10
Pedro Cornéliochica jinunca
1 Aman Cesarea pueblobi soldado capitan manca jominue Cornelio mumun. “Italiano” tinun bolonbi mantamin jominue.
2 Yabe yachi familialabe Diosica respetaito jelerato, seque tenca camin jominlanue. Israelita itotonan, popere israelítalachi tenchi duque cala cuwamin jominue. Diosibe ma cura rocaimin jominue.
3 Junni manca mate tre de la tardete Cornéliochi ura jera quirajanue. Anjeliri Diosi ereca jun jato, Cornelio tinue.
4 Cornéliori anjelica duque jelenasa quirato, itsantinue:
—Miya, ¿niyan jun? tinue.
Junni anjeli yabe itsantinue:
—Nu Diosibe rocain, poperelachi titiya cuwan, quimin joe tinue. Junnan Diosi nuca mantenhinae tinue.
5 Junni nuri tsachilaca Jope puebloca ereto, Simón Pédroca jasa caride! tinue.
6 Yari quidoca cato se suwamin Simónchibi chue tinue lamari quelote. Junni Pédrori inte jato, nu ti quino jonunca jera micarichunae tinue.
7 Junni anjeli manjinunsi, Cornelio pemanca tsachilaca jade! tinue peyun palucaca soldado mancaca. Cornéliobe mantaimin soldado jominue Diosica tenca camin soldado.
8 Junni yalabe jera cuenta manpolarinue anjeli cuenta quicaca. Junsi yalaca Jope puebloca erenue.
9 Aman ayuna nanchi ya tsachila Jópeca jalainasanan, Pedro terasabi lonue. Yotute Diosibe rocaibi lonue.
10 Junnasanan Pédrochi duque ano muquinaminue. Junni Pedro ano acari mérasanan, yachi quirajanue.
11 Yoquido lasaraminca quiranue. Junni wa jali tsan patanue. Jali junpalu puntabi tela jun to fecári patanue.
12 Junni jun jalibi duque animalila pominue. Quela, susu, pini, baro, titiya pominue.
13 Junni Pedro junca quiranaminnan fiqui meránue. Itsantinue:
—Pedro, cupade! In animalilaca toteto fide! tinue.
14 Pedro mantimini beco pato itsantinue:
—Te, fino miitoyoe tinue. Miya Diosi, nu mirae. La fitununca numanan fitumanyoe tinue. Chiranlaca fitumanyoe tinue.
15 Junni manaman fiquica manmeránue. Itsantinue:
—Diosi ticatiya fintsan suwayoe tinari, nuri junca chiran tituna! tinue.
16 Peman ne jun tsan jun tsannan tilatinue. Junni jalica jamochi manlaricanue.
17 Junni Pedro yachi quirajacaca tenca canato, Diosi yaca tíca micarichi tinamin jonhoncanque tenca canaminue. Tsanque tenca cato chusanan, Cornelio ereca jun tsachila falainue. Simonchi yaca panhato jato, urachi wiruraminlanue.
18 Junni urachi wirurato otito, itsanlatinue:
—¿Simón Pedro inte chunan? tilatinue.
19 Junnasa mantimini Pedro yachi quirajacaca tenca canasanan, Diosichi Tenca yabe itsantinue:
—Meráde! tinue. Pemanca tsachila nuca quirachique meralarae tinue.
20 Junni cupato, yalaca quirabi jide! Junni natiya jele tituto, yalabe pejiniina! tiyoe tinue. Israelita itotonan, la mantaca jun jalaie tinue.
21 Junni Diosichi Tenca Pédrobe tsantinunsi, Pedro patinue janamin tsachilaca quirabi. Junto yalabe itsantinue:
—La nula neyananun tsachi joyoe tinue. ¿Niyaito jalainayun? tinue.
22 Junni Cornelio ereca junla beconan pato itsanlatinue:
—Capitan Cornelio chiquilaca eree latinue. Aman yari seque quimin joe latinue. Diosica respetaito jeleramin jonan, piyanle israelítalanan yaca sen joe timinlae latinue. Junni Diosichi anjeli Cornéliobe cuenta quito, nuca jasa caride! tie latinue. Nuri Cornéliochi yaca jato, micarino joe tie latinue yape ya merása.
23 Junni Pedro yalaca meráto, tamochi wiyato, mile chudilaide! tinue. Junni ayuna nanchi Pedro yalabe pejinue. Aman Jesucrístobe penenamin israelítalanan pejilainue Jópebi chuminla.
24 Junni junhayuna nanchi Pédrola Cesaréabi felainue. Junnasa Cornelio yachi familailaca, amicolaca jera layasuwato méraminlanue.
25 Junni Pedro tamochi winasanan, Cornelio quirabi jato, yachi cale telenhinue Diosichi cale cuwenta.
26 Pedro mantimini yaca manwirucarito itsantinue:
—Manwiruide! Lari tsachiri joyoe tinue.
27 Tsantitobi, Pédrobe Cornéliobe cuenta quede parejo wilainue. Wito quiranari, duque tsachila layaica jominlanue.
28 Junni Pedro yalabe itsantinue:
—Nulari israelítala itotonan, israelítalaca miralarae tinue. Chiquilachi mite israelita itonlabe natiya penenano itolajoyoe. Israelita itonlachi yabi winotiya itolajoyoe tinue. Tsan josanan Diosi laca uyan quiraque manmicaricae tinue. Amana mirayoe tinue. Uyan tsachilaca nin epe joe nin chiran joe tituntsan joe tinue. Diosi ya cuwaca animalilaca chiran titude! tinato, laca micarie tinue yachi tsachilacanan chiran tituntsan joeque.
