26
Pablo Agrípalabe cuenta quinunca
Junni Festo tsantinunsi, Agripa Páblobe itsantinue:
—Nuri cuenta quiniquede! tinue.
Junni Pablo tede jalitanue cuenta quechinayoe tito. Junsi isa pato itsantinue:
—Miya Agripa, lachi pansi tenjae tinue amana nube cuenta quechinayoeque. Uyan israelítalari laca duque culpa quichi latinae. Junni amana nuca jera tucarichinayoe tinue. Nuri chiquilachi mica seque mirae. Chiquila panuncanan nu jera mirae. Junni nube rocainayoe yape laca de fecári merása.
Jerale israelítala laca miralarae tinue. Na mánta lachi tobinan, junsi Jerusalénbinan yalabe pesonnamin jomanyoe. Nalalan mánta fariseo tala Diosica tenca camin jomanyoe tinue. Aman fariséolari uyanlaca fécari tenfeminlae israelítalachi mantaca meráchique. Junni lari fariseo pejomanyoe tinue. Israelítala junca jera miralarae. Yalachi tsa pano muquilaquinari, junca pano jominlanue. Aman Diosiri chiquilachi matu to tatalabe trato quinato, puyaca junlaca mansoncariyanae tica joe tinue. Junni amana yaca tsa joe tito me nenayoe. Jun tenchisiri amana nuchi cale wirurayoe tinue. Jun tenchisiri laca culpa quichi latinae. 7-8 Aman jerale chunca palu bolon israelítalanan jun tsanquenan tenca caminla joe Diosi puyaca junlaca mansoncarino joeque. Yalari quepen, malon Diosichi tenchi titiya quichi timinla joe yalanan mansonhiminla ichique. Nulanan junca quereituntsan joe titulajona! Junni miya, israelítalari tsanque tenca caminla jotonan, laca culpa quichi latinae puyaca junla mansonhinola joeque quereinun tenchi.
Junni Páblori Agrípalabe cacuenta quinato itsantinue:
—Matute lanan Jesús Nasarénoca seiton quintsan joe timin jomanyoe tinue. 10 Jerusalenbi mantá tan patelelachi mantate Diosichi sen tsachilaca duque dosa carimin jomanyoe. Junni uyanla Jesucrístochi tsachilaca totelaquinasa, lanan totenilaquede! petimin jomanyoe tinue. 11 Junto Diosichi fiqui miinun yabi yalaca casticaquimin jomanyoe yape Jesucrístoca telaquepolaquisa. Yalaca duque paito, uyan pueblobinan yalaca casticaquichun neyabi jimin jomanyoe tinue.
12 Junto mantá tan patelelachi mantate la Damasco puebloca jinamanyoe tinue. 13 Junni miya, seque meráde! tinue. Yotute labe uyanlabe jinaminlayoe. Junto jinaminnan, aman jamochi nechi duque tsenca quirayoe chiquilachi awinta. Yoca fécari tsequee tinue. 14 Junni jeralela tobi queereitonan lari fiquica meráyoe. Israelítalachi fiquichi pato, lachi tsa mumunca pato, Saulo, Saulo, ¿ti quichun laca seiton quinayun? tie tinue. Laca seiton quinato, nu tencachiquenan fécari padeseinae tie calu chide puntabi terachi quimin cuwenta.
15 Junni lari jun fiquica merasí, Miya, ¿moyun? tiyoe tinue. Junni Miya Jesús beconan pato, Jesúyoe tie tinue. Laca nu seiton quinae tie. 16 Junni Jesuri laca cupato manwiruide! tie tinue. Junsi laca yabe mantaito nenamin ide! tie tinue. Jun tenchi labe quirainayoe tie tinue. Junni jun mate quirananunca cuenta polarimin jona! tie tinue. Junni Jesucristo labe manan manquirainan, juncanan cuenta manpolarimin jochunae tie tinue. 17 Junsi laca israelita itonlachica erechinayoe tie. Junsi laca isaichinayoe tie tinue yape israelítalanan, israelita itonlanan totelaquitusa. 18 Junni laca israelita itonlachica jito, yalaca tuca tenca casa caride! tie tinue yape cuni jun cuwenta canenalaratusa. Junni meráminla seiton tenca canunca purato, sen tenca mancalaquichunae tie tinue. Satanachi mantabi nechi loto, Diosi mantananun tsachi bolonbi manwilaichunae tie tinue. Yalari Jesube cayaica jonan, Diosi yalachi jutsaca piyarito, yalaca sen tenca suwachunae tie tinue. Diosichi weyan tsachilaca cuwenta, yalacanan tsanque sen tenca suwachunae.
