10
1 Asarepajʉ̃'ʉ, chʉ'ʉ majapãijana. Chʉ'ʉ rekocho ija'che chiiʉ Diore sẽemʉ chʉ'ʉ: “Chʉ'ʉ majapãi Israelpãi si'arʉmʉ mʉ'ʉna'me re'oja'che paapʉ”, chiimʉ chʉ'ʉ.
2 Repana pa'iche re'oja'che kʉamʉ chʉ'ʉ; Dios chiiche'te cho'oñu chiime repana. Jã'ata'ni Dios chiirepache cho'oñu chiinata'ni vesʉjʉ cho'oma'me repana.
3 Pãi cu'ache pa'ina Dios re'oja'chechi'a pa'inare care'vakaiche'te cuhejʉ cho'okaicojñoma'ñe repanachi'a cho'ocheji re'oja'che pañu chiime repana, Dios jo'kasi'ere cuhejʉ.
4 Aperʉmʉ pãi re'oja'che pañu chiinare Diopi chʉ̃'ʉʉna Moisés tocha jo'kasi'ere peore cho'oche paniasomʉ. Chura jã'aja'ñe cho'oche peomʉ ija'che cho'osi'ejekʉna: Pãire chʉ̃'ʉa'kʉ chini Dios Raosi'kʉ Jesucristoji cho'okaisi'kʉa'mʉ maire, Repaʉ'te cuasanani ũcuanʉkore re'oja'chechi'a pa'inare cho'ora chini.
5 Aperʉmʉ ija'che tochaasomʉ Moisés, pãi Dios chʉ̃'ʉ jo'kasi'ere cho'ojʉ Diopi ñato re'oja'che pañu chiina pa'iche'te kʉakʉ:
Pãi Dios chʉ̃'ʉ jo'kasi'ere peore masi cho'ona
Ũcuaʉna'me si'arʉmʉ re'oja'che pa'ijanaa'me,
chiimʉ. Jã'ata'ni pãi te'eʉjẽ'e Dios aperʉmʉ chʉ̃'ʉ jo'kasi'e peore masi cho'omanaa'me.
6 Diopi ñato mai Repaʉ'te cuasanata'ni re'onaa'me. Diore cuasanare Repaʉ'te re'oja'che ja'me pa'iche che'choche ija'che kʉamʉ:
Ija'che cuasamanejʉ̃'ʉ:
“¿Neepi cʉnaʉmʉ mʉni maire Cho'okaijaʉre Cristo'te casajanaa'ñe?”
7 Ũcuachi'a ija'che cuasamanejʉ̃'ʉ:
“¿Neepi jũ'isina pa'icheja caje Cristo'te vaso etuajanaa'ñe?”,
chiimʉ. Repaʉ Jesucristo chejana caje pa'iʉ jũni vajʉranicuhasi'kʉa'mʉ. Jã'ajekʉna jã'aja'ñe cuasache chiima'mʉ.
8 Dios chʉ'o ija'che kʉamʉ:
Mʉsanʉkona rekoñoãpi Dios chʉ'ore asamasiʉache cuasato masire'omʉ.
Ũcuare asa cuasajʉ cutujʉ pa'ime mʉsanʉkona,
chiimʉ. Dioni cuasaa'jʉ chini mai chʉ'vachʉ'oa'me jã'a.
9 Mʉsanʉkonapi Jesucristo'te jũniso tãcojñosi'kʉre Dios vaso etosi'ere masi cuasajʉ, “Jesucristo Dios Mamakʉ chʉ'ʉre Paakʉ'mʉ”, chiijʉ rekoñoãpi cuasani Dios pa'ichejana saijanaa'me.
10 Ija'chea'me: Dios Repaʉ'te masi cuasanare re'oja'chechi'a pa'inare cho'omʉ. Dioni masi cuasajʉ, “Jesucristo Dios Mamakʉ chʉ'ʉre paakʉ'mʉ”, chiijʉ rekoñoãpi cuasana Dios pa'ichejana saijanaa'me.
