9
ᐁ ᐃᐦᑕᑯᐦᒡ ᔕᐌᔨᐦᒋᒉᐎᓐ ᐁ ᒦᐙᓅᐦᒡ
1 ᓇᒧᐃ ᐯᑎᓈᔅᒡ ᓂᑕᐌᔨᐦᑖᑯᓐ ᒉᒌ ᐋᔨᒨᑕᒫᑕᑯᒡ ᐁ ᐸᒋᔥᑎᓂᑳᓅᐦᒡ ᐊᓂᑦ ᐁ ᐅᐦᒋ ᐐᒋᐦᐋᑲᓅᑣᐤ ᐊᓂᒌ ᑳ ᑖᐺᐦᑕᐦᒀᐤ ᒎᑎᔭᐦᒡ ᑳ ᐃᐦᑖᑣᐤ᙮
2 ᒋᒋᔅᒉᔨᒥᑎᓈᐙᐤ ᑮᐹ ᓈᔥᒡ ᐁ ᐋᔑᐦᒉᔨᐦᑕᒣᒄ ᒉᒌ ᐐᒋᐦᐁᑯᒡ᙮ ᒋᒌ ᐋᔨᒨᒥᑎᓈᐙᐤ ᒫᒃ ᐊᓂᑌ ᒫᓯᑐᓂᔭᐦᒡ ᑳ ᐃᑕᒀᐤ ᐊᓂᒌ ᐄᓅᒡ, ᒌᒋᔖᓅᒡ ᐊᑫᔮ ᑳ ᐃᔑᓂᐦᑳᑌᔨᒡ ᐊᔅᒌᔫ ᑳ ᐃᐦᑖᑣᐤ, ᔖᔥ ᐯᐳᓂᔨᒡ ᒌ ᐊᔦᔅᑯᐎᔫᒡ ᒉᒌ ᐸᒋᔥᑎᓂᒉᑣᐤ ᔔᓕᔮᔫ, ᓂᒌ ᐃᑖᐅᒡ᙮ ᑳ ᐯᐦᑕᐦᒀᐤ ᐅᔫ ᓈᔥᒡ ᒌ ᐃᑌᔨᐦᑕᒧᒡ ᑲᔦ ᐎᔭᐙᐤ ᒉᒌ ᐸᒋᔥᑎᓂᒉᑣᐤ᙮
3 ᐃᐦᑖᐅᒡ ᐅᒌ ᒌᒋᔖᓅᒡ ᐁ ᐃᑎᔕᐦᐊᒫᑕᑯᒡ ᒉᒌ ᐅᑎᓇᐦᒀᐤ ᐊᓂᔫ ᔔᓕᔮᔫ ᑳ ᐸᒋᔥᑎᓇᒧᐌᒄ ᐁ ᐐᒋᐦᐋᑲᓄᔨᒡ ᐊᓂᔫ ᑳ ᑖᐺᐦᑕᒦᑣᐤᐦ ᐊᓂᑌ ᒉᕉᓴᓚᒥᐦᒡ ᑳ ᐃᐦᑖᔨᑣᐤᐦ᙮ ᐙᐸᐦᑏᐌᒄ ᑖᐺ ᐁ ᐃᔑᓈᑯᐦᒡ ᑖᓐ ᑳ ᐃᑖᒋᒥᑖᐦᒡ ᓈᔥᒡ ᐁ ᐋᔑᐦᒉᔨᐦᑕᒣᒄ ᒉᒌ ᐐᒋᐦᐄᐌᔦᒄ ᑲᔦ ᒋᔭᐙᐤ᙮
4 ᐁᔥᒄ ᒫᒃ ᐁᑳ ᒉ ᐊᔦᔅᑯᐐᐌᑴ ᒉᒌ ᐸᒋᔥᑎᓇᒣᒄ ᔔᓕᔮᐤ ᐅᑎᐦᑎᑖᐦᒉ, ᑮᐹ ᓇᐙᒡ ᒉ ᔖᑴᔨᒧᐦᐃᔮᐦᒡ ᑲᔦ ᒋᔭᐙᐤ ᒫᒃ ᓇᐙᒡ ᒋᑲ ᐱᒫᒣᔨᒧᓈᐙᐤ᙮ ᐌᔥ ᓈᔥᒡ ᑖᐺ ᓂᒌ ᒉᔥᑎᓈᐦᐅᓐ ᒥᒄ ᒉ ᐃᔑ ᐸᒋᔥᑎᓂᒉᔦᒄ᙮
