11
Lázaro pa'cho
1 Fae a'i paji'su Betaniani can'jen. Tise inise Lázaro. María, tise she'she Marta'qque tseni can'jen'fa.
2 Tsa Maríaja paji'su Lázaro she'she tsu. Tsa tsu Na'su Jesús tsu'ttema ñome'bai'ccu onjoemba tise tosei'ccu sanjan'su.
3 Lázaro pajisi tise she'shepa Jesúsnga aya'faen moen'fa qquen supa:
—Na'su, que in'jan'cho amigo tsu paji.
4 Jesúsja tsama pañamba su:
—Va paqque'suja ñoa'me pan'jaeña'bi tsu. Tsa'ma Chigaja ti'tsse'tssia qquen canjaeña'cho tsu. Toya'caen tsu canjaeña ña Chiga Dutssi'ye'qque gi ti'tsse'tssia.
5 Jesúsja Marta, tise que'ttema, tise quinshin Lázaroma'qque ñotsse in'jan.
6 Tsa'ma Lázaro paji qquen paña'an'qque toya dos a'ta can'jen tise can'jeni.
7 Tsomba Jesúsja inginga su:
—Jinge ccase jaye Judeani.
8 Tsonsi ingija su'fa:
—Atesian'su, voeyi tsu tseni'su israendeccuja patui'ccu quema fi'ttiye in'jan'fa. Tse'an qui ccase jaye in'jan.
9 Jesúsja ingima su:
—Dyombe can'faja. ¿Ñoa'membi ti fae a'ta doce horave coe'je de'jeye? A'ija a'ta jacan'da iñaccaya'bi tsu coe'je desi attepa can jacamba.
10 Tsa'ma cose jacan'da iñaccaya tsu a'ta shacasi. Chigaja a'tatssi ingima coiraye.
11 Tsomba Jesúsja su:
—Ingi amigo Lázaroja tayo tsu ana. Tisema qquendyaen'su gi jayi.
12 Tsonsi ingija su'fa:
—Na'su, ana'da tsu ccushaye tson'jen.
13 Tsa'ma Jesúsja Lázaro tayo pa qquen suye in'jansi ingija pañamba aqquia ana'suma su qquen in'jan'fa.
14 Tsonsi Jesúsja a'tatssia've conda:
—Lázaroja tayo tsu pa.
15 Tseni can'jembipa gi avuja. Tsa'caen tsu ñotssi que'i attepa in'jan'faye. Tsa'ma jinge can'gaye.
16 Tsonsi Tomás, tsa Gemelo qquen su'choja, inginga su:
—Jinge ingi'qque jaye Jesúsi'ccu fae'ngae paye.
Jesúsja Qquendyaen'su, cansian'su
17 Tseni napipa gi paña'fa tayo cuatro a'ta tsu Lázaroma a'tu'choja.
18 Betaniane'da Jerusaléni biambicco –tres kilometroa'can.
19 Tsain'bitssia israendeccu Marta, Maríama can'su ji'je'fa, tise quinshi pa'chone fae'ngae ñombi'yepa fuiteye.
20 Jesús pan napiji qquen pañamba Marta cachui'su ja. Tsa'ma Maríaja tsaoni catiye.
21 Cachuipa Martaja Jesúsnga su:
—Na'su, va'tti que can'jen'choecan'da meinte tsu ña quinshi'ñejan paye'can.
22 Tsa'ma ñanda gi atesu Chiga tsu afeya pa'cco que iñajan'choma.
23 Jesúsja su:
—Que quinshi'ñenda tsu ccase qquendyaya.
24 Martaja su:
—Ju, atesu gi ccase tsu qquendyaya poi pa'chondeccui'ccu osefaeña'cho a'ta napisi.
25 Tsonsi Jesúsja su:
—Ña gi qquendyaen'su, cansian'su. Majan ñama in'jan'chota tsu pa'a'qque ccase qquendyaya.
26 Nane poiyi'cco majan toya canse'chondeccu ñama in'jan'da minguite'qque payambi tsu. ¿Queta ti qui in'jan?
27 Tiseja su:
—Ju, Na'su. Ñajan in'jan gi queja Cristo, Chiga Dutssi'ye, va andenga ji'cho.
Jesúsja Lázaro'yene i'na
28 Tsomba Marta tise que'tte Maríama ttuse'su japa a'tutsse su:
—Atesian'su tsu tayo jipa queve ttuse'je.
29 Tse'faei'ccuyi tsama pañamba Maríaja Jesúsma can'su ja.
30 Nane Jesúsja canqqueni ca'nimbipa toya Marta cachui'ttini can'jen.
31 María cunshoa'me sombopa jasi tse'tti tsaoni can'jen'cho fae'ngae ñombi'yepa fuite'su israendeccu atte'fa. Attepa atu'ttini ina'su jayi qquen in'jamba tise'pa'qque fae'ngae omboe ja'fa.
32 Tsonsi Maríaja ingi can'jeni napipa Jesús tsutteccofanga ccaru dyaipa su:
—Na'su, va'tti que can'jen'choecan'da meinte tsu ña quinshi'ñejan paye'can.
