Kayëte kigëna mba Pol nte kerëhnëka Timote
Wade yehëhna hnë iŋi kayëte
Afaƴik Pol kerëhnëka kayëte kigëna Timote, «ajë mën ale ỹahnëɓu hn'ikwëtahn». Mpëd Pol cëɗik Rom hna (1.8, 17), yëbëlan bëhn wafëhw mbëɗ g'iryaw̃ g'imbëɗ g'iryaw̃ gë bëhn wafëhw imbëɗ g'iryaw̃ g'imbëɗ gë warar (66 gë 68) ga ndëcëk hnagi Yesu ỹa. Kayëte nte hamënayend ye. Pol njëtëk gojëlahna ɗus cëmahn. Ñaɗ kamënaỹehna Timote nko kahnënda hnë vakaraŋ Vikerëh hna, lakënde haryënkw hambah hna do horot hna do vakaraŋ wamër. Andënkwëtehnëɗëha uyëɗ W̃ënu ŋa nte nuỹak ŋa wati le tindëkawo Pol wëɓák ŋa, uyëɗ ule rëfëka mbalëtahn soŋe ɗoku lëw̃u ỹa hnë vacery sali hna. Pol njëɗaka fëna Timote siyab lëw̃u ỹa dënk hnë wapuhnala kayëte hna.
Wëlin wanës wakwëhn nafa hn'iŋi kayëte: ɗoku, ikahnënda, fanka, uyëɗ, toña, ɗënkwëta, wanës, ayohal.
Wëlin gante nke kayëte ka:
Simpaỹi (1.1-2)
Ikamënaỹehn hn'ikahnënda (1.3-18)
Soɗaɗe Këris (2.1-13)
Ayohal afërën, ayohal Ahwëhn (2.14-26)
Wafac warëkwa (3.1-17)
Pëƴahn Wanës W̃ën (4.1-8)
Wanira watëkwa do gë simpaỹi rëkwa (4.9-22)
1
Simpaỹi
1 Ami Pol, ale ye afaƴik Yesu Këris kaɓi W̃ënu ŋa ỹak koyëna, soŋe pëƴahn uwám ule ntehnëko W̃ën njëɗaɗëhëhni vahnë vële hwëtahnëka Yesu Këris va,
2 kerëhnëryiɗëmi Timote, fatah mën fante ỹahnëɓu hn'ikwëtahn. Araɓi W̃ën Rëm ỹa do gë Yesu Këris Ahwëhn fu ỹa njëɗënihi ipërëna gë ikaỹëhnahn do gë ƴam.
Ikamënaỹehn hnë kahnënda
3 Camehnëɗëfuha W̃ën hunte ryokuŋëhnëɗëfu g'inahan pacah, had vacërakëlo mën, nahaɗëmi g'umëɗ gë g'anent nte-wo-nte njëfaɗëfu ŋa.
4 Ndënkwëtaɗëfu wankwën hu ŋa, do ñankahnëko ɗus vok hnuỹi pëɓahno uhnatah w̃a.
5 Ndënkwëtaɗëfu ikwëtahn hu paryi nte kwëhnaniho ten vëhni hnëmuh sankaf Lowis gë hnëmuh Ënis ŋa.
6 Soŋe rac ryënkwëtehnahnëɗëmi waŋi: ƴaw̃ënëry ɗus uyëɗ W̃ën le hnuỹaru ante tindëmino wëɓák ŋa.
7 Kaɓi Iƴir ante njëɗakëfu W̃ënu ŋa nambëna fanka, Iƴir nte yaɓënëɗëhëfu fanka ye gë iŋahn do gë iƴët vankaf fu.
8 Awa antë cëfëhni soŋe aye seɗe Ahwëhn fu ỹa, ma ami ale sëɗik soŋe lëw̃u ỹi. Ɓare korotëntëryi g'ami soŋe Wanës Wakasëk ŋa alihahnënd fanka fale njëɗaki W̃ënu ŋa,
9 umë ale fehëtëkëfu do w̃acëkëfu nkeyin vëfacah. Gena soŋe ifërën ile liɗen ỹa, ɓare ipëhna dëw̃u ŋa dënk ye gë ipërëna dëw̃u ŋa. Ipërëna tac, nte yëɗayinëkëfuno hnë Yesu Këris koɓëri wapëgwa hna,
10 tame tufahniko g'icahn Afehët fu ŋa, Yesu Këris. Umë rëkwehnëk fanka icëm fa do, gë Wanës Wakasëk ŋa, njëtëndanëk uwám paryi g'uwám usër.
11 Do soŋe iỹi ɗoku Wanës Wakasëk tëhnako W̃ën yewu afëƴahn, afaƴik do aharaŋ,
12 do soŋe rac horotahnëɗëfu aki. Ɓare cëfëhnëlohna, kaɓi njëtëɓu hnë ale kwëtëɓu ikwëtahn mën ŋa do pacëko kwëhnak fanka njaw̃ën ile kwëtehnahnëko ỹa hafo hnë Fac Kiti hna.
13 Ƴaw̃ënëry ɗus wanës toña wante wëryëru hnë ỹal mën ŋi, hnë ikwëtahn do gë hn'iŋahn nte ye hn'iɓëmënkël gë Yesu Këris hna.
14 Keryëry ɗus, gë iɗema Iƴir Ipacah nte ye hnë fuhnë ŋa, wapërën wante hwëtehnahniru ŋi.
15 Njëtëru vëvë Asi va fop tavëniho, hnë vërac nkentiniho Fijel gë Erëmojen.
16 Araɓi Ahwëhn a kaỹëhnahna gë tere Onesifor ỹa, kaɓi umë njaw̃ënehnëɗëhow̃o wati-wo-wati, do cëfëhnëlawohna g'ami ale sëɗiko ỹa;
17 ɓare ante njijëko Rom ŋa, njëkëlehnëkowo gante-wo-gante hafo nuwo.
18 Araɓi Ahwëhn a ndemahna nuỹa ikaỹëhnahn W̃ënu ŋa hnë Fac Kiti hna. Njëtëru alëbëhni vahnë va fop gante ndemako ka hnë nkol Efes hna.