22
ᐁ ᓃᐴ ᒪᑯᔖᓅᐦᒡ ᑳ ᐋᔨᒨᑌᒡ
ᓘᒃ 14:15-24
1 ᐁᒄ ᒌᓴᔅ ᒦᓐ ᑳ ᐊᔨᒥᐦᐋᑦ ᐊᓂᔫ ᐄᓅ ᑎᐹᒋᒧᐎᓐ ᒋᔅᑯᑕᒫᒉᐎᓂᔫ ᐁ ᐋᐸᒋᐦᑖᑦ᙮
2 ᒋᑲ ᐐᐦᑕᒫᑎᓈᐙᐤ ᑖᓐ ᐁ ᐃᑌᔨᐦᑖᑯᐦᒡ ᑭᐦᒋᑮᔑᒄ ᒋᔐᐅᒋᒫᐎᓐ᙮ ᒧᔮᒻ ᒋᔐᐅᒋᒫᐤ ᐁ ᒌ ᐊᔦᔅᑰᔥᑖᑦ ᐁ ᒥᔖᔨᒡ ᒪᑯᔖᓂᔫ, ᐅᑯᓯᓴ ᐁ ᒪᑯᔐᐦᐋᑦ ᐁ ᒌ ᓃᐳᔨᒡ᙮
3 ᒌ ᐃᑎᔕᐦᐌᐤ ᒫᒃ ᐋᐸᒋᐦᐋᑲᓐ ᒉᒌ ᓂᑐᐙᐸᒫᔨᒡ ᐊᓂᔫ ᐊᐌᔫ ᑳ ᐐᔖᒫᑲᓄᔨᒡ᙮ ᐁᒄ ᓇᒧᐃ ᐅᐦᒋᐐ ᑕᑯᔑᓂᔫᐦ ᐊᓂᔫ ᑳ ᐐᔖᒫᑲᓄᐐᑣᐤᐦ᙮
4 ᐁᒄ ᒦᓐ ᑯᑕᒃ ᐋᐸᒋᐦᐋᑲᓐᐦ ᑳ ᐃᑎᔕᐦᐙᑦ ᔮᐸᒡ ᒉᒌ ᐐᔖᒫᔨᒡ ᐊᐌᔫ᙮ ᒫᐅᔫ ᑳ ᐃᑕᔓᒫᑦ ᒉᒌ ᐃᑗᔨᒡ, ᔖᔥ ᓂᒌᔕᐃᐦᑎᓐ ᒉ ᒪᑯᔐᔮᓐ᙮ ᔖᔥ ᒌ ᓂᐸᐦᐋᑲᓅᒡ ᒥᔅᑐᓯᒡ ᐁᒄ ᒫᒃ ᒥᔅᑐᓯᔕᒡ ᒉ ᒪᑯᔖᓅᐦᒡ ᑲᔦ ᔖᔥ ᒌᔑ ᐐᔥᑖᓱᓈᓅ᙮ ᐯᒋ ᑕᑯᔑᓂᒄ ᒫᒃ᙮
5 ᒥᒄ ᒫᒃ ᐊᓂᒌ ᑳ ᐐᔖᒫᑲᓅᑣᐤ ᓇᒧᐃ ᐅᐦᒋ ᐊᔮᐸᑎᐦᑕᒧᒡ, ᐋᐦᒌᐤᐦ ᒌ ᐃᔑ ᑲᒋᔅᑐᐦᑌᐅᒡ᙮ ᐯᔭᒄ ᐊᓐ ᐊᓂᑌ ᐅᓂᐦᑖᐅᒋᐦᒋᑲᓐ ᐁ ᐃᐦᑕᑯᓂᔨᒀᐤᐦ ᒌ ᐃᑐᐦᑌᐤ᙮ ᐁᒄ ᒦᓐ ᑯᑕᒃ ᒌ ᐊᔮᑯᐸᓀ ᑖᓐ ᐁ ᐃᔑ ᐊᑖᐌᑦ᙮ ᐁᑯᑌ ᑳ ᐃᑐᐦᑌᑦ ᐎᔭ᙮
6 ᐁᒄ ᐊᓂᒌ ᑯᑕᑲᒡ ᑳ ᒫᑯᓈᑣᐤ ᐊᓂᔫ ᐅᑖᐸᒋᐦᐋᑲᓂᔫ ᐊᓂᔫ ᒋᔐᐅᒋᒫᐤ ᐁᒄ ᑳ ᑯᓰᐦᑯᐙᑣᐤ, ᑳ ᐊᑎ ᓂᐸᐦᐋᑣᐤ᙮
