5
ᐙᔥᑖᐎᓂᐦᒡ ᐋ ᐄᔑ ᐱᒫᑎᓰᓈᓂᐎᒡ
1 ᓲᐦᒃ ᐐᐦ ᓂᔅᐱᑎᐙᐦᒄ ᒋᔖᒥᓂᑑ, ᐙᔥ ᐋᔪᐎᒄ ᒌᔨᐙᐤ ᐅᑎᐙᔑᔒᒻ ᑳ ᓵᒋᐦᐋᑦ᙮
2 ᓵᒋᐦᐋᐦᑯᒡ ᐄᔨᔨᐅᒡ, ᒧᔮᒻ ᑖᓐ ᑳ ᐃᔥᐱᔥ ᓵᒋᐦᐄᑎᐦᒄ ᙭᙮ ᑳ ᐱᒋᔅᑎᓂᐦᒃ ᐅᐱᒫᑎᓰᐎᓐ ᒌᔮᓂᐤ ᐅᐦᒋ ᒧᔮᒻ ᐋ ᐐᐦᒋᒫᔅᑖᔨᒡ ᐱᒋᔅᑎᓂᒑᐎᓂᔨᐤ ᑭᔮᐦ ᒧᒋᔥᑖᐦᐋᒫᐎᓂᔨᐤ, ᑳ ᓂᐦᐋᔨᐦᑎᒥᐦᐄᑯᔨᒡ ᒋᔖᒥᓂᑑ᙮
3 ᒌᔨᐙᐤ ᐋ ᑖᑆᐦᑎᒫᒄ ᓂᒧᐃ ᒥᑐᓐ ᒋᐱᐦ ᐅᐦᒋ ᑎᑯᓐ ᐐᓂᓱᐎᓐ ᐊᓂᑎᐦ ᐋᐦ ᑖᔮᒄ, ᐋᑦ ᒥᒄ ᐆ ᒑ ᒌ ᐄᔑ ᐋᔨᒧᒥᑯᐎᔮᒄ᙮ ᓂᒧᐃ ᑭᔮᐦ ᒋᐱᐦ ᐅᐦᒋ ᑎᑯᓐ ᓂᑎᐐ ᒥᒄ ᐃᔨᐦᑎᐎᓐ ᑭᔮᐦ ᒥᒋᒧᔥᑖᓈᔮᔨᐦᑎᒧᐎᓐ᙮
4 ᓂᒧᐃ ᑯᐃᔅᑯᓈᑯᓂᔨᐤ ᒋᔖᒥᓂᑑ ᐅᑎᔨᔨᒻᐦ ᒑ ᒌ ᐅᐐᓂᐦᑖᑯᓃᔨᒡ ᐅᑎᔨᒧᐎᓂᔨᐤᐦ ᑭᔮᐦ ᒫᒃ ᒑ ᒌ ᒌᔥᒀᑖᑯᓰᔨᒡ ᑭᔮᐦ ᒫᒃ ᓂᑎᐐ ᒥᒄ ᒑ ᒌ ᐄᔑ ᐙᐎᔨᑣᔨᒡ᙮ ᑎᔨᑯᒡ ᒋᐱᐦ ᓂᓈᔅᑯᒫᐅᒡ ᑎᐹᔨᐦᒋᒑᓯᐤ᙮
5 ᒋᓂᑎᐙᔨᒥᑎᓈᐙᐤ ᒑ ᒌ ᒋᔅᒑᔨᐦᑎᒫᒄ ᐊᓐ ᐊᐙᓐ ᐐᓂᓱᐎᓂᐦᒡ ᑳ ᐄᔑ ᐱᒫᑎᓰᑦ ᑭᔮᐦ ᓂᑎᐐ ᒥᒄ ᑳᐦ ᑎᒃ ᑭᔮᐦ ᒨᔥ ᑳ ᒧᔥᑖᓈᔮᔨᐦᑎᐦᒃ ᒑᒀᔨᐤ ᒑ ᒌ ᐃᔮᑦ ᓂᒧᐃ ᒋᑭ ᒌ ᐐᒋᐦᐄᐙᐤ ᒋᔖᒥᓂᑑ ᑭᔮᐦ ᙭ ᐅᒋᐦᒋᐅᒋᒫᐎᓃᔨᒡ᙮ ᐊᓐ ᐊᐙᓐ ᒨᔥ ᓈᔥᒡ ᑳ ᒧᔥᑖᓈᔮᔨᐦᑎᐦᒃ ᒧᔮᒻ ᒥᓂᑑᐦᑳᓐ ᐋ ᐊᔨᒥᐦᐋᔅᑎᐙᑦ ᐃᓯᓈᑯᓂᔨᐤ ᐅᔮᔨᐤ ᐋᐦᑎᒃ᙮
