San Juan debi
chuteca jun pila
Caque fiqui: Weyan tsachila Jesucrístoca paca sen fiquica micaride nenamin jominlanue. Ya micariminla weyanlari Juan ereca junla joto, seque micarinaminlanue. Junni yalari manca pueblobi felainue micarichun. Jun pueblobi Jesucrístochi tsachila tala, manca mantá tan tsachi Gayo mumun jominue. Manca Diótrefe mumun jominue. Junni jun micaride nenaminlari ya pueblobi felainari, Diótreferi yalaca facaricatun, micarisa caritun jonue. Junni Juanni junca meráto in pilaca quito Gáyochica erenue ya problemaca manse patarichun. Wata 90 tsansite in pila quinue.
1
1 La Juan Jesucrístochi tsachila tala mantá tan uni joto, in pilaca Gáyochica erechun quinayoe. Nuca tsaracari laquirayoe.
Gáyoca duque epe cuwamin joe tinunca
2-3 Jesucrístochi tsachila weyanlari lachica jato, labe cuenta quito, nuca seque nenae tilatie. Junni la Diosibe rocainato, nuchi tenca se jonan, nuchi pucacanan senan josa rocaimin joyoe. Nuca duque seque chusa carisa rocaimin joyoe. Junni aman nuca cuenta quimin tsachilari nuca seque pato, tsarasi paca fiquica meráto nenamin joe tilatie. Junni lari yalachi fiquica meráto, duque son tiyoe.
4 Apa cuwenta nuca duque laquirayoe. Junto lachi nalala cuwenta junlacari tsarasi fiquica meráto nenalarasa tenjae. Tsarasi fiquica meráminla joe tilatinari, nantanancari fécari son tito merámin joyoe.
5 Nuri acolachi ticatiya munaranuncatiya cuwaca jominue. Quiratunun acola josatiya, cuwaniquinue. Junni tsanquino duque se jominue.
6 Junni cuwacaca caminlari Jesucrístochi tsachila tala cuenta quinato, nuca cuenta quilaquee. Nuca pato, duque laquiramin joe latie. Junni nuri yalachi manan mancuwanari, nantanancari se jochunae. Yala Diosibe mantaiminla joe tito, ti munaranuncatiya cuwato, yalaca seque erena!
7 Yalari Jesucrístochi mantate nenato, Diosica quereituminla cuwanaminca ticanantiya natiya calaquitiyoe tilatinue.
8 Junni chiquilari Diosica quereiminla joto, yalaca facaricanola joyoe. Tsanquitori, tsarasi fiquica pemicariminla cuwenta jocaichunae.
Diótrefe seiton quimin jonunca
9 Lari manqui pilaca numa quito, nuchica erecayoe yape Jesucrístochi tsachila tala layaito quiralaquisa. Tsan josanan, Diótreferi laca merátuchi timin joe. Laca mantá itonhe tito, yasiri fe mantá tachi timin joe.
10 Junni lari nulachica jatori, ya jera seiton quinanunca jera cuenta queyanae. Laca seitonque epele pamin joe. Junsi nantanancari seiton quinato, Diosichi tenchi nenamin acola janaminlaca facaricatumin joe. Facaricachi timinlacanan facaricasa carituto, yalacanan weyan Jesucrístochi tsachilabe pelayaisa caritumin joe.
11 Nucari laquirato seque payinayoe. Seitonla cuwenta itoto, senla cuwenta jona! Se quiminlari Diosichi jolajoe; seiton quiminlari Diosica miitolajoe.
Demetrio sen jonunca
12 Aco Demetrio ya manca sen pejoe. Piyanlela yaca sen joe timinla joe. Yari tsarasi fiquica meráto nenamin joe. Junca mirato, yaca sen joeque miintsan joe. Lanan yaca sen joe tiyoe. Junni nulari miralarae la tsarasica pamin joeque.
Saludo
13 Nube duque cacuenta quino muquinasanan, pilachi cuenta quino muquetue.
14 Inale nuca quirabi jato, cale cuenta quino muquee.
15 Nucari pansi wepanatuto nenasa tenjae. Inte chumin amicolanan nuchi saludo peerelaquinae. Jerale junbi chumin amicolabe lachi tenchi mancabe mancabe saludaide!