7 ᐃᔅᑯᑕᒃ ᒫᒃ ᐊᓐ ᒋᔐᐅᒋᒫᐤ ᒉᔅᒉᔨᐦᑕᐦᒃ ᐅᔫ ᐁ ᒌ ᐃᐦᑎᓈᓄᔨᒡ ᒌ ᒥᔅᑕᒋᔓᐙᓲ᙮ ᐁᒄ ᑳ ᐃᑎᔕᐦᐙᑦ ᐅᔑᒫᑲᓂᔑᒻ ᒉᒌ ᓂᑑ ᓂᐸᐦᐋᔨᒡ ᐊᓂᔫ ᑳ ᓂᐸᐦᐋᔨᒡ ᐅᑖᐸᒋᐦᐋᑲᓐ ᐁᒄ ᑲᔦ ᑳ ᐊᑎ ᐃᔥᒀᓴᒧᐙᑦ ᐊᓂᔫ ᐅᑎᐦᑖᐎᓂᔫ᙮
8 ᐁᒄ ᒦᓐ ᑳ ᐐᔖᒫᑦ ᑯᑕᒃ ᐅᑖᐸᒋᐦᐋᑲᓐ, ᑳ ᐃᑖᑦ, ᔖᔥ ᐌᔥ ᐊᔦᔅᑰᔥᑌᐤ ᐊᓐ ᓃᐴ ᒪᑯᔖᓐ᙮ ᐊᓂᒌ ᒫᒃ ᑳ ᐐᔖᒪᒀᐤ ᓇᒧᐃ ᐅᐦᒋᐐ ᑕᑯᔑᓅᒡ ᐁᒄ ᒫᒃ ᓇᒧᐃ ᑌᐱᒉᔨᐦᑖᑯᓲᒡ ᐊᓂᑦ ᒉᒌ ᐃᐦᑖᑣᐤ᙮
9 ᒫᒌᒄ ᒫᒃ ᐃᑐᐦᑌᒄ ᐊᓂᑌ ᒣᔅᑲᓈᐦᒡ ᐊᓂᑌ ᐁ ᐌᔫᑎᓰᑣᐤ ᐄᓅᒡ ᒥᒄ ᑕᐦᑐ ᐊᐌᓂᒌ ᒉ ᐙᐸᒣᑯᒡ ᒉ ᐐᔖᒣᑯᒡ ᒉᒌ ᐯᒋ ᓈᒋᒪᑯᔐᑣᐤ᙮
10 ᐁᒄ ᐊᓂᒌ ᐋᐸᒋᐦᐋᑲᓂᒡ ᑳ ᐃᑐᐦᑌᑣᐤ ᐊᓂᑌ ᒣᔅᑲᓈᐦᒡ, ᐁᑯᑦ ᒫᒃ ᑳ ᐙᐸᒫᑣᐤ ᒥᓯᐌ ᐁ ᐃᑌᔨᐦᑖᑯᓯᔨᒡ ᐊᐌᔫ, ᐅᒪᒋᐦᑣᐤ ᑲᔦ ᑳ ᑯᐃᔅᑯᑖᑎᓯᔨᒡ᙮ ᐁᐅᒄ ᐅᔫ ᑳ ᐙᐐᓵᒫᑣᐤ᙮ ᐁᒄ ᒫᒃ ᒥᑐᓐ ᑳ ᐊᑎ ᓵᑲᔅᒋᓈᓄᔨᒡ ᐊᓂᑦ ᐊᓂᔫ ᑳ ᒪᑯᔖᓄᔨᒡ᙮
11 ᐃᔅᑯᑕᒃ ᒫᒃ ᐊᓐ ᒋᔐᐅᒋᒫᐤ ᐱᔦᒋ ᐲᐦᒉᑦ ᒉᒌ ᐙᐸᒫᑦ ᐊᓂᔫ ᐊᐌᔫ ᑳ ᑕᑯᔑᓃᑣᐤᐦ, ᒌ ᐙᐸᒣᐤ ᐯᔭᒄ ᐊᓂᑦ ᓈᐯᐤ ᐁᑳ ᒧᔮᒻ ᐃᑖᔅᐱᓱᔨᒡ ᑖᓐ ᒋᐹ ᐃᑖᔅᐱᓱᔫ ᐁ ᓃᐴᓈᓄᔨᒡ᙮
