132
Tyiꞌtɨ́j tɨ ɨ Dios jaꞌtáratziiriꞌ aꞌɨ́jcɨ ɨ David
Cuíinarij ɨ maj jɨn huatyáajuꞌun
1 Ootámuaꞌreej, Tavástaraꞌ, aꞌɨ́jcɨ ɨ David
pajta néijmiꞌi tyiꞌtɨ́j tɨ jɨn jeꞌej tyóomuaꞌtzej,
2 ootámuaꞌreej tyiꞌtɨ́j tɨ jɨn tyámuaꞌ naa tyaꞌtóoratziiriꞌ,
muéetzij jimi, aꞌɨ́jna ɨ tɨ néijmiꞌi jɨn antyúumuaꞌreej aꞌɨ́jcɨ jimi ɨ Jacob.
3 “Canu nye chiꞌtáj ujoꞌtyárutyij
canu nyajta huatyáhuiꞌsij nyej nyij huányasoꞌpeꞌen,
4 canu ootyácusij
canu nyanaꞌaj cɨ́ɨ tyiꞌrácusij,
5 nyatɨꞌɨj quee eexúj chiꞌij huátyoonyij
aꞌɨ́ɨn tɨꞌij jaꞌaꞌrij ɨ Tavástaraꞌ, ɨ tɨ néijmiꞌi jɨn antyúumuaꞌreej aꞌɨ́jcɨ jimi ɨ Jacob.”
6 Aꞌáa tu a Efrata jáanamuajriꞌ maj jatyáxajtasimaꞌaj ɨ tɨ jitzán séejreꞌ ɨ paj jɨn tyaꞌtáꞌratziiriꞌ,
tyajta jeꞌen aꞌáa ɨtzitáj yoꞌtyoj aꞌáa tɨ jaꞌajtyámaꞌcan a Jáar.
7 ¡Tyicheꞌ aꞌáa jóꞌjuꞌun ɨ tyeyúujraꞌ tzajtaꞌ ɨ Tavástaraꞌ!
¡Tyicheꞌ jimi tyítunutaxɨꞌɨn véjriꞌ joꞌtɨj aꞌɨ́ɨn jaꞌraꞌɨ́ɨcajmee!
8 Ájchesij, Tavástaraꞌ, aꞌɨ́jcɨ jɨmeꞌ ɨ tɨ jitzán séejreꞌ ɨ paj jɨn tyaꞌtáꞌratziiriꞌ,
pajta jeꞌen mujoꞌvéꞌmeꞌen aꞌyájna joꞌpaj jaꞌhuáꞌsoꞌpeꞌen.
9 Micheꞌ tyámuaꞌ tyityatóosejrata aꞌɨ́ɨmaj ɨ maj aꞌjimi tyíꞌhuɨɨreꞌ,
majta jutyamuaꞌveꞌej huajíjhua ɨ maj aꞌjimi tyámuaꞌ een.
10 Aꞌɨ́j paj ootámuaꞌreej ɨ David, muéetzij tɨ muahuɨɨreꞌ,
capáj majúujɨpuan aꞌɨ́jcɨ ɨ rey muáaj paj jaꞌantyíhuoj.
11 Tavástaraꞌ pu tyiꞌtɨ́j jɨn tyámuaꞌ naa tyaꞌtáratziiriꞌ aꞌɨ́jcɨ ɨ David,
aꞌyaa puꞌij néijmiꞌi jɨn tyaꞌróoꞌastej jeꞌej tɨ tyaꞌtáratziiriꞌ.
12 “Séej nu vaꞌcán jɨn tyeꞌentyárujtyeꞌej muéetzij tɨ jitze eerányesij.
Tɨpuaꞌaj aꞌyóojmuaꞌ maꞌráꞌastej jeꞌej nyaj tyiꞌtɨ́j jɨn tyaꞌtányaraj
majta aꞌɨ́jcɨ ɨ nyúucarij ɨ nyaj jɨn tyihuáꞌmuaꞌtyen,
majta jeꞌen aꞌyan majta huárɨnyij ɨ huaꞌyojmuaꞌ aꞌɨ́ɨjma
aꞌɨ́ɨjma pu jitze jusén jɨmeꞌ séeriaꞌaj jaꞌmej ɨ maj jɨn tyuꞌtaꞌíjtaj.”
13 ¡Tavástaraꞌ pu arí aꞌɨ́j antyíhuo ɨ jɨríj Sión tɨ ántyapuaj!
¡Aꞌyaa pu tyaꞌváꞌhuoo tɨꞌij aꞌáa jaꞌhuóochejtyeꞌen!
14 “Aꞌɨ́ɨ pu ɨ jɨríj aꞌɨ́ɨn puéꞌeen ɨ nyaj jitzán jaxɨeꞌveꞌ nyej jusén jɨmeꞌ aꞌyan séjreꞌej,
aꞌáa nu jaꞌcháaj naꞌmej, jiꞌnye aꞌyaa pu tyinaꞌránajchacaꞌ.
15 Jéehua nu tyámuaꞌ tyuꞌtyátoosij aꞌɨ́jcɨ ɨ tyajaꞌmuacueꞌraj
nyajta tyámuaꞌ tyihuáꞌcueꞌtyej aꞌɨ́ɨjma ɨ maj quee jeꞌej tyéejviicueꞌ.
16 Aꞌɨ́j nu tyihuoꞌtyéchejtyeꞌsij ɨ maj jɨn jaꞌmua japua huatányuunyij aꞌɨ́ɨmaj ɨ maj jaꞌmua jimi tyíꞌhuɨɨreꞌ
nyajta nu tyuꞌtáꞌsij mej mij jutyamuaꞌveꞌej muaajíjhuaj ɨ maj jimi tyámuaꞌ een.
17 Aꞌáa nu nyij tyuꞌtáꞌsij tɨꞌij huataséjreꞌen ɨ David tɨ jɨn antyúumuaꞌreej.
Nuꞌríj ɨ tatzárij tyámuaꞌ huáruuj
aꞌɨ́j nu nyij jimi jaatyátoosij ɨ rey nyaj nyeríj jaꞌantyíhuoj.
18 Jéehua nu huápuɨꞌɨj tyéviꞌsiꞌ huoꞌtaséjrataj aꞌɨ́ɨjma ɨ maj jájchaꞌɨɨreꞌ,
ajta aꞌɨ́j nu huápuɨꞌɨj tyámuaꞌ naa tyuꞌtaséjrataj.”