San Pablo Tesalónicalachi caque
ereca jun pila
Caque fiqui: Tesalónica wa pueblo jominue. Lamari quelote jominue. Junni jun pueblobi chumin Jesucrístobe penenaminlari problema tan jominlanue. Uyanlari yalaca padeseisa carinaminlanue Jesucrístobe penenaminla jonun tenchi. Junsi Jesucristo numasi jamochi nechi manpatano jonunca palaque tenca camin jominlanue. Weyanlari Jesucristo moora manpatano jonari ¿ti quichun trabajaquino jun? tito, lan chumin jominlanue. Junni Páblori Corinto pueblobi chuto meraca jominue ya problema talaraeque. Junca meráto, in pila chutenue yalaca mantucarichun. Wata 50 tsansite in pila quinue.
1
La Pablo in pilaca nulachi erechun quinayoe Tesalónicabi chuminlachi. Nulari Miya Jesucrístochi tsachi bolon joto, yabe Apa Diosibe man junni jolajoe. La Páblori Silvánobe Timotéobe in pilaca erelaquinayoe. Apa Diosibe Miya Jesucrístobe nulaca laquirato pansi chularasa carisa tenjalaquee yape wepanatuto chularasa.
Tesalónicabi chuminla seque nenaminla jonunca
Nula jeralelachi tenchi numasitiya Diosibe acradeseimin jolajoyoe. Diosibe rocainato, nulachi tenchinan perocaimin jolajoyoe. Nulanan chiquilachi Miya Jesucrístoca tennato, duque seque quiminla joe. Diosica laquirato, yaca meráno tenfeminla joe. Peleituto Jesucrístoca quereito ya manpatano fecári yaca meralarae. Junni tsanla jonunca tenca cato, chiquilachi Apa Diosibe rocaimin jolajoyoe.
4-5 Junni acola, soquila, Diosi nulaca laquirae. Junni chiquilari nulaca Diosichi sen fiquica micarinato, fiquichisiri micarilaquitiyoe. Diosichi Tencanan pepasa carinasa, tsara merántsanque micarilaquiyoe. Nula Jesube cayailaichunaeque tenca canato micarilaquiyoe. Tsanque miilaiyoe Diosi nulaca wenteca jonunca.
Nulanan miralarae chiquilari nulachite niyaque nenalaranunca. Junni chiquila nulachi tenchi seque nenanan, nulanan chiquila cuwenta ilaie. Junto nulari Diosichi fiquica meráchun duque padeseilaie. Tsanhinasatiya, Diosichi Tenca nulaca ayudaie yape ya fiquica son tito meralaquisa. Tsanque seque meránato, chiquila cuwenta, Miya Jesucristo cuwenta, nenamin ilaie. Junni uyanlanan nulaca micato, yalanan Jesucrístobe seque nenanunca fécari miilainue. Macedonia tobi, Acaya tobi jerale Jesucrístobe cayaica junla tsanque jera micalaquinue. Junni nula Macedonia tobi chuminla jonana, jerale nulachi tobi, junsi Acaya tobinan, Miya Jesuca paca fiqui mera joe. Junni junbisiri mera itoe; jerale totenan nulaca mera joe nula Diosibe cayaicala joeque. Junni chiquilari yalabe nulaca natiya pano itolajoyoe. 9-10 Chiquila pachinasanan, yalari chiquilabe caquenan paminla joe. Nulaca itsantiminla joe: Nula chiquilaca seque facarito, epe diosi joe tinunlaca purato, tsa Diosibe cayaicala joe timinlae. Amana tsarasica sonnamin Diosibe mantaito nenaminla joe timinlae. Yachi Nao Jesuca meralarae timinlae yape jamochi nechi manpatasa. Ya Jesús puyacaca Diosi mansoncarinue. Yari se larimin joe yape Diosi seitonlaca casticaquinato chiquilacari casticaquitusa. Junni nulaca meráminla tsanque chiquilabe cuenta manpolariminla joe.