40
Naꞌráanajchij nyaj aꞌyan huárɨnyij jeꞌej paj muáaj tyáꞌxɨeꞌveꞌ, nyaj Dios
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ
1 Tavástaraꞌ nu jimi jaatyájtoo ɨ nyaj jɨn tyiꞌijchóꞌveꞌ,
aꞌɨ́ɨ puꞌij ecóotutacaꞌ tɨꞌij jáanamuaj jeꞌej nyaj jimi tyáꞌhuoo,
2 nyajapuáj pu huatanyúj nyej nyij quee huámuɨꞌnyij aꞌájna joꞌtɨj jaꞌtyácun,
capu tyuꞌtáꞌ nyej nyij atyájcataj joꞌtɨj jéehua joꞌjéxaj.
Aꞌáa pu nyajaꞌráꞌɨɨcatyej joꞌtɨj tyámuaꞌ naa tyojoꞌtoonyij,
tyámuaꞌ pu tyíꞌuurej jóꞌnyaj jooméj.
3 Aꞌɨ́ɨ pu naatáꞌ nyej nyij jájcuacan tyuꞌtáchuiicaj,
aꞌɨ́jcɨ ɨ chuíicarij ɨ nyaj jɨn tyámuaꞌ tyaatáꞌan ɨ Dios.
Mamueꞌtɨ́j mu, matɨꞌɨj aꞌíj huaséj, aj mu mij tyuꞌtyátzaahuatyej
matɨꞌɨj mij aꞌɨ́j jitze tyuꞌtyáacaꞌan ɨ Tavástaraꞌ.
4 ¡Cheꞌ huatóotyamuaꞌveꞌen aꞌɨ́jna ɨ tyáatɨꞌ tɨ ɨ Tavástaraꞌ jitze tyíꞌcaꞌnyej
ajta quee aꞌɨ́ɨjma jitze tyíꞌcaꞌnyej ɨ maj óotzaahuatyeꞌ
nusu aꞌɨ́ɨjma ɨ maj sáanturij najchej!
5 Nyavástaraꞌ ajta nyaj Dios,
jéehua pu tyíꞌsejreꞌ ɨ tɨ naa tyuꞌséꞌrin muáaj paj tyúꞌtaahuacaꞌ
ajta jeꞌej paj jéehua ityájma tyitáꞌcuꞌvej.
¡Capu tyiꞌtɨ́j séejreꞌ tɨ aꞌyan huaséꞌrihuaꞌan patɨꞌɨj muáaj!
Nyáaxɨeꞌveꞌ nyaj huoꞌréꞌixaatyeꞌen, nyaj aꞌɨ́j tyuꞌtaxáj,
ajta canu pújoorej nyej nyij néijmiꞌi tyuꞌtaxáj.
6 Capáj muáaj aꞌɨ́jna jɨn atyamuaꞌveꞌ maj aꞌ jimi tyuꞌtámuꞌvejritaj
nusu maj jatzíj tyimuaatámuꞌvejrityeꞌen,
capáj pajta jahuoo mej mij yaꞌmuáatyee aꞌ jimi huatámuꞌvejritaj
nusu maj tyiꞌtɨ́j tyuꞌtáꞌan a jimi pej pij aꞌɨ́jna jɨn tyihuoꞌtúꞌuunyiꞌ.
Sulu aꞌyaa paj huarɨ́j, muáaj paj naatáꞌ nyej nyij iityánamuajra.
7 Aꞌɨ́j nu jɨn aꞌyan tyuꞌtaxájtacaꞌ tɨjɨn: Yáꞌnyaj huatyéjve,
aꞌyájna tɨꞌɨj nyaj jɨmeꞌ tyéꞌyuꞌsiꞌ ɨ yuꞌxarij jitze.
8 Nyaj Dios, nyéetzij pu naꞌráanajchij nyaj aꞌyan huárɨnyij jeꞌej paj muáaj tyáꞌxɨeꞌveꞌ,
nyaxɨéjnyuꞌcaa tzajtaꞌ pu séejreꞌ jeꞌej paj muáaj tyíꞌnyamuaꞌtyej.
9 Aꞌɨ́ɨmaj mu mueꞌtɨ́j tyiꞌséeracaj aꞌtyéɨtyeristyamuaꞌ
nyatɨꞌɨj huoꞌtaséjra tyiꞌtɨ́j tɨ xáꞌpuɨꞌ.
