24
Aꞌɨ́jna ɨ Rey tɨ jɨn tyiꞌtyéjvee tɨ naa huaséꞌrin
Chuíicarij David tɨ joꞌyúꞌxacaꞌ
1 Tavástaraꞌ pu jaꞌaꞌrij néijmiꞌi ɨ cháanacaj,
ajta néijmiꞌi ɨ tɨ jitzán tyíꞌsejreꞌ,
majta néijmiꞌi ɨ maj jitzán ajoꞌcháatɨmee.
2 Jiꞌnye Tavástaraꞌ pu tyámuaꞌ jáaruuj ɨ tɨ jitzán aróocaꞌnyej ɨ chuéj
ajta tyámuaꞌ jáaruuj ɨ jájritzeꞌ ajta ɨ játyaꞌnaj jitze.
3 ¿Aꞌtanyíj pújoorej tɨꞌij aꞌáa joꞌréꞌnyej joꞌtɨj jeꞌej jeꞌen ɨ Tavástaraꞌ?
¿Aꞌtanyíj pújoorej tɨꞌij aꞌáa jaꞌséeriaꞌaj jáꞌraꞌnyij ɨ tyeyúujraꞌ tzajtaꞌ tɨ naa een?
4 Aꞌɨ́jna ɨ tɨ tyámuaꞌ een ɨ jumuácaꞌ jitze ɨ jumuaꞌtzíiraꞌaj jitze
ajta quee tyiꞌtɨ́j jɨn tyiꞌijxánaꞌcɨraꞌaj
aꞌɨ́jna ɨ tɨ quee sáanturij naꞌmichej
ajta quee hueꞌtzij jɨn tyaꞌtóoratziꞌracaa.
5 Aꞌɨ́jna ɨ Tavástaraꞌ, ajta ɨ Dios tɨ japuan huatányuusij,
aꞌɨ́ɨ pu tyámuaꞌ tyeetyátoosij ajta tyámuaꞌ naa tyáꞌxaꞌpuɨꞌɨntariꞌtzeꞌen.
6 Aꞌyaa pu tyúuxɨeꞌveꞌ maj aꞌyan eenyeꞌ aꞌɨ́ɨmaj ɨ maj jahuoo ɨ Tavástaraꞌ,
aꞌɨ́ɨmaj ɨ maj jahuoo maj jaaséj joꞌtɨj jáꞌsejreꞌ ɨ Dios raꞌ aꞌɨ́jcɨ ɨ Jacob.
7 ¡Cheꞌ antácuunyiꞌhuaxɨꞌɨn ɨ puéertaj tɨ jusén jɨn séejreꞌ!
¡Cheꞌ antacúunyiꞌhuaj táꞌraꞌnyij tyahuaꞌpuajmaꞌaj,
aꞌɨ́ɨ puꞌij utyárutyij aꞌɨ́jna ɨ tɨ naa huaséꞌrin ɨ tɨ Rey jɨn tyiꞌtyéjvee!
8 ¿Aꞌtanyíj aꞌɨ́ɨn puéꞌeen ɨ tɨ naa huaséꞌrin ɨ tɨ Rey jɨn tyiꞌtyéjvee?
¡Aꞌɨ́ɨ pu aꞌɨ́ɨn puéꞌeen ɨ Tavástaraꞌ, ɨ tɨ uhuájcaꞌnyej ajta jéehua jaayíꞌtɨn tɨ huatyényoꞌseꞌen!
¡Aꞌɨ́ɨ pu aꞌɨ́ɨn puéꞌeen ɨ Tavástaraꞌ, ɨ tɨ jaayíꞌtɨn tɨ tyuꞌtyámueꞌtɨn aꞌájna joꞌmaj jáꞌnyoꞌseꞌ!
9 ¡Cheꞌ antácuunyiꞌhuaxɨꞌɨn ɨ puéertaj tɨ jusén jɨn séejreꞌ!
¡Cheꞌ antacúunyiꞌhuaj táꞌraꞌnyij tyahuaꞌpuajmaꞌaj,
aꞌɨ́ɨ puꞌij utyárutyij aꞌɨ́jna ɨ tɨ naa huaséꞌrin ɨ tɨ Rey jɨn tyiꞌtyéjvee!
10 ¿Aꞌtanyíj aꞌɨ́ɨn puéꞌeen ɨ tɨ naa huaséꞌrin ɨ tɨ Rey jɨn tyiꞌtyéjvee?
¡Aꞌɨ́ɨ pu aꞌɨ́ɨn puéꞌeen ɨ Tavástaraꞌ ɨ tɨ néijmiꞌi putyíꞌuurej!
¡Aꞌɨ́ɨ pu aꞌɨ́ɨn puéꞌeen ɨ tɨ Rey jɨn tyiꞌtyéjvee tɨ ajta naa huaséꞌrin!