'che kʉamʉ repa:
15 Ũcuanʉko vajʉchʉma'ñe pa'ijʉ̃'ʉ mʉsanʉkona Jerusalén vʉ'ejoopo cana.
Mʉsanʉkonare chʉ̃'ʉkʉ'te burrochĩiva'ʉni tuhiʉ raiʉna ñajʉ̃'ʉ,
chiimʉ repa tocha jo'kasi'e.
16 Reparʉmʉ chʉkʉna Jesús neena, “Dios chʉ'o kʉache'te cho'ome ina ikʉre”, chiimanesinaa'me. Repaʉ Jesús jũni vajʉrani cʉnaʉmʉ mʉisirʉmʉta'ni repa tocha jo'kasi'ere asamasijʉ, “Repa tochasi'e kʉache cho'osinaa'me pãi Jesure”, chiisinaa'me chʉkʉna.
17 Pãi Jesuni ja'me pa'ijʉ repaʉji Lázaroni jũnisõ tãcojñosi'kʉni soiʉna vajʉrani etaʉna ñasina chekʉnare kʉajʉ pa'isinaa'me.
18 Diochi'a cho'omasiche Jesús cho'oche kʉajʉna asanajejʉ etasinaa'me repana pãi repaʉni tijñañu chini.
19 Jã'aja'ñe cho'ojʉna ña sãiñechi'a i'kasinaa'me fariseopãi.
—Rʉa cu'amʉ ija'che pa'ito. Ñajʉ̃'ʉ. Pãi ũcuanʉko repaʉ'te jovome. Ʉ̃secu'amʉ jã'aja'ñe cho'oto —chiisinaa'me repana.
Griegopãi Jesure ku'esi'ere kʉamʉ
20 Fiestarʉmʉjekʉna Dios cho'okaisi'ere cuasajʉ pojoñu chini Jerusalén vʉ'ejoopona sani pa'inare griegopãi sani ja'me pa'isinaa'me.
21 Pa'ijʉ Galilea cheja cajoopo Betsaida vʉ'ejoopo cakʉre Felipe'te mʉa rʉa i'kaasome repana griegopãi.
—Jesuni ñañu chiime chʉkʉna —chiniasome repana.
22 Chitena asa mʉa Andreni kʉaasomʉ repaʉ. Kʉa ũcuaʉna'me Jesuni kʉañu chini mʉaasomʉ repaʉ.
23 Kʉarena asa Jesús i'kaasomʉ.
—Chʉ'ʉ Dios Raosi'kʉ pa'iche'te pãi jainʉko masirʉmʉ tĩ'acuhaja'mʉ. “Rʉa masiʉ'mʉ ikʉ”, chiijanaa'me pãi chʉ'ʉre.
24 Ija'chea'me: Ãura'karʉã tãru charo joimʉ. Repacaãpi jonisõmaneni aineema'mʉ. Jonisõni ainee pi'ni repañʉ rʉa kʉ̃ija'mʉ. Ũcuarepaa'me jã'a.
25 Ũcuaja'che pãiʉ ũcuaʉakʉji repaʉ chiichechi'a cho'ora chiikʉ cu'ache pa'iʉ Dios pa'icheja saimaneja'mʉ. Pãiʉ Dios chʉ̃'ʉñe cho'ora chiikʉta'ni re'oja'che pa'iʉ repaʉ jũnisõsirʉmʉ Dios pa'ichejana ai sani re'oja'che pa'ija'mʉ.
26 Chʉ'ʉ chʉ̃'ʉñe cho'oñu chiinare, “Chʉ'ʉni jovojʉ̃'ʉ”, chiimʉ chʉ'ʉ. Chʉ'ʉre jovoni Dios pa'ichejare sani chʉ'ʉna'me pa'ijanaa'me repana. Chʉ'ʉ chʉ̃'ʉñe cho'onare re'oja'che cho'okaija'mʉ Dios, “Re'onaa'me ina”, chini —chiniasomʉ repaʉ.