6 ᔮᒀᒦᔅᑐᐙᐦᑯᒡ ᐊᓂᒌ ᐙᐦ ᐎᓂᐱᔨᐦᐄᑖᑯᒡ ᐅᐦᒋ ᐊᓂᔮᔨᐤ ᓂᑎᐐ ᐅᑎᔨᒧᐎᓂᐙᐤ ᐋᑳ ᒌ ᐎᔮᔅᑖᐱᓃᔨᒡ, ᐙᔥ ᐊᓂᔮᔨᐤ ᒑᒀᔨᐤ ᐊᑏᐦᑎᒡ ᐋᑳ ᓂᓂᐦᐄᐦᑐᐙᒡ ᒋᔖᒥᓂᑑ, ᒋᑭ ᐅᑎᑎᐦᐅᑯᐙᒡ ᐅᑖᐦᑭᐎᐙᔓᐎᓂᔨᐤ᙮
7 ᐊᑳᐐ ᐙᐐᒑᐅᐙᐦᑯᒡ ᐅᔮᔨᐤ ᐋᐦ ᐄᑖᑎᓰᔨᒡ ᐊᓂᒌ ᐄᔨᔨᐅᒡ᙮
8 ᐙᔥ ᑭᔮᐦ ᒌᔨᐙᐤ ᐊᐅᑳᔥᑖᔮᐎᓂᐦᒡ ᒋᒌ ᑖᓈᐙᐤ ᐊᓂᑖᐦ ᐅᑖᐦᒡ, ᒥᒄ ᒫᒃ ᐊᓅᐦᒡ ᐋᒄ ᐙᔥᑖᐎᓂᒡ ᐋᐦ ᑖᔮᒄ ᐊᓐ ᐅᐦᒋ ᐋ ᑖᑆᔮᔨᒫᒄ ᑎᐹᔨᐦᒋᒑᓯᐤ᙮ ᐋᑯᑖᐦ ᒫᒃ ᐋᒄ ᓲᐦᒃ ᐐᐦ ᐄᔑ ᐱᒫᑎᓰᒄ᙮
9 ᑖᑆᐦ ᐙᔥᑖᐎᓂᐦᒡ ᐄᔑ ᐱᒫᑎᓰᔮᒀ ᒋᑭ ᓅᑯᓐ ᒥᔪᐦᑣᐎᓐ ᑭᔮᐦ ᑯᐃᔅᑯᑖᑎᓰᐎᓐ ᑭᔮᐦ ᑖᑆᐎᓐ ᐊᓂᑖᐦ ᒌ ᐱᒫᑎᓰᐎᓂᐙᐦᒡ᙮
10 ᒨᔥ ᐐᐦ ᓈᓂᑐ ᒋᔅᒑᔨᐦᑎᒧᒄ ᑖᓐ ᒑ ᒌ ᐄᔑ ᓂᓂᐦᐄᐙᐦᐋᒄ ᑎᐹᔨᐦᒋᒑᓯᐤ᙮
11 ᐊᑳᐐ ᐃᔮᐱᑖᔨᐦᑎᒧᒄ ᑖᓐ ᐋ ᐄᔑ ᓂᓈᐦᑭᐤ ᓂᑎᐐ ᒥᒄ ᐊᔨᑎᓈᓂᐎᒡ ᐊᐅᑳᔥᑖᔮᐎᓂᐦᒡ, ᑖᐹ ᒥᑐᓐ ᐎᔮᔥ ᐄᔑ ᐐᒋᐦᐄᐙᐱᔨᐤ ᐅᐦᐄ᙮ ᑎᔨᑯᒡ ᒋᐱᐦ ᐐᐦ ᐙᐱᑎᔨᐙᓈᐙᐤ ᑖᓐ ᐋ ᐄᔑ ᐋᑳ ᑯᐃᔅᑯᓈᑯᐦᒡ ᐅᑎᐦ ᐅᐦᐄ ᒑᒀᓂᐦᐄ᙮
