San Juan caque
chuteca jun pila
Caque fiqui: Wata 85 o 90 tsansite weyanlari duque palaque micarinaminlanue. Diosichi mantate micarinayoe titonan, yala tenca mánta epele tenca caya jun fiquica micarinaminlanue.
Itsanque micarinaminlanue: Jerale taquirano podeinun cosala seiton jolajoe timin jominlanue. To, tape, chide, pi, ano, chiquilachi puca, titiya seiton joe tinaminlanue. Espíritu cosasiri sen joe. Chiquilachi tenca, Diosi, anjelila, Diosichi to cosala, yalasiri sen jolajoe. Junni chiquilachi puca seiton jonari, numanan Diosichi tsachi ino podeituntsan jochunae. Junni tsan jonari, Jesucristo Diosi joto, tsachi itunue timin jominlanue. Tsachinan quiran ica jotonan, tsachi patsa itunue. Junsi chiquilachi puca seitonari, pucaca padeseisa carintsan jominue. Juntonan jutsa quitonan culpa tenhituntsan joe. Winan itori, wepanatuntsan joe. Tenca sen joto jutsa quituca joe. Seiton pucari jutsa quica joeque tenca cantsan joe tinaminlanue. O uyanchi sonabe catsotori, culpa tenhituntsan joe. Chiran pucari jutsa quica jotonan, tencari sen joto culpa itoe timin jominlanue. Ya seitonlari tsanque micarimin jominlanue.
Junsi Diosibe seque nenachun, yalasiri miranun fiquica estudiaito miintsan joe tinaminlanue. Junni Juan in pilabi yalachi seiton fiquica quereilaituna! tinae. Ya fiquica meráminlaca mantucarichun in pila quinue. Wata 90 tsansite in pila quinue.
1
Jesucristo Diosibe sonnasa carimin fiqui joe tinunca
1-2 Casale casaleri tinantiya caitosanan, Cristo numa jominue. Yari Diosi niyan jonunca micarimin joto, Fiqui tinun mumun joe. Diosibe sonnasa carimin Fiqui cuwenta joe. Ya sonnasa cariminni quiraie. Chiquilari yaca quiraca joto, cuenta quinayoe. Yari numatotiya Diosibe sonnasa carimin joe. Junto Apa Diosibenan pechumin joto, chiquilabenan quiraie. Junca nulabe cuenta quinayoe. Yaca merán, cacachi quiran, tedechi taquiran, quilaquiyoe.
3 Yaca quirato, yaca meráto, nulabe cuenta polarinayoe yape nulanan chiquilabenan man junni jolajosa. Chiquila mantimini Diosibenan yachi Nao Jesucrístobenan man junni jolajoyoe.
4 Junni pansi jolajosa itsanque pila chutenayoe yape natiya laqui itolajosa.
Tsente cuwenta nenano jonunca
5 In fiquica Crístobe miito nulabe manpolarinayoe: Diosiri tsara sen joe tsen cuwenta. Natiya nemen itoe.
6 Tsachilari nemente cuwenta seitonque nenatonan, Diosibe man junni joyoe tilatitori, nene pun jolajochunae. Tsarasi paca fiquica tennatuto nenaminla jochunae.
7 Diosi mantimini tsente chue. Junni tsachilanan tsente cuwenta seque nenatori, yabe man junni jolajochunae. Chiquilari tsente nenalaranari, Diosichi Nao Jesucrístochi asan chiquilachi jutsaca jera tsalemin jochunae.
8 Jutsa itoyoe timinlari tsarasi paca fiquica miitoto, palaque tenca caminla jochunae.
9 Chiquilachi jutsaca Jesucrístobe jera panilaquinari, yari jera piyarichunae. Yari seque quimin joe. Junto chiquila seitonque tenca cananunca jera tsalechunae. Tsanno joe; nene patumin joe.
10 Juntonan Jutsa quitucayoe timinlari Diosica nene pun curaniquito, yachi fiquica merátuminla jochunae.