6
Jesús cinco mil a'ive o'fian'cho
(Mt 14.13-21; Mr 6.30-44; Lc 9.10-17)
1 Tsomba tse'i ingija Jesúsi'ccu Galilea mar jonifani ja'fa. Tsaveyi inisian'fa Tiberias mar.
2 Tsain'bio a'i Jesúsi'ccu jacan'fa tise canjaen'choma attepa pajisundeccuma'qque ccushaensi.
3 Tse'i ingija ccotta'cconga Jesúsi'ccu ansundepa dyai'fa.
4 Ingi israendeccu Chiga panshaen'cho injienge'cho fiestaja pan napiji.
5 Jesúsja camba tsain'bio a'i jiña'fasi attepa Felipema su:
—¿Manima gi chava'faya a'ima o'fiaña'chove?
6 Jesúsja ma'caen tsoña'chove atesu'chopa Felipe jongoe qquen su've'se qquen in'jamba iñajampaña.
7 Tsonsi Felipeja su:
—Dosciento denario corifin'di napiya'bi tsu poiyi'cco re'riccoe añe chavaye'ja.
8 Tsonsi faesu Jesúsma shondo'su –Andrés– Simón Pedro quinshija su:
9 —Va'tti tsu can'jen du'shu –cinco máchicama ñoña'cho pan, dos avuma an'bian'cho. Tsa'ma ¿ma'caen tsu pa'cco a'i va'ccoanjan an'faya?
10 Tsonsi Jesúsja inginga su:
—Poiyi'ccoma su'faja cuintsu dyai'faye.
Tsain'bia shoshovi jinchonga tsain'bitssia a'i dyai'fa. Tsandienaccuyi cinco milca'on tsu dyai'fa.
11 Tsonsi Jesúsja panma isupa Chigama iñajan. Iñajan nanimba ingi tisema shondosundeccunga afesi ingija aindeccunga afe'je'fa. Tsa'caeñi avuma'qque a'i añe in'janqquia'caen afe'fa.
12 Poiyi'cco an tteppu'fasi Jesúsja inginga su:
—An antteye'choma tai'faja aqquia catiyesa'ne.
13 Cinco máchicama ñoña'cho pan antteye'choma taipa doce saparove gi on'boen'fa.
14 Tsonsi a'ija Jesús va canjaen'choma attepa su'fa:
—Ñoa'me tsu va a'ija Chiga Aya'fama afa'su jiya'cho qquen su'cho.
15 A'ija Jesúsma na'suve tsoñe indiye in'jan'fa. Tsa'ma Jesúsja tise'pa in'jan'choma atesupa ccuyapa ansunde ccotta'cconga tisuyi.
Jesús na'eñe jacan'cho
(Mt 14.22-27; Mr 6.45-52)
16 Tayo cose jisi ingija marni ande'fa.
17 Tayo sinttie cose'ni'qque Jesús toya jimbisi tisema catipa gi shavonga otse'fa Capernaum canqqueni iseye.
18 Quia'me fingiañe ashaensi shave'pa tsu jangi.
19 Enttinge marni –cinco o seis kilometro bia'suve– chho'chho jayipa gi Jesúsma atte'fa na'eñe tsui shavoni jiña'choma. Attepa gi dyo'fa.
20 Tsa'ma Jesúsja su:
—¡Ña gi! ¡Dyo'fajama!
21 Qquen susi gi avujapa tisema otsian'fa. Ti'tsseca'ñi gi napi'fa ingi jáyini.
A'i Jesúsve tta'tta'fa'cho
22 Ccaqui a'ta toefanga catiye'fa'chondeccuja Jesúsma shondosundeccu fae shavoyi jinchonga Jesúsma catipa tisupayi ja'fa qquen in'jan'fa.
23 Tsa'ma Tiberias canqquene tsain'bio shavo jipa Na'su Jesús Chigama iñajamba panma o'fian'ttinga ccattufa'fa.
24 Ccattufasi tse'ttinga catiye'fa'chondeccuja Jesúsve, tisema shondosundeccuve'qque me'i'onsi shavonga otsepa Capernaumni ja'fa Jesúsve ttatta'su.
Cansiaña'cho panne condase'cho
25 Jonifani isepa Jesúsma attepa iñajampaña'fa:
—Atesian'su, ¿minga'ni qui vani ji?