12 ᐁᒄ ᑳ ᐃᑖᑦ ᐊᓂᔫ ᓈᐯᐤ, ᓂᐐᒉᐙᑲᓐ ᑖᓂᑌ ᑳ ᐅᐦᒋ ᐲᐦᒉᔨᓐ ᐅᑕᐦ ᐆ ᐁ ᒪᑯᔐᔮᓐ ᐁᑳ ᒫᒃ ᒧᔮᒻ ᐃᑖᔅᐱᓱᔨᓐ᙮ ᓇᒧᐃ ᒫᒃ ᐅᐦᒌ ᒋᔅᑑ ᐊᓐ ᓈᐯᐤ᙮
13 ᐁᒄ ᐊᓐ ᒋᔐᐅᒋᒫᐤ ᑳ ᐃᑖᑦ ᐊᓂᔫ ᐅᑯᐦᐹᓀᒻ, ᒫᐦᑯᐱᑕᒧᐙᐦᒃ ᐅᓯᑦ ᑲᔦ ᐅᑎᐦᒌ, ᒉ ᐃᔓᐌᐱᓀᒄ ᓀᑌ ᐁ ᐅᑳᔥᑌᔮᔨᒡ ᑖᓂᑌ ᒉ ᓇᓀᐦᑳᑌᔨᒧᑦ ᐊᓂᑌ ᒉ ᒫᑑᑣᐤ ᐊᐌᓂᒌ ᑲᔦ ᒉ ᒪᒪᑗᔮᐱᑌᓯᓂᑣᐤ᙮
14 ᐁᒄ ᒌᓴᔅ ᑳ ᐊᑎ ᐃᑗᑦ, ᒥᐦᒉᑐ ᐊᐌᓂᒌ ᑌᑆᑖᑲᓅᒡ, ᒥᒄ ᒫᒃ ᓇᒧᐃ ᒥᐦᒉᑦ ᐎᔮᐸᒫᑲᓅᒡ᙮
ᒋᔐᐅᒋᒫᐤ ᔔᓕᔮᐤ ᐁ ᒌᔒᐦᑳᓱᓈᓅᐦᒡ
ᒫᕐᒃ 12:13-17; ᓘᒃ 20:20-26
15 ᐁᒄ ᑳ ᒋᔅᑐᐦᑌᑣᐤ ᐊᓂᒌ ᕓᕆᓰᒡ, ᒉ ᓂᑑ ᐊᔨᒥᐦᐄᑐᑣᐤ ᑖᓂᑌ ᒉᒌ ᐅᐦᒋ ᐱᓰᐎᔮᑣᐤ ᒌᓴᔅ ᐁ ᑲᑴᒋᒫᑣᐤ ᒉᒀᔫ᙮
16 ᒌ ᐃᑎᔕᐦᐌᐅᒡ ᒫᒃ ᐅᒋᔅᒋᓄᐦᐊᒧᐙᑲᓇᐙᐤ ᑲᔦ ᐦᐁᕋᑦ ᐅᑖᐸᒋᐦᐋᑲᓂᔫ ᐊᓂᑌ ᒌᓴᔅ ᐁ ᐃᐦᑖᔨᒡ᙮ ᐁᒄ ᑳ ᐃᑖᑣᐤ ᐊᓂᔫ ᒌᓴᔅ, ᒋᔅᒋᓄᐦᐊᒫᒉᓲ, ᒋᒋᔅᒉᔨᒥᑎᓈᓐ ᑖᐺ ᐁ ᑖᐺᒪᑲᐦᒡ ᑖᓐ ᐁ ᐃᔑ ᒋᔅᑯᑕᒫᒉᔨᓐ ᑲᔦ ᒥᓯᐌ ᐯᔭᑯᓂᐦᒡ ᐁ ᐃᔑ ᒋᔅᑯᑕᒨᑣᐤ ᐊᐌᓂᒌ ᑖᓐ ᐁ ᐃᔑ ᓂᑐᐌᔨᒥᑯᑣᐤ ᒋᔐᒪᓂᑑ ᒉᒌ ᐃᔑ ᐱᒫᑎᓰᑣᐤ᙮ ᓇᒧᐃ ᒥᑐᓐ ᐎᔦᔥ ᒋᑎᑌᔨᐦᑕᒥᐦᐄᑰᓐ ᑖᓐ ᒉ ᐊᑎ ᐃᑌᔨᐦᑕᒥᐦᐄᑯᑣᐤ ᐊᐌᓂᒌ ᑖᓐ ᐁ ᐃᔑ ᒋᔅᑯᑕᒫᒉᐅᑦ, ᑲᔦ ᒥᓯᐌ ᐯᔭᑯᓂᐦᒡ ᒋᑎᑌᔨᒫᐅᒡ ᐊᐌᓂᒌ᙮
