126
¡Muáaj paj aꞌyan tyúꞌuurej tɨꞌij tajimí tyámuaꞌ tyáꞌraꞌnyij!
Cuíinarij ɨ maj jɨn huatyáajuꞌun
1 Tɨꞌɨj ɨ Tavástaraꞌ seequéj tyeetyájtoo ɨ Sión,
aꞌyaa pu toꞌtaséjra cuxáa tyaj tyiꞌtyámaarasimeꞌen.
2 Aj puꞌij ɨ tatyényij jitze huataséjre
tyej tyij huánaꞌnan tyajta huajíjhua tyatatyámuaꞌveꞌej;
aj mu mij ɨ maj quee tyáꞌtzaahuatyeꞌ aꞌyan tyíꞌxajtacaꞌaj tɨjɨn:
“¡Tavástaraꞌ pu vaꞌcán jɨn tyámuaꞌ tyúꞌruuj aꞌɨ́ɨjma jimi!”
3 Aꞌyaa pu tyiꞌjaꞌyájna, Tavástaraꞌ pu vaꞌcán jɨn tyámuaꞌ tajimí tyúꞌruuj,
aꞌɨ́j tu jɨn huátatyamuaꞌvej.
4 ¡Tavástaraꞌ, ajtáhuaꞌaj paj tyuꞌtáꞌan tɨꞌij tajimí tyámuaꞌ tyáꞌraꞌnyij,
aꞌyájna tɨꞌɨj seequéj tyeꞌmej tɨpuaꞌaj muaatyéviiyej aꞌájna joꞌtɨj quee jáꞌtyiꞌtɨj!
5 Aꞌɨ́ɨmaj ɨ maj juyíinyej metyiꞌhuasteꞌ,
aꞌɨ́ɨ mu tyíꞌcɨɨtyen majta jeꞌen jijhuan aꞌɨ́jcɨ jɨmeꞌ ɨ maj jutyamuaꞌveꞌej.
6 Tyij majta móoj juyíinyej ayóotɨsimaꞌaj cústaaj jitze ɨ jatzíj,
aꞌɨ́ɨ mu tyíꞌchuiicaj huariaꞌcɨɨnyij aꞌɨ́jcɨ jɨmeꞌ ɨ maj jutyamuaꞌveꞌ,
majta jéehua jaaꞌáꞌsimaꞌaj ɨ tyeríicuj tɨ huácɨɨriacaꞌ.