29 Jun tenchi laca jasa tinan, lari natiya jele tituto janiiyoe. Junto lachi miino muquee tinue ¿niyaque laca munarato jasa tiyun?
30 Junni Pédrochi fiquica meráto, Cornelio itsantinue:
—Junpalu ma poleca lachi yabi chuniramanyoe tinue. Junto Diosibe rocaino órate ano fitunca ito rocainamanyoe tinue tre de la tardete. Aman Diosibe rocainasanan, tsaracari fibaquin camisa pun tsachi quiraie tinue.
31 Lachi cale wiruito, itsantie tinue: Cornelio, Diosi nu rocainunca meránae tie tinue. Poperelachi ticatiya cuwamin jonun tenchi nuca mantenhinae tie tinue.
32 Junni tsachilaca Jópeca erede! Jun pueblobi Simón Pédroca neyasa caride! Aman Pédrori quidoca cato se suwamin Simónchibi chue tie tinue lamari quelote. Junni Pedro jato nuca micarichunae tie tinue.
33 Junni anjeli tsantinunsi, tsachilaca ereyoe tinue yape nuca jasa tilatisa. Junni nu sen joto janiinue tinue. Junni intele jera layaito chularayoe tinue nuca meráchun. Diosinan chiquilaca quiranae. Junni paniquede! tinue Miya Diosi nuca jera pasa mantanunca.
Pedro Cornéliolaca micarinunca
34 Junni aman Cornelio tsanque cuenta quinunsi, Pedro itsantinue:
—Aman tsarasica miiyoe tinue Diosi jeralelaca jun parejonan laquiraeque.
35 Diosica jelerato respetaito seque nenaminlaca Diosi sen jolajoe tichunae. Aman nun bolonbi nechi tsachila jototiya, o israelítala jototiya, o israelita itonla jototiya, Diosiberi jun tsannan jolajochunae tinue.
36 Junni aman Diosi israelítalaberi sen fiquica pasa carinue. Ya Jesucrístoca paca fiqui joe. Ya Jesucrístori se patarimin joe tinue yape tsachilabe Diosibe pa tala itolajosa. Jesucristo jeralelachi Miya joe tinue.
37 Aman nulanan Jesuca numa meracala jonhoe tinue. Casale Galilea tobi, junsi jerale Judea tobi, jera mera jominhe. Aman casale Mumunmin Juan Diosichi fiquica micaricae tinue mumunhinola joeque.
38 Junsi Diosi Jesús Nasarénoca wenteto, yaca sonba tenca suwanue tinue. Diosichi Tenca Jesube tsaracari seque penenaminue. Junni Jesús seque quito nenaminue. Yucan pasuwaca junlaca Jesús mansemin jominue. Diosibe ura mantaito tsanque seque nenaminue.
39 Junca chiquila ura pemiralarayoe tinue. Israelítalachi tobi, Jerusalén pueblobinan Jesús titiya jera quinaminca quiracalayoe tinue. Jun tenchi jera tsanque cuenta quilaquinayoe tinue. Aman junni Jesucrístoca titiya seque quinamincanan corosibi eruncarito totelaquee.
40 Junni ya puyaca jominca peman mate Diosi yaca mansoncarito manquiraisa carinue.
41 Jeralelaberi manquiraitue. Diosi chiquilacasiri wentenue Jesucrístoca manquirato uyanlabe cuenta manpolarilaquisa. Yari puyan ocolachibi nechi manjatobi chiquilabe ano pemanfin, pi pemancuchin quicae tinue.
42 Aman junni meralaquede! tinue. Diosi Jesucrístochi mantá cuwanue jeralelaca quirato miisa senla jonunca o seitonla jonunca. Numa puyaca junlacanan, casonnaminlacanan quirato miichunae tinue. Junni Jesucristo chiquilaca mantanue yape tsachilabe ya cuentaca jera polarilaquisa.
43 Jesucrístori jutsa piyarimin joe tinue. Jerale yabe cayaiminlacari jutsa piyarichunae tinue. Jerale matu tote Diosichi mantate paminlanan jun tsanquenan cuenta polarimin jominlanue tinue.
Diosichi Tenca israelita itonlachibi winunca
44 Junni Pedro tsanque camicarinasaleri, Diosichi Tenca patato, jerale meráminlachibi winue.
45-46 Junni merátunun fiquichi pato, Diosica seque palaquinue. Israelita itonla josanan Diosichi Tenca yalachibi winiinue. Aman Pédrobe pejaminlari Jesucrístobe penenaminla jotonan, israelítala jominlanue. Junni yalari junca quirato duque wepanalainue.
47 Junni Pedro itsantinue:
—Quiralaquede! Diosichi Tenca inlachibinan winue tinue chiquilachibi cuwenta. Tsanhica jonari, inlanan mumunhino podeilaichunae tinue.
48 Junni Pedro tsantisi, yalaca mumunsa mantanue Miya Jesuchi jolajoe tito. Junni Pédroca rocailainue yalabe nasi pechusa.