17 ᐁᒄ ᒫᒃ ᓀᑐᐌᔨᒥᑖᐦᒡ ᒉᒌ ᐐᐦᑕᒧᔮᐦᒡ, ᐃᑕᔥᑌᐤ ᐋ ᐐᔓᐌᐎᓂᐦᒡ ᕎᒻ ᒋᔐᐅᒋᒫᐤ ᒉᒌ ᒥᔮᑲᓅᑦ ᐊᓂᔫ ᔔᓕᔮᔫ ᑳ ᒌᔒᐦᑲᒥᔨᒡ ᐊᐌᔫ᙮
18 ᒌᓴᔅ ᒫᒃ ᒌ ᒋᔅᒉᔨᒣᐤ ᓂᑕᒧᒄ ᐁ ᒌ ᐐ ᐃᑗᐦᐄᑯᑦ ᐁᒄ ᑳ ᐃᑖᑦ, ᒋᔭᐙᐤ ᑳ ᐊᔨᒥᐦᐁᐦᑳᓱᔦᒄ, ᒉᒀᓐ ᐌᐦᒋ ᐐ ᐯᒋ ᑲᑴᒋᐦᐃᔦᒄ᙮
19 ᐯᒋ ᐙᐸᐦᑏᒄ ᒫ ᐊᓐ ᔔᓕᔮᐤ ᐁ ᐸᐦᑴᓇᒧᐙᑲᓅᑦ ᒋᔐᐅᒋᒫᐤ᙮ ᐁᒄ ᑳ ᒦᑯᑦ ᔔᓕᔮᓈᐱᔅᑾ᙮
20 ᐁᒄ ᑳ ᐃᑖᑦ, ᐊᐌᓐ ᒫᒃ ᐅᑖᔥᑕᒧᐦᒄ ᐁ ᓅᑯᓂᔨᒡ ᐅᑕᐦ ᑲᔦ ᐊᐌᓐ ᐅᔫ ᐅᑎᔑᓂᐦᑳᓱᓐ ᑳ ᒪᓯᓈᑌᔨᒡ᙮
21 ᐁᒄ ᑳ ᐃᑎᑯᑦ, ᕎᒻ ᒋᔐᐅᒋᒫᐤ ᓰᓴᕐ ᐊᓂᔫ ᐅᑖᔥᑕᒧᐦᒄ ᑲᔦ ᐎᔭ ᐊᓂᑦ ᒪᓯᓈᓲ᙮ ᐁᒄ ᒌᓴᔅ ᑳ ᐃᑖᑦ, ᒥᔮᐦᒄ ᒋᔐᐅᒋᒫᐤ ᓰᓴᕐ ᑖᓐ ᐊᓂᔫᐦ ᐎᔭ ᑌᐱᔦᐅᓰᑦ, ᑲᔦ ᒫᒃ ᒥᔮᐦᒄ ᒋᔐᒪᓂᑑ ᑖᓐ ᐊᓂᔫᐦ ᐎᔭ ᑌᐱᔦᐅᓰᑦ᙮
22 ᐃᔅᑯᑕᒃ ᒫᒃ ᐊᓂᒌ ᑳ ᐯᒋ ᐃᑎᔕᐦᐙᑲᓅᑣᐤ ᐱᔦᐦᑕᐙᑣᐤ ᐅᔫ ᐁ ᐃᑎᑯᑣᐤ, ᓈᔥᒡ ᒌ ᒥᔅᑳᑌᔨᐦᑕᒥᐦᐄᑰᒡ ᑖᓐ ᑳ ᐃᔑ ᓂᔥᑴᐅᔑᐦᐄᑯᑣᐤ, ᑳ ᓇᑲᑖᑣᐤ ᐁᒄ ᑳ ᐊᑎ ᒋᔅᑐᐦᑌᑣᐤ᙮
ᒌᓴᔅ ᑳ ᐊᔨᒥᑐᑕᐦᒃ ᑳᐤ ᒉ ᐱᒫᑎᓰᓈᓄᔨᒡ
ᒫᕐᒃ 12:18-27; ᓘᒃ 20:27-40
