49
Wanës watëkwa Sakob
1 Sakob macëkëhniwo viju do ntehnëhni: «Ɓarëpëlin ñaɗëfu fëƴaw̃u ile yeɗëhu haryënkw ỹa.
2 «“Ɓarëpëlin do ahnëpaw̃u, vutah mën,
nëparyino ami, rëmun, Isërayel.
3 Wëjë, Riben, wëjë ye ajë mën aryënkwëryënkw a,
ale ryënkwëɓuho hnagu ante nkoko njaɓo fanka ŋa.
Wëjë lëbëkëhni vëhery hu vi untënah ŋa gë fanka fa;
4 had sën le w̃acëk yeru.
Ɓare goɗila ale ỹak njaɓëk nafa ỹa,
kaɓi cëfëhnanëruho aryaku pad mën hna
g'asëval mën aryampo.
5 Simeỹo gë Levi ndanko fo nkeni:
nkwëryëlëni soŋe ntini uw̃eh.
6 Ɓare gentandela ile pëhnani ỹi,
ƴantëɗela pankël dëw̃ hni ŋa.
Kaɓi hnë ntavah ntëw̃ hni hna ndaw̃ënihëhni vahnë
do hnë nëh ntëw̃ hni hna ntëpëtënihëhni wuhni w̃a vënkahn wapary ŋa.
7 Araɓi ntavah ntëw̃ hni ŋa ndëwani w̃eh,
ntavah ƴapah ɗëcët ŋa.
Campehnëɗëfuhëhni vële hnagëɗe hnë vëhni va Isërayel hna,
campehnëɗëfuhëhni nkal hna fop.
8 Yuɗa, vicër hu gë vëhery hu njëw̃ëɗëni icëmb hu ŋa.
Cikëɗuhëhni vëỹew̃ hu va arënkwëndëhni forosima,
do vicër hu gë vëhery hu va dënk ndëkwëhnëɗëni haryënkw hu.
9 Ha, ajë mën, Yuɗa, had fambësëhn fante rokëka intaw̃
do vokaɗ gë ryëka lëw̃u nkeru.
Paryi had vësëhn ile lañaɗ do ryakëɗ nkeru.
Mo hoɗ matëndi forosima?
10 Fanka ucankaf fa hnë tere Yuɗa hna nkoɗ.
Ryoko vësankaf ỹa hnë vák vële hnagëɗe hnë umë hna nkoɗ,
hafo tëki ale hwëhnëk paryi ỹa, ale maw̃ëhnëɗëni ɓulunda ỹa.
11 Hn'ikaỹ waresen hna pokëɗëha fali falëw̃u fa,
fapali fa hnë fasëc resen le ỹak yivëk hna;
uñen hna ndagëɗ viỹi vilëw̃u va,
cuɗ cankaf ntëw̃u ŋa w̃ënka waresen wavëntah hna.
12 Uñen ƴaɓah ŋa ntancënëɗëha vinkër va
do wambël waƴaɓah ŋa njerënëɗëha wabeñ ŋa.
13 Sabilon tëfary wov hna ntëɗëɗ,
le nke hahna wasisikulu hna.
Inkal dëw̃u ŋa njiɗ hafo Sidon.
14 Isakar fali fayaw̃ah ye,
yëbëlan wakece le liyik wamir waki ndakëɗ.
15 Kamahnëko ỹëw̃a fërën ye,
do nkal nëŋah ye.
Awa më maw̃ëk ndiɓëndënde waryiɓ w̃a,
ɗoku vëramp maw̃ako.
16 Dan naw̃ëndëhëhni ɓulunda lëw̃u ỹa
gë wahnënk wavë Isërayel w̃i fop.
17 Dan had lën vankaw̃ nke,
had lën ỹañah hnë tëfary nkaw̃:
lën ỹa ŋarëɗëha pahnac ŋa hwër hna
do ale haƴëka ỹa njoɗ.
18 Ahwëhn W̃ën, kwëtahnëɓu pehëtëɗëho!
19 Gad, ge pëgwëniha wabandi ŋa,
mëtaryëɗëhëhni do tëfëlehnëɗëhëhni.
20 Hn'inkal Aser hna nkwamëɗ ɗus roka ỹa,
nkal dëw̃u hna ntëw̃ëɗ roka le ñaɗëni vëhnaw̃ ỹa.
21 Nefëtali had incaw̃ nte yaryëlend afaya nke
do hnagëɗëhëhni vutah vunkwamah.
22 Yosef had atëh nte lëw̃ëɗ
fëhnëk hnë tëfary garyëla nke.
Wahni walëw̃u w̃a cëpëk kece kaỹ iŋa.
23 Vësan fëgwëka,
do lahëka gë wëca.
24 Ɓare njaw̃ënëk ɗus uŋwary ntëw̃u ŋa,
wahnil walëw̃u w̃a gë wëɓák ŋa ñënkalahna.
Gë fanka W̃ën yaw̃ah Sakob fa,
ahery vahnë, itaka Isërayel.
25 Araɓi W̃ën rëmuh hunte ryemaɗëhi ha,
Hwëhn Fanka le ryëwanëɗëhi ỹa,
njëɗayi rëv fërën, gë w̃ënka wante yalëɗ nkal li,
gë vutah vuƴaɓah do gë wusaw̃ wuyaɓah.
26 Waɗëwara rëmuh ŋa ntëbëk ɗus
wëla waɗëwara wahuŋ wale yeho koɓëri w̃i.
Ntëbëk hnapul vukuŋ vumb koɓëri vi.
Araɓi ɗëwara dëw̃u ŋa pëlahna Yosef, ale ye asankaf vicëru g'aheryu ỹa!
27 Besame had ỹin ỹañah nke.
G'acahnëfëɗ ga, intaw̃ tokëɗ,
do g'anëka ga cahëlehnëɗ ile wok ỹa.”»
28 Vëỹi fop liko wahnënk pëhw gë wahi (12) Isërayel w̃a. Waŋi ntehnëkëhniwo rëm hni, ante nësëhnëɗëhëhniwo rëkwa ŋa. Ale-wo-le ndëwara minu ndëwanëkawo.
Icëm Sakob
29 Tac Sakob më ntehnëkëhni aki: «Ge cëmëɓu, kwëtëryino hn'iƴag vacërakëlo mën hna, iƴag nte ye hn'ikaỹ Efëron avë ɓulunda Het ỹa,
30 Makëpela hna, ɗarël Mamëre hna hn'inkal Kanan hna. Abëraham ntaw̃ëko iŋi kaỹ vëhni Efëron hna soŋe ƴag iŋi kwëhn umë.
31 Hnam mbañiniho g'asëvalu Sara, tac Isak fëna g'asëvalu Rebeka. Do ami dënk hnam mbañëɓuha Leya.
32 Kaỹ iŋa gë ƴag nte yeho hnam ŋa ɓulunda Het hna ntaw̃iko.»
33 Ga puhnak Sakob nësëhn tëkwa vërahu ŋa, më mbokak ndak, tac njilehn tëkëhëhni vacërakëlow̃u va cëm hna.