5 ᐁᐅᒄ ᐆ ᐌᐦᒌ ᓃᑳᓐ ᐃᑎᔕᐦᐊᒫᑕᑯᒡ ᐅᒌ ᓃᒋᔖᓂᒡ, ᒋᑲ ᒌ ᐐᒋᐦᐄᑯᐙᐅᒡ ᒉᒌ ᐊᔦᔅᑰᓇᒧᐌᒄ ᐊᓂᔫ ᔔᓕᔮᔫ ᑳ ᐃᑗᐌᒄ ᒉ ᐸᒋᔥᑎᓇᒧᐌᒄ᙮ ᐙᐸᐦᑕᒫᓀ ᒫᒃ ᔖᔥ ᐁ ᒌ ᐊᔦᔅᑰᓇᒣᒄ ᐊᓐ ᒋᐸᒋᔥᑎᓂᒉᐎᓇᐙᐤ ᑕᑯᔑᓂᔮᓀ ᐁᑯᑦ ᒉ ᓂᓯᑑᓈᑯᐦᒡ ᐁᑳ ᐋᔨᐦᑲᒻ ᐅᐦᒋ ᐸᒋᔥᑎᓂᒉᔦᒄ ᒫᒃ ᐁ ᒌ ᓯᒋᔦᓯᔦᒄ ᒉᒌ ᒦᐌᔦᒄ᙮
6 ᒫᐤ ᒉ ᐐ ᒋᔅᒋᓯᔦᒄ, ᐊᓐ ᒥᒄ ᐊᐱᔒᔥ ᑳ ᓂᐦᑖᐅᒋᐦᒋᐦᒉᑦ ᒥᒄ ᐊᐱᔒᔥ ᒉᒀᔫ ᒋᑲ ᓂᐦᑖᐅᒋᓂᔫ ᐁᒄ ᐊᓐ ᒥᔅᑕᐦᐄ ᑳ ᓂᐦᑖᐅᒋᐦᒉᑦ ᒥᔅᑕᐦᐄ ᒉᒀᔫ ᑲᑕ ᓂᐦᑖᐅᒋᓂᔫ᙮
7 ᒥᓯᐌ ᐹᐦᐯᔭᒄ ᐊᐌᓐ ᒥᒄ ᑖᓐ ᑳ ᐃᑌᔨᐦᑕᐦᒃ ᐅᑌᐦᐄᐦᒡ ᒉ ᐃᔥᐱᔥ ᐸᒋᔥᑎᓂᒉᑦ ᐁᑯᓐ ᒋᐹ ᐃᔥᐱᔥ ᐸᒋᔥᑎᓂᒉᐤ᙮ ᓇᒧᐃ ᒋᐹ ᐅᐦᒋ ᒫᐃᓯᔫ ᑲᔦ ᓇᒧᐃ ᐋᐃᓵᒡ ᒋᐹ ᐅᐦᒋ ᐸᒋᔥᑎᓂᒉᐤ᙮ ᒋᔐᒪᓂᑑ ᓈᔥᒡ ᓵᒋᐦᐁᐤ ᐊᓂᔫ ᐊᐌᔫ ᑳ ᒥᔦᔨᐦᑕᒥᔨᒡ ᐁ ᐸᒋᔥᑎᓂᒉᔨᒡ᙮
8 ᒋᑲ ᒌ ᐃᐦᑑᑕᒻ ᒋᔐᒪᓂᑑ ᐹᔑᒡ ᒉᒌ ᐃᔥᐱᔥ ᒦᑖᒄ ᑕᐦᑣᐤ ᐁ ᔕᐌᔨᒥᑖᒄ, ᐁᒄ ᒫᒃ ᒨᔥ ᒉ ᐊᔮᔦᒄ ᑖᓐ ᒉ ᐃᔑ ᓂᑕᐌᔨᐦᑕᒧᐌᑴ᙮ ᐹᔑᒡ ᒋᑲ ᐃᔥᐱᔥ ᒦᑯᐙᐤ ᑯᑕᑲᒡ ᐊᐌᓂᒌ ᒉᒌ ᐐᒋᐦᐁᑯᒡ᙮
9 ᐃᑕᔥᑌᐤ ᒋᔐᒪᓂᑑ ᐅᑕᔨᒧᐎᓂᐦᒡ,
ᐊᓐ ᐊᐌᓐ ᑳ ᐌᔫᒡ ᐐᒋᐦᐋᑦ ᐊᓂᔫ ᑳ ᒋᔅᑎᒫᑎᓯᔨᒡ ᑳᒋᒉ ᑲᑕ ᒋᔅᒋᓯᓈᓄᔫ ᐅᒥᔫᑑᑕᒫᒉᐎᓐ᙮
