108
Nyaxɨéjnyuꞌcaa pu néijmiꞌi jɨn putyaꞌajxɨeꞌviꞌraꞌaj
Cuíinarij ajta ɨ chuíicarij David jaꞌaꞌrij
1 Nyaxɨéjnyuꞌcaa pu néijmiꞌi jɨn putyaꞌajxɨeꞌviꞌraꞌaj, nyaj Dios,
¡aꞌyaa pu tyaꞌajxɨéꞌviꞌraꞌ tɨ muéetzij jimi tyuꞌtáchuiicaj!
Huájɨsij, nyajúuricamej;
2 xaatájɨsij, áarpaj ajta canárij;
¡nyáajɨstej ɨ tɨ jájcuan huatapuáꞌrij!
3 Chuíicarij nu jɨn tyimuaatatyójtziꞌreꞌej, Tavástaraꞌ,
huaꞌ tzajtaꞌ ɨ tyeɨ́tyee nyajta aꞌɨ́ɨjma jimi ɨ maj séej chuéj japua joꞌcháatɨmee.
4 Jiꞌnye jéetzeꞌ paj vaꞌcán jɨn taxɨeꞌveꞌ quee ɨ tajapuá tɨ séejreꞌ.
¡Ɨ paj jɨn tyámuaꞌ een aꞌáa pu jaꞌráꞌasej ɨ tɨ huáꞌraa jitze tajapuá tɨ séejreꞌ!
5 ¡Nyaj Dios, muáaj paj japuan ajaꞌseejreꞌ ɨ tajapuá tɨ séejreꞌ;
ajta ɨ paj jɨn naa huaséꞌrin néijmiꞌqueꞌ pu orióonajchi ɨ cháanacaj japua!
6 Aꞌɨ́j paj jɨn tajapuá huatányuunyij ɨ paj jɨn néijmiꞌi putyíꞌuurej,
taꞌaj ij huóꞌhuɨɨreꞌen aꞌɨ́ɨjma ɨ paj huaꞌxɨeꞌveꞌ.
¡Pataꞌaj taatájeevej!
7 Dios pu tyuꞌtaxájtacaꞌ aꞌújna ɨ ju tyeyúuj tzajtaꞌ aꞌyan tɨjɨn:
“¡Nyenyetyámuaꞌvaꞌaj nu muiꞌcaquéj jariáꞌnaxɨꞌɨj ɨ chájtaꞌnaj Siquem
nyajta aꞌɨ́j huoꞌriáaꞌsij aꞌáa tɨ huatacaꞌaj a Sucot!
8 Aꞌɨ́jna ɨ Galaad ajta ɨ Manasés aꞌɨ́ɨ mu nye jitze ajtyámaꞌcan;
Efraín pu aꞌɨ́ɨn puéꞌeen ɨ tɨ naꞌváꞌnaa ɨ nyamuꞌuj jitze;
ajta Judá pu aꞌɨ́ɨn puéꞌeen ɨ itzɨ́j nyaj jɨn tyíꞌijta;
9 Moab pu aꞌɨ́ɨn puéꞌeen ɨ nyaj jitzán anányamuejtyeꞌen;
nyajta ɨ nyaj caꞌquéj aꞌɨ́j nu japua jarárɨesij ɨ Edom,
¡nyajta tyuꞌtáchuiicaj nyatɨꞌɨj tyuꞌtyámueꞌtɨn aꞌɨ́ɨjma jimi ɨ filisteos!”
10 ¿Aꞌtanyíj náꞌviꞌtɨn aꞌájna joꞌtɨj jáꞌsejreꞌ ɨ chájtaꞌnaj tɨ curiáꞌnamiꞌ?
¿Aꞌtanyíj nuꞌcájuyetyej aꞌájna a tɨ aꞌyan tyajaꞌrájtyapuaj tɨjɨn Edom?
11 Jiꞌnye muáaj, taj Dios, muáaj paj períj matuuhuaꞌxɨj,
¡capáj cheꞌ huaꞌ jamuán ujóꞌmej ɨ tyétyacaa maj tajɨ́meꞌ nyoꞌsii!
12 Taatáhuɨɨreꞌ aꞌɨ́jcɨ jimi ɨ tɨ tájchaꞌɨɨreꞌ,
jiꞌnye capu tyiꞌtɨ́j huɨɨreꞌ ɨ tyévij tɨ jɨn tyíꞌhuɨɨreꞌ.
13 Vaꞌcán tu jɨn tyíꞌmueꞌtɨn aꞌɨ́jcɨ jɨmeꞌ ɨ Dios tɨ taatyáhuɨɨreꞌej,
¡aꞌɨ́ɨ puꞌij huoꞌtzíinajraꞌaj aꞌɨ́ɨjma ɨ maj tájchaꞌɨɨreꞌ!