17
Egae tsincon'chone condase'cho
(Mt 18.6-7, 21-22; Mr 9.42)
1 Tsomba Jesúsja tisema shondosundeccuma su:
—Tsaveqque'su tsu va andenijan osha'cho tsu jin a'ima qqueñasi cuintsu egae tsincon'faye. Tsa'ma va'cha tsu tsa a'i majan cca'ima egae tsoñe injaen'suja.
2 Majan va ñame in'jan'cho du'shuma egae tsoñe in'jaen'ninda tisene bove ñotssi tsu toya tsa'caen injaembite sunda'cho patuma tise tsifonga tandamba singu'ccunga andeccoemoeñe.
3 Tisuma ñotsse coira'faja tsa'caen tsonsa'ne.
Que faenga'su quema egae tsincon'nijan tisema candusiaña'cho. Tsa'ma tsa a'i tise egae tsincon'choma chi'ga'nijan aqquepoeña'cho.
4 Tiseja fae a'ta siete se quema egae tsincomba siete se quema ñoquiañe in'jan'ninda tise egae tsincon'choma tsu aqquepoeña'cho.
In'jan'da osha'choma oshaya'cho
5 Tisema shondosundeccuja Na'suma su'fa:
—Ingima in'jaenjan queve ti'tsse in'jañe.
6 Na'su tise'pama su:
—Que'ija ñame re'riccoe in'jan'da ñoa'me qui osha'choma osha'faya. Nane mostasa choja ñoa'me'qque chipiri tsu. Que'i in'jan'choja tsa'caen chipiri'ccu qui va rande quini'jin joqquitssiye mandaye osha'faya. “¡Joqquitssipa na'enga amppija!” qquen manda'ninda tsa'caen tsu daya.
Semasundeccu sema'faya'cho
7 Majan que'imbe semasundeccuja andema pa'fupa joñe sema'fa. Majan semasundeccuja que'i ovejama coira'je'fa. Tsa'ma sema nanimba tsaoni jisi ¿majan que'i'suja tisema qquen suya: “Junde ca'nimba dyaipa anjan”?
8 Me'i. Tsa'caen qui su'faya'bi. Ñoa'mejan qquen qui tisema su'faya: “Ña anqque'suma sho'ccoenjan. Osha'chove ñoñamba ñama o'fiamba cui'ñajan. Ña an nanisi qui omboe amba cu'iya.”
9 Sema'suja ñotsse pañamba tsa'caen tsonsi ¿na'suta ti sema'suma ñotsse afaya'cho?
10 Me'i, tsaveqque'su tise'pambe sema'sumajan. Toya'caen que'i'qque osha'cho Chiga manda'choma pañamba tson'da qui qquen su'faya'cho: “Aqquia semasundeccu gi. ¿Ma'caen tsu ingine ñotsse afa'faya? Aqquiatsse ingima mandasi gi tson'jen'fa.”
Diez na congomba pajisundeccu
11 Jesúsja Jerusaléni jayipa Galileane sombopa Samariani napipa
12 chipiri canqquenga ca'ni. Ca'ni ji'ni diez na congomba pajisundeccu tisema cachui'fa. Biane ccutsupa
13 quia'me fundopa afa'fa:
—¡Na'su Jesús, ingima mende'yeja!
14 Jesúsja tise'pama attepa su:
—Japa Chigama afasundeccunga tisuma canjaen'faja.
Tise'pa jayi'fa'ni Jesúsja tise'pama ccushaen.
15 Tsonsi fae'cco tsendeccu'su tisu ccusha'choma attepa toequi shanda. Quia'me fundopa Chigane ñotsse afa'je.
16 Tsomba Jesús tsutteccofanga puntssamba camba'jui'ccu andenga ccuipa Jesúsma ñotsse afa. Tiseja samaria'su a'i.
17 Tsonsi Jesúsja su:
—¿Diezyi'cco a'i ti ccusha'fa? ¿Mani tsu faesu nueveta?
18 ¿Aqquia ti va israembi'su toequi jipa Chigama ñotsse afa? ¿Faesuveja me'i'on ti?
