93
Tavástaraꞌ pu Rey puéꞌeen
1 ¡Tavástaraꞌ pu Rey puéꞌeen!
¡Tavástaraꞌ pu arí aꞌɨ́j tyuꞌtyóochejtyej ɨ tɨ naa tyuꞌséꞌrin
ajta aꞌɨ́jna jɨn curioonaj ɨ tɨ néijmiꞌi jɨn putyíꞌuurej!
Aꞌɨ́ɨ pu tyámuaꞌ jáaruuj ɨ cháanacaj, tɨꞌij quee táhuaanyeꞌen.
2 Aꞌyaa puꞌij ooj tyíꞌeen, Tavástaraꞌ, tyámuaꞌ pu een aꞌɨ́jna ɨ paj jitzán huatyájcaj.
¡Muáaj paj jusén jɨmeꞌ séejreꞌ!
3 Muáaj paj Tavástaraꞌ puéꞌeen,
ɨ játyaꞌnaj pu tɨꞌrájna ajta jéehua áꞌxɨreꞌej;
4 ajta muáaj, Tavástaraꞌ, jútyeꞌ ɨmuáj paj jáꞌsejreꞌ,
jéetzeꞌ paj uhuájcaꞌnyej quee ɨ jájtyij tɨ áꞌxɨreꞌej
nusu ɨ japúutzarij tɨ atyúutaꞌhuaj ɨ jájritzeꞌ.
5 Muáaj paj Tavástaraꞌ puéꞌeen,
tyámuaꞌ pu een aꞌɨ́jna ɨ paj jɨn tyuꞌtaꞌíjtacaꞌ.
¡Ajta ɨ paj jɨn tyámuaꞌ een aꞌɨ́j pu jɨn jusén jɨmeꞌ naa huaséꞌrin aꞌ tyeyúuj!