23 ᐊᓂᔫ ᒫᒃ ᐁ ᐯᔭᑯᓂᔨᒡ ᐁ ᒌᔑᑳᔨᒡ ᓵᑑᓰᐦ ᒌ ᐯᒋ ᓂᑐᐙᐸᒥᑰ ᒌᓴᔅ᙮ ᐁᐅᑯᓐ ᐊᓂᔫ ᑳ ᐃᑗᔨᒡ ᒌᔥᐱᓐ ᐁ ᐴᓂᐱᒫᑎᓯᔨᒡ ᐊᐌᔫ ᐅᑕᐦ ᐊᔅᒌᐦᒡ ᐁᑳ ᒦᓐ ᒉ ᐅᐦᒋ ᐗᓂᔥᑳᔨᒡ᙮
24 ᒌ ᐃᑎᑰ ᐊᓂᔫ ᓵᑑᓰᐦ, ᒋᔅᒋᓄᐦᐊᒫᒉᓲ, ᒧᓯᔅ ᒌ ᒪᓯᓇᐦᐊᒻ ᐅᔫ ᐐᔓᐌᐎᓂᔫ᙮ ᐃᑕᔥᑌᔫ ᒫᒃ, ᓂᐱᑌ ᓈᐯᐤ, ᐁᑳ ᒫᒃ ᐅᐦᒋ ᐊᔮᐙᑴ ᐊᐙᔕ, ᐊᓂᔫ ᐐᒋᔖᓐᐦ ᐊᓐ ᓈᐯᐤ ᑳ ᓂᐱᑦ ᒋᐹ ᐐᒋᒣᔫ ᐊᓂᔫ ᐐᒋᔅᑴᐤ᙮ ᐁᒄ ᒫᒃ ᒋᐹ ᐊᔮᐌᐅᒡ ᐊᐙᔕ ᐊᓂᔮ ᐅᔅᑌᓴ ᒉᒌ ᐅᐦᐱᓂᐦᑖᐅᒋᔥᑕᒧᐙᑦ᙮
25 ᐁᒄ ᐅᔫ ᑳ ᐃᔑ ᑎᐹᒋᒧᔥᑐᐙᑣᐤ ᒌᓴᔅ ᐊᓂᒌ ᓵᑑᓰᒡ, ᒌ ᐃᐦᑖᐅᒡ ᐯᔭᒀᐤ ᓃᔣᔥᒡ ᓈᐯᐅᒡ ᐁ ᒌ ᐐᒋᔖᓂᐦᑑᑣᐤ᙮ ᐁᒄ ᐊᓐ ᑳ ᐅᔅᑌᓯᒫᐅᑦ ᑳ ᓃᐳᑦ᙮ ᒌ ᐴᓂᐱᒫᑎᓯᔫ ᒫᒃ ᐁᑳ ᐅᐦᒋ ᐊᔮᐙᑣᐤ ᐊᐙᔕ᙮ ᐁᒄ ᐊᓂᔫ ᐐᒋᔖᓐᐦ ᑳ ᐅᐦᒋ ᑖᐦᒋᔥᑳᑯᑦ ᑳ ᐐᒋᒫᔨᒡ ᐊᓂᔫ ᐐᒋᔅᑴᐤ᙮
26 ᒉᒃ ᒫᒃ ᑲᔦ ᐎᔭ ᐊᓐ ᐐᒋᔖᓂᒫᐤ ᑳ ᐐᒋᒫᑦ ᐊᓂᔮᐦ ᐐᒋᔖᓐᐦ ᐐᒋᔅᑴᐅᔫᐦ ᑳ ᐴᓂᐱᒫᑎᓯᔨᒡ᙮ ᓇᒧᐃ ᑲᔦ ᐎᔭ ᐅᐦᒋ ᐊᔮᐌᐤ ᐊᐙᔕ᙮ ᐁᒄ ᒦᓐ ᐊᓂᔫᐦ ᐌᐦᒋ ᑖᐦᒋᔅᑳᑯᑦ ᐊᓐ ᐊᓄᐦᒌᔥ ᑳ ᐴᓂᐱᒫᑎᓰᑦ ᑳ ᐐᒋᒫᔨᒡ ᐊᓂᔫ ᐃᔅᑴᐤ᙮ ᐁᑯᓐ ᒬᐦᒡ ᑳ ᐊᑎ ᐃᔅᐸᔨᑦ ᑲᔦ ᐎᔭ ᐆ᙮ ᒌ ᐴᓂᐱᒫᑎᓯᔫ ᐁᑳ ᒣᒋᒻ ᐅᐦᒋ ᐊᔮᐙᑦ ᐊᐙᔕ᙮ ᒉᒃ ᒥᓯᐌ ᐁᑯᓐ ᑳ ᐊᑎ ᐃᔑᓈᑯᓯᑣᐤ ᐊᓂᒌ ᓃᔣᔥᒡ ᐐᒋᔖᓂᒫᐅᒡ᙮ ᒥᓯᐌ ᒌ ᐐᒋᒣᐅᒡ ᐊᓂᔫᐦ ᐃᔅᑴᐤ ᑲᔦ ᒥᓯᐌ ᒌ ᐊᑎ ᐴᓂᐱᒫᑎᓯᔫᒡ ᐁᑳ ᐅᐦᒋ ᐊᔮᐙᑣᐤ ᐊᐙᔕ᙮
27 ᒉᒃ ᑲᔦ ᐎᔭ ᐊᓐ ᐃᔅᑴᐤ ᑳ ᐴᓂᐱᒫᑎᓰᑦ᙮
28 ᐃᔅᑯᑕᒃ ᒫᒃ ᑳ ᒌᔑ ᑎᐹᒋᒧᔥᑐᐙᑣᐤ ᒌᓴᔅ ᐊᓂᒌ ᓵᑑᓰᒡ ᐁᒄ ᑳ ᑲᑴᒋᒫᑣᐤ, ᐃᔅᑯᑕᒃ ᐅᑎᐦᒋᐸᔨᐦᒉ ᒉᒌ ᐗᓂᔥᑳᑣᐤ ᐊᓂᒌ ᑳ ᐴᓂᐱᒫᑎᓰᑣᐤ ᐊᐌᓐ ᒉ ᐐᒋᔅᑴᐅᑦ ᐊᓂᔫ ᐃᔅᑴᐤ, ᐌᔥ ᒥᓯᐌ ᐊᓂᒌ ᓃᔣᔥᒡ ᐐᒋᔖᓂᒫᐅᒡ ᒌ ᐐᒋᒣᐅᒡ ᐊᓂᔫ ᐃᔅᑴᐤ᙮
29 ᐁᒄ ᒌᓴᔅ ᑳ ᐃᑖᑦ, ᒋᐗᓂᐸᔨᓈᐙᐤ᙮ ᓇᒧᐃ ᒋᒋᔅᒉᔨᐦᑌᓈᐙᐤ ᑖᓐ ᐁ ᐃᑕᔥᑌᔨᒡ ᒋᔐᒪᓂᑑ ᐅᑕᔨᒧᐎᓐ ᑲᔦ ᓇᒧᐃ ᒋᒋᔅᒉᔨᐦᑕᒧᐙᓈᐙᐤ ᒋᔐᒪᓂᑑ ᐅᒪᔅᑰᓰᐎᓐ ᐆ ᑳ ᐃᔑ ᑲᑴᒋᒥᔦᒄ᙮
30 ᐌᔥ ᐃᔅᑯᑕᒃ ᐅᑎᐦᒋᐸᔨᐦᒉ ᒉ ᐗᓂᔥᑳᑣᐤ ᐊᓂᒌ ᑳ ᐴᓂᐱᒫᑎᓰᑣᐤ, ᑖᐹ ᑲᑕ ᐅᐦᒋ ᓃᐴᒡ ᑲᔦ ᓇᒧᐃ ᑲᑕ ᐅᐦᒋ ᓃᐴᐦᐋᑲᓅᒡ, ᐌᔥ ᐊᓂᔫ ᐁ ᐃᑌᔨᐦᑖᑯᓯᔨᒡ ᒋᔐᒪᓂᑑ ᐅᑌᓐᒋᓕᒻᐦ ᑭᐦᒋᑮᔑᑯᐦᒡ ᑳ ᐃᐦᑖᔨᒡ ᐁᑯᓐ ᒬᐦᒡ ᒉ ᐃᑌᔨᐦᑖᑯᓯᑣᐤ᙮
31 ᐁᒄ ᒫᒃ ᐊᓐ ᐐ, ᒉ ᐗᓂᔥᑳᑣᐤ ᐊᓂᒌ ᑳ ᓂᐱᑣᐤ, ᓇᒧᐃ ᐋ ᑰᐦᒋ ᐊᔨᒥᐦᑖᓈᐙᐤ ᑳ ᐃᑎᑖᒄ ᒋᔐᒪᓂᑑ, ᒦᓐ ᒉ ᐗᓂᔥᑳᔨᒡ ᒥᓯᐌ ᐊᓂᔫ ᑳ ᐴᓂᐱᒫᑎᓯᔨᒡ᙮
