4
Cʉnaʉmʉ cana Diore pojojʉ re'oja'che i'kache'te kʉamʉ
1 Jã'aja'ñe cho'ocuhasirʉmʉ cʉnaʉmʉ ñato jatisa'aro vatasisa'aro pa'isi'kʉa'mʉ. Ũcuachi'a aperʉmʉ chʉ'ʉre trompetavʉ juhijʉna asocheja'che rʉa asoche i'kasi'kʉ jo'e ija'che i'kasi'kʉa'mʉ: “Ichejana mʉijʉ̃'ʉ. Na'a pa'isirʉmʉ ti'jñejañere mʉ'ʉni ñora”, chiisi'kʉa'mʉ.
2 Reparʉmʉ chʉ'ʉre Dios Rekochoji cho'okaiʉna ñakʉ cʉnaʉmʉ Repaʉ pa'icheja pãi chʉ̃'ʉna ñu'isaivʉ Ñu'ikʉni ñasi'kʉa'mʉ chʉ'ʉ Repaʉ'te Diore.
3 Repasaivʉ ñu'ikʉ jaspe catapʉã pachoko'sija'icheja'che ko'sija'iʉ ũcuachi'a cornalina cata maako'sijapʉãja'ñe ko'sija'iʉ ñosi'kʉa'mʉ chʉ'ʉre. Repaʉ ñu'isaivʉ ũcuachi'a ma'ñarekovʉ esmeralda cata vĩjako'sija'icheja'che ko'sija'ivʉji rũhiso'koro pa'isi'kʉa'mʉ.
4 Ũcuachi'a chekʉsaivʉã veinticuatrorepasaivʉã repasaivʉ pa'iche rũhiso'koro pa'isi'kʉa'mʉ. Ũcuasaivʉãre aina veinticuatrorepana ñu'isinaa'me. Kãña pojakãñare ju'ijʉ tuhivʉã pachokurivʉãre tuhijʉ ñu'isinaa'me repana ũcuanʉko.
5 Ũcuachi'a Dios ñu'isaivʉ rʉ̃ichejapi fe'nekʉ rʉa asoche curusi'kʉa'mʉ. Ũcuachi'a repasaivʉ ti'jñeñe'te ʉoñoã pa'isaivʉã sieterepasaivʉã nʉkakʉ uukʉ pa'isi'kʉa'mʉ. Jã'asaivʉã sieterepasaivʉã Dios Rekochoja'chea'me.
6 Ũcuachi'a repasaivʉ ti'jñeñe'te mar chiaraja'chepi joicʉna ko'sija'iʉ etajaiche ñoñeja'ñe pa'isi'kʉa'mʉ. Ũcuachi'a repasaivʉ rʉ̃ichejare vajʉpãi ũcuaka'chapana repana ca'nivʉãre si'acaca'nivʉã tijñapa cakã'jñona'me cho'je cakã'jño ñakocaã paanapi si'acakã'jño pa'isinaa'me.
7 Repana vajʉpãi te'eʉ león chaija'iʉ pa'isi'kʉa'mʉ. Chekʉ toroja'iʉ pa'isi'kʉa'mʉ. Chekʉ pãi chia paasi'kʉa'mʉ. Jo'e chekʉpi tao cãva ku'ikʉja'iʉ pa'isi'kʉa'mʉ.
8 Repana vajʉpãi kue'chaka te'eʉ seirepakachi'a paasinaa'me. Ũcuakare ñakocaã paasinaa'me repana vʉ'evʉãna'me sẽ'sevʉã. Ũcuachi'a jmamakarʉjẽ'e cuhama'ñe umucusena'me ñami ija'che i'kajʉ pa'isinaa'me repana:
Re'okʉ'mʉ Dios.
Re'okʉ'mʉ Dios.
Re'okʉ'mʉ Dios.
Peore Masiʉ'mʉ Repaʉ.
Irʉmʉjẽ'e pa'iʉ chuta'a cheja cho'omarʉmʉjẽ'e pa'ikʉ'mʉ Repaʉ.
Ũcuachi'a si'arʉmʉ pa'ikʉ'mʉ Repaʉ,
chiijʉ pa'isinaa'me repana.
9-10 Repaʉ'te Diore Si'arʉmʉ Pa'ikʉ'te ñu'isaivʉ ñu'ikʉni repana vajʉpãi pojojʉ re'oja'chere ija'che i'kasinaa'me: “Peore Masiʉ'mʉ mʉ'ʉ. Peore re'oja'che cho'okaikʉjekʉna, ‘Re'orepamʉ’, chiime chʉkʉna mʉ'ʉre”, chiisinaa'me. Jã'aja'ñe i'kato aina veinticuatrorepana Dioni pojojʉ Repaʉ'te ti'jñeñe ro're pʉʉ ñu'ijʉ ũcuachejana repana tuhivʉã tĩ'te ũha ija'che i'kasinaa'me:
11 Dios, Chʉkʉna'te Paakʉ, mʉ'ʉpi chiiʉ cho'oʉna peore si'ache pa'imʉ.
Mʉ'ʉpi cho'oma'to peora'amʉ jã'a.
Jã'ajekʉna pãi ũcuanʉko mʉ'ʉni cuasajʉ pojojʉ,
“Peore Masiʉ'mʉ mʉ'ʉ.
Peore re'oja'che cho'okaikʉ'mʉ.
Peore chʉ̃'ʉkʉ paaʉ”, chiijʉ paapʉ,
chiisinaa'me repana.