7
Patsa junpalu chunca junpalu mili marca quica junla
1 Junte nechi junpaluca anjelilaca tobi wiruraminlaca quirayoe. Ya anjelila manca fe nanchi, manca pele nanchi, paluca butunnin tala nanchi wiruralarae yape wu nunchi nechinantiya jatusa. Nin tobi, nin lamaribi wu quisa carilaquitue. Chide man pelecanantiya wu quechutaisa carilaquitue.
2 Junni ya anjelilachi mantá cuwaca joe yape tocanan, lamaricanan yucapiyarilaquisa. Junsi manca anjelicaman quirayoe. Yo lanun minu nechi jae. Yari sonnamin Diosichi marca quinunca tae. Ya anjeliri junpaluca anjelilaca sonba otito,
3 itsantie:
—Cayucapiyarilaquituna! tie. Tocanan, lamaricanan, chide pelecanan natiya cayucapiyarilaquituna! Casale chiquilachi Diosibe mantaimin tsachilaca lesule marca quinola joyoe. Yalaca marca quino fecári natiya yucapiyarilaquituna! tie.
4 Junni anjelila tala tsantinunbi, la niyanca marca quica jonunca meráyoe. Jerale nechi patsa junpalu chunca junpalu mili jolajoe. Chunca paluca israelita bolonla jolajoe.
5 Matu to Judachi alicala chunca palu mili jolajoe.
Matu to Rubenchi alicala chunca palu mili jolajoe.
Matu to Gádichi alicala chunca palu mili jolajoe.
6 Matu to Asérichi alicala chunca palu mili jolajoe.
Matu to Neftalichi alicala chunca palu mili jolajoe.
Matu to Manasechi alicala chunca palu mili jolajoe.
7 Matu to Simeonchi alicala chunca palu mili jolajoe.
Matu to Levichi alicala chunca palu mili jolajoe.
Matu to Isacárichi alicala chunca palu mili jolajoe.
8 Matu to Zabulonchi alicala chunca palu mili jolajoe.
Matu to Josechi alicala chunca palu mili jolajoe.
Matu to Benjaminchi alicala chunca palu mili jolajoe.
9 Aman jun quiranari, manca wa bolon tsachilaca quirayoe. Mituntsancari duque jolajoe. Jerale tobi nechi, jerale tsachi bolonbi nechi, jerale fiqui paminlale nechi tsancari duque jolajoe. Mantamin chudinun caquele, Opisa Nachi caquele wiruralarae. Fibaquin baren camisa pun joto, peso japisunan quiranca tedebi tan jolajoe.
10 Junni sonba pato, itsanlatinae:
Chiquilachi Diosi ya chudinunbi chuminbe, junsi Opisa Nabe, aman yalasiri se lariminla joe latiyoe tilatinae.
11 Junni jerale anjelilanan Diosi chudinun awinta, junsi unicalachi awinta, junsi junpaluca wiruraminlachi awinta jera wiruilaie. Juntele jera wiruraminnan, aman tobi mutsale ito Diosica se tito
12 itsanlatie:
Tsa joe latie.
Chiquilachi Diosica duque seque pantsan joe latie.
Yaca tsara sen joe tin, yaca tsara miramin joe tin, yabe acradesein, yaca jeleran, yaca tsara sonban joe tin, tintsan joe.
13 Junni anjelilari tsanque cantaquinunsi, unica manca labe panhato itsantie:
—¿Ja duque fibaquin camisa pun tsachila mo jolajunhun? tie. ¿Nunchi nechi jacala junhun? tie.
14 Junni lari pato, nu mantá tan joto miranae tiyoe. Junni yari itsantie:
—Inla duque padeseinaminnan locala joe tie. Yalachi camisaca Opisa Nachi asanchi tsaleto fiban suwacalae tie.
15 Junto Diosi mantamin chudinun caquele wiruralarae. Quepen, malon Diosichi yabi parejo rato, yachi tenchi ticatiya quiminla joe tie. Junni jun chudinunbi chumin yalaca cuidaichunae tie.
16 Yalari ano mochi, nin pi mochi natiya manpadeseilaituchunae tie. Pata chibaca pasailaituchunae. Chiba matenan natiya pasailaituchunae tie.
17 Opisa Na yalaca cuidaichunae. Yari Diosi mantamin chudinun quitsale rae tie. Tsa opisa tsacuminla yalachi opisaca cuidaiminla cuwenta, jun tsanquenan ya Opisa Nari yachi tsachilaca cuidaichunae tie. Yalaca pi cuchisa tanjichunae. Ya pi mantimini numatotiya sonnato polesa carimin pi jochunae tie. Diosi yalachi cacabi capinca jera casito cuwachunae tie.