36
Tyiꞌtɨ́j tɨ ɨ tyáatɨꞌ jɨn jeꞌej puaꞌaj tyiꞌtyúuchaꞌɨj ajta ɨ Dios tɨ tyúꞌpuejveꞌ
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. David tɨ jaꞌaꞌrij, Tavástaraꞌ tɨ jimi tyíꞌhuɨɨreꞌ
1 Aꞌɨ́jna ɨ tɨ jeꞌej puaꞌaj een aꞌɨ́j pu tyíꞌixaatyeꞌ ɨ tɨ jeꞌej puaꞌaj tyiꞌtyúuchaꞌɨj
tyétyeꞌ ɨmuáj ɨ xɨéjnyuꞌcariaꞌraꞌ tzajtaꞌ.
Capu aꞌnáj tzajtaꞌ séejreꞌ
tɨꞌij tzáahuatyiꞌraꞌaj jimi tyíchaꞌɨɨj ɨ Dios.
2 Aꞌyaa pu tyóomuaꞌtzej maj néijmiꞌi tyámuaꞌ tyáꞌxaj,
capu ij jaxanaꞌveꞌ ɨ tɨ jɨn jeꞌej puaꞌaj tyiꞌtyúuchaꞌɨj.
3 Jeꞌej pu puaꞌaj tyíꞌxaxaꞌaj ajta tyíꞌhueꞌtacaa,
aꞌɨ́ɨ pu yoꞌrɨej ɨ tɨ xáꞌpuɨꞌ, ajta jaatapuáꞌcɨtacaꞌ ɨ tɨ tyámuaꞌ een.
4 Huaqueꞌtɨ́j pu aꞌájna joꞌtɨj jáꞌhuiꞌcaa, aꞌɨ́j pu curiaꞌmuaꞌsij tyiꞌtɨ́j tɨ jɨn jeꞌej puaꞌaj huárɨnyij,
huápuɨꞌɨj pu aꞌɨ́j jitze jucaꞌnyej ɨ tɨ jɨn jeꞌej puaꞌaj rɨcɨj
capu ij jaxɨeꞌveꞌ tɨ jaatapuáꞌcɨtaj ɨ tɨ jeꞌej puaꞌaj een.
5 Ajta ɨ paj jɨn taxɨeꞌveꞌ, Tavástaraꞌ, tajapuá pu ɨmuáj jaꞌráꞌasej;
ajta ɨ paj jɨn tyámuaꞌ een aꞌáa pu jaꞌráꞌasej ɨ tɨ huáꞌraa jitze tajapuá tɨ séejreꞌ.
6 Aꞌɨ́jna ɨ paj muáaj jɨn tyíꞌxaꞌpuɨꞌɨntareꞌ aꞌyaa pu een tɨꞌɨj ɨ jɨríj tɨ jéetzeꞌ ajtɨ́tɨꞌɨjmee;
ajta ɨ paj jɨn tyíꞌijta aꞌyaa pu een tɨꞌɨj ɨ jájtyij tɨ veꞌéj tɨ ajta huápuɨꞌɨj atyáatɨꞌ.
Muáaj, Tavástaraꞌ, muáaj paj huáꞌchaꞌɨj ɨ tyeɨ́tyee pajta ɨ tyiꞌtyán maj tyityaacɨ́ꞌɨj.
7 ¡Dios, huápuɨꞌɨj pu naa huaséꞌrin ɨ paj jɨn taxɨeꞌveꞌ!
Muéetzij mu jimi jahuoo, aꞌɨ́ɨmaj ɨ tyeɨ́tyee mej mij huatyóohuɨɨreꞌen.
8 Tyámuaꞌ mu naa tyityaatajúꞌxaj
aꞌɨ́jcɨ jɨmeꞌ ɨ tɨ jéehua ɨ cueꞌráj tyíꞌsejreꞌ aꞌájna joꞌpaj jaꞌchej,
muáaj paj huaꞌtáꞌcaa mej mij huayeꞌen aꞌɨ́jcɨ jitze ɨ játyaꞌnaj tɨ naa éenyeꞌej muɨꞌyej,
9 jiꞌnye muéetzij jitze pu séejreꞌ ɨ júuricamej
ajta muéetzij jimi ɨꞌríj tyej tyij maꞌunyéjnyeꞌrej.
10 Pataꞌaj aꞌnáj tɨ naꞌaj huaꞌtáꞌcareꞌen ɨ paj jɨn taxɨeꞌveꞌ pajta ɨ paj jɨn tyámuaꞌ een
aꞌɨ́ɨjma ɨ maj muéetzij muamuaꞌtyej,
aꞌɨ́ɨjma ɨ tyeɨ́tyee maj quee tyiꞌtɨ́j jɨn áꞌɨtzeereꞌ.
11 Capáj tyiꞌtáꞌcareꞌen maj naatzíinajyiꞌcan aꞌɨ́ɨmaj ɨ maj óotzaahuatyeꞌ
nusu maj aꞌɨ́ɨmaj nyenyoꞌsiꞌtyaꞌaj ɨ maj jeꞌej puaꞌaj tyityetyúuchaꞌɨj.
12 ¡Cásɨꞌ aꞌɨ́ɨmaj mu eetávitzej ɨ maj jeꞌej puaꞌaj tyityetyúuchaꞌɨj!
¡Aꞌɨ́ɨ mu eetávitzej mej mij quee cheꞌ ájhuiixɨꞌɨn!