48
Aꞌɨ́jna ɨ Sión tɨ jɨn naa huaséꞌrin, chájtaꞌnaj tɨ puéꞌeen Dios tɨ jitze ajtyámaꞌcan
Chuíicarij. Chuíicarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré
1 ¡Vaꞌcán pu jɨn tyiꞌtyéjvee ɨ Tavástaraꞌ!
¡Aꞌɨ́jna ɨ taj Dios tyámuaꞌ pu een tyej tyij jimi tyuꞌtáchuiicaj
ɨ chájtaꞌnaj tɨ jitzán ajtyámaꞌcan ajta aꞌájna joꞌtɨj néijmiꞌi tyámuaꞌ tyejéꞌeen ɨ jɨríj jitze!
2 ¡Naa pu huaséꞌrin aꞌɨ́jna ɨ jɨríj tɨ ájtyeej ɨ tɨ aꞌyan ántyapuaj tɨjɨn Sión,
aꞌájna pujmuaꞌ, joꞌtɨj joꞌtáꞌasej ajtyapuáj ɨmuáj tɨ séejreꞌ!
¡Aꞌɨ́ɨ pu tyámuaꞌviꞌraꞌaj puéꞌeen néijmiꞌqueꞌ ɨ chuéj japua!
¡Aꞌɨ́ɨ pu puéꞌeen ɨ chájtaꞌnaj tɨ veꞌéj aꞌɨ́ɨn tɨ jaꞌaꞌrij ɨ Rey tɨ jɨn tyiꞌtyéjvee!
3 Dios pu aꞌáa jáꞌsejreꞌ a Jerusalén aꞌájna joꞌmaj jeꞌráatyij ɨ maj tyíꞌijta;
Dios pu aꞌyan tyuꞌtóosejratacaꞌ tɨꞌɨj joꞌtɨj jáaɨꞌrij tɨꞌij tyámuaꞌ tyihuoꞌtyáhuɨɨreꞌen.
4 Jiꞌnye aꞌɨ́ɨmaj mu tyúusɨɨj ɨ maj rey jɨn tyityetyuꞌuj
aj mu mij néemiꞌij aꞌɨ́j jimi huatajeꞌyacaꞌ;
5 ajta matɨꞌɨj jaaséj ɨ chájtaꞌnaj jeꞌej mu tyoꞌtaséj,
majta quee cheꞌ jeꞌej jájtyoovaꞌaj aj mu mij huatóoꞌuj.
6 Aꞌɨ́ɨ pu huaꞌ jimi huatyáꞌɨtzee ɨ maj jɨn tyuꞌtátzɨɨnyeꞌen:
huápuɨꞌɨj pu huaꞌcuiꞌcaꞌaj, aꞌyájna tɨꞌɨj íitaj tɨ ootacuíꞌnyej tɨꞌɨj tyiyóoj jaꞌmej;
7 pahuaꞌantyipuáꞌrij ɨ maj tyíꞌijta aꞌyájna tɨꞌɨj ɨ áacaj aꞌáa tɨ pujmuaꞌ jeꞌréꞌnyinyii joꞌtɨj ɨ xɨcáj jéꞌejnyinyiij, ɨ tɨ huoꞌtyáanaꞌxɨj ɨ báarcuj aꞌáa maj jáꞌsejreꞌ aꞌ tɨ aꞌyan tyajaꞌrájtyapuaj tɨjɨn Tarsis.
8 Aꞌájna a chájtaꞌnaj jitze taj Dios tɨ jaꞌaꞌrij,
ɨ Tavástaraꞌ ɨ tɨ néijmiꞌi jɨn antyúumuaꞌreej,
aꞌɨ́j tu tyeríj huaséj ɨ tajɨꞌɨj jɨmeꞌ
aꞌyájna matɨꞌɨj meríj tyitáaꞌixaatyaꞌcaꞌaj,
¡Dios pu jusén jɨmeꞌ tyámuaꞌ tyeꞌchaꞌɨ́ɨj jaꞌmej ɨ chájtaꞌnaj Jerusalén!
9 Taj Dios, aꞌájna jéꞌtaꞌ aꞌ tyeyúuj tzajtaꞌ
aꞌáa tu aꞌɨ́j jitze tyíꞌmuaꞌtzej ɨ paj vaꞌcán jɨn taxɨeꞌveꞌ.
10 Taj Dios, néijmiꞌqueꞌ mu ɨ cháanacaj japua tyámuaꞌ tyimuatáꞌcaa
aꞌyájna tɨꞌɨj tyaꞌráanajchi aꞌɨ́jcɨ jitze jeꞌej paj ántyapuaj.
Aꞌɨ́jna ɨ paj néijmiꞌi jɨn putyíꞌuurej aꞌɨ́j paj jɨn tyámuaꞌ naa tyáꞌxaꞌpuɨꞌɨntareꞌ.
11 ¡Micheꞌ néijmiꞌi huatóotyamuaꞌveꞌen aꞌájna a tɨ aꞌyan tyajaꞌrájtyapuaj tɨjɨn Sión!
¡Micheꞌ tyítzunaxɨꞌɨn muutyámuaꞌvaꞌaj ɨ chájtaꞌnaj jitze aꞌáa tɨ tyejeꞌejtyámaꞌcan a Judá
aꞌɨ́jcɨ jɨmeꞌ jeꞌej paj tyámuaꞌ naa tyaaxáꞌpuɨꞌɨntarej!
12 Siataꞌaj eetyácɨɨnyej aꞌájna a Sión
siajta jeꞌen jaatyéꞌiten aꞌchu tɨ aráꞌasej ɨ chiꞌij tɨ ajtɨ́tɨꞌɨjmee;
13 xaaséj ɨ tɨ atátaavijhuaj ajta joꞌmaj jeꞌráatyij aꞌɨ́ɨmaj ɨ maj tyíꞌijta,
tɨꞌij ɨꞌríitan siaj huoꞌtéꞌexaatyeꞌen
aꞌɨ́ɨjma ɨ maj jaꞌmua jitze eerányesij
14 tɨ aꞌyan een ɨ taj Dios
tɨꞌɨj naꞌaj yu tɨ joꞌcaꞌaj ajta jusén jɨmeꞌ.
¡Aꞌɨ́ɨ pu aꞌɨ́ɨn puéꞌeen ɨ tɨ táaviꞌtɨj ijíij ajta jusén jɨmeꞌ!