149
Dios, ɨ tɨ néijmiꞌi tyúꞌtaahuacaꞌ ajta Rey jɨn tyiꞌtyéjvee
1 ¡Alelúuyaj!
Jájcuacan xu tyuꞌtáchuiicaj ɨ Tavástaraꞌ jimi,
aꞌáa xu tyaatatyójtziꞌreꞌen joꞌmaj jóosɨɨreꞌ ɨ maj jimi tyámuaꞌ tyityetyúuchaꞌɨj.
2 Xatóotyamuaꞌveꞌ mu siaj Israel jitze ajtyámaꞌcan, siajta Sión siaj joꞌcháatɨmee,
jiꞌnye Dios pu néijmiꞌi jaꞌmua jimi tyúꞌtaahuacaꞌ ajta Rey jɨn tyiꞌtyéjvee.
3 Setyuꞌtatyójtziꞌreꞌ ɨ tɨ jɨn ántyapuaj siajta jimi tyuꞌtyéenyeꞌen,
jimi xu tyuꞌtáchuiicaj ɨ canárij jitze siajta ɨ quéetzaj jitze.
4 Jiꞌnye ɨ Tavástaraꞌ pu jutyamuaꞌveꞌ aꞌɨ́ɨjma jimi ɨ jutyéɨtyeristyamuaꞌ,
aꞌɨ́ɨjma pu huataꞌsij maj tyuꞌmuéꞌtɨn ɨ maj quee óotzaahuatyeꞌ.
5 Siataꞌaj huatóotyamuaꞌveꞌen mu siaj quee tyiꞌtɨ́j jɨn áꞌɨtzeereꞌ aꞌɨ́jcɨ jɨmeꞌ siaj tyuꞌtyámueꞌtɨj,
tyij siajta siooj tyácuꞌtzisimeꞌen xuutyámuaꞌveꞌej xu tyíꞌchuiicaj.
6 Cheꞌ ɨ chuíicarij jaꞌmuatyényij jitze séjreꞌej ɨ Dios siaj jɨn tyuꞌtatyójtziꞌreꞌen,
ajta ɨ jaꞌmua muácaꞌ jitze ɨ chúun tɨ juxaꞌaj tyaꞌantámuamuaa
7 siaj sij aꞌɨ́jna jɨn tyoꞌrióorɨeeraj aꞌɨ́ɨjma jimi ɨ maj quee tyáꞌtzaahuatyeꞌ,
siajta puéjtzij huoꞌtáꞌan ɨ maj séej chuéj japua jáꞌmaꞌcan,
8 siataꞌaj huoꞌtyájɨꞌqueꞌen ɨ maj rey jɨn tyíꞌijta siajta ɨ tyeɨ́tyee maj jéehua uhuácacaꞌnyeꞌ
aꞌɨ́jcɨ jɨmeꞌ xu huoꞌtyájɨꞌqueꞌen ɨ cadéenaj tyapúustiꞌ tɨ puéꞌeen tɨ tyíjetyej,
9 taꞌaj ij aꞌɨ́ɨjma jimi aꞌyan tyaꞌróoꞌastej jeꞌej tɨ arí tyoꞌyúꞌsiꞌhuacaꞌ.
¡Aꞌíi pu aꞌɨ́ɨn pueꞌéenyeꞌej jaꞌmej ɨ maj jɨn jaatyátzaahuatyeꞌen ɨ maj jimi tyámuaꞌ een!
¡Alelúuyaj!