San Pablo Colósalachi
ereca jun pila
Caque fiqui: Pablo Roma pueblobi dorato in pilaca quinue. Colosa pueblobi weyanlari Jesucrístochi mantate micarinayoe tito, seiton epe fiqui micarinaminlanue. Duque epe cosaca sonba mantamin jominlanue weyan anoca fituntsan joeque, weyan cosaca talatuntsan joeque. Junsi anjelilachi cale telenhintsan joeque mantamin jominlanue Diosichi cale cuwenta. Junsi yala miranun fiquica miitutori Diosichi cale sen itochunaequenan micarinaminlanue. Junni Páblori in pilaca quinue jun epe fiquica seitoe, tennatuna! tichun. Jesucrístoca tanari, yari michi joeque, uyan mantá titiya munaratueque, in pilabi micarinue. Wata 60 tsansite in pila chutenue.
1
1-2 La Pablo nulachi saludo erenayoe Colosa pueblobi chuminlachi. Diosiri laca wentecae yape Crístochi mantá tan nenasa. Junni labe Timoteo acobe nulachi saludo erelaquinayoe. Nulari Diosichi tsachila jolajoe. Crístobe cayaica joto, chiquilachi acola, soquila icala joe. Jun tenchi nulabe saludailainayoe. Chiquilachi Apa Diosibe Miya Jesucrístobe nulaca laquirato pansi chularasa carisa tenjalaquee yape wepanatuto chularasa.
Pablo colósalachi tenchi Diosibe acradeseito rocaimin jonunca
3 Apa Diosibe nulachi tenchi acradeseilainayoe. Nulachi tenchi rocainato, numasitiya Diosibe acradeseiminlayoe. Yari chiquilachi Miya Jesucrístochi Apa joe.
4 Chiquilari nulaca meralaquiyoe Jesucrístobe cayaito, jerale yachi tsachilaca laquiralaraeque. Jun tenchi nulachi tenchi acradeseiminlayoe.
5 Diosi yachi tsachilachi tenchi titiya tsara senca tae. Ya senca jamochi seto tae. Nulari yachi sen fiquica meráto, junca miilainue. Junto nulanan jera weyan Diosichi tsachilabe jun senca pecalaquichunae. Junni nulari jun senca canoca tenca cato meralarae.
6 Junni nulari junca tenca cato mérato, Jesucrístoca fécari querein, yachi tsachilaca fécari laquiran, ralarae. Jun tenchi Diosibe nulachi tenchi acradeseiminlayoe. Jerale tote duque tsachila Diosichi sen fiquica meráto sen tenca ilainae. Junni nantanancari tsachila jun fiquica quereilainasa, nulanan quereilainue. Nula meralaquinue Diosi nulaca laquiraeque. Junni junca tsarasica meránunle nechi nulanan quereito seilainae.
7 Casaleri Epafras nulaca junca numa micarica joe. Epáfraca chiquilari duque laquiralarayoe. Yari chiquilabe Crístochi tenchi titiya pequito nenamin joe. Nulaca ayudaichun, Crístochi tenchi seque quimin joe.
8 Junni yari chiquilabe cuenta quinue nulari Diosichi Tencachi sonbabe yachi tsachilaca laquiralaraeque.
9 Junni nulaca meracale nechi nulachi tenchi numasitiya Diosibe rocaiminlayoe yape Diosi niyaque nenasa munaranunca miilaisa. Diosibe rocaiminlayoe yape nulachi tencabi ticatiya sele micarisa.
10 Junni nulachi tenchi tsanque rocaiminlayoe yape Miya Jesucrístochi tsachila joto duque seque nenalarasa. Tsanque seque nenatori, duque sen ito, Diosica fe miide miide jilaichunae. Junni Miya Jesús nulaca tsara sen jolajoe tichunae.
11 Junni Diosiri tsaracari sonban joto, nulachi tencaca sonba suwachunae yape nulari duque son tito, quereinoca numanan peleituto nenalarasa. Sonban tenca ito, niyan quilaquinasatiya pailaituchunae. Junni chiquilari Diosibe nulachi tenchi duque rocaiminlayoe yape nula tsantin nenalarasa.
12 Tsanque nenaminlari, Apa Diosibe acradeseintsan jochunae. Junni aman yachi tsachilachiri senca cuwachunae yachi tobi. Yachi tobiri tsara uraran jochunae tsen cuwenta. Junni Apa Diosiri nulaca sen suwaca joe nulachinan jun senca pecuwachun. Junni jun tenchi nula son tito yabe duque acradeseintsan jochunae.