19 Tsomba Jesúsja tisema su:
—Jangipa japa canseja. Queja ñame in'jamba qui ccusha.
¿Chiga aindeccuve da'faya'cho?
(Mt 24.23-28, 36-41)
20 Fariseondeccuja Jesúsma iñajampaña'fa: “¿Minga'ni tsu a'ija Chiga aindeccuve da'faya?” Tsa'caen iñajampaña'fasi Jesúsja tise'pama su:
—A'i Chiga aindeccuve da'faya'choma que'ija atteye osha'faya'bi.
21 Ni a'ija qquen su'faya'bi: “Va'tti tsu tsa'caen da,” ni “Tse'tti tsu tsa'caen da.” Ñoa'me tsu Chigaja que'i injama'chonga ca'nisi qui tayo Tise aindeccuve da'fa.
22 Tsa'caen supa Jesúsja tisema shondosundeccuma su:
—Junde qui que'ija Sefaccone Ji'cho A'i que'i'ccu fae a'tayi'qque can'jeñe in'jan'faya. Tsa'ma ñajan que'i'ccu can'jeña'bisi qui ñombi'ye'faya.
23 Cca'indeccuja que'inga conda'faya: “Joni tsu tiseja can'jen”, Toya'caen “Va'tti tsu Jesúsja can'jen.” Tsa'ma paña'fajama ni ñame ttatta'fajama.
24 Ña jiña'nijan poiyi'cco tsu fae'ngatsse ñama atte'faya. Nane tsanda veyaensi poiyi'cco fae'ngatsse atteqquia'caen tsu poiyi'cco ñama atte'faya.
25 Tsa'ma o'tieta gi ñoa'me vanaña'cho. O'tie tsu poiyi'cco vani'su aindeccuja ñama chi'ga'faya.
26 Tayopi'su Noé can'jeinteqquia'caña tsu ña ccase jiya'ngae.
27 Noé tsa'o shavonga otseya'ngae a'ija an'jemba cui'je'fa. A'ija pushe'fa. Tise'pa onquengendeccuma'qque antte'fa. Tsa'caen canse'fa'ni na'en jipa poiyi'ccoma piccosi tsangae pa'fa.
28 Toya'caen tsa'caeñi tsu tayopi'su Lot can'jeinte'qque da'fa. Nane a'ija an'jen'fa, cui'je'fa, chava'je'fa, chavaen'jen'fa, jon'jen'fa, tsaoña'jen'fa.
29 Tsa'ma Lot Sodoma canqque'ye sombosi tsu si'ngeja asufrei'ccu sefaccone amppipa poiyi'ccoma oque cati.
30 Tsa'caeñi tsu ja'ño'su aindeccu'qque Chigave in'jambe'yi injanga canse'faya ña ccase jiya'ngae.
31 Tsequi a'ta majan a'i tsa'o omba'su ppappacconi dyaipa tise an'bian'choma tsa'onga an'bian'da i'ngambe'yi tsu catipa ccuyaya'cho. Toya'caen majan nasipani sema'jen'da toequi tise tsaoni jimbe'yi ccuyin jaya'cho.
32 Lot pushene condase'choma ñotsse injan'jen'faja.
33 Majan tisu canse'pama ccushaeñe in'jan'da tsu qqueñaña. Tsa'ma majan tisu canse'pama cati'ta tsu ñoa'me ccushaya.
34 Nane tsequi cose fae ana'jen'choni dos a'i ana'jen'choma fae'ccoe angapa faesuma catiya.
35 Toya'caen dos pushesu fae'ngae sunda'je'fa'choma fae'ccoe angapa faesuma catiya.
36 Dos a'i nasipani sema'jen'choma'qque fae'ccoe angapa faesuma catiya.
37 Tsonsi tisema shondosundeccuja Jesúsma su'fa:
—Na'su, ¿mani tsu tsa'caenjan daya?
Jesúsja tise'panga su:
—Congomba ccuini tsu ccompanajan bo'je'fa. Ña su'cho napisi qui in'jan'faya.