12 ᐙᐙᒡ ᐅᐙᓂᑎᒋᐦᐄᑯᒡ ᐄᔨᔨᐅᒡ ᒑ ᒌ ᐋᔨᒸᐦᐄᑯᒡ ᐅᔮᔨᐤᐦ ᒑᒀᔨᐤᐦ ᑳ ᐃᔥᐱᔥ ᐙᔥ ᓈᔥᒡ ᒌᒧᒡ ᓂᑎᐐ ᐊᔨᑎᓈᓂᐎᔨᒡ᙮
13 ᐙᔥᑖᐎᓂᐦᒡ ᒫᒃ ᐋᑯᑖᐦ ᓅᑯᐦᒡ ᒥᓯᐙ ᒑᒀᓐ ᑖᓐ ᓂᐦᐋᐤ ᐋ ᐄᑖᔨᐦᑖᑯᐦᒡ᙮
14 ᐙᔥ ᐙᔥᑖᐎᓐ ᐅᐦᒋ ᓅᑯᐦᒡ ᒥᓯᐙ ᒑᒀᓐ᙮ ᐋᐅᒄ ᒫᒃ ᐙᐦᒋ ᐄᓈᓅᒡ ᒫᓐ, “ᐎᓂᔥᑳ ᒌᔨ ᑳ ᐐᐦᒋᐦᒀᒧᔨᓐ, ᐎᓂᔥᑳ ᐊᓂᑎᐦ ᓂᐱᐎᓂᐦᒡ ᐅᐦᒋ᙮ ᐋᒄ ᒫᒃ ᙭ ᒑ ᒥᔨᔅᒃ ᐙᔥᑖᐎᓂᔨᐤ᙮”
15 ᓲᐦᒃ ᔮᒀᒦᒄ ᑖᓐ ᐋ ᐄᔑ ᐱᒫᑎᓰᔮᒄ᙮ ᓂᒧᐃ ᒋᐱᐦ ᐅᐦᒋ ᐄᔑ ᐱᒫᑎᓰᓈᐙᐤ ᑖᓐ ᐋ ᐄᔑ ᐱᒫᑎᓰᔨᒡ ᐊᓂᒌ ᐋᑳ ᑳ ᐃᔮᒡ ᑭᒑᐦᑖᐙᔨᐦᑎᒧᐎᓂᔨᐤ᙮ ᐄᔨᔨᐅᒡ ᑳ ᐃᔮᒡ ᑭᒑᐦᑖᐙᔨᐦᑎᒧᐎᓂᔨᐤ ᐋᐅᒄ ᐃᔮᒄ ᒋᐱᐦ ᐄᔑ ᐱᒫᑎᓰᓈᐙᐤ᙮
16 ᒨᔥ ᑯᐃᔅᒄ ᑐᑎᒧᒄ ᒑᒀᓐ ᐃᔮᔮᒄ ᒑ ᒌ ᐄᐦᑐᑎᒫᒄ, ᐙᔥ ᓈᔥᒡ ᒥᔖᐤ ᒥᒑᑎᓰᐎᓐ ᐅᐦᐄ ᐊᓅᐦᒡ ᑳ ᒌᔑᑳᒡ᙮
17 ᐊᑳᐐ ᒫᒃ ᒌᔥᒀᐱᒫᑎᓰᒄ᙮ ᑎᔨᑯᒡ ᓲᐦᒃ ᐐᐦ ᓂᔅᑐᐦᑎᒸᒄ ᑎᐹᔨᐦᒋᒑᓯᐤ ᐅᑎᑖᔨᐦᑎᒧᐎᓐ᙮
18 ᐊᑳᐐ ᒌᔥᒀᐹᒄ, ᐙᔥ ᐋᐅᒄ ᐆ ᒑ ᓂᔑᐎᓈᒋᐦᐄᑯᔮᒄ᙮ ᑎᔨᑯᒡ ᐱᒋᔅᑎᓈᐦᒄ ᐱᔮᐦᒋ ᐊᐦᒑᐦᒄ ᒑ ᒌ ᓵᑭᔅᒋᓈᔥᑳᑖᒄ᙮
19 ᓈᔅᑎᐎᔮᒄ ᒑ ᓂᑭᒧᔮᒄ ᓂᓈᐦᑭᐤ ᐊᔨᒥᐦᐋᐤ ᓂᑭᒧᐎᓐ, ᑭᔮᐦ ᐊᓂᔮᔨᐤ ᑌᕕᑦ ᐅᓂᑭᒧᐎᓐ ᑭᔮᐦ ᐋ ᐅᔅᑳᒡ ᐊᐦᒑᐦᒄ ᓂᑭᒧᐎᓐ ᓂᑭᒧᒄ, ᐋ ᒫᒥᐦᒋᒫᐦᒄ ᑎᐹᔨᐦᒋᒑᓯᐤ ᒋᑖᐦᐄᐙᐦᒡ ᐅᐦᒋ᙮