32 ᒌ ᐃᑌᐤ, ᐁᐅᒄ ᓂᔭ ᐅᒋᔐᒪᓂᑑᒥᐙᐤ, ᐁᑉᕋᐦᐊᒻ, ᐊᐃᓴᒃ ᐁᒄ ᒫᒃ ᒉᑲᑉ᙮ ᓇᒧᐃ ᐅᒋᔐᒪᓂᑑᒥᑐᑖᑰ ᒋᔐᒪᓂᑑ ᐊᓂᔫ ᑳ ᓂᐱᔨᒡ ᒥᒄ ᐊᓂᔫ ᑳ ᐱᒫᑎᓯᔨᒡ᙮
33 ᐃᔅᑯᑕᒃ ᒫᒃ ᐊᓂᒌ ᐄᓅᒡ ᐱᔦᐦᑕᐙᑣᐤ ᐅᔫ ᐁ ᐃᑗᔨᒡ, ᒌ ᒥᔅᑳᑌᔨᐦᑕᒥᐦᐄᑰᒡ ᐊᓂᔫ ᐁ ᐃᔑ ᒋᔅᑯᑕᒫᒉᔨᒡ᙮
ᐊᓐ ᒫᐅᒡ ᒉᔅᑌᔨᐦᑖᑯᐦᒡ ᐃᑕᔓᐌᐎᓐ
ᒫᕐᒃ 12:28-34; ᓘᒃ 10:25-28
34 ᐃᔅᑯᑕᒃ ᒫᒃ ᐊᓂᒌ ᕓᕆᓰᒡ ᐱᔦᐦᑕᐦᒀᐤ ᐁ ᒌ ᒋᐳᑐᓀᐦᐙᔨᒡ ᒌᓴᔅ ᐊᓂᔫ ᓵᑑᓰᐦ, ᐁᒄ ᑳ ᓂᔥᑐᐐᑣᐤ ᒫᒨ ᑳ ᓂᑐᐙᐸᒫᑣᐤ ᒌᓴᔅ᙮
35 ᐯᔭᒄ ᒫᒃ ᐊᓂᑦ ᐁ ᑕᔑᑣᐤ ᐊᓂᒌ ᕓᕆᓰᒡ, ᑳ ᒋᔅᑯᑕᒫᒉᑦ ᐐᔓᐌᐎᓂᔫ ᐁ ᐃᑖᐸᑎᓯᑦ, ᒋᐐ ᓈᓂᑑ ᐱᓰᐎᔦᐤ ᒌᓴᔅ, ᐁ ᑲᑴᒋᒫᑦ ᒉᒀᔫ᙮
36 ᒌ ᐃᑌᐤ ᒫᒃ, ᐁ ᑕᐦᑎᐦᒀᐤ ᑲᒉᔅᑴᐎᓐᐦ ᒋᔐᒪᓂᑑ ᑳ ᐐᔥᑖᑦ, ᑖᓐ ᒫᐅᒡ ᐁ ᒋᔅᑌᔨᐦᑖᑯᐦᒡ᙮
37 ᐁᒄ ᒌᓴᔅ ᑳ ᐃᑖᑦ, ᓵᒋᐦᐄ ᐅᑎᐯᔨᐦᒋᑫᐤ ᒋᒋᔐᒪᓂᑑᒻ, ᒥᓯᐌ ᒋᑌᐦᐄᐦᒡ, ᑲᔦ ᒥᓯᐌ ᒋᑕᐦᒑᐦᑯᐦᒡ ᑲᔦ ᒥᓯᐌ ᒋᒥᑐᓀᔨᐦᒋᑲᓂᐦᒡ᙮
38 ᐁᐅᒄ ᐆ ᒫᐅᒡ ᓈᑳᓀᔨᐦᑖᑯᒡ ᑲᔦ ᒫᐅᒡ ᒉᔅᑌᔨᐦᑖᑯᐦᒡ ᑲᒉᔅᑴᐎᓐ᙮