10 ᒋᔐᒪᓂᑑ ᐁᐅᒄ ᒫᔮᑦ ᓂᐦᑖᐅᒋᐦᒉᓲ ᒉᒀᔫ ᒉ ᓂᐦᑖᐅᒋᐦᑖᔨᒡ᙮ ᐎᔭ ᑲᔦ ᐊᔕᒣᐤ ᒥᓯᐌ ᐊᐌᔫᐦ᙮ ᑲᔦ ᒋᔭᐙᐤ ᒫᒃ ᒋᑲ ᐌᔫᒡ ᒦᑯᐙᐤ ᒥᐦᒉᑐ ᐊᐌᓂᒌ ᒉᒌ ᐐᒋᐦᐁᑯᒡ᙮ ᐁᒄ ᒫᒃ ᐆ ᐁ ᐃᔑ ᒥᔪᑑᑕᒫᒉᔦᒄ ᒥᐦᒉᑐ ᐊᐌᓂᒌ ᒥᔅᑕᐦᐄ ᒋᑲ ᒥᔪᑑᑕᒫᑰᒡ ᒋᔐᒪᓂᑑ᙮
11 ᑲᔦ ᒋᔭᐙᐤ ᒫᒃ ᓈᔥᒡ ᑖᐺ ᓇᓈᐦᑰ ᒋᑲ ᐃᔑ ᐌᔫᒡ ᒦᑯᐙᐤ ᒋᔐᒪᓂᑑ ᐁᒄ ᒫᒃ ᓇᓈᐦᑰ ᒉᒌ ᐃᔑ ᒥᔦᑯᒡ ᑯᑕᑲᒡ᙮ ᐁᒄ ᒫᒃ ᒉ ᒥᐦᒉᑎᑣᐤ ᐊᓂᒌ ᒉ ᓇᓈᔅᑯᒫᑣᐤ ᒋᔐᒪᓂᑑ ᐃᔅᑯᑕᒃ ᒥᔅᑲᐦᒀᐌᓂᒡ ᐊᓂᔫ ᒋᐸᒋᔥᑎᓂᒉᐎᓇᐙᔫ᙮
12 ᐅᔫ ᒫᒃ ᐁ ᐃᔑ ᒥᔪᑑᑕᒧᐌᑯᒡ ᑳ ᑖᐺᐦᑕᐦᒀᐤ ᐁ ᒥᔦᑯᒡ ᑖᓐ ᐁ ᐃᔑ ᓅᐦᑌᐸᔨᑣᐤ ᐁᑯᑦ ᐌᐦᒋᐸᔨᔨᒡ ᒥᔅᑕᐦᐄ ᒉᒌ ᓇᓈᔅᑯᒫᑣᐤ ᒋᔐᒪᓂᑑ᙮
13 ᐁᔫ ᒫᒃ ᑲᑕ ᒋᔥᑖᒋᒣᐅᒡ ᒋᔐᒪᓂᑑ ᐙᐸᐦᑕᐦᒀᐌᓂᒡ ᐁ ᓅᑯᓂᔨᒡ ᑖᐺ ᐁ ᑖᐺᐦᑕᒧᐌᒄ ᑲᔦ ᐁ ᓇᓂᐦᐄᐦᑕᒧᐌᒄ ᒌᓴᔅ ᙭ ᐅᒥᔻᒋᒧᐎᓐ᙮ ᑲᔦ ᒫᒃ ᑲᑕ ᒋᔥᑖᒋᒣᐅᒡ ᒋᔐᒪᓂᑑᐦ ᐊᓂᔫ ᑖᓐ ᑳ ᐃᔥᐱᔥ ᐐᒋᐦᐁᑯᒡ ᑲᔦ ᑖᓐ ᑳ ᐃᔥᐱᔥ ᐐᒋᐦᐄᒣᒄ ᑯᑕᒃ ᐊᐌᔫᐦ᙮
14 ᑳ ᐃᔥᐱᔥ ᒌ ᐌᔫᒡ ᔕᐌᔨᒥᑖᒄ ᒋᔐᒪᓂᑑ ᒋᑲ ᓵᒋᐦᐄᑯᐙᐅᒡ ᑲᔦ ᒫᒃ ᒋᑲ ᐊᔨᒥᐦᐁᔥᑕᒫᑯᐙᐅᒡ᙮
15 ᓇᓈᔅᑯᒫᑖᐤ ᒋᔐᒪᓂᑑ ᐊᓂᔫ ᐅᒦᐌᐎᓐ᙮ ᓇᒧᐃ ᓂᐦᐋᐤ ᒌ ᐐᐦᑖᑲᓅᔫ ᐁ ᐃᔥᐱᔥ ᒥᔦᔨᐦᑖᑯᓂᔨᒡ᙮