20 ᒨᔥ ᓂᓈᔅᑯᒫᐦᒄ ᒋᔖᒥᓂᑑ ᑰᐦᑖᐐᓂᐤ ᒥᓯᐙ ᒑᒀᔨᐤ ᒌᓴᔅ ᙭ ᒌ ᑎᐹᔨᐦᒋᒑᓯᒥᓂᐤ ᐅᑎᔑᓂᐦᑳᓱᐎᓂᔨᐤ ᐅᐦᒋ᙮
ᓈᐹᐤ ᑭᔮᐦ ᒫᒃ ᐐᐤᐦ ᑖᓐ ᒋᐱᐦ ᑑᐎᒡ
21 ᐱᒋᔥᑖᔨᒧᔅᑖᑑᒄ ᐊᓂᔮᔨᐤ ᙭ ᐋ ᒋᔅᑖᔨᒫᒄ ᐅᐦᒋ᙮
22 ᒌᔨᐙᐤ ᐃᔥᒀᑐᒃ ᐱᒋᔥᑖᔨᒧᔅᑐᐙᐦᑯᒡ ᒌ ᓈᐹᒥᐙᐅᒡ ᒧᔮᒻ ᐋ ᐄᔑ ᐱᒋᔥᑖᔨᒧᔅᑎᐙᒄ ᑎᐹᔨᐦᒋᒑᓯᐤ᙮
23 ᐙᔥ ᓈᐹᐤ ᒌ ᒥᔮᑭᓂᐤ ᒑ ᒌ ᓃᑳᓂᔥᑭᐙᑦ ᐐᐤᐦ ᒧᔮᒻ ᙭ ᐋ ᐄᔑ ᓃᑳᓂᔥᑭᐙᑦ ᐅᒫᒨᐊᔨᒥᐦᐋᐤ ᐐᔨ ᑭᔮᐦ ᐅᐱᒫᒋᐦᐄᐙᓯᒥᑖᑰ ᐅᒫᒨᐊᔨᒥᐦᐋᐤ, ᐋᔪᐎᒄ ᒫᒃ ᐅᔮᔨᐤ ᐐᔨ ᙭ ᐅᔨᐤ᙮
24 ᒧᔮᒻ ᒫᒃ ᐋ ᐄᔑ ᐱᒋᔥᑖᔨᒦᓱᒡ ᙭ ᐋᐦ ᑖᔨᒡ ᐅᒫᒨᐊᔨᒥᐦᐋᐅᒡ ᐋᔪᐎᒄ ᒧᔮᒻ ᑭᔮᐦ ᐃᔅᒀᐅᒡ ᒋᐱᐦ ᐄᔑ ᒥᓯᐙ ᐱᒋᔥᑖᔨᒧᔅᑎᐙᐅᒡ ᐆ ᓈᐹᒧᐙᐤ᙮
25 ᒌᔨᐙᐤ ᓈᐹᑐᒄ, ᒋᐱᐦ ᓵᒋᐦᐋᐙᐅᒡ ᒌᐅᐙᐅᒡ ᒧᔮᒻ ᙭ ᑳ ᐃᔥᐱᔥ ᓵᒋᐦᐋᑦ ᐅᒫᒨᐊᔨᒥᐦᐋᐤ, ᒥᑐᓐ ᐋ ᒌ ᐱᒋᔅᑎᓂᐦᒃ ᐅᐱᒫᑎᓰᐎᓐ ᑳ ᐃᔥᐱᔥ ᓵᒋᐦᐋᑦ,
26 ᒑ ᒌ ᐄᔑ ᐱᔮᐦᒋᐦᐋᑦ ᐅᑎᔨᔨᒻᐦ ᐃᔥᐱᔥ ᑳ ᒋᔥᑖᐹᐎᔮᑦ ᓂᐱᐦᒡ ᐊᓂᔮᔨᐤ ᑖᓐ ᑳ ᐄᔑ ᐋᔨᒨᑖᔨᒡ ᒋᔖᒥᓂᑑ ᐅᑎᔨᒧᐎᓃᔨᒡ
