40
Rojankinatakiri David.
Rashi yotaantzirori omampahaantsi.
1 Amaanikiini noyeeri Tajorentsi.
Ari rowayempitataana, ari ikemaena nokaemirira.
2 Rowawijaakotaana nokamaemi ikitatanteetenarimi.
Rowawijaakotakina eejatzi oniyenami sampowatha.
Ikatziyakahaana okijopathatzira kepatsi.
Ramitakotaana nanashitantaari kameethari, tee nantziwawaeta.
3 Roma-mpaakahaanawo owakirari omampahaantsi.
Eejatzi weshiryaantsi, rootaki nokimoshirewentantariri Tajorentsi.
Osheki ñaayitawakirori iroka, riyokitziiwentayitakiro.
Roowa rawentaantanakariri Tajorentsi.
4 Kimoshireri ikanteeya awentahaeyaarini Tajorentsi.
Kaari aapatziyeeyaarini shamewaetatsiri,
Kaari amanariri tajorentsiniro.
5 ¡Noyinkatharite! Tajorentsi, pitajonkawentantapiintee,
Osheki poshiretapiinteena,
Tekatsi oshiyeemini eeroka,
Noñaawenawitakawo nokamanteri itsipapaeni atziri okaatzi pitajonkawentantayitakira.
Roori kantzimaetacha oshekiperotanee jempe okaatzi kaari riyoteetzi.
6 Tee pikowamatsiteero ramayiiteemi ratsipetakaani, eejatzi rashitakahaetemiri.
Tema pikemathatakahaanawo,
Teera intaani onimotemi itayeetzimiri pirahaatsi, eejatzi ikaatzi ramayitzimiri rashitakaayitzimiri.
7 Pikeme nokante naaka: Ari nopokaki.
Tema rojankinatakoyiitakina paerani.
8 Ari onimotakina nanteemiro okaatzi pikowakayinari.
Oshiyaawo pojankinashiretantatyeenawomi pinintakaantani.