26 Tsa'ma Jesúsja su:
—Ñoa'me gi su, que'i an tteppu'choveyi in'jamba qui ñame tta'tta'fa ña canjaen'choma in'jambipa.
27 Congonqque'su aña'choma in'jan'fajama. Tsa'ma Sefaccone Ji'cho A'i quenga afe'cho tsangae cansiaña'cho anqque'suma ñotsse in'jan'faja. Chiga Quitsa tsu ñama in'jamba tsa'caen afeye manda antte.
28 Tsonsi iñajampaña'fa:
—¿Ma'caen gi tson'faya Chiga in'jan'chove tsoñe'da?
29 Tsonsi Jesúsja su:
—Chigaja in'jan cuintsu que'i Tise moen'cho a'ive in'jan'faye.
30 Tsonsi iñajampaña'fa:
—¿Jongoesu canjaen'choma qui canjaeñe osha ingi attepa in'jañe? ¿Jongoesuma qui tsoña?
31 Nane ingi tayopisundeccuja a'i menia can'jemba pan'can'cho manáma an'fa. Qquen tsu Chiga Tevaen'jen su: “Sefacconi'su panma afe cuintsu an'faye.”
32 Tsonsi Jesúsja su:
—Ñoa'me gi su: Moisésja sefacconi'su panma afembi tsu. Tsa'ma Chiga ña Quitsa tsu que'inga afe'je ñoa'me Chiga sefacconi'su panma.
33 Chiga sefaccone afe'cho pan tsu a'i –Chiga sefaccone ande'cho. Tsaja poi a'ima qquendyaen'su.
34 Tsonsi su'fa:
—Na'su, tsangae tsesu panmeñi inginga afe'jeja.
35 Tsonsi Jesúsja su:
—Ña gi cansiaña'cho pan. Majan ñani ji'chota tsu qquipoe'suya'bi. Majan ñame in'jan'chota minga'ni'qque tsaqquie'suya'bi.
36 Tsa'ma ña suqquia'caen qui ñama atte'a'qque toya ñame in'jan'fambi.
37 Poiyi'cco ña Yaya ñanga afe'cho a'ija ñanga tsu ji'faya. Ñanga ji'chomajan tteyaya'bi gi.
38 Ñajan sefaccone jimbi gi tisu in'jan'chove tsoñe. Tsa'ma ñama moen'su in'jan'chove tsoñe gi ji.
39 Ñama moen'su in'jan'chota tsu qquen: Majameñi'qque Tise in'jaensi ñame in'jan'chondeccuma ni fae'ccoeyi'qque qqueñambecañe. Tsa'ma Chigaja in'jan ñajan tsendeccu poiyi'ccoma qquendyaeñe osefaeña'cho a'ta napisi.
40 Ñama moen'su in'jan'chota tsu poiyi'cco majan Chiga Dutssi'yema attepa tise've in'jan'da tsangae canse'faya'cho. Tsendeccuma gi ccase qquendyaeña osefaeña'cho a'ta napisi.
41 Jesús: “Ña gi Chiga sefaccone ande'cho pan” qquen susi pañamba israendeccuja tise su'choma in'jambipa afaseye ashaen'fa.
42 Qquen tsu su'fa:
—¿Vata ti Jesús? ¿José dutssi'yembi ti? Tise yayama, tise mamama gi atesu'fa. ¿Ma'caen tsu tiseja sefaccone ande'cho qquenjan su?
43 Tse'i Jesúsja su:
—Afasembecan'faja.
44 Chiga Quitsa, ñama moen'su, a'ima ñanga moembiecan'da ñanga jiye osha'faya'bi. Tsa'ma Chiga tsendeccuma moensi gi tise'pama ccase qquendyaeña osefaeña'cho a'ta napisi.
45 Nane Chiga Aya'fama afasundeccu tevaen'jengata tsu qquen: “Chigaja poiyi'cco tsendeccuma atesiaña.” Tsa'cansi poiyi'cco Chiga Quitsama pañamba in'jan'chondeccuja ñanga jiya'chondeccu tsu.