39 ᐊᓐ ᒫᒃ ᐐᔓᐌᐎᓐ ᒦᓐ ᒫᐅᒡ ᒉᔅᑌᔨᐦᑖᑯᐦᒡ ᐁᐅᒄ ᐆ ᑳ ᐃᑗᒪᑲᐦᒡ, ᓵᒋᐦᐄᒡ ᑯᑕᑲᒡ ᐊᐌᓂᒌ ᒬᐦᒡ ᒋᔭ ᐁ ᐃᔥᐱᔥ ᓵᒋᐦᐄᓱᔨᓐ᙮
40 ᐁᐅᒄ ᒫᒃ ᐅᔫ ᓃᔓ ᑲᒉᔅᑴᐎᓐᐦ ᐊᓂᑦ ᒉᒌ ᐅᐦᒋ ᓇᓈᑲᑕᐌᔨᐦᑕᒥᐦᐄᑰᐦᒄ ᐊᓂᔫ ᒧᓯᔅ ᐅᐐᔓᐌᐎᓂᔫ ᑳ ᒥᔮᑲᓅᑦ ᑲᔦ ᒫᒃ ᑖᓐ ᑳ ᐃᔑ ᒋᔅᑯᑕᒫᒉᑣᐤ ᐅᒋᔅᒋᐌᐦᐄᒉᓲᒡ᙮
ᐊᐌᓐ ᐆ ᙭
ᒫᕐᒃ 12:35-37; ᓘᒃ 20:41-44
41 ᒣᒀᒡ ᒫᒃ ᒫᐅᓱᒃ ᐁ ᐯᒋ ᐃᐦᑖᔨᒡ ᐊᓂᔫᐦ ᕓᕆᓰᐦ, ᒌᓴᔅ ᒌ ᑲᑴᒋᒣᐤ,
42 ᑖᓐ ᐁ ᐃᑌᔨᒣᒄ ᙭᙮ ᐊᐌᓐ ᐊᓂᔫ ᐅᑯᓯᓴ᙮ ᐊᐌᔫ ᐁ ᐃᐦᑖᔨᒡ ᑳ ᐅᐦᒋ ᐋᓂᔅᒉ ᐱᒫᑎᓰᑦ᙮ ᐁᒄ ᑳ ᐃᑎᑯᑦ, ᑌᐱᑦ ᐁ ᐃᐦᑖᔨᒡ ᒌ ᐅᐦᒋ ᐋᓂᔅᒉ ᐱᒫᑎᓯᔫ᙮
43 ᐁᒄ ᒌᓴᔅ ᑳ ᐃᑖᑦ, ᒉᒀᔫ ᒫᒃ ᐅᑎᐯᔨᐦᒋᑫᐤ ᐌᐦᒌ ᐃᔑᓂᐦᑳᑎᑯᑦ ᑌᐱᑦ᙮ ᐌᔥ ᑌᐱᑦ, ᑳ ᐸᔦᐦᒋᓯᔨᒡ ᐊᐦᒑᐦᑾ ᒌ ᒦᑰ ᒉᒌ ᐃᑗᑦ,
44 ᐅᑎᐯᔨᐦᒋᑫᐤ ᒌ ᐃᑌᐤ ᓂᑎᐯᔨᐦᒋᑫᒻᐦ, ᐅᑌ ᐯᒋ ᐊᐱᐦ ᓂᐦᐄᐎᓂᐦᒡ ᐹᑎᔥ ᒌ ᐊᔥᐸᔑᐦᐄᒀᐌᓂᒡ ᐊᓂᒌ ᑳ ᐅᐦᑳᑎᔅᒀᐤ᙮
45 ᐁᒄ ᒫᒃ ᑌᐱᑦ ᓂᑎᐯᔨᐦᒋᑫᒻ ᐁ ᒌ ᐃᔑᓂᐦᑳᑖᑦ ᐊᓂᔫᐦ ᙭ ᑖᓂᑌ ᒉᒌ ᐅᐦᒋ ᐅᑯᓰᑐᑕᐙᑦ᙮
46 ᓇᒧᐃ ᒫᒃ ᐊᐌᔫ ᐅᐦᒌ ᓂᔥᑴᐅᔑᐦᐄᑰ ᒌᓴᔅ᙮ ᐊᓂᑦ ᒫᒃ ᐅᐦᒋ ᐊᓂᔫ ᑳ ᒌᔑᑳᔨᒡ ᓇᒧᐃ ᒦᓐ ᐊᐌᔫ ᐅᐦᒋ ᑯᒋᐦᑖᔫ ᒉᒌ ᑲᑴᒋᒥᑯᑦ ᒉᒀᔫ᙮