64
Jeꞌej maj tyityeetyényuunyij tɨꞌij ɨ Dios huóꞌchaꞌɨɨn
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ
1 Nyaj Dios, huánamuaj jeꞌej nyaj tyíꞌnyenyuusteꞌ;
huáchaꞌɨj ɨ nyajúuricamej aꞌɨ́ɨjma jimi ɨ maj huápuɨꞌɨj nyéjchaꞌɨɨreꞌ.
2 Naatyáꞌavaaj aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj
ajta jeꞌej maj avíitzij tyiꞌtɨ́j jɨn rɨcɨj;
pajta nyajapuáj huatányuunyij tyiꞌtɨ́j maj jɨn tyámuaꞌ juꞌuurej ɨ maj jeꞌej puaꞌaj rɨcɨj,
3 aꞌɨ́ɨ mu jacaachej ɨ junyanúu cuxáa tɨ chúun puéꞌeenyeꞌ
ajta ɨ maj jɨn tyíꞌxaj aꞌyaa pu een tɨꞌɨj ɨ ɨꞌrɨ́j tɨ tyuꞌjéꞌcaj.
4 Aꞌáa mu ɨmuáj joꞌtyaꞌúuj joꞌmaj jóoꞌavaaj jeꞌej puaꞌaj mahuaꞌuurej aꞌɨ́ɨjma ɨ maj quee tyiꞌtɨ́j jɨn áꞌɨtzeereꞌ,
aꞌɨ́ɨ mu mij huaꞌcuꞌraj matɨꞌɨj quee putyámuamuaꞌreꞌej. Camu aꞌɨ́ɨmaj tyíꞌtzɨɨnyeꞌej.
5 Aꞌɨ́ɨ mu jujɨ́ɨmuaꞌaj caꞌnyíjraꞌaj tóoaꞌcaa mej mij jeꞌej puaꞌaj huárɨnyij;
aꞌɨ́ɨ mu avíitzij jɨn tyámuaꞌ jaꞌuurej ɨ maj jɨn huáꞌviiviꞌ
majta aꞌyan tyíꞌmuaꞌtzej tɨ quee aꞌtɨ́j huaꞌsejran,
6 tɨ quee aꞌtɨ́j jaatyésejra tyiꞌtɨ́j maj jɨn jeꞌej puaꞌaj rɨcɨj.
Ajta aꞌɨ́jna ɨ tɨ jaayíꞌtɨn tɨ jáamuaꞌreej
jeꞌej tɨ avíitzij jɨn tyíꞌmuaꞌtzej aꞌɨ́jna ɨ tyévij,
aꞌɨ́ɨ pu tyámuaꞌ tyeetyésejra.
7 Dios pu tyihuáꞌpuejtyeꞌen aꞌɨ́jcɨ jɨmeꞌ ɨ tyihuaꞌ ɨꞌrɨ́j,
aꞌɨ́ɨ pu tyihuáꞌpuejtyeꞌen matɨꞌɨj puaꞌaj quee putyámuamuaꞌreꞌej,
8 aꞌɨ́ɨ mu jujɨ́ɨmuaꞌaj puéjtzij huatóoaꞌsij aꞌɨ́jcɨ jɨmeꞌ jeꞌej maj tyíꞌxaj;
ajta aꞌtyán maj huaꞌsejran aꞌɨ́ɨ mu huoꞌtyáxaahuataj.
9 Aj mu mij néijmiꞌi tzáahuatyiꞌraꞌaj tyichaꞌɨ́ɨj muáꞌjuꞌun ɨ Dios
majta jaataxájtaj jeꞌej tɨ tyiꞌtɨ́j jɨn rɨcɨj,
majta aꞌɨ́j jitze tyúumuaꞌtziityeꞌen jeꞌej tɨ aꞌɨ́ɨn tyiꞌtɨ́j huáruuj.
10 Aꞌɨ́jna ɨ tyévij tɨ tyámuaꞌ tyiꞌtyúuchaꞌɨj aꞌɨ́ɨ pu huatóotyamuaꞌveꞌsij ɨ Tavástaraꞌ jimi
ajta aꞌɨ́j jimi jahuoonyij tɨꞌij jaatyáhuɨɨreꞌen,
majta néijmiꞌi ɨ tyeɨ́tyee maj tyámuaꞌ tyityetyúuchaꞌɨj
aꞌɨ́ɨjma pu tyámuaꞌ huataꞌeexaj.