Jesús repaʉ chuenisõjañere kʉamʉ
27 Ũcuarʉmʉ Jesús ija'che i'kaasomʉ:
—Chura rʉa sʉma'mʉ chʉ'ʉre. Ja'kʉre, ¿je'se chiija'che chʉ'ʉ? “¿Chʉ'ʉre ti'jñejañe cu'ache ʉ̃sekaijʉ̃'ʉ”, chiija'che chʉ'ʉ? Pãara. Jã'are cho'ocojñora chini cajesi'kʉa'mʉ chʉ'ʉ —chiniasomʉ.
28 Ũcuarʉmʉ Pʉka'kʉre ija'che i'kasi'kʉa'mʉ repaʉ:
—Ja'kʉ, mʉ'ʉ si'ache cho'omasiche'te cho'o ñora chini mʉ'ʉre ʉache cho'ojʉ̃'ʉ chʉ'ʉre —chiisi'kʉa'mʉ repaʉ.
Chikʉna cʉnaʉmʉpi chʉ'o i'kache asosi'kʉa'mʉ.
—Chʉ'ʉ masiche si'ache cho'o ñocuhasi'kʉa'mʉ chʉ'ʉ. Jo'e cho'o ñora —chiisi'kʉa'mʉ Dios.
29 I'kaʉna asa pãi te'ena ija'che i'kasinaa'me:
—Okocurucosomʉ jã'a —chiisinaa'me.
Chekʉnata'ni,
—Angelpi ikʉni i'kacosomʉ jã'a —chiisinaa'me.
30 Chitena Jesús jo'e i'kasi'kʉa'mʉ.
—Chʉ'ʉpi asaa'kʉ chini i'kasi'ema'mʉ jã'a. Mʉsanʉkonapi asaa'jʉ chini i'kasi'ea'me.
31 Chʉ'ʉre cuasamanajejʉ cu'ache pa'inare cu'ache ti'jñerʉmʉ tĩ'acuhamʉ. Ũcuachi'a cu'ache pa'ijʉ chʉ'ʉre cuasamanare chʉ̃'ʉkʉ'te vati aire ʉ̃serʉmʉ tĩ'acuhamʉ.
32 Chʉ'ʉre jẽ'jo nʉkosirʉmʉ chʉ'ʉpi soiʉna pãi si'achejña pa'ina chʉ'ʉni cuasajʉ jovojanaa'me —chiisi'kʉa'mʉ repaʉ.
33 Repaʉ'te kurususẽ'verona jẽ'jo nʉko vẽasõjañere repaʉ jã'aja'ñe i'kakʉ kʉasi'kʉa'mʉ.
34 Jã'aja'ñe i'kaʉna asa i'kasinaa'me pãi.
—Mai aipãi tocha jo'kasi'e Dios chʉ'o ija'che kʉamʉ:
Cristo Dios Raosi'kʉ jũnisõma'ñe ai pa'ija'mʉ,
chiimʉ. Jã'ata'ni mʉ'ʉ, ¿je'se pa'iʉna, “Pãire ja'me paaʉ chini Dios Raosi'kʉre jẽ'jo nʉkojanaa'me pãi”, chiikʉ? Jã'a pa'ito, Cristo chiicojñokʉ, ¿tĩiʉ'ʉ? —chiisinaa'me repana.
35 Chitena Jesús i'kasi'kʉa'mʉ.
—Chʉ'ʉ icheja cheja pa'inare pãi Miañeja'ñe Pa'ikʉ mʉsanʉkonare jmamakarʉ ja'me pani sanisõja'mʉ. Jã'ajekʉna chuta'a miarʉmʉna churana ku'ijʉ̃'ʉ mʉsanʉkona, ru'ru na'isõmaneñu chini. Ru'ru na'isõni ñamipi ku'ijʉ ma'api ñomaʉna cavesʉsõjanaa'me mʉsanʉkona.
36 Chʉ'ʉre Miañeja'ñe Pa'ikʉ'te chuta'a mʉsanʉkonare ja'me pa'irʉmʉna cuasajʉ̃'ʉ chʉ'ʉ pa'icheja'che re'oja'che pañu chini —chiisi'kʉa'mʉ repaʉ.
Jã'aja'ñe i'ka pi'ni sani katisõsi'kʉa'mʉ repaʉ Jesús.
