97
Tavástaraꞌ pu Rey puéꞌeen
1 ¡Siataꞌaj néijmiꞌqueꞌ huatóotyamuaꞌveꞌen ɨ cháanacaj japua!
¡Siajta huatóotyamuaꞌveꞌen joꞌtɨj jaꞌrahuáchijmee ɨ jájritzeꞌ!
¡Tavástaraꞌ pu Rey puéꞌeen!
2 Ajta jéetɨrij jariáꞌnaj tɨquee tzajtaꞌ nyéeriꞌij;
ajta ɨ ɨpuariáaraꞌan aꞌɨ́j pu jitze jucaꞌnyej ɨ tɨ tyámuaꞌ een ajta huatóojeꞌyej;
3 ajta ɨ tɨéj anájcaj aꞌɨ́jcɨ jimi
aꞌɨ́ɨ puꞌij huáꞌteeraj aꞌɨ́ɨjma ɨ maj jájchaꞌɨɨreꞌ.
4 Aꞌɨ́jna ɨ tɨ tyánaꞌaxcavaꞌraꞌaj aꞌɨ́j pu jɨn huányeeriꞌij ɨ cháanacaj japua,
¡ajta ɨ cháanacaj pu huatóocaꞌtzɨj tɨꞌɨjta aꞌɨ́ɨjma huaséj!
5 Ajta ɨ jɨríj aꞌyaa pu tyuꞌtóotuiꞌsij tɨꞌɨj ɨ xɨ́ɨjca
aꞌɨ́jcɨ jimi ɨ Tavástaraꞌ, aꞌɨ́jcɨ jimi ɨ tɨ néijmiꞌi jaꞌaꞌrij ɨ cháanacaj.
6 Ajta ɨ tajapuá tɨ séejreꞌ pu jaxajta ɨ tɨ jɨn tyámuaꞌ naa tyáꞌxaꞌpuɨꞌɨntareꞌ;
néijmiꞌi mu ɨ tyeɨ́tyee jaaséj ɨ tɨ jɨn naa huaséꞌrin.
7 Mahuoꞌtyáxaahuatacaꞌ aꞌɨ́ɨjma ɨ maj sáanturij najchej,
aꞌɨ́ɨmaj ɨ maj aꞌɨ́ɨjma jimi óotzaahuatyeꞌ.
Néijmiꞌi mu ɨ maj tajapuá tyíꞌhuɨɨreꞌ jimi ecóotutaxɨj.
8 Muáaj paj Tavástaraꞌ puéꞌeen,
Aꞌɨ́jna ɨ chájtaꞌnaj Sión ajta séecan ɨ chájtaꞌnaj Judá tɨ jitze ajtyámaꞌcan
aꞌɨ́ɨ mu aꞌɨ́j jɨn jutyamuaꞌveꞌ jeꞌej paj muáaj tyuꞌtaꞌíjtacaꞌ,
9 jiꞌnye muáaj, Tavástaraꞌ jútyeꞌ ɨmuáj paj jáꞌsejreꞌ,
muáaj paj néijmiꞌi japuan séejreꞌ ɨ cháanacaj
pajta jéetzeꞌ huaꞌ japua ɨmuáj séejreꞌ ɨ maj a jimi tyíꞌhuɨɨreꞌ.
10 Tavástaraꞌ pu huaꞌxɨeꞌveꞌ aꞌɨ́ɨjma ɨ tɨ quee huaꞌráanajchi ɨ tɨ jeꞌej puaꞌaj een;
ajta tyámuaꞌ tyéꞌchaꞌɨj ɨ huaꞌ júuricamej ɨ maj jimi tyámuaꞌ een;
huaꞌ japua pu huatányuusij mej mij quee jeꞌej huáꞌuurej ɨ maj jeꞌej puaꞌaj tyityetyúuchaꞌɨj.
11 Tatzárij pu huataséjreꞌsij aꞌɨ́jcɨ jimi ɨ tyévij tɨ tyámuaꞌ tyiꞌtyúuchaꞌɨj;
majta huatóotyamuaꞌveꞌsij ɨ tyeɨ́tyee maj quee tyiꞌtɨ́j jɨn áꞌɨtzeereꞌ.
12 ¡Siataꞌaj huatóotyamuaꞌveꞌen ɨ Tavástaraꞌ jimi, tyeɨ́tyee siaj tyámuaꞌ tyityetyúuchaꞌɨj,
siajta tyaatatyójtziꞌreꞌen ɨ tɨ jɨn ántyapuaj tɨ ajta tyámuaꞌ een!