11 Dios chʉ'o aperʉmʉ tochasi'e ija'che kʉamʉ:
Pãi Repaʉ'te cuasanare ũcuarepa cho'oja'mʉ Dios, pãire cacʉ'omanera chini,
chiimʉ Dios chʉ'o.
12 Diopi ñato judíopãina'me judío peona ũcuate'epãia'me. Ũcuate'eʉji ũcuanʉkore Paakʉ, Repaʉ'te sẽenare karama'ñe ĩsimʉ Repaʉ.
13 Ũcuaja'che Dios chʉ'o ija'che kʉamʉ:
Diore cuasajʉ sẽena Repaʉ pa'ichejana saijanaa'me,
chiimʉ.
14 Jã'ata'ni Repaʉ'te cuasamaneni, ¿je'se sẽejanaa'ñe? Ũcuachi'a, ¿je'se cuasajanaa'ñe Repaʉ pa'iche asamaneni? Ũcuachi'a, ¿je'se asajanaa'ñe Dios chʉ'o chʉ'vana peoto?
15 Ũcuachi'a, ¿je'se chʉ'vajanaa'ñe Dios chʉ'o chʉ'vanare Saokʉji peoto? Dios chʉ'o aperʉmʉ tochasi'e ija'che kʉamʉ:
Dios chʉ'o re'oja'che mai asamanesi'ere kʉana raito rʉa re'omʉ,
chiimʉ.
16 Jã'ata'ni pãi ũcuarepanʉko Dios chʉ'o re'oja'che asa chẽama'me. Isaías tochasi'e ija'che kʉamʉ:
Chʉ'ʉre Paakʉ, mai chʉ'vachʉ'ore jachajʉ cuasama'me pãi,
chiimʉ.
17 Jã'ajekʉna ija'chea'me: Jesucristo pa'iche'te kʉajʉna asa chẽanachi'a Diore cuasame.
18 Jã'ajekʉna te'eʉ ija'che cuasakʉ i'kamʉ chʉ'ʉ: Chekʉrʉmʉ Dios chʉ'o asamanacosome repana Israelpãi. Jã'ata'ni asasinaa'me repana. Dios chʉ'o tochasi'e repana asasi'e ija'che kʉamʉ:
Repana si'achejñarʉã so'ña ku'ijʉ chʉ'vajʉna repachejña pa'ina asaasome,
chiimʉ.
19 Jo'e te'eʉ ija'che cuasakʉ i'kamʉ chʉ'ʉ: Chekʉrʉmʉ Israelpãi masi asamanacosome. Charo tochasi'kʉ Moisés ija'che kʉamʉ jã'a:
Chʉ'ʉ, Dios, judío peonare chʉ'ʉre cuhenare rʉa vesʉnare chʉ'ʉni cuasaa'jʉ chini cho'okaija'mʉ.
Jã'aja'ñe cho'oʉna mʉsanʉkona judíopãi ña pe'rujanaa'me repanare,
chiimʉ repaʉ tochasi'e.
20 Na'a pa'isirʉmʉna Isaías vajʉchʉma'ñe Dios chʉ'o i'kakʉ tochasi'e ija'che kʉamʉ:
Chʉ'ʉ chʉ'o asaneemanesinapi asa chẽajanaa'me.
Ũcuaja'che chʉ'ʉre sẽemanesinani i'kaja'mʉ chʉ'ʉ,
chiimʉ.
21 Israelpãi pa'iche'te kʉakʉ ija'che tochaasomʉ Isaías:
Chʉ'ʉre, Diore, cuhejʉ jachana chʉ'ʉni cuasaa'jʉ chini
si'arʉmʉ re'oja'che cho'okaikʉ'teta'ni ũcua jachame,
chiimʉ repaʉ tochasi'e.