¡Muáaj paj tyámuaꞌ naa tyáꞌmuaꞌreej, Tavástaraꞌ, nyaj quee aꞌnáj huatyápuaꞌriacaꞌ!
10 Canu aꞌnáj quee jaataxájtacaꞌ aꞌɨ́jcɨ ɨ paj jɨn tyámuaꞌ tyíꞌuurej,
nuꞌríj jaataxájtacaꞌ paj quee tyiꞌtɨ́j jɨn áꞌɨtzeereꞌ nyajta ɨ paj jɨn tahuɨɨreꞌ.
Canu aꞌnáj jaatyáꞌavaatacaꞌ ɨ paj jɨn taxɨeꞌveꞌ ajta ɨ tɨ jɨꞌréꞌcan jɨmeꞌ muéetzij jimi
aꞌɨ́ɨjma jimi aꞌtyéɨtyeristyamuaꞌ ɨ maj jéehua aráꞌasej.
11 Pajta muáaj, Tavástaraꞌ, capáj nyaꞌaviitzeꞌej ɨ paj jɨn tyámuaꞌ nyojoꞌmuaꞌraj.
Aꞌnáj tɨnaꞌaj paj nyechaꞌɨɨj aꞌɨ́jcɨ jɨmeꞌ ɨ paj jɨn nyaxɨeꞌveꞌ ajta ɨ paj jɨn tyámuaꞌ een.
12 Jiꞌnye jéehua pu jeꞌej puaꞌaj tyíꞌnyaꞌuurej
ajta quee ɨꞌríj nyaj jaatyéꞌiten aꞌchu tɨ arí puaꞌmáj jeꞌej puaꞌaj tyináaruuj.
Aꞌɨ́ɨ pu arí nyeriaꞌnaj ɨ nyaj jɨn jeꞌej puaꞌaj huarɨ́j,
canu nyij nyajta cheꞌ tyámuaꞌ metyóonyeej.
Puꞌríj jéetzeꞌ aráꞌasej quee ɨ nyaj cɨpuáj,
capu ij ajta cheꞌ nyacaꞌnyistiꞌ.
13 Tavástaraꞌ, pataꞌaj cuiꞌ mujoꞌvéꞌmeꞌen pej pij nyajapuáj huatányuunyij.
Tavástaraꞌ, caꞌnácan paj mujoꞌvéꞌmeꞌen pej pij naatáhuɨɨreꞌen.
14 ¡Micheꞌ néijmiꞌi jɨn huápuɨꞌɨj tyéviꞌsiꞌ huataséjreꞌen
aꞌɨ́ɨmaj ɨ maj jaxɨeꞌveꞌ maj naꞌantyipuáꞌrityeꞌen!
¡Micheꞌ tyéviꞌsiꞌ séeriaꞌaj huatóoꞌuunaj
aꞌɨ́ɨmaj ɨ maj jeꞌej puaꞌaj nyaꞌuuriajmuɨꞌ!
15 ¡Micheꞌ jutyéviꞌraꞌaj muatóoꞌuunaj
aꞌɨ́ɨmaj ɨ maj jeꞌej puaꞌaj nyojoꞌmuaꞌraj!
16 Majta néijmiꞌi aꞌɨ́ɨmaj ɨ maj muéetzij muahuoo
micheꞌ aꞌɨ́ɨmaj jéehua huatóotyamuaꞌveꞌen,
majta ɨ maj jaxɨeꞌveꞌ paj huaꞌ japua huatányuunyij
micheꞌ aꞌnáj tɨnaꞌaj aꞌyan tyíꞌxajtaj tɨjɨn: “¡Vaꞌcán pu jɨn antyúumuaꞌreej ɨ Tavástaraꞌ!”
17 Ajta nyaj jɨmeꞌ, nyaj quee jeꞌej tyéejviicueꞌ nyajta quee jeꞌej tyéejtyoovej,
capáj nyojoꞌhuaꞌnan, Tavástaraꞌ.
Muáaj paj aꞌɨ́ɨn puéꞌeen ɨ tɨ nyahuɨɨreꞌ ajta nyajapuáj huatányuusij,
¡capáj áꞌtyeeviꞌin, nyaj Dios!