Judíopãi Jesure cuasama'ñere kʉamʉ
37 Repana ñajʉ'te Diochi'a cho'omasiche si'arʉmʉ cho'okʉ'teta'ni repaʉ'te Jesure cuasamanesinaa'me repana pãi.
38 Dios chʉ'o kʉakaisi'kʉ Isaías tocha jo'kasi'e kʉache cho'osinaa'me repana. Repaʉ tocha jo'kasi'e ija'che kʉamʉ:
Chʉ'ʉre Paakʉ, mai kʉache jachajʉ cuasama'me pãi.
Mʉ'ʉ masiche si'ache cho'o ñokʉ'teta'ni jachame pãi,
chiimʉ.
39 Pãipi cuasavesʉjʉna repaʉ Isaías cheke ija'che tocha jo'kaasomʉ:
40 Ñakocaã ñamava'naja'ñe paapʉ chini jo'kaasomʉ Dios.
Ũcuachi'a Repaʉ chʉ'o asavesache cho'oasomʉ repanare.
Diopi jã'aja'ñe cho'oʉna, “Ikʉ maire vasoja'mʉ”, chiimapʉ chʉ'ʉre raima'me repana,
chiiʉ tocha jo'kaasomʉ.
41 Diopi ñokʉna Jesús Masiʉ pa'iche ñasi'kʉjekʉ repaʉ pa'iche'te kʉakʉ jã'aja'ñe tocha jo'kaasomʉ Isaías maire.
42 Reparʉmʉ judíopãi jainʉko Jesuni cuhejʉ cuasamanesinaa'me. Chekʉnata'ni jachama'ñe cuasasinaa'me repaʉ'te. Ũcuachi'a repanare chʉ̃'ʉna te'ena cuasasinaa'me. Cuasanata'ni fariseopãire vajʉchʉjʉ kʉamanesinaa'me, “Kʉarena fariseopãipi asa mai judíopãi chi'ivʉ'e kakache'te ʉ̃sejʉ”, chini.
43 Ũcuachi'a repanare pãi pojoche'te na'a rʉa chiijʉ kʉamaneasome repana, “Kʉato pojoja'mʉ Dios maire”, chiimapʉ.
Jesús i'kache jachasi'e ro'i ro'ijachere kʉamʉ
44 Ũcuarʉmʉ Jesús ʉjachʉ'opi ija'che i'kasi'kʉa'mʉ:
—Pãi chʉ'ʉre cuasana chʉ'ʉrechi'a cuasama'me. Chʉ'ʉre Raosi'kʉre Diore ũcuachi'a cuasame repana.
45 Chʉ'ʉ pa'iche masina ũcuaja'che chʉ'ʉre Raosi'kʉ pa'iche masime.
46 Chʉ'ʉ Miañeja'ñe Pa'ikʉ chejana raisi'kʉa'mʉ, pãi chʉ'ʉre cuasanapi chijacheja pa'ina pa'icheja'che cu'ache pa'imanea'jʉ chini.
47 Chʉ'ʉ i'kache asanata'ni jachajʉ cho'omanare, “Jachasi'e ro'iche pa'imʉ”, chisa chini cajesi'kʉma'mʉ chʉ'ʉ. Chʉ'ʉre cuasanani chẽa paakʉ vati toa saiche'te ʉ̃sekasa chini cajesi'kʉa'mʉ chʉ'ʉ.
48 Jã'ata'ni pãi chʉ'ʉni cuhejʉ chʉ'ʉ i'kache asana jachajʉ cho'omanesi'e ro'ijanaa'me Dios pãi ũcuanʉko cho'osi'e ro'iche chʉ̃'ʉumucuse.
49 Chʉ'ʉchi'a cuasache'te i'kama'mʉ chʉ'ʉ. Ja'kʉ, chʉ'ʉre Raosi'kʉ kʉache'te i'kamʉ chʉ'ʉ.
50 Iere masimʉ chʉ'ʉ: Ja'kʉ kʉache'te chʉ'ʉpi i'kakʉna pãipi asa chẽa cho'ona Repaʉ pa'ichejana ai sani pa'ijanaa'me. Jã'ajekʉna Ja'kʉ chʉ'ʉre kʉache'techi'a i'kakʉ'mʉ chʉ'ʉ —chiisi'kʉa'mʉ repaʉ.