46 Ni fae'ccoyi'qque tsu Chigama atte'fambi. Tsa'ma Chigane ji'suyi, tsayi tsu Tisema atte.
47 Ñoa'me gi su ñame in'jan'chota tsangae canseya'cho tsu.
48 Ña gi cansiaña'cho panjan.
49 Que'i tayopi'su coenzandeccuja pan'can'cho manáma an'fa a'i menia. Tsendeccu tsu pa'fa.
50 Tsa'ma ñanda gi afa sefaccone ande'cho panne. Majan tsama an'da pa'faya'bi tsu.
51 Ñañi gi va sefaccone ande'cho cansiaña'cho panjan. Majan tsa panma an'da tsangae tsu canse'faya. Ña ai'vo tsu ña afe'cho panjan. Tsama gi afeya cuintsu poiyi'cco a'i canse'faye.
52 Tsonsi israendeccuja tisupapora afaccoye ashaen'fa qquen supa:
—¿Ma'caen tsu tiseja tisu ai'voma inginga o'fiaña?
53 Jesúsja su:
—Ñoa'me gi su: Que'ija Sefaccone Ji'cho A'i ai'voma ambi'ta, tise anjampama cu'imbi'ta canse'faya'bi qui.
54 Nane majan ña ai'voma amba ña anjampama cu'i'cho'ta tsangae tsu canse'faya. Osefaeña'cho a'ta napi'nijan tsama gi qquendyaeña.
55 Ña ai'vo tsu ñoa'me aña'cho. Ña anjampa tsu ñoa'me cui'ya'cho.
56 Majan ña ai'voma amba ña anjampama cu'i'cho tsu ñai'ccu fae'ngae jincho'fa. Ña'qque tisei'ccu fae'ngae gi jincho.
57 Ña Yaya ñama moen'su'ta tsu tsangae canse'cho. Tise'ye gi ñajan canse. Tsa'caeñi tsu ñama an'cho'ta ña'ñe canse'faya.
58 Afa gi sefaccone ande'cho panne. Va panda tsu que'i tayopi'su coenzandeccu'ye pan'can'cho manáma anqquia'cambi. Tsama an'an'qque pa'fa. Tsa'ma va panma an'chota tsangae tsu canse'faya.
59 Qquen tsu Jesúsja atesian Capernaumni'su Chigane atesian'jen'ttinga.
Tsangae canseya'chone condase'cho
60 Tsa'caen atesian'jensi pañamba majan Jesúsma shondosundeccuja su'fa:
—Aiye'pa tsu tise su'choja. ¿Ma'caen pañamba in'jaña?
61 Tsonsi Jesúsja tisema shondosundeccu afacco'je'choma atesupa iñajampaña:
—¿Egae ti gi su que'inejan?
62 ¿Ma'caen qui in'jan'faya Sefaccone Ji'cho A'i toeni tise can'jeni ansundinja'choma atte'ta?
63 Nane qquendya'pa tsu cansian'su. Ai'voja cansiaña'bi tsu. Toya'caen ña que'inga su'choja ñoa'me cansiaña'cho qquendya'pane su'cho tsu.
64 Tsa'ma majanda qui toya in'jan'fambi.
Jesúsja me'ttia'ye atesucho majan tise've in'jan'fambi'choama. Toya'caen atesucho majan tisema indiye afeya'choma.
65 Tsomba su:
—Tsa'camba gi su a'ija ñanga jiye osha'faya'bi ña Yaya anttembiecan'da.
66 Tsa'caen susi majan Jesúsma shondosundeccuja tisema catipa ccase tisei'ccu jacan'fambi.
67 Tsonsi Jesúsja ingi doce tisema shondosundeccuma iñajampaña:
—¿Que'i'qque ti qui jaye in'jan'fa?
68 Tsa'ma Pedroja su:
—¿Na'su, majanga gi ja'faya? Que su'chota tsu tsangae cansiañe su'cho.
69 Ingita gi tayo in'jan'fa. Atesu'fa gi queta qui Cristo, Chiga Dutssi'ye.
70 Tsonsi Jesúsja su:
—Ñajan que'ima doce a'ive ttu'se'a. Tsa'ma que'i'su fae'ccota tsu cocoya.
71 Jesúsja Simón Iscariote dutssi'ye, Judasne afa. Nane Judas tsu ingi doce'su tisema indiye afeya'cho.