27 ᐋᔪᐎᒄ ᐅᔮᔨᐤ ᑳᐦ ᑐᑎᐦᒃ ᙭, ᒑ ᒌ ᐱᔮᐦᒋᓰᔨᒡ ᑭᔮᐦ ᐋ ᒥᔪᓈᑯᓰᔨᒡ ᐐᔨ ᐋ ᑭᓂᐙᐱᒫᑦ, ᓂᒧᐃ ᓈᔥᑎᔨᔥ ᒋᑭ ᐆ ᒥᒋᐦᑣᐎᓂᔨᐤ ᑭᔮᐦ ᒫᒃ ᓂᒧᐃ ᒋᑭ ᐊᑑᐙᔨᐦᑖᑯᓯᔨᐤ᙮
28 ᙭ ᑳ ᐄᔑ ᓵᒋᐦᐄᐙᑦ ᑭᔮᐦ ᐐᔨ ᓈᐹᐤ ᒋᐱᐦ ᓵᒋᐦᐋᐤ ᐐᐤᐦ ᒧᔮᒻ ᐋ ᐃᔥᐱᔥ ᓵᒋᐦᑖᑦ ᐅᔨᐤ᙮ ᓈᐹᐤ ᐋ ᓵᒋᐦᐋᑦ ᐐᐤᐦ ᓅᑯᓂᔨᐤ ᐋ ᓵᒋᐦᐄᓱᑦ᙮
29 ᓂᒧᐃ ᓂᐦᑖ ᒥᒑᔨᐦᑎᒻ ᐊᐙᓐ ᐅᔨᐤ᙮ ᐊᔑᒥᓲ ᐙᐦ ᒦᒋᓱᒡ ᑭᔮᐦ ᒫᒥᔪᐦᑳᓲ᙮ ᐋᔪᐎᒄ ᒫᒃ ᒧᔮᒻ ᐋᐦ ᑐᑎᐙᑦ ᙭ ᐅᒫᒨᐊᔨᒥᐦᐋᐤ,
30 ᐙᔥ ᒌᔮᓂᐤ ᑳ ᑖᑆᔮᔨᒥᐦᒄ ᙭, ᒥᓯᐙ ᐋᑯᑎᐦ ᐙᐦᒌᐦᒄ ᙭ ᐅᔨᐤ ᐅᐦᒋ᙮
31 ᐄᑎᔥᑖᐤ ᒋᐦᒋᒥᓯᓂᐦᐄᑭᓂᐦᒡ, “ᐋᔪᐎᒄ ᒑ ᐅᐦᒋ ᓂᑳᑖᑦ ᓈᐹᐤ ᐅᓃᒋᐦᐄᒄᐦ ᐋᒄ ᒫᒃ ᒑ ᐐᒋᒫᑦ ᐐᐤᐦ᙮ ᐋᒄ ᒫᒃ ᐋᓃᓰᔨᒡ ᐹᔨᒄ ᒥᔨᐤ ᒑ ᐃᓯᓈᑯᓯᒡ᙮”
32 ᐊᓐ ᒫᒃ ᑳ ᐄᔑ ᒥᓯᓂᐦᐄᑭᓂᐎᒡ ᐊᑎᑎᐤ ᑎᑯᓐ ᐋ ᐄᔑ ᐐᐦᑎᒫᒑᒥᑭᐦᒡ᙮ ᓃᔨ ᑭᔨᑆ ᐋ ᐄᔑ ᓂᔅᑐᐦᑎᒫᓐ, ᙭ ᑭᔮᐦ ᒫᒃ ᐊᓂᒌ ᐅᒫᒨᐊᔨᒥᐦᐋᐅᒡ ᐋᔨᒨᒫᑭᓂᐎᒡ ᐊᓂᑎᐦ᙮
33 ᑭᔮᐦ ᒫᒃ ᒥᓯᐙ ᐋᑎᐹᐦᐹᔨᑯᑦ ᓈᐹᐤ ᒋᐱᐦ ᓵᒋᐦᐋᐤ ᐐᐤᐦ ᒧᔮᒻ ᐐᔨ ᐋ ᐃᔥᐱᔥ ᓵᒋᐦᐄᓱᑦ᙮ ᑭᔮᐦ ᒫᒃ ᐃᔅᒀᐤ ᒋᐱᐦ ᒋᔥᑖᔨᒫᐤ ᐅᓈᐹᒻ᙮