13 Chiquilachi tencabi yucanbe mantainato, nemen cuwenta jominlayoe. Junni tsan jominlaca Apa Diosiri chiquilaca manse larito, yachi laquiranun Nao mantananun tsachi bolonbi penenasa carinue.
14 Ya Naochi mantá cuwanue yape chiquilaca se larito chiquilachi jutsaca piyarisa.
Diosichi Nao colósalaca Diosibe manse patarica jonunca
15 Junni Apa Diosiri quiratunun josanan, yachi Nao Diosi jotonan, quiranun inue yape tsachila Diosica miilaisa. Junni Diosichi Naori jera Diosi quicaca mantá tan joe.
16 Diosi yachi Naoca jera quisa carinue. Jamochi jominca, tote jominca, quirasá jominca, quirasá itominca, yari jera quinue. Mantá tan anjeli tsanlaca, mantá tan oco tsanlaca, yala tala miyalaca, yari jera quinue yape yachi jolajosa.
17 Tinantiya caitosanan, Diosichi Naori numa jominue. Ya jera ticatiya cuidaimin joe yape jeraitusa.
18 Junsi Diosichi Naori yachi tsachilaca jerale mantamin joe. Yachi tsachilari layaito Diosichi Naochi puca cuwenta jolajoyoe; yari chiquilaca mantamin joto, chiquilachi misu cuwenta joe. Jerale puyaca junlale nechi Diosichi Naori caque mansonhica joto, yachi tsachilaca sonnasa carimin joe. Tsanque yari niyaquetiya fe jono patinue.
19 Junni Diosiri niyantiya jomin joto, yachi Naocanan jun tsanquenan josa carinue tsanque se jochunae tito.
20 Junni yachi Naochi mantá cuwanue yape jeralelaca Diosibe se patarisa. Tote chuminlaca, jamochi chuminlaca, jeralelaca Diosibe se patarimin joe. Corosibi puyato, yachi asanca larito, jeralelaca se patarimin joe.
21-22 Junni jeralelaca tsanque se patarimin joto, nulacanan tsanquenan se patarinue. Casaleri nulari yaca laquiratuto, pa tala nenato seitonque nenamin jominlanue. Tsan jominlaca yari manse patarinue. Tsachi puca ito puyanue yape nula Diosichi ilaisa. Puyanue yape nanni ina nulari Diosichi cale sen jolajosa. Yari nulaca nanni ina Diosichi cale senlaca wirucarichunae. Junto ya puyanun tenchi jun materi monantiya nulaca culpa quino podeilaituchunae.
23 Junni nulari jun mate sen jochun yaca duque tennato canenanola joe. Jesucrístochi sen fiquica meráto, Diosichi tsara senca meralaquinue. Jun senca nulachi cuwano joeque meralaquinue. Junni yaca seque tenca cato méranola joe. Sonban tenca ito, peleituto, jun senca méranola joe.
Crístochi tsachilachi tenchi Pablo duque tenfeto titiya quimin jonunca
Jun sen fiquicari jerale tote chuminlaca micarica joe. Junni la Páblonan jun sen fiquica micarimin iyoe.
24-25 Aman nulachi tenchi duque padeseinatotiya, son jonijoyoe. Crístochi tsachilari layaito yachi puca cuwenta jolajoe. Junni yalaca la ayudaimin joyoe. Diosi lachi tsanque mantá cuwaca joe yape nulaca yachi fiquica jera micarisa. Junni Crístori labe pae yachi tsachilachi tenchi duque padeseichunaeque. Junni lari capadeseino jonunca jera padeseinayoe.
26 Junni la micarinun fiquiri duque sen fiqui joe. Maturi miratunun fiqui jotonan, amanari miranun ica joe. Diosiri yachi sen tsachilaca jun fiquica miisa carica joe.
27 Ya tsara sen fiquica yalaca miralarasa munaraminue. Junni israelita itonlachi tenchinan tsara sen fiqui joe. Yari itsanque joe: Cristo nulachi tencabi wito chunan, nulari manca mate Diosibe tsara sen chularachunae. Cristo nulachi tencabi pechunari, jun ma fecári pansi mérano podeilaichunaeque paca fiqui joe.
28 Jun tenchi chiquilari tsachilaca micarinato, Crístocari paminlayoe. Crístochi tsachila jeralela yaca quereito tsara sen jonola joe. Junni chiquilari jeralelaca payin, urara tenca tanque micarin, quiminlayoe yalaca jera sen suwachun.
29 Tsanquichun, lari duque tenfemin joyoe. Cristo yachi duque sonbabe laca poden suwanasa, yachi tsachilaca se suwachique duque tenfemin joyoe.