Pablo Jesucristo pacaca meráto nenamanyoe tinunca
19 Junni Pablo Jesucrístoca cacuenta quinato, Agrípalabe itsantinue:
—Junni Jesucristo jamochi nechi labe quiraito pacaca meráto nenayoe. 20 Junni jun fiquica meráto, tsachilabe cuenta quito, jutsa quinanunca telaquepoto Diosibe cayailaide! tito nenamanyoe. Junsi seque nenalarana! timanyoe tinue yape jutsaca telaquepoeque tenhilaisa. Casale Damáscobi, junsi Jerusalenbi, junsi jerale israelítalachi tobi, junsi israelita itonlachi tobi tsanque cuenta polaridede nenamanyoe tinue.
21 Junni tsanque cuenta quinun tenchisiri israelítalari laca Diosichi yabi cato totechi latie tinue. 22-23 Tsan josanan Diosi laca isainue yape totelaquitusa. Junto amanachitiya inte Jesucrístoca cuenta caquito wirurayoe. Jeralelabe, mantá tanlabenan, mantá itonlabenen, jun cuentaca quinayoe tinue. Matu tote Moisebe uyanlabe Diosichi mantate pila chutelaquinue Diosi wenteca Cristo tinun tsachi padeseino jochunaeque. Puyato, ya caquenan mansonhichunae latinue. Tsanque israelítalabe israelita itonlabe Diosica tsarasica miino podeilaichunae latinue. Junni lanan jun tsanquenan manpánayoe tinue Moisela matu tote pilabi chutelaquinunca.
Agrípaca Jesucrístobe cayaisa tenjae tinunca
24 Junni Pablo tsantinasanan, Féstori sonba pato, Pablo, nuri loco joe tinue. Duque miichique tenfenaminnan, misu yucapiyanue tinue. 25 Junni Páblori Féstoca duque respetaito manpato, itsantinue:
—Te, loco itoyoe. Tenca tan joto, tsarasica pánayoe tinue. 26 Junca miya Agripa jera mirae tinue Jesucrístoca paca fiquica. Jun tenchi luratuto yabe cuenta quiniquinayoe tinue. Yari junca jera miranae tinue. Jesucristo nosa nenatumin jominhe tinue.
27 Junni Pablo Féstobe tsantisi, miya Agrípabe itsantinue:
—¿Nuri Diosichi Pilaca quereiyun? ya matu to Diosichi mantate pila chutecaca. La mirayoe tinue nu quereimin joeque.
28 Junni Agripa Páblobe beconan itsantinue:
—Nuri cuenta nasi caquitori, lacanan Jesucrístobe penenamin suwano jonhoe tinue.
29 Junni Páblori itsantinue:
—O nasi cuenta caquito, o duque cuenta caquito, se jonijochunae tinue. Nuca la cuwenta josa tenjae. Diosibe rocainayoe tinue yape tsanhisa carisa. Jerale amana meranaminlanan la cuwenta josa tenjae tinue. Juntonan nulacari la cuwenta telarasa tenjatue tinue.
30 Junni Pablo tsantinasaleri, miyabe cobernadoribe Berenícebe uyanlabe jeralela wiruito manlolainue. 31 Junni manlotobi, Pábloca tenpalaquinue. Culpa itoe latinue. Totentsancari jutsa natiya quica itoe latinue. Doranonan itoe latinue. 32 Junsi Agripa Féstobe itsantinue:
—Pablo románolachi fe mantá tan miyachica eresa rocaica itomanpari, yaca manlarino podeino jominla joinhie tinue.