15
Tyiꞌtɨ́j tɨ ɨ Dios tyicho ꞌveꞌ aꞌɨ́jcɨ jimi ɨ tyáatɨꞌ
Chuíicarij David tɨ joꞌyúꞌxacaꞌ
1 Tavástaraꞌ,
¿aꞌtanyíj pújoorej tɨꞌij aꞌáa joꞌquéej jáꞌraꞌnyij joꞌpaj muáaj jáꞌsejreꞌ?,
¿aꞌtanyíj pújoorej tɨꞌɨj aꞌáa jaꞌcháaj jáꞌraꞌnyij joꞌtɨj néijmiꞌi tyámuaꞌ tyejéꞌeen tɨ ajta aꞌ jitze ajtyámaꞌcan?
2 Aꞌɨ́ɨ puꞌuj ɨ tɨ quee tyiꞌtɨ́j jɨn áꞌɨtzeereꞌ ajta tyámuaꞌ tyiꞌtyúuchaꞌɨj séecan jamuán,
ajta aꞌɨ́jna jɨn tyíꞌxaj ɨ tɨ jɨꞌréꞌcan jɨmeꞌ néijmiꞌi jɨmeꞌ ɨ juxɨéjnyuꞌcaa,
3 aꞌɨ́jna ɨ tɨ quee aꞌtɨ́j jeꞌej puaꞌaj tyíꞌxaj,
aꞌɨ́jna ɨ tɨ quee jeꞌej puaꞌaj jaꞌuurej ɨ juꞌ amíincuj,
ajta quee jeꞌej puaꞌaj tyihuáꞌxaj ɨ maj jimi avéjriꞌ joꞌcháatɨmee,
4 aꞌɨ́jna ɨ tɨ huaꞌxanaꞌveꞌ aꞌɨ́ɨjma ɨ maj huápuɨꞌɨj jeꞌej puaꞌaj tyityetyúuchaꞌɨj,
ajta tzáahuatyiꞌraꞌaj tyíchaꞌɨj aꞌɨ́jcɨ jimi ɨ tɨ tyáꞌtzaahuatyeꞌ ɨ Tavástaraꞌ jimi,
aꞌɨ́jna ɨ tɨ aróoꞌastee jeꞌej tɨ tyiꞌtɨ́j jɨn tyaꞌtóorasij tyij ajta quee tyámuaꞌ tyéꞌyiꞌcan jimi,
5 aꞌɨ́jna ɨ tɨ huaꞌnyijtyeꞌ ɨ jutúmii ajta quee huáꞌhuavii mej mij jéetzeꞌ tyaanájchityeꞌen,
aꞌɨ́jna ɨ tɨquee jaxɨeꞌveꞌ tɨ tyiꞌtɨ́j ancuriáan avíitzij jɨmeꞌ aꞌɨ́jcɨ jimi ɨ tɨquee tyiꞌtɨ́j jɨn áꞌɨtzeereꞌ.
Aꞌɨ́jna ɨ tɨ aꞌyan tyiꞌtyúuchaꞌɨj, capu aꞌnáj tyiꞌtɨ́j jɨn ootyáꞌɨtzeereꞌej.