33 María, tisei'ccu ji'cho israendeccu'qque i'nasi attepa Jesúsja injama'cho tsosipie ñombi'yepa quia'me qquendyaccopa
34 iñajampaña:
—¿Mani qui a'tu'fa?
Tise'paja su'fa:
—Na'su, jipa can'gija.
35 Tsonsi Jesúsja i'na.
36 I'nasi israendeccuja su'fa:
—Min'ge'e tsu in'jan.
37 Tsa'ma cca'indeccuja su'fa:
—Vaja binima ccushaen'suta, ¿ma'caen'qqueta ti tsoña'bi Lázaro'ye pambecañe?
Lázaro ccase qquendya'cho
38 Atu'ttinga catsepa Jesúsja ccase injama'cho tsosipie ñombi'ye. Atu'ttija fattocco chango tsu patui'ccu picco'cho.
39 Jesúsja su:
—Joqquitssian'faja patuma.
Marta, pa'chombe sheshe'yeja su:
—Na'su, tayo tssu'jutssiya tsu. Cuatro a'ta tsu tise pa'choja.
40 Tsa'ma Jesúsja su:
—¿Minga gi su'a: “In'jan'da qui atteya Chigaja ti'tsse'tssiave.”?
41 Tsonsi patuma joqquitssian'fasi Jesúsja sefacconima camba su:
—Yaya, Queja ñama pañasi gi Quene ñotsse afa'je.
42 Ñajan atesu gi Que ñama paña'jen'choma. Tsa'ma qquen gi Quene ñotsse afa'je cuintsu vani can'jensundeccu pañamba in'jañe Que ñama moen'chove.
43 Tsa'caen supa quia'me fundopa afa:
—Lázaro, tse'ttie somboja:
44 Tse'i pa'choja sombo tsu'tte, tivema sarupafai'ccu findi'fa'cho; tsoveju'qque pañeroi'ccu oppoen'cho. Jesúsja su:
—Ccupa'faja cuintsu jaye.
Jesúsma fi'ttiye asi'ttaen'fa'cho
(Mt 26.1-5; Mr 14.1-2; Lc 22.1-2)
45 Tsa'caen tsonsi tsain'bio Maríama can'su ji'chondeccu Jesús tson'choma attepa Jesúsve in'jan'fa.
46 Tsa'ma majandeccuja tsendeccu'su fariseondeccunga japa condase'fa ma'caen Jesús tson'choma.
47 Tsonsi Chigama afa'su nasundeccu, fariseondeccu'qque bopa su'fa:
—¿Ma'caen gi tson'faya? Va a'ija ñoa'me ñotssiama tsu canjaen'jen.
48 Ingi can antte'nijan poiyi'cco tsu tise've in'jan'faya. Tsonsi Romano nasundeccu mandasi tsu sundarondeccu jipa va Chiga ettima asitta cati'faya. Ingi aindeccuma'qque tsu sefoen'faya.
49 Tsa'ma fa'e na'su, Caifás qquen inise'cho'cho, tsa canqque'fane Chigama afa'su na'suve ca'ni'choja qquen tsu su:
—Que'ija atesu'fambi qui.
50 Ni in'jan'fambi qui –ñotssi tsu ingine'jan fae a'iyi poiyi'ccone paye, romanondeccu poiyi'cco ingi aindeccuma sefoen'fasa'ne.
51 Nane Caifásja tisuyi in'jamba tsa'caen sumbi. Tsa'ma tiseja tsa canqque'fa Chigama afa'su na'supa Chiga tisema in'jaensi tsa'caenjan su Jesúsja poiyi'cco israendeccune paya'chove.
52 Tsa'ma israendeccuneñimbi tsu Jesús paya'choja. Poiyi'cco attufa'cco'cho Chiga dutssiyendeccu'qque fae a'iyiqquia'caen da'faye tsu Jesúsja paya'cho.
53 Caifás tsa'caen susi tsequi a'ta ashaemba israe'su nasundeccuja condasecco'fa ma'caen Jesúsma fi'ttiya'chove.
54 Tsa'cansi Jesúsja a'tatsse jacambi israendeccuni. Tsa'ma Judea andene sombopa Efraín canqqueni japa ingi'ccu can'jen'fa. Tsa canqqueja a'i menia pporotsse.
55 Israendeccu Chiga panshaen'cho injienge'cho fiesta pan napiji. Tsa'ma fiesta toya napimbi'te tsain'bio a'i tise'pa canqque'ye sombopa Jerusaléni jaja'fa asettupa onjoñe.
56 Jesúsve tta'ttapa Chiga ettini can'jemba tisupapora iñajansepoencco'fa:
—¿Jongoe qquen qui in'jan'fa? ¿Jiya ti fiestangaja?
57 Nane Fariseondeccu, Chigama afa'su nasundeccu'qque tayo qquen manda'a:
—Majan mani Jesús can'jen'choma